2018/12/24

རྟ་ཤོད་ཅེས་པའི་ཐ་སྙད་ཀྱི་ལོ་རྒྱུས།

རྟ་ཤོད་ཅེས་པའི་ཐ་སྙད་ཀྱི་ལོ་རྒྱུས།
ཁྱུང་རིག་འཛིན། ༢༠༡༨། ༡༡། ༠༧། 

དེ་ཡང་བོད་མདོ་ཁམས་ཡུལ་དུ་སྨད་ཀྱི་ཏྲེ་ཤོད་དང་སྨར་ཤོད། བར་གྱི་དཔའ་ཤོད་དང་ལྗང་ཤོད། སྟོད་ཀྱི་དངུལ་ཤོད་དང་ནག་ཤོད་སོགས་ཀྱིས་མཚོན་པས་ཤོད་ཆེན་བཅུ་གཅིག་གམ་བཅོ་བརྒྱད་སོགས་བརྩི་སྲོལ་ཡོད་པ་ལྟར་འདིར་ཁམས་སྟོད་ཁྱུང་པོའི་ལུང་ཚན་“རྟ་ཤོད་”ཅེས་པའི་ཡུལ་མིང་འདིར་ཅུང་ཟད་དཔྱད་ན། ཐ་སྙད་འདི་ཆེས་མ་འཐའ་ཡང་འདི་ནས་ཡར་བརྩིས་པའི་ལོ་ངོ་ཆིག་སྟོང་ཙམ་གྱི་སྔོན་ཡོད་པ་སྟེ།
དེ་ཡང་ཐོག་མར་དུས་རབས་ ༡༠ དང་ ༡༡ པའི་བར་བྱོན་པའི་ཨ་མྱེས་བྱང་ཆུབ་འདྲེ་བཀོལ་ (968–1076) གྱིས་བརྩམས་པར་གྲགས་པའི་«རླངས་ཀྱི་པོ་ཏི་བསེ་རུ་»ལས། “རླངས་ཀྱི་གྲུབ་ཐོབ་ཆེན་པོ་རྩ་རྔུ་ལྷ་ཡི་རྡོ་རྗེས། རྟ་ཤོད་ལྷ་ཁང་ཐང་དུ་མཐའ་འདུལ་གྱི་གཙུག་ལག་ཁང་བཞེངས།” ཅེས་“རྟ་ཤོད་”ཙམ་མིན་པར་རྟ་ཤོད་དུ་ཡོད་པའི་ས་གནས་བྱེ་བྲག་པ་“ལྷ་ཁང་ཐང་”དང་བཅས་པ་གསལ་ཡོད།
དེ་ནས་དུས་རབས་ ༡༢ པའི་ནང་འབྲི་གུང་སྐྱོབ་པ་འཇིག་རྟེན་མགོན་པོས་མཛད་པའི་ (1143–1217) «ཕྱག་རྒྱ་ཆེན་པོ་གཞི་ལམ་འབྲས་གསུམ་གྱི་ཞལ་གདམས་རིན་པོ་ཆེ་ཕྲེང་བ་»ལས། “གཡག་རུ་དཔལ་གྲགས། རྟ་ཤོད་ཨ་ཙ། རི་སྟོན།” ཞེས་གསུངས་ཡོད་པ་ལས་དཔོགས་ཐུབ། “རྟ་ཤོད་ཨ་ཙ་རའི་”ཕ་ཡུལ་ཁམས་ཁྱུང་པོ་ནས་ཡིན་མིན་གང་ལྟར་ཡང་རྟ་ཤོད་ཀྱི་ཐ་སྙད་དང་དག་བརྡ་དག་འབྲི་ཚུལ་དེ་ག་རང་ཡིན་པ་འདིས་མཚོན་ཐུབ།
དེ་བཞིན་དུ་དུས་རབས་ ༡༣ དང་ ༡༤ (1284–1339) བར་བྱོན་པའི་ཀརྨ་པ་རང་བྱུང་རྗེས་མཛད་པའི་«འགྲོ་མགོན་རས་པ་ཆེན་པོའི་རྣམ་པར་ཐར་»ལས། “དབུས་སུ་བཞུད་པས་རྟ་ཤོད་རྣ་རྒྱང་(རྨེ་རུའི་གནམ་ལ་ཡིན་ནམ་སྙམ།)དུ་བསྐྱལ་ནས། ས་སྨད་དུ་བཞུད་པར་གདའ།” ཞེས་གསལ།
ཡང་དེ་རྗེས་དུས་རབས་ ༡༦ (1527–1592) པར་བྱོན་པའི་འབྲུག་པ་པདྨ་དཀར་པོས་བརྩམས་པའི་«ཆོས་འབྱུང་བསྟན་པའི་པདྨོ་རྒྱས་པའི་ཉིན་བྱེད་»ལས། “ཁྱུང་ཚང་པ། འབྲོག་སྒོམ། བུར་སྒོམ། རྟ་ཤོད་རས་པ་ལ་བྱང་གི་བུ་ཆེན་བཞི།”ཞེས་དང་།
