2012/01/28

དགོང་མོ།



གཉིད་ཀྱི་ཞིང་ཁམས་ནས་ཧར་གྱིས་ལངས་དུས། །
མུན་པའི་སྒོ་ཆེན་རྦད་དེ་བརྒྱབ་འདུག །
འདྲུད་ལྷམ་ཟད་པོ་རྐང་པས་ཉུག་སྐབས། །
དཔྲལ་བའི་མེ་ལོང་སྒོ་དང་བརྡབས་སོང་། །

རྣ་བའི་བུ་ག་སིལ་སྒྲས་བཀང་དུས། །
མེ་སྟག་ཕྲོམ་ཕྲོམ་མིག་ནས་མཆེད་ཅིང་། །
ཁ་མངར་སྐྱུར་གསུམ་ཁ་ལ་བྲོ་སྐབས། །
ཟུག་རྔུའི་ཚོར་སྣང་དལ་གཅིག་འགག་སོང་། །

འགྲམ་ཆུ་ལུ་མས་མངར་ཇ་འབོད་དུས། །
ཐབ་ཚང་འོ་སྣོད་སྟོངས་པས་བསྒུགས་འདུག །
འབྲས་དཀར་རྡིག་ལ་དབུགས་སུབ་གཏོང་དུས། །
ཚོད་མ་བྲོས་པའི་ཤུལ་ཙམ་མི་འདུག །

ཕྱི་སྒོ་ཕྱེས་ཏེ་ཁྲོམ་ལ་འགྲོ་སྐབས། །
མུན་ཁྲོད་ཁ་བ་ལྷ་མོས་བསྒུགས་འདུག །
ལྷ་མོ་ཡུས་པའི་འཆི་མའི་འབབ་རྒྱུན། །
མར་བབས་གཙང་པོའི་རླབས་དང་འདྲེས་འདུག །