2016/11/12

རི་བོ་རྩེ་དྲུག

— ཁྱུང་ཨོ་རིག་འཛིན།
ཁྱུང་པོའི་རི་བོ་རྩེ་དྲུག་འདི།།
རིག་འཛིན་བརྒྱད་ཅུའི་ཕོ་བྲང་ཟེར།།
ཕྲན་ཆུང་ང་ཡི་མདུན་རི་ཡིན།།
ང་ཆུང་ཆུང་ཨ་མའི་པང་ཐོག་ནས།།
རི་བོ་འདི་ཡི་ཕར་ནང་ན།།
ནམ་མཁའ་རྐྱང་རྐྱང་ཡིན་ནམ་བསམས།།
འཇིག་རྟེན་དེ་ཙམ་ཡིན་ན་བསམས།།
ང་དེ་རྗེས་བེའུ་རྫི་འགྲོ་བའི་ཚེ།།
རི་བོ་འདི་ཡི་རྩེ་མོ་ལ།།
དར་དང་ཟ་འོག་མདོག་འདྲ་ཞིང་།།
ཤེལ་དང་གློག་གི་འོད་སྣང་བའི།།
དགོང་ཀའི་མཚམས་སྤྲིན་ཆགས་པ་ན།།
ལྷ་དང་སྲུང་མའི་ཚོགས་དེ་དག།
འདི་འདྲ་ཞིག་ཏུ་བཞུཌ་སམ་བསམས།།
གུ་རུ་ཡེ་ཤེས་མཚོ་རྒྱལ་གཉིས།།
འདི་ཤེད་ཅིག་ནས་མཇལ་འོངས་སྙམ།།
རྗེ་བཙུན་སྒྲོལ་མའི་དར་གོས་དག།
ཁ་དོག་འདི་དང་ཨེ་འདྲ་བསམས།།
ང་དེ་རྗེས་ནོར་རྫིར་འགྲོ་བའི་དུས།།
རྒྱ་གར་བྱ་རྒོད་སྤུང་རི་དང་།།
དབུས་ཀྱི་ཉི་མ་ལྷ་ས་སོགས།།
རི་འདི་བརྒལ་ན་ཡོད་པར་གོ།
ཆུ་ཆེན་རྒྱ་མོ་རྔུལ་ཆུ་ཡང་།།
རི་འདིའི་རྒྱབ་ནས་བཞུར་བར་ཤེས།།
ང་དེ་རྗེས་དར་བ་བབ་པའི་ཚེ།།
རི་བོ་འདི་ཡི་རྒྱལ་ལོགས་ནས།།
ཨ་རིའི་རྡུལ་ཕྲན་མཚོན་ཆ་ཞིག།
འཇར་པན་ཡུལ་དུ་འཕངས་པ་གོ།
རི་བོ་འདི་ཡི་སྟེང་ཤེད་ནས།།
དེང་གི་འཇིག་རྟེན་འཕུར་གྲུ་དེ།།
ཟླ་བའི་སྟེང་དུ་བབས་པ་གོ།
རི་འདིའི་རྒྱབ་ཀྱི་རྒྱབ་ཅིག་ན།།
མགོ་སེར་འཇིག་རྟེན་ཡོད་པར་གོ།
མི་ནག་ཡུལ་ཁམས་ཡོད་པར་གོ།
སྲིད་པའི་ངོ་མཚར་ཇི་སྙེད་ཅིག།
རི་འདི་བརྒལ་ན་ཡོད་པར་རྟོགས།།