དེ་ནས་དུས་རབས་ ༡༧ ནས་ ༡༨ (1694–1738) བར་བྱོན་པའི་གནམ་ལྕགས་རྩ་གསུམ་གཏེར་བདག་གླིང་པས་གསལ་བར་བྱས་པའི་«ཟབ་མོའི་གཏེར་དང་གཏེར་སྟོན་གྲུབ་ཐོབ་ཇི་ལྟར་བྱོན་པའི་ལོ་རྒྱུས་མདོར་བསྡུས་བཀོད་པ་རིན་ཆེན་བཻཌཱུརྻའི་ཕྲེང་བ་»ལས། “ན་བུན་རྫོང༌། རྟ་ཤོད་དཀྱིལ་འཁོར་ཐང་སོགས་ནས་སྔ་ཕྱིར་ཟབ་གཏེར་མང་དུ་སྤྱན་དྲངས་པ་གཏེར་འབྱུང་ལས་གསལ།”ཞེས་དང་།
དེས་རྗེས་དུས་རབས་ ༡༩ ནས་ ༢༠(1880–1923/1925) བར་བྱོན་པའི་ཀཿཐོག་སི་ཏུའི་ཆོས་ཀྱི་རྒྱ་མཚོས་མཛད་པའི་«དབུས་གཙང་གནས་ཡིག་»གྲགས་ཅན་མ་ལས། “ལྷོ་རྟ་ཤོད་ཀྱི་བུ་མོ་པདྨ་མཚོས་རྫུ་འཕྲུལ་གྱིས་ཉིན་གཅིག་གིས་འཐག་པའི་སྒ་སློས་རྟ་འཇག་མ་ཞེས་ངོ་མཚར་ཅན།”ཞེས་པདྨ་མཚོའི་རྣམ་ཐར་ཀྱི་ཆ་ཤས་དང་བཅས་པ་འཁོད་ཡོད།
དེ་བཞིན་དུ་ཀུན་བཟང་ཉི་མས་བརྩམས་པའི་ (1904–1958) «ཀོང་ཐེའུ་རང་གི་ར་རྫོང་ཕབ་པ་འཛམ་གླིང་ཆོས་ཀྱི་རྒྱལ་པོའི་རྟོགས་བརྗོད་དཔལ་གྱི་བེའུ༔»ལས། “དེ་ནས་འཇང་ཕྲུག་གཡུ་ལྷ་ཐོག་འགྱུར་ཤར་ལྷོ་མཐོན་པོ་རི་དྲུག་ནས་བརྒལ་ཏེ་རྟ་ཤོད་རྡོ་རྗེའི་ཁྲ་སྒོ་མཐོན་པོ་ནས་གཟིགས་ཙ་ན་མཐོན་པོ་རྟ་རྣ་ཅན་གྱི་དམག་རྩི་ཤིང་ལས་ལྷུན་འཐུག་”ཞེས་དང་།
ཁྱད་པར་དུ་སྤྱི་ཚོགས་གསར་རྙིང་གཉིས་ཀ་བརྒྱུད་མྱོང་ཞིང་མཁྱེན་དཔྱོད་ཡངས་པའི་སྐུ་ངོ་ང་ཕོད་ངག་དབང་འཇིགས་མེད་ཀྱིས་བརྩམས་པའི་ (འདས་ལོ་ 2009) «བོད་ཀྱི་རིག་གནས་ལོ་རྒྱུས་དཔྱད་གཞིའི་རྒྱུ་ཆ་བདམས་བསྒྲིགས་»ལས། “སྐུ་ཕྲེང་དང་པོ། རྒྱ་ར་སངས་རྒྱས་ཡེ་ཤེས་ཀྱི་རྣམ་སྤྲུལ་དུ་གྲགས་པ་གྲུབ་ཆེན་ཤེས་རབ་ཕུན་ཚོགས། ཁྱུང་པོ་རྟ་ཤོད་དུ་འཁྲུངས། དགུང་གྲངས་རེ་དྲུག་ཆུ་སྤྲེལ་ལོ་གཤེགས།”ཞེས་རྟ་ཤོད་ཅེས་གསལ་བར་འཁོད། དཔེ་དེབ་འདི་ནི་ཆབ་མདོ་དགོན་པའི་བླ་ཆེན་རྣམས་ཀྱི་ལོ་རྒྱུས་འཁོད་པ་ཞེ་གཅིག་ཡིན།
