ཆོས་གྲོགས་ལ་ཕུལ་བའི་སེམས་གཏམ།

བདག་གིས་ངོ་ལོ་བཅོ་ལྔའི་གོང་ཙམ་ལ་བྲིས་པའི་སྙན་རྩོམ་ཞིག་ཉེ་ཆར་ལོ་ཤས་སྔོན་དུ། རྒྱ་གར་ལྷོ་ཕྱོགས་མཻ་སུར་སྔ་འགྱུར་རྙིང་མའི་ཆོས་སྡེ་ཆེན་པོ་རྣམ་གྲོལ་གླིང་གི་དུས་དེབ་«པདྨའི་རང་མདངས་ཀྱི་ལེགས་རྩོམ་གཅེས་བཏུས་དཔེ་ཚོགས་»ལས་«སྙན་རྩོམ་དབྱངས་ཅན་མགྲིན་གླུ་»ནང་དུ་ཚུད་འདུག་པ་དེ་འདིར་བཀོད་ཡོད། «སྙན་རྩོམ་དབྱངས་ཅན་མགྲིན་གླུ་» Byalakuppe, Mysore: «སྔ་འགྱུར་རིག་མཛོད་རྩོམ་སྒྲིག་ལྷན་ཁང་» 2016, pp. 135––140. 

