2011/09/24

དབྱར་གནས་དགའ་དབྱེའི་སྨོན་ཚིག

མ་སྨད་བསོད་ནམས་བྱེ་བས་བསྐྲུན་པའི་མཐོང་ན་ཀུན་ཏུ་དད་པའི་སྐུ། །
མ་ལུས་འགྲོ་བའི་སྙན་གྱི་བུང་བར་གསུང་གི་རྩི་བཅུད་རབ་ཏུ་མངར། །
མ་སྨད་མཁྱེན་པའི་དཀྱིལ་འཁོར་ཡོངས་གང་སྤང་རྟོཌ་ཀུན་ཏུ་རྫོཌ་པའི་ཐུཌ། །
མ་ལུས་སྐྱེ་རྒུའི་དཔུང་གཉེན་དམ་པ་ཐུབ་དབང་འཇིག་རྟེན་མིག་གཅིག་རྒྱལ། །

ཤཱ་རི་བུ་དང་བཙུན་པ་རཱ་ཧུ་ལ། །
མགོན་པོ་ཀླུ་དང་མཁན་ཆེན་ཞི་འཚོ་སོགས། །
རྣམ་དག་བསླབ་པས་ཀུན་ཏུ་ཕྱུག་པ་ཡི། །
སྔོན་བྱོན་འདུལ་འཛིན་བརྒྱུད་པའི་ཚོགས་བསྙེན་ཏེ། །


བསླབ་གསུམ་དཔལ་གྱིས་ཕྱུག་པའི་དགེ་སློང་དང་། །
དགེ་ཚུལ་བརྒྱ་ཕྲག་ཟུང་ཙམ་འདུས་སྡེ་འདིར། །
དབྱར་སྔོན་ཟླ་གསུམ་བགྱིས་པའི་རྣམ་དཀར་མཐུས། །
རིས་མེད་རྒྱལ་བསྟན་ཀུན་ཏུ་དར་རྒྱས་ཤོག །

དར་མ་གདུག་པས་ཁ་རླངས་མ་ཐེབ་ཅིང་། །
བརྒྱུད་པའི་ཉག་ཐག་གཡའ་དྲིས་མ་སྦགས་པ། །
བླ་ཆེན་བཙུན་པས་སྨད་ནས་སྦར་བ་ཡི། །
སྡོམ་རྒྱུན་འདི་ཉིད་ཀུན་ཏུ་རྒྱས་རྒྱུར་ཅིག །


རང་དོན་བས་མཐར་གཅིག་ཏུ་མ་གཞོལ་བར། །
གཞན་དོན་བྱང་ཆུབ་སེམས་ཀྱི་ལྷག་བསམ་མཐུས། །
སྔ་འགྱུར་རྒྱལ་བསྟན་འཛིན་བཟོད་རིས་སྤྲུལ་མཆོག །
ཐུགས་བཞེད་འགྲུབ་ཅིང་སྐུ་ཚེ་ཡུན་བརྟན་ཤོག །

འཇི༵གས་མེ༵ད་ལྷུན་པོའི་སྤོ་རུ་ཐུ༵བ་པའི་བསྟ༵ན། །
བཤ༵ད་དང་སྒྲུ༵བ་པའི་རྒྱལ་བའི་རིང་ལུགས་ཀྱི། །
ཟབ་དགུའི་ཆོ༵ས་ཀྱི༵་སྒྲ༵་དབྱ༵ངས་སྒྲོགས་པའི་སླད། །
མཆོག་སྤྲུལ་པདྨ་གཞོན་ནུ་མྱུར་འབྱོན་ཤོག །

སྔ་འགྱུར་རིང་ལུགས་རྒྱལ་བ་དཔལ་ཡུལ་བའི། །
བསྟན་པའི་སྲོལ་འབྱེད་ཀུན་བཟང་ཤེས་རབ་ནས། །
དྲི་མེད་རྒྱལ་བསྟན་མི་ཉམས་འཛིན་པའི་གནས། །
ཆོས་འཁོར་འདི་ཉིད་གླིང་འདིར་ཡུན་གནས་ཤོག །

སྙིགས་དུས་རང་མདངས་བདོ་བའི་དེང་གི་ཆར། །
ས་གཡོས་རླུང་འཚུབ་མུ་གེ་ནད་ཡམས་སོགས། །
མཚོ་བཞི་གླིང་ལྔའི་སྐྱེ་འགྲོའི་ཚེ་སྲོག་གི །
ཆོམ་པོ་འདི་དག་རྩད་ནས་ཞི་གྱུར་ཅིག །

དམར་པོའི་ན་བུན་དཀྲིགས་པའི་འོབས་ཀློང་སྟེ། །
མི་ཡི་ཡུལ་དུ་བསྐྲུན་པའི་དམྱལ་ཁམས་འདིར། །
ཀུན་ཏུ་མནར་བའི་རང་ཅག་གངས་ཅན་པ། །
རང་དབང་ཞི་བདེའི་འོད་ཀྱིས་རེག་གྱུར་ཅིག །

མདོར་ན་འདི་ཕྱིར་ཀུན་ཏུ་དགེ་བ་ཡི། །
ཞི་བསིལ་དམ་པའི་ཆོས་ཀྱི་བདུད་རྩི་འདིས། །
སྡུག་བསྔལ་གསུམ་གྱིས་བཙེས་པའི་ཉམ་ཐག་འགྲོ། །
བླ་མེད་རྫོགས་པའི་ས་རུ་དབུགས་དབྱུང་ཤོག །

ཅེས་མཁན་ངག་དབང་རྡོ་རྗེ་མིང་པས་སྦྱར་རོ།། དགེའོ།། །།