2011/08/16

བསིལ་ལྷམ།

Image result for slippersང་ནི་བསིལ་ལྷམ་གྱི་སོ་པ་ཞིག 
 ང་ནི་བསིལ་ལྷམ་གྱི་རྫི་བོ་ཞིག 
 མེ་ཏོག་ལས་མཛེས་པའི་བསིལ་ལྷམ་དམར་པོ། 
 མུ་ཏིག་ལས་འཚེར་བའི་བསིམ་ལྷམ་སྔོན་པོ། 
གལ་ཏེ་བསུ་མ་དང་འདྲ་བའི་བསིལ་ལྷམ་ཆུང་ངུ་དག་གིས་འཛུམ་དམུལ་དམུལ་གྱིས་སྒོ་དྲུང་ནས་ང་བསྒུགས་མེད་ཚེ།
ངའི་སྙིང་གསེང་ནས་ཅི་ཞིག་འཐོར་ཏེ་བྱེ་ཐང་ནས་གང་ཞིག་འཚོལ་བ་དང་འདྲ་སོང་།
ངའི་གཅེས་པའི་བསིལ་ལྷམ་ཆུང་ངུ་ལགས།
ཞོགས་པ་ལྷ་གསོལ་གྱི་དུད་སྤྲིན་ཀློང་ནས་ཁྱེད་ཉིད་བཞད་སོང་ལ།
དགོང་མོའི་རྨི་ལམ་གྱི་ཞིང་ཁམས་ནས་ཁྱེད་རང་འཛུམ་སོང་།
རྒྱུན་དུ་་་་
ང་ཆེས་དགའ་སའི་ཇ་མངར་མོ་དང་སྔོ་མོ་མོའི་བྲོ་བའི་གཏིང་རུམ་ནས་གསེར་ཉ་བཞིན་དུ་འཁྱུགས་སོང་།
བསིལ་ལྷམ་ལགས།
ཚོན་མདོག་གིས་རྣམ་པར་བཀྲ་བའི་ཁྱེད་ཀྱི་སེན་མོ་དམར་པོ།
མཉེན་འཇམ་གྱིས་མཛེས་པའི་ཁྱེད་ཀྱི་རྐང་ཆུང་ལྡེམ་པོ།
ཁྱེད་ཉིད་ནི་རྐང་ཆུང་ལ་དག་ཅིང་ང་ནི་ཁྱེད་རང་ལ་དག
མ་གཞི་བསིལ་ལྷམ་ཆུང་ངུ་ལགས།
ཁྱོད་ཉིད་ངའི་རྐང་སྒོག་གི་ལོང་སྤྱོད་དུ་མི་འོས་པ་བདེན་སྲིད་ཀྱང་།
ངའི་མགོ་ཐོག་གི་གཙུག་རྒྱན་དང་། སྐེ་ཐོག་གི་སྲུང་བ།
ཐ་ན་གཡང་སྒམ་གྱི་བཅུད་དུ་བསྟིམས་ན་ཆོག་གམ།
བསིལ་ལྷམ་ལགས།

2011/08/08

བཀའ་ཁྲི་གསར་པ།




སྐུ་དྲག་དཔོན་རྒྱུད་མིང་སྐམ་མ་ཁྱེར་ཞིང་། །
རྒྱུ་དང་འབྱོར་བའི་ལྐོག་ནས་མ་སྐྱོར་པར། །
ངལ་བརྒྱས་བཀྲུན་བའི་ཤེས་རིག་འོད་སྣང་འདིས། །
ཆེས་མཐོའི་སྲིད་སྐྱོང་བཞུགས་ཁྲི་མཛེས་པར་བྱས། །

དེང་སྲོལ་མཁས་ཟེར་སྙན་པ་སྒྲོགས་ཀྱང་སྲིད། །
གནའ་སྲོལ་མི་མཁྱེན་སྨོད་པ་བྱེད་ཀྱང་སྲིད། །
བླ་མ་མིན་པས་ཡིད་ཆེས་མེད་ཀྱང་སྲིད། །
ཐམས་ཅད་མགུ་བ་འཇིག་རྟེན་འདི་ན་མེད། །