སེམས།

སེམས་ནི་སྟོན་ཀའི་ལོ་མ་ཞིག།
སེམས་ནི་དགུན་ཁའི་བུ་ཡུག་ཅིག།
སེམས་ནི་དཔྱིད་ཀའི་རླུང་བུ་ཞིག།
སེམས་ནི་དབྱར་གྱི་མེ་ཏོག་ཅིག།
སེམས་ནི་རྒྱ་མཚོའི་རྦ་རླབས་ཤིག།
སེམས་ནི་ནམ་མཁའི་སྤྲིན་པ་ཞིག།
སེམས་ནི་དགོང་ཀའི་མཚམས་སྤྲིན་ཞིག།
སེམས་ནི་གྱང་གི་ལྡེབས་བྲིས་ཤིག།
སེམས་ནི་ན་བུན་རབ་རིབ་ཅིག།
སེམས་ནི་རྒྱང་གི་སྨིག་སྒྱུ་ཞིག།
སེམས་ནི་དགུན་གྱི་ལྷགས་རླུང་ཞིག།
སེམས་ནི་འཇག་མའི་ཤུ་གླུ་ཞིག།
སེམས ནི་བྱེ་ཐང་རྔ་མོང་ཞིག།
སེམས་ནི་བཤས་རའི་གཡག་གུ་ཞིག།
སེམས་ནི་སྤྲེའུའི་གར་སྟབས་ཤིག།
སེམས་ནི་བྱིས་པའི་རྩེ་ར་ཤིག།
སེམས་ནི་ས་ཐོག་གྲོག་མ་ཞིག།
སེམས་ནི་གཡོ་ཅན་ཝ་མོ་ཞིག།
སེམས་ནི་ཧམ་ཆེན་ཇག་པ་་ཞིག།
སེམས་ནི་དཀར་པོ གངས་རི་ཞིག།
སེམས་ནི་ནག་པོ་སོལ་བ་ཞིག།
སེམས་ནི་རྟག་པ་ཐེར་ཟུག་ཅིག།
སེམས་ནི་ཅང་མེད་སྟོང་པ་ཞིག།
སེམས་ནི་བསམ་བརྗོད་བྲལ་བ་ཞིག།
སེམས་ནི་ཀླད་པའི་འགུལ་སྐྱོད་ཅིག། (function)

2016/07/25

ནུ་བོ་ཐ་ཆུང་།


kunsang
ནུ་བོ་ཐ་ཆུང།
ཁྱོད་རང་ཐོག་མར་འཇིག་རྟེན་འདི་ན་འོངས་པའི་དུས་ཚོད་གསལ་པོ་མི་དྲན། ཨ་མས་གསུངས་ན་ཁྱོད་རང་རྒས་བུ་མགོ་འགྱ་རེད་ཟེར། (མགོ་ཆེ་བའི་དོན)
གང་ལྟར་ཨ་འཕེལ་ཁྱེད་གཉིས་སྤུན་མཆེདགཞན་ལས་ལུས་སྟོབས་ཆེ་བས། བཙའ་སྐབས་ཨ་མ་ལ་དཀའ་ཚེགས་མི་ཉུང་བ་ཞིག་འཕྲད་ཡོད་ལ། ལྷག་པར་ཨ་འཕེལ་སྐྱེ་སྐབས་ཨ་ཕ་ཡང་མེད་ལ་ཨ་མ་བང་ཁྲག་བཞུར་ཚད་མང་དྲགས་རྐྱེན་ཏོག་ཙམ་མིན་ན་མེད་པ་ཆགས་གྲབས་ཡིན། དཀོན་ཅོག་མཁྱེན།

2016/07/23

སྡུག་གྱོང་གྱིས།

པ་ཀི་སྠན་ཡུལ་ནས་མེར་བསྲེགས་པའི་བུ་མོ།
མི་རི་ཡ་་ས་ད་ཁ་ཊ་(Maria Sadaqat)
ཀྱེ་མ་ཀྱེ་ཧུད་འཇིག་རྟེན་འདི་ན། །
ཆོས་ལུགས་འདི་ཚོ་ཅི་ཞིག་ཡིན་ན། །
ཆོས་ལུགས་འདི་ཚོས་ཅི་ཞིག་སྒྲུབ་ཀི །
ཆོས་ལུཌ་བསྒྲུབས་ནས་ཅི་ཞིག་འགྲུབ་ཐལ། །

རླབས་ཆེན་ཁ་ཆེའི་ཆོས་དཔོན་ཞིག་གིས། །
རང་གི་བུ་ཆུང་དམར་མཆོད་ཕུལ་མྱོང་། །
མཐོང་རྒྱུ་མེད་པའི་དཀོན་ཅོག་དེ་ལ། །
རྒྱགས་རྒྱུ་ངོམ་རྒྱུ་གཏན་ནས་མེད་ཟིག །