ཆོས་མཐུན་བྱ་བར་དུས་དྲུག་གི་འཁོར་མོར། ། 

ཆོས་བཞིན་སྤྱོད་པའི་ཆོས་ལྡན་གྱི་གྲོགས་པོ། ། 

སྙན་ཚིག་ཉམས་བརྒྱའི་འགྱུར་ཁུགས་རང་མེད་ཀྱང༌། ། 

བཅོས་མིན་སེམས་ཀྱི་ཁ་བརྡ་འདིར་གསོན་དང༌། ། 

ཉམས་དགའི་དབེན་གནས་ནགས་ཁྲོད་དང་བས་མཐར། ། 

རྩེ་གཅིག་སྒོམ་པའི་རྣལ་འབྱོར་འདི་མེད་ཀྱང་། ། 

བཟང་ངན་འཛིངས་པའི་སྤྱི་ཚོགས་ཀྱི་ཁྲོད་དུ། ། 

ཡ་རབས་དམ་པའི་ངང་ཚུལ་འདི་མ་ཤོར། ། 

ཆེ་རྒུའི་མདུན་དུ་ངོ་སྲུང་གི་བཅོས་འཛུམ། ། 

ཉམ་ཆུང་ཐོག་ཏུ་འཕྱ་སྨོད་ཀྱི་ཁྲེལ་འཛུམ། ། 

སོ་ཕྲེང་ངོམས་པའི་རྣམ་འགྱུར་འདི་ཁོ་ནས། ། 

བྱམས་སྡང་སྒྱུ་མའི་གར་རྩེད་དག་མ་སྟོན། ། 

གཞན་ཕན་ལྷག་བསམ་དབྱར་དུས་ཀྱི་ལྗོན་བཟང་། ། 

ལེགས་བྱས་ཕན་བདེས་གྲིབ་བསིལ་དག་མེད་ཀྱང༌། ། 

གཞན་འབྱོར་ཕུན་ཚོགས་རབ་དཀར་གྱི་ལྷུན་པོར། ། 

མ་བཟོད་རཀྟའི་ཁྲུས་ཆབ་འདི་མ་གཏོར། ། 

མ་རྒན་སེམས་ཅན་དྲིན་ལྡན་དུ་གོ་ན། ། 

མ་ཎི་བགྲང་བའི་བསྔོ་བ་འདི་མེད་ཀྱང་། ། 

ལྟོ་ཐེངས་གཅིག་གི་བྲོ་བ་ལ་བརྔམས་ཏེ། ། 

ཉམ་ཆུང་དུད་འགྲོའི་ཚེ་སྲོག་དེ་མ་འཕྲོག ། 

མགོ་དང་རྣ་བས་རང་ལུགས་འདིར་འཐམ་ཞིང་། ། 

སྒྲོ་དང་སྐུར་བས་གཞན་ཕྱོགས་སུ་གཤེ་བ། ། 

ཆགས་དང་སྡང་བའི་མེ་འོབས་འདིའི་ཀློང་དུ། ། 

ལེགས་བྱས་ཚོགས་ཀྱི་བུད་ཤིང་དེ་མ་སྲེག ། 

འདོད་ལྷ་དབུ་སེར་ཆེ་ཐང་གིས་བརྟེན་ན། ། 

འདོད་ཡོན་དངོས་གྲུབ་སྩོལ་བ་རེ་སྲིད་ཀྱང་། ། 

འདོད་སྲེད་འཁྲུགས་པའི་རྒྱ་མཚོ་འདིའི་ཀློང་དུ། ། 

ཆོག་ཤེས་ནོར་བུ་རྩ་བརླག་ཏུ་མ་ཤོར། ། 

རང་རང་བདེ་སྡུག་སྔོན་བསགས་ལ་རག་ན། ། 

འཁྲུལ་སྣང་ལྷ་འདྲེས་བཀའ་དབང་གི་འོག་ཏུ། ། 

མ་བསྐོས་དང་བླངས་རང་འཆིང་གི་བྲན་གཡོག ། 

གདོད་མའི་སྐྱེ་བོའི་རྡོག་ཁྲེས་འདི་མ་ཁུར། ། 

སྤང་བླང་མ་ཕྱེ་འཇུག་ལྡོག་གི་བྱ་བར། ། 

མངོན་རྗེས་ཚད་མས་འཇུག་པ་དག་མེད་པར། ། 

མ་ངེས་མོ་ཡིས་ཐག་གཅོད་ཅིག་གནང་སྟེ། ། 

རང་མགོ་རང་གིས་བསྐོར་བ་རང་ཅི་དགོས། ། 

ཅི་ཡང་མི་མངོན་མུན་ནག་གི་ཁྲོད་དུ། ། 

ཅི་མཛད་ལེགས་པར་མོས་པ་ནི་འདི་ལས། ། 

གང་ཡང་གསལ་བའི་དཔྱད་རིགས་ཀྱི་སྒྲོན་མེས། ། 

སུ་ཡང་བརྟག་པར་འཛེམ་བག་འདི་མ་གནང་། ། 

གང་དག་འབྱོར་ཕྱུག་ནོར་བདག་གི་རྣམ་རོལ། ། 

བུ་སྨད་སྐྱོང་བའི་ཁྱིམ་བདག་གི་མཛད་པ། ། 

སྡེ་རིས་འབྱེད་པའི་སྲིད་དོན་གྱི་ཕྲིན་ལས། ། 

མ་ངེས་འཁྲུལ་བའི་བླ་གཟུགས་འདི་མང་ཡང༌། ། 

མདོ་རྒྱུད་དགོངས་དོན་རང་སེམས་དང་འདྲིས་ཤིང༌། ། 

མ་སྨད་ལྷག་བསམ་གཞན་དོན་གྱི་ཕྲིན་ལས། ། 