དེ་མིན་མཁན་པོ་དམ་ཆོས་ཟླ་བས་དུས་རབས་ ༢༠ པར་བརྩམས་པའི་གསོ་བ་རིག་པའི་ཡིག་ཆ་«འཚོ་བྱེད་ལས་དང་པོ་ལ་ཉེར་བར་མཁོ་བའི་ཟིན་ཏིག་གཅེས་པར་བཏུས་པ་བདུད་རྩིའི་ཐིགས་པ་»ལས། “མུ་མེད་[sic]ནི་རྡོ་ལས་འབྱུང་བའི་སྔོ་ནག་གསེར་ཐིག་ཅན་མཆོག [་་་] འདི་རིགས་འབྲུམ་པ་ཡོད་མེད་སོགས་ཡུལ་ཁྱད་པར་གྱིས་སྣ་ཚོགས་འདུག་ཀྱང་ལྷོ་རྟ་ཤོད་ནས་འབྱུང་བ་བཟང་།” ཞེས་གསལ།
མདོར་བསྡུས་ནས་བཤད་ན་དུས་རབས་བཅུ་པ་ཡན་མན་ནས་བཟུང་ད་ལྟའི་བར་དུ་ “རྟ་ཤོད་”ཅེས་པའི་ཐ་སྙད་དང་བརྡ་དག་འབྲི་ཚུལ་འདི་ག་རང་ཡིན་པ་ཁུངས་ལྡན་གྱི་ལོ་རྒྱུས་ཁག་ཏུ་གསལ་ཡོད་པས། ད་ལྟ་གློ་བུར་དུ་རང་གི་ཚོར་སྣང་དང་དགའ་ཕྱོགས་ལ་བསྟུན་ནས་“ལྟག་ཤོད་”དང་། “སྟག་ཤོད།” “ཏག་ཤོད་”སོགས་གང་བྱུང་གིས་བཟོ་བཅོས་མ་བྱས་ན་བཟང་། ལོ་རྒྱུས་ནི་ལོ་རྒྱུས་ཏེ་བཟང་ངན་བར་གསུམ་གང་བྱུང་བ་ཐམས་ཅད་ཇི་བཞིན་འཁོད་དགོས་པ་ལས། དགའ་དང་མི་དགའི་འདེམས་སྒྲུག་བྱེད་པ་ནི་ལོ་རྒྱུས་རིག་པ་དང་བརྡ་སྤྲོད་རིག་པ་སོགས་གང་ལ་ཡང་མི་རུང་བ་ངེས་པར་དུ་མཁྱེན་དགོས།
ཞོར་དུ་ཤོད་ཆེན་བཅོ་བརྒྱད་ཀྱི་གྲངས་འདྲེན་ནི།
དེང་དུས་བསྟན་འཛིན་ཆོས་དབྱིངས་ཀྱིས་བྱས་པའི་«མེས་པོའི་བྱུང་བ་»ལས། “ད་ལྟ་ས་ཆ་དང་དངོས་སུ་ར་འཕྲོད་བྱུང་བ་ནི།
༡ ནགས་ཤོད། འབྲི་རུ་རྫོང་ཁོངས་ཀྱི་ས་ཆ་ཕལ་ཆེ་བ།
༢ སོག་ཤོད། སོག་གཡག་ལའི་ཁུལ།
༢ དཀར་ཤོད། སོག་རྫོང་ཁོངས།
༤ རེ་ཤོད། སོག་རྫོང་ཁོངས།
༥ རྒྱ་ཤོད། སྟོད་འབྲི་རུ་དང་སྨད་དཔལ་འབར།
༦ ས་ཤོད། དཔལ་འབར་རྫོང་ཁོངས།
༧ དཔའ་ཤོད། དཔལ་འབར་རྫོང་ཁོངས།
༨ རྒྱང་ཤོད། སྟེང་ཆེན་རྫོང་ཁོངས།
༩ གྱིམ་ཤོད། སྟེང་ཆེན་རྫོང་ཁོངས།
༡༠ རྟ་ཤོད ། སྟེང་ཆེན་རྫོང་ཁོངས།
༡༡ གཡི་ཤོད་དམ་གཡང་ཤོད་ནི་རི་བོ་ཆེ་རྫོང་ཁོངས།
༡༢ དངུལ་ཤོད། ལྷོ་རོང་རྫོང་ཁོངས།
༡༢ རྔོད་ཤོད། མཛོ་སྒང་རྫོང་ཁོངས།
༡༤ ཟླ་ཤོད། ཆབ་མདོ་རྫོང་ཁོངས།
༡༥ ངོམས་ཤོད། ཆབ་མདོ་རྫོང་ཁོངས།
༡༦ མེ་ཤོད། སྡེ་དགེ་རྫོང་ཁོངས།
༡༧ སྨར་ཤོད། གོ་འཇོ་རྫོང་ཁོངས།
༡༨ ཀྲེ་ཤོད། དཀར་མཛེས་རྫོང་ཁོངས་ཞེས། དེ་ལྟར་ཁམས་མདོ་སྟོད་ནགས་ཤོད་ནས་སྨད་དཀར་མཛེས་བར་དུ་སྐབས་ཤིག་གཅིག་འགྱུར་གྱི་ས་བབས་དང་ཆུ་རྒྱུད་རིག་གནས་གཅིག་གི་སྒྲིག་གཞིའི་ཁོངས་སུ་གཏོགས་པ་ཞིག་ཡིན།”