2016/07/13

དྷར་མ་པ་ལ།

ནང་པའི་དགེ་བསྙེན་ཨ་ན་་གཱ་རི་ཀ་དྷརྨ་པ་ལ་ (Sinhalese: අනගාරික ධර්මපාල; 17/09/1864 –29/4/1933) ནི་ཤྲཱི་ལངྐའི་ནང་བསྟན་བསྐྱར་གསོ་གནང་མཁན་དང་། རྩོམ་པ་པོ། སིངྷ་ལའི་ནང་པའི་འཚེ་བ་མེད་པའི་རིང་ལུགས་དང་ནང་བསྟན་ལ་མཐུན་འགྱུར་གྱི་རྨང་འཛུགས་མཁན། དུས་རབས་འགའི་རིང་ལ་དོན་དངོས་སུ་མིང་གི་ལྷག་མ་ཙམ་དུ་གནས་པའི་རྒྱ་གར་ཡུལ་གྱི་ནང་བསྟན་བསྐྱར་གསོའི་བྱ་གཞག་གསར་གཏོད་གནང་མཁན། ཨེ་ཤི་ཡ་དང་། ནུབ་ཨ་རི། ཡོ་རོབ་གླིང་བཅས་གླིང་ཆེན་གསུམ་ལ་ནང་ཆོས་འཆད་ཁྲིད་གནང་མཁན་ཐོག་མ། དེ་བཞིན་ཁོང་དང་ཧེན་རས་་སི་ཊལ་་ཨོ་ཁོཊ་(Henry Steel Olcott)དང་ཧེ་ལེ་ན་་བྷུ་ལ་་ཝཊ་སི་ཀས་(Helena Blavatsky)བཅས་ནི་ལྷ་ལམ་ཚོགས་པ་(Theosophical Society)གསར་གཏོད་གནང་མཁན་ཡིན་པ་དང་། སེས་ལོན་ནི་སིའི་(Ceylonese)ནང་བསྟན་བསྐྱར་གསོ་དང་ལེགས་བཅོས་གནང་མཁན་གཙོ་བོ་དང་། ནུབ་ཕྱོགས་སུ་ནང་བསྟན་བརྒྱུད་སྤེལ་གྱི་རྣམ་པ་གལ་ཆེན་ཞིག་ཀྱང་ཐོན་ཡོད། མཁས་དབང་ཨམ་བྷེཌ་ཀར་ལས་དུས་རབས་ཕྱེད་ཀྱི་སྔོན་ལ་ཁོང་གིས་ཏ་མིལ་དུ་ནང་བསྟན་དར་བར་བགྱིས་པ་ཚུད་པའི་རྒྱ་གར་ལྷོ་ཕྱོགས་ཌ་ལིཊ་(Dalits)ཡི་ལས་འགུལ་ལ་སྐུལ་སློང་ཤུགས་ཆེན་ཐེབས་ཡོད། སྐུ་ཚེའི་སྨད་ལ་ནང་པའི་བསྟན་ལ་རབ་ཏུ་བྱུང་ཞིང་མཚན་བཀུར་འོས་ཤྲཱི་དེ་ཝ་མིཏྟ་དྷརྨ་པ་ལ་ཞེས་གསོལ།

2016/07/01

གྲོགས་པོ།

ལོ་ཤས་སྔོན་ངས་གྲོགས་པོར་བརྩི་བའི་མི་ཞིག་གི་ཟེར་ན། “ཁྱེད་ཀྱི་སྔོན་མའི་གྲོགས་པོ་ལ་དེང་སང་ཁྱེད་རང་མཁོ་དགོས་མེད་པས་ནམ་ཡང་འབྲེལ་འདྲིས་མ་བྱས་ན་བཟང་” ཟེར་བཤད་བྱུང་ལ་ངས་ཀྱང་བདེན་པ་ལྟ་བུར་སྣང་སྟེ། ལོ་གསུམ་རིང་ཁ་པར་མ་བཏང་ལ་སྐད་ཆ་ཡང་མ་དྲིས། 

རྟ་མཆོག་དང་། མཛངས་མ། མཆོད་རྟེན།

སྤྲིན་ནག་ནི་སྲིད་པའི་ཁ་རླངས་པ། །
བྱ་ཚོགས་རྣམས་མཁའ་ཡི་འཕུར་གྲུ། །
རྟ་མཆོག་དག་ས་ཡི་གླག་རྒོད། །
ལྗོངས་བཀོད་འདི་ཡིད་ཀྱི་ཞིང་ཁམས། །

འདི་ནི་ལྷ་ཡི་མེ་ཏོག་གམ། ། 
ཡང་ན་མཁའ་ཡི་འཇའ་ཞིག ། 
གཞན་དུ་དབྱངས་ཅན་རོལ་མོའམ། ། 
ཡང་ན་དྲི་ཟའི་གླིང་བུ་ཞིག །