འཆི་མ་གསོད་དུ་ལུས་པའི་བོད་དོན་འདི། །
ཕྱག་སྟོང་སྤྱན་རས་གཟིགས་ཀྱིས་བསླུ་དཀའ་ན། །
ཕྱག་གཉིས་བློ་བཟང་སེང་གེས་བདེ་བླག་ཏུ། །
ལེན་པར་བསམ་ན་བྱིས་པའི་བློ་ལས་ཅི། །

དབུ་མ་རང་བཙན་ཆོས་བཤད་མ་བྱས་གོང་། །
སྟོང་ལ་ཉེ་བའི་གངས་རིའི་མི་འུ་དང་། །
ནུབ་ལ་ཉེ་བའི་བྷོ་ཊའི་ཕ་སྐད་གཉིས། །
འཕྲལ་དུ་བསྐྱབ་རྒྱུ་ཐོག་མའི་འོས་འགན་སྙམ། །

2011/08/05

སྤང་སྒང་རི་ཁྲོད་ཀྱི་ཁྲི་འདོན་མཛད་སྒོ།

དེ་རིང་ནི་བོད་ཟླ་དྲུག་པའི་ཚེས་ལྔ་དང་སྤྱི་ལོ་ ༢༠༡༡ ཟླ་ ༨ པའི་ཚེས་ ༤ ཉིན་མོ་འདིར་ས་གནས་ཀུ་ལུ་མ་ན་ལིའི་མངའ་ཁོངས་སུ་ཡོད་པའི་སྤང་སྒང་རི་ཁྲོད་དུ་ཡང་སྲིད་ཁྲི་འདོན་གྱི་མཛད་སྒོ་ཟབ་རྒྱས་ཤིག་འཚོགས་ཀྱིན་འདུག སྤྱིར་རི་ཁྲོད་འདི་ཉིད་སྔ་འགྱུར་རྙིང་མའི་ཆོས་རྒྱུད་འཛིན་པ་(རྨེ་བ་མཁན་ཆེན་ཐུབ་བསྟན་འོད་ཟེར་དཔའ་བཟང་པོ་མཆོག་)གིས་ཕྱག་བཏབ་ཅིང་སློབ་རྒྱུན་གཙོ་བོ་བཙུན་མ་དང་ཐོས་བསམ་སྒོམ་གསུམ་ལས་སྒོམ་པ་གཙོ་ཆེར་གནང་སའི་རི་ཁྲོད་མཐོང་ན་སྤྲོ་བ་ཞིག་རེད། 
བར་ལམ་ཕྱི་ལོ་ ༢༠༠༠། ཟླ་བ་༩། ཚེས་ ༢༠ ཉིན་མཁན་ཆེན་གང་ཉིད་དགོངས་པ་བཤེགས་ཏེ་ལོ་གཅིག་གི་རྗེས་སུ་འཁྲུངས་ཞིང་ཡབ་ཁུ་ནུ་བ་ཕུན་ཚོགས་སྟོབས་རྒྱལ་དང་ཡུམ་རྒྱ་གར་ཁམས་པ་ཚེ་རིང་སྒྲོལ་མའི་{སྲས་འཇིགས་མེད་བསྟན་འཛིན་འགྱུར་མེད་}ཡང་སྲིད་དུ་གཏན་ཁེལ་ཞིང་།དེ་རིང་ཨ་བྲ་ཆུང་ཡང་སུག་བཞི་ཚང་ཟེར་བ་ལྟར་འདུས་སྡེ་ཆུང་ངུ་ཞིག་གིས་ངོས་ནས་བཤད་ན་བྱ་དཀའ་བའི་ཁྲི་འདོན་གྱི་མཛད་སྒོ་ཆེན་པོ་ཞིག་དངོས་སུ་འདུ་བགྱིས་འདུག་སྙམ།