2017/12/08

སྒྲོལ་མ།

ཨོཾ་རྗེ་བཙུན་མ།
སྐྱ་རེངས་དང་པོ་དང་པོའི་དུས།།
བསིལ་རླུང་ཞིམ་པོ་ཞིམ་པོ་ལྡང་།།
དགུན་ཁ་དགུན་ཁའི་ནམ་དུས་ལ།།
དབྱར་ཁ་དབྱར་གྱི་ཆར་ཟིམ་འཇོ།།
སྣང་བ་སྣང་བའི་མེ་ལོང་ངོགས།།
སྒྲོལ་མ་དཀར་མོ་དཀར་མོའི་སྐུར།།
དྭངས་ལ་དྭངས་བའི་དད་པ་འཕྱོ།།
རེ་འདོད་མེད་པའི་རེ་འདོད་ནི།།
དད་པ་ནང་གི་དད་པ་ཡིན།།
དམ་ཚིག་ནང་གི་དམ་ཚིག་ཡིན།།
— ཁྱུང་ཨོ་རིག་འཛིན།

2017/11/15

ཨ་མ་དྲན་པའི་གདུང་ཚིག

ཨ་མའི་འཛུམ་ཞལ་ཁ་བའི་ལྗོངས་སུ་ལུས།།
ས་མཐའི་སེམས་པ་ཚ་བའི་འོབས་སུ་ལྷུང་།།
བཅུ་ཕྲག་གཉིས་ལྷག་ཀྱག་ཀྱོག་མི་ཚེ་འདིར།།
བསམ་བཞིན་བསམ་དུས་སྙིང་ནས་འཆི་མ་ཤོར།།

ཕ་དང་ཁུ་བོས་ལྔ་པའི་ལམ་ཆེན་བསྙེགས།།
གཅེན་མོ་དབང་མེད་རྒྱ་ཡུལ་ལོ་མང་འགྲིམས།།
ལྷག་ལུས་བུ་ཕྲུག་ཨ་མའི་གདོང་ལ་ཅེར།།
བསམ་བཞིན་བསམ་དུས་སྙིང་ནས་འཆི་མ་ཤོར།།