ཕྱག་སྐོར་བ་རྣམས་ཁྱིམ་དུ་ལོག །
བྱེའུའི་ཚོགས་དག་མལ་དུ་སོང་། །
མཚམས་སྤྲིན་ཁ་དོག་རིམ་བཞིན་ཡལ། །
མཆོད་རྟེན་ངེད་གཉིས་ཤུལ་དུ་ལུས། །


2016/06/29

མིང་གི་རྒྱབ་རྟེན།

འདིར་ངས་བཤད་འདོད་པ་ནི། ཡུལ་གཞན་གྱི་ས་གནས་དང་། ཐོན་དངོས། གང་ཟག་སོགས་ཀྱི་མིང་བོད་ཡིག་རྐྱང་པའི་ཐོག་འབྲི་བ་ཙམ་མིན་པར་ཐ་སྙད་དེའི་ཁུངས་ངོ་མའི་སྐད་ཡིག་གང་ཡིན་པ་དེའི་ཡིག་གཟུགས་དངོས་སུ་མཆན་དུ་འགོད་དགོས།(1) སྐད་ཆ་འདི་ཁ་ཤས་ཞིག་གི་བློ་ལ་མི་འཐད་པ་འབྱུང་སྲིད་ཀྱང་གལ་ཏེ་རྒྱབ་རྟེན་མེད་པར་བོད་ཡིག་རྐྱང་པས་བྲིས་ན། རྗེས་སོར་ཀློག་པ་པོས་ངོས་བཟུང་བར་དཀའ་ངལ་མི་ཉུང་བ་ཞིག་འཕྲད་ངེས་ལ་ཐ་ན་གཏན་ནས་མི་རྙེད་པའང་འགྱུར་སྲིད། ཁྱད་པར་དེང་དུས་དྲྭ་བའི་ལམ་ནས་འཚོལ་དགོས་ན་དེ་བས་ཀྱང་དཀའ་ཚེགས་ཆེ་རུ་འགྲོ་བར་བཤད་ཅི་དགོས།


དེས་ན་ང་ཚོས་མཁྱེན་དགོས་པ་ནི་སྐད་རིགས་གཞན་གྱི་ཐ་སྙད་དེ་དོན་བསྒྱུར་བྱས་ནའང་རེད། ལྷ་རབ་བྱུང་ན་ཐ་སྙད་དེ་སྒྲ་སྒྱུར་བྱས་རྗེས་ཟུར་དེར་ཤད་གུག་” (bracket) ནང་ངམ། ཡང་ན་རྐང་མཆན”(footnote) སོགས་སུ་ཕུགས་ཀྱི་སྐད་ཡིག་གང་ཡིན་པ་དེའི་བརྡ་དག་མ་ནོར་བར་འབྲི་དགོས་པ་སྟེ། དཔེར་ན་སྒྱུ་རྩལ་བ་གྲགས་ཅན་མིག་ཁཱལ་ཇེག་སོན་ལགས་ཀྱི་མཚན་འབྲི་དགོས་ན་རྒྱ་ནག་གིས་ཅི་ཟེར་དང་། གཞན་དག་གིས་གང་ཟེར་མི་ལྟ་བར་གཙོ་བོ་ཨིན་སྐད་དུ་ཅི་ཟེར་ལ་ཉན་དགོས་པས་མིག་ཁཱལ་ཇེག་སོན་(Michael Jackson) ཟེར་འབྲི་དགོས་པ་ལས་རྒྱ་སྐད་(2)ལྟར་“རྨེ་ཁི་་ཇེ་ཁི་ཤི་ལྟ་བུར་བྲིས་ན་དོན་དངོས་ལས་རྒྱང་རིང་དུ་སོང་ཡོད། དེ་བཞིན་ཐ་སྙད་དེའི་ཁུངས་རྒྱ་ནག་ཡིན་ན་རྒྱ་སྐད་ལྟར་འབྲི་དགོས་པ་སྨོས་མེད་རེད། མདོ་དོན་བརྡ་ཆད་དེ་འབྱུང་སའི་སྐད་ཡིག་ཁུངས་མའི་ཡིག་གཟུགས་དེ་མཆན་དུ་འདེབས་རྒྱུ་བརྗེད་མི་རུང་། གལ་ཏེ་འབྲི་བར་དཀའ་ངལ་ཡོད་ན་ཨིན་ཇིའི་(English)ཚིག་མཛོད་ཚད་ལྡན་དུ་ཐ་སྙད་དེ་གཏན་ལ་ཕབ་ཡོད་ན་དེས་ཆོག་པར་སེམས་ཏེ། གོ་ལ་ཟླུམ་པོ་འདིའི་སྒང་དུ་སྐད་ཡིག་གཞི་རྐང་བརླིང་ཞིང་འཚོལ་རྙེད་སླ་ཤོས་དེ་ཨིན་ཇི་ཡིན་པས་ཕན་ཐོག་ཆེན་པོ་ཡོང་བར་ངེས། 