མཛད་སྒོའི་སྐུ་མགྲོན་གཙོ་བོ་ཆོས་རིག་བཀའ་བློན་དང་། སྤྱི་འཐུས་ཚོགས་གཞོན། ས་གནས་རང་གཞུང་གི་གནད་ཡོད་མི་སྣ་ཁག རྙིང་མའི་མ་དགོན་ཆེན་པོ་དག་གི་སྐུ་ཚབ་ཀྱིས་མཚོན་པའི་སྐུ་དྲག་དག་ཀྱང་མི་ཉུང་བ་ཞིག་ཕྱག་ཕེབས་འདུག་ལ། མགོ་ལ་མེ་ཏོག་ཙམ་པ་ཀས་བརྒྱན་པའི་ཡབ་རྒྱུད་ཀྱི་གཉེན་ཉེ་ཡུལ་མི། ལུས་ལ་བོད་གོས་གྱོན་ཞིང་གདོང་མཚལ་ཐིག་བཏབ་པའི་ཡུམ་རྒྱུད་ཀྱི་ཉེ་བཞི་རྩ་ལག་ཕལ་ཆེར་མ་ཚང་བ་མེད་པར་འཛོམས་ཡོད་པར་སྣང་།
རྒྱུན་ལྡན་གྱི་གནས་སྟངས་དང་མཚུངས་པར་འདི་གར་ཧི་མ་ལའི་ཉིན་སྲིབ་ཀྱི་དད་ལྡན་པ་དད་པའི་གདན་གཏིང་ཞིང་དད་པའི་གོས་གྱོན་མཁན། དད་པ་དང་མ་ངོ་མཉམ་དུ་ཤེས་པའི་མི་ཚོགས་ཀྱི་འདུ་འཛོམས་ཧ་ཅང་ཆེ་ཡང་ཆར་པ་ཤུགས་ཀྱིས་བྱོ་སྟེ་རྒན་བྱིས་དག་ལ་བརྡབ་གསིག་མི་ཆུང་བ་ཞིག་ཀྱང་བྱུང་སོང་། །

2011/08/03

ཆོས་འཁོར།

འཇིག་རྟེན་མི་ཡི་དབང་པོར་མ་འབྱོར་ཞིང་། །
ལོ་དྲུག་དཀའ་ཐུབ་སྤྱད་ཀྱང་མ་བརྙེས་པའི། །
བརྗོད་འདས་དོན་གྱི་བདུད་རྩི་ཟབ་མོ་ཞིག །
བྱང་ཆུབ་ལྗོན་པའི་འོག་ནས་ངང་གིས་བརྡོལ། །

སུས་ཀྱང་མི་གོ་སྙམ་རྗེས་ལྔ་སྡེ་ལ། །
བསྟན་ན་གྲོལ་བར་འགྱུར་བ་གཟིགས་ཚུལ་འདིས། །
ཁྱེད་ཀྱི་རྣམས་པ་ཐམས་ཅད་མཁྱེན་དེ་ལ། །
ཐེག་པ་ཆེན་པོས་སྒྲོ་འདོགས་བྱས་མེད་དམ། །

རྫུལ་འཕྲུག་གཤོག་པ་བརྐྱངས་ཏེ་མ་ཕེབས་པར། །
ལྷུང་གཟེད་མཁར་བསིལ་བསྣམས་ནས་དལ་བུ་ཡིས། །
གྲོང་དང་གྲོང་ཁྱེར་བརྒྱུད་པའི་ཐ་མ་རུ། །
ཝཱ་རཱ་ཎ་སིར་ལྔ་སྡེ་བཟང་པོ་རྙེད། །

ལྷ་རྟེན་སྐུ་འབག་ཕུག་ཏུ་མ་བཤམས་ཤིང་། །
རྔ་ཆ་རོལ་མོའི་འུར་ཆེམ་མ་སྒྲོགས་པར། །
གང་གིས་བརྙེས་པའི་བདུད་རྩི་ཟབ་མོའི་ཆོས། ། 
གདུལ་བྱའི་སྙིང་གི་པད་མོར་ཡོངས་སུ་བསྟིམས། །

ཆོས་གྲོགས་ལ་ཕུལ་བའི་སེམས་གཏམ།

བདག་གིས་ངོ་ལོ་བཅོ་ལྔའི་གོང་ཙམ་ལ་བྲིས་པའི་སྙན་རྩོམ་ཞིག་ཉེ་ཆར་ལོ་ཤས་སྔོན་དུ། རྒྱ་གར་ལྷོ་ཕྱོགས་མཻ་སུར་སྔ་འགྱུར་རྙིང་མའི་ཆོས་སྡེ་ཆེན་པོ་རྣམ...