འཛུམ་པའི་ཞལ་ལ་རྒས་པའི་གཉེར་རིས་བརྩེཌ།།
སྨུག་པོའི་སྐྲ་ལོར་ཁ་བའི་མེ་ཏོག་བཞད།།
ད་དུང་བུ་ཕྲུག་སྐྱོང་བའི་དཀའ་སྡུག་ལ།།
བསམ་བཞིན་བསམ་དུས་སྙིང་ནས་འཆི་མ་ཤོར།།

ཐམས་ཅད་ལས་ཀྱི་ཕྲོགས་པའི་ཁྱེད་ཉིད་ལ།།
སྐྱོབ་པའི་གཉེན་མེད་བྱམས་པའི་གྲོཌ་ཀྱང་མེད།།
དཀའ་སྡུག་ཀློང་དུ་འགྲེངས་པའི་སྐྱེས་མ་ལ།།
བསམ་བཞིན་བསམ་དུས་སྙིང་ནས་འཆི་མ་ཤོར།།

ཡུན་རིང་ས་མཐར་གྱར་བུའི་ཕྲུག་ལ།།
དྲན་པའི་མིག་ཆུ་བརྩེ་བའི་སེམས་ཀྱི་ཁུར།།
བགྲང་གིས་མི་ལང་སེམས་ཀྱི་རྨ་ཁ་འདིར།།
བསམ་བཞིན་བསམ་དུས་སྙིང་ནས་འཆི་མ་ཤོར།།

རེ་བའི་མིག་ཟུང་སླར་འཛོམས་དུས་ལ་ཅེར།།
བྱམས་པའི་ལག་ཟུང་མཆོག་གསུམ་མདུན་དུ་བཏུད།།
བགྲང་བྱའི་རེ་སྒུག་སེམས་ཀྱི་ཁོངས་སུ་སྦས།།
བསམ་བཞིན་བསམ་དུས་སྙིང་ནས་འཆི་མ་ཤོར།།

འཇིག་རྟེན་འདི་ཡི་སྡུག་བསྔལ་སྣ་ཚོགས་པ།།
ཐམས་ཅད་རང་གི་ལས་ལས་འབྱུང་མོད་ཀྱང་།།
ལས་འདིས་ཁྱེད་ལ་བརྙས་བཅོས་ཆེ་དྲག་པས།།
བསམ་བཞིན་བསམ་དུས་སྙིང་ནས་འཆི་མ་ཤོར།།

— ཨ་བུ་ལོ་ལོས།

2017/11/13

སྣང་བ་དཀར་རྐྱང་།

རུས་པའི་རྐང་གི་ན་ཟུག་འགའ།།
སྐྲ་དཀར་མཉམ་དུ་སྦས་བཞག་ཡོད།།
གདོང་ལྤཌ་ལྷོད་པའི་ལྟེབ་སུལ་ལ།།
དབུར་ཏི་རྒྱག་ལ་འགྲོ་ན་བསམ།།

སྣང་བ་དཀར་རྐྱང་འཕྱོ་ཚུལ་ནི།།
མུ་ཏིག་འོད་དུ་འཚེར་བ་འམ།།
སྒྲོལ་མ་དཀར་མོ་བཞད་འདྲ་བས།།
རྨི་ལམ་ཡིན་པ་ཁག་ཐེག་ཡིན།།

འོན་ཏང་དེ་ལ་ཅི་ཞིག་ནོངས།།
སྣང་བ་ཟ་ཟི་ལྡང་འདྲ་བའི།།
ང་དང་ང་ཚོ་ཡུད་ཡུད་པོ།།
རྨི་ལམ་ཡིན་པ་ཞེ་གཅིག་ཡིན།།

སྐོར་ལམ་ནང་གི་ཨ་ཕྱི་མ།།
ལྷ་ཡི་ཕོ་ཉ་ཡིན་ངེས་འདྲ།།
རྐང་པ་གྱོལ་སྟངས་རེ་རེ་ལ།།
མ་ཎི་དུང་གི་བྱིན་རླབས་གདའ།།

བསྐལ་ཆེན་སྟོང་གི་འཆར་འགོད་ཅིག།
འགྲུབ་པའི་གདིང་ཚོད་ང་ལ་མེད།།
གྲོང་པའི་འདབ་ཀྱི་མཆོད་རྟེན་ལ།།
རེས་འགར་དཀར་རག་འབྱུག་ན་འདོད།།