2016/06/22

བག་ཆགས།


----------------------རིག་འཛིན་ཁྱུངཿ
རི་ལམ་རབ་རིབ་འཐེན་པའི་སྤང་ལྗོངས་ཤིག་ནས།།
རྒོད་མ་སྨུ་གུ་མ་དེར་ཐུར་སྐྱ་ཕབ་ཏེ།།
དུད་ཚང་ཆུང་ཆུང་ཞིག་ལ་གནས་ཚང་གཡར་དུས།།
ང་ཡི་གཏམ་རྒྱུད་ཐོག་མ་འདི་ནས་བརྩམས་ཡིན།།

འཛུམ་ཆུང་ངོ་ཚར་སྨིན་པའི་བུ་མོ་ཞིག་གིས།།
ཕར་ཁའི་ཐབ་ཀྱི་རྒྱབ་ན་གབ་ཀྱིན་མངོན་བཞིན།།
སྐྲ་ལོ་སིལ་མ་ཤམ་པའི་གསང་དང་གསེང་ནས།།
མིག་ཟུང་འཁྱུག་གིན་འབྲོས་ཀྱིན་རྩེ་བ་མཐོང་སོང་།།

2016/04/19

སོག་པོའི་འབྲོག་པ།

འབྲོག་པ་ཡོད་ཚད་འབྲི་གཡག་གི །
འབྲོག་པར་མ་བསམས་བོད་རྒན་ལགས། །
ཤ་བས་ཕྱུག་པའི་སོག་འབྲོག་འདི། །
འབྲོག་པ་མིན་ན་ཅིག་ཞིག་རེད། །

རྟ་མཆོག་གྱེན་དུ་འཕུར་བའི་སྟེང། །
གླག་རྒོད་སྦར་གྱིས་འཛིན་ཐུབ་པའི། །
སོག་པོའི་ཕོ་རྒོད་འདི་འདྲ་བ། །
ས་ཕྱོགས་གཞན་དུ་ཨེ་ཡོད་ན། །

2016/04/17

དགོང་ཀའི་སྙན་ངག


ལྗོན་པའི་ཐོག་ནས་ཕྱི་མིག་བཅས།།
ཉི་མ་མལ་དུ་ཆས་པར་རྩོམ།།
མཚམས་སྤྲིན་གདོང་གི་འོད་དམར་སེར།།
སྣང་བའི་ངོགས་ལ་ལྷག་ཏུ་འཚེར།།

2016/02/03

རྡོར་གདན་གནས་སྐོར།

—ཁྱུང་རིག་འཛིན།

སྟོན་པ་མཆོག་དེས་བདུད་རྩི་བརྙེས་པའི་ཡུལ།།
རྡོ་ཡི་མཆོད་རྟེན་བརྗིད་ཀྱིས་འགྱིངས་བའི་ས།།
བྱང་ཆུབ་ལྗོན་པ་འཕྲེད་ལ་གྱེས་པའི་གནས།།
བྷོ་དྷི་གྷ་ཡའི་གནས་སུ་ད་ལོ་འབྱོར།།

གྲྭ་ཆུང་གི་ལས་དབང་།

——ཁྱུང་རིག་འཛིན།


རི་དྭཌ་གཟན་ལ་གཡེངས་བའི་རི་ཁུག་རེར།།
ཤ་ཁྱི་རོལ་དུ་ཁྲིད་པའི་རྔོན་པ་རེ།།
མིག་ཟུང་དད་པས་ཟུམ་པའི་སྤྱི་ཚོཌ་རེར།།
ཆོས་གཟུགས་སྣ་ཚོཌ་སྟོན་པའི་བླ་མ་རེ།།

འདི་ཡང་འཇིག་རྟེན་འཁོར་བའི་ཆོས་ཉིད་དེ།།
བླ་མ་མེད་ན་སྦྱིན་བདག་འོངས་དོན་མེད།།
སྦྱིན་བདག་མེད་ན་དགོན་པ་བཞེངས་དོན་མེད།།
དགོན་པ་མེད་ན་གྲྭ་ཆུང་བསྡུ་དོན་དོན་མེད།།