2011/03/07

སྐྱ་མདངས།

གདུང་ཤུགས་ཀྱི་འབོད་པ། །
སེམས་ཁོང་ན་རྙིད་སོང་། །
རེ་འབྲས་ཀྱི་རྨི་ལམ། །
ཀླད་རྒྱ་ལས་ཡལ་སོང་། །
ཉི་འོད་ཀྱི་བཀྲག་མདངས། །
དུ་རྡུལ་གྱིས་སྦག་སོང་། །
མིག་ཟུང་གིས་གཟི་མདངས། །
རབ་རིབ་ཀྱིས་སྒྲིབ་སོང་། །
ཁོག་སྟོད་ན་འཚང་བའི་དབུགས་རིང་། །
འཁུན་སྒྲ་ལ་ཐིམ་སོང་། །
ཚ་བས་ཡི་ངོ་གདོང་། །
རྔུལ་ཆུ་ཡིས་བསྐྱམས་སོང་། །

ལོ་གསར་རེད་དམ།

སྐྱིད་པོ་མི་འདུག ལོ་གསར་ལགས།
ཁ་བས་སྐྲ་ལོ་མནན་ཐོག་ལ།
ཁུ་འཕང་ཉིལ་སོང་།
བུ་ཡུལ་འཚུབ་སོང་།
འདི་ལོ་གསར་རེད་དམ།
རྐང་མགོ་ལྷག་རླུང་གིས་བརྡུང་དུས།
ཁབ་སོ་དང་ཚེར་མ་ཤ་གསེང་དུ་འཛུལ་སོང་།
རུས་གསེང་དུ་བསྟིམས་སོང་།
སྐྱིད་པོ་རེད་དམ།
ནག་ཐིབ་ཐིབ་ཀྱི་མུན་པ་སེམས་ཁོང་ན་དཀྲིག་དུས།
ཀླད་གཏིང་ན་དུ་ཞག་དཀྲིགས་སོང་།
སྤྲིན་ནག་འཁོར་སོང་།
ལོ་གསར་རེད་དམ།
མོ་མོ་དང་བག་ལེབ།
རྩ་སྐྱ་དང་ཕུར་མའི་ཕུང་པོ་རེད།
འདི་དག་ལོ་གསར་རེད།