བཤད་སྒྲུབ་ཆོས་ཀྱི་སྒྲོན་མེ་རབ་འདེགས་པའི། ། 

ངེས་དོན་བླ་མ་ངེས་པར་དུ་མ་ནོར། ། 

ཨ་མས་རྨིས་པའི་རྨི་ལམ་གྱི་ཁྲོད་དུ། ། 

ཨ་ཕས་ཞུས་པའི་ཆོག་མཆན་ཞིག་བསྣམས་ཏེ། །

སྒྱུ་མ་འཕྲུལ་གྱི་འཕུར་གྲུ་ལས་ཕེབས་པའི། ། 

དེང་རབས་སྤྲུལ་སྐུའི་རྒྱུ་འགྲུལ་འདི་མང་ཡང་། ། 

དམ་པ་གོང་མའི་རྒྱུད་པ་དེ་འཛིན་ན། ། 

དམ་བཅའ་ཙམ་གྱི་ཁ་ཕོ་འདི་མིན་པར། ། 

དམ་པའི་ཚུལ་དགུ་རང་ཆས་སུ་མངའ་བའི། ། 

དམ་པའི་སྐྱེ་སྤྲུལ་འཚོལ་བ་ལ་མ་ནོར། ། 

སྙན་དང་གྲགས་ཕྱིར་རྟེན་བཞེངས་དང་གཏོང་སྒོ། ། 

ཁེ་དང་རྒྱལ་ཕྱིར་སྐུ་རིམ་དང་ཞབས་བརྟན། ། 

བསྟོད་དང་བཀུར་ཕྱིར་ཚུལ་འཆོས་དང་ཟོག་པོ། །

ཆོས་ལྟར་བཅོས་བའི་བསྟན་པ་དག་འཛིན་ན། ། 

བཅོས་མིན་སྙིང་རྗེའི་རང་བཞིན་གྱི་མཛེས་གཟུགས། ། 

བསླབ་གསུམ་ནོར་བུའི་རྒྱན་ཕྲེང་གིས་སྒེག་པའི། ། 

རྣམ་དག་ཆོས་ཀྱི་དགའ་མ་དང་འགྲོག་ཚེ། ། 

ཆོས་བརྒྱད་སྡོམ་སོ་ཤོར་བ་ལ་མ་སྐྱེངས། ། 

ལུང་རྟོགས་ཆོས་ཀྱི་པད་ཚལ་དག་འཛུམ་པར། ། 

ཐོས་བསམ་སྒོམ་པའི་གཟིགས་མོ་ལ་སྤྲོ་ན། ། 

རྔ་རྡུང་རོལ་མོའི་རམ་འདེགས་དང་ལྷན་དུ། ། 

མི་ཚེའི་ཟློས་གར་གྲོང་ཆོག་ལ་མ་རྩེན། ། 

གང་དག་ངག་རྟ་གཞན་གསོས་ཀྱི་བུ་མོ། ། 

སྤོམ་བཤད་ཚིག་གི་འགྱུར་ཁུགས་ལ་མཁས་ཀྱང་། ། 

དཀའ་བའི་གནད་ཀྱི་འཁྱག་རོམ་དག་བརྩེགས་པར། ། 

འཆད་པའི་མགྲིན་བཟང་འདྲེད་རྡབ་ཏུ་མ་ཤོར། ། 

ཅ་ཅོའི་རྩོད་སྒྲ་འབྲུག་སྟོང་བཞིན་རྒོད་ཀྱང་། ། 

ཡང་དག་རིགས་པའི་སྦྲང་ཆར་འདི་དབེན་ན། ། 

མི་སྡུག་བཞིན་གྱི་ཁྲོ་གཉེར་དག་བསྡུས་ཏེ། ། 

ངན་མཚང་འབྲུ་བའི་འཐབ་རྩོད་འདི་མ་གནང་། ། 

རྩོམ་པའི་བརྗོད་སྙིང་འབྲས་དཀར་གྱི་ཕུང་པོ། ། 

སྡེབ་ལེགས་ཚིག་གི་ཕབ་རྩི་དང་སྦྱར་བ། ། 

མངར་སྐྱུར་རང་ཁུའི་བཟི་ཁ་འདི་མེད་ན། ། 

ཉག་ཉོག་ཚིག་གི་ཤོག་ཁ་རེ་མ་འགེངས། ། 

ཐོས་དོན་སྒོམ་སྒྲུབ་ཡུན་རིང་དུ་གནང་མཐར། ། 

མ་ཉམས་དུག་ལྔ་རང་གཞིན་གྱི་ཕ་འབབ། ། 

མཐོ་དམན་བར་མའི་སྐྱེ་བོ་ལ་སྦྱིན་གྱིན། ། 

རང་ཁྱིམ་སྤང་སར་རང་འཇགས་སུ་མ་ཕེབས། ། 

ཞི་བསིལ་བདུད་རྩིའི་ཟེགས་མ་དག་རེས་ཀྱང་། ། 

སྲིད་པའི་ཚ་གདུང་ལྷག་མེད་དུ་འཇོམས་པའི། ། 

མདོར་ན་ཆོས་ཀྱི་ཆུ་གཏེར་འདི་རྒྱས་པར། ། 

ཆོས་མིན་སྲིད་ཀྱི་བ་ཚྭ་འདིས་མ་སྦགས། ། 

ཡོན་པོར་བརྗོད་པའི་བཅོས་བསླད་དག་མེད་པར། ། 

རང་སེམས་དྭངས་མ་ཉག་གཅིག་ལས་རྡོལ་བ། ། 

གཤིས་ཀྱི་རབ་མངར་སེམས་གཏམ་གྱི་འོ་རྒྱན། ། 

མཆེད་གྲོགས་དགྱེས་པའི་མཆོད་ཕྲེང་དུ་སྤྲོ་འོ། །