ཟླ་བའི་ཐོད་དུ་ཐེམ་སྐས་ཤིག།
འཛུགས་རྒྱུའི་ནུས་པ་བདག་ལ་མེད།།
རྡོག་པའི་འོག་གི་རྐང་ལམ་འདིར།།
གད་དར་ཅུང་ཟད་བགྱི་ན་བསམ།།
— ཁྱུང་ཨོ:རིག་འཛིན།

2017/09/17

བོད་ཡིག་ལ་རྐྱེན་ཡིག་གསར་བ་སྣོན་པའི་དགོས་དབང་གླེང་བ།

བོད་ཡིག་ལ་རྐྱེན་ཡིག་གསར་བ་སྣོན་པའི་དགོས་དབང་གླེང་བ།
2017-07-03 11:54:14: གུ་རུ་སྐྱབས། (པེ་ཅིང) ཀློག་གྲངས། 3689 མཆན 4 ཡོད།

ནང་དོན་གནད་བསྡུས། དཔྱད་རྩོམ་འདིར་སྐད་ཡིག་གཞན་ཁག་ཅིག་གི་རྐྱེན་ཡིག་ལོ་རྒྱུས་ལ་ཟུར་ལྟ་བྱས་ཤིང་། བོད་ཡིག་གི་སྔར་གྱི་རྐྱེན་ཡིག་རྣམས་ཀྱི་མི་འདང་བའི་ཆ་ལ་དབྱེ་ཞིབ་བྱས་ཏེ། དེང་དུས་བོད་ཡིག་ལ་རྐྱེན་ཡིག་གང་དག་སྤྱོད་འོས་པའི་སྐོར་ལ་བསམ་གཞིགས་བཏང་ཡོད།
བརྡ་ཆད་གཙོ་བོ། བོད་ཡིག རྐྱེན་ཡིག དགོས་དབང་། སྤྱོད་ཚུལ།
tibetan punc.png
                                        གླེང་གཞི།

2017/08/07

ཆ་བེ་ཆོབ་བེ།

སྤུན་ཆུང་རྣམ་རྒྱལ།
སྔ་དྲོ་ཆོས་ཁྲིའི་ཁ་ནས་གཅིག་པ་ཟེར།།
ཕྱི་དྲོ་འབོལ་གདན་སྟེང་ནས་ཁ་ཁ་ཟེར།།
དོན་དུ་ང་གཉིས་འགལ་ཟླ་བཟོ་བའི་རྒྱུ། །
བླ་མ་ཆ་བེ་ཆོ་བེ་ཉུང་ན་བསམ། །

ཁ་ནས་སྐད་ཆ་བཤད་ན་གྲུབ་མཐའ་གླེང་།།
ངག་གིས་གླུ་དབྱངས་བླངས་ན་ཕྱོཌ་རིས་འབོད།།
དོན་དུ་ང་དང་གངས་ཕྲུག་སུན་པའི་རྒྱུ།།
གླུ་པ་ཆ་བེ་ཆོ་བེ་ཉུང་ན་བསམ།།

ཕྱི་ལ་དམར་དམར་མཚོན་གྱི་ཞལ་བ་བྱུག།
ནང་གི་སྙིང་ཆུང་དམར་པོས་སྒོར་མོ་སྒོམ།།
དོན་དུ་ང་དང་གྲོགས་པོ་གཞོ་མཁས་པའི།།
བུ་མོ་ཆ་བེ་ཆོ་བེ་ཉུང་ན་བསམ། །

2017/07/10

རྫི་རོགས་ཆུང་ཆུང་།


ཉི་ཟེར་སྔས་མགོ་ལ་འཁྱིལ་ཡང་། །
གཉིད་ཀྱི་མུན་ནག་དེ་སེལ་མེད། །
ཆུ་འཁྱགས་རུང་ཁོང་ན་འཛུལ་དུས། །
རྨི་ལམ་རབ་རིབ་དེ་ཡལ་འགྲོ། །

ཞོགས་པ་ཁ་ལོ་ལ་འགྲོ་དུས། །
གནམ་རྒྱའི་ཉི་འོད་ཀྱི་ངོགས་སུ། །
འབྲི་མོའི་ཁ་རླངས་དང་སྣ་རླངས། །
རི་མེ་མཆེད་མཆེད་ཟིག་ཡིན་ར། །