2011/07/20

གདོན་གཏམ།

Image result for evil

སྔོན་ཚེ་དྲང་སྲོང་བྲམ་ཟེའི་འཚོ་ཐབས་སུ། །
དངོས་བྱུང་བདེན་པའི་གར་སྟེགས་མཐོན་པོ་རུ། །
སྣ་ཚོགས་ལྷ་འདྲེ་འཁྲབ་པའི་གསོབ་གཟུཌ་དེར། །
འགྲེང་མིས་ངོ་མཚར་དད་པས་དགའ་བསུ་ཐོབ། །

སྒང་པ་འདི་ཡང་ལྷ་འདྲེའི་ཞིང་ཁམས་སྟེ། །
སྲིད་པ་ཆགས་པའི་ལྷ་དགུ་མན་ཆད་ནས། །
གླུད་ཡས་བསྔོ་སའི་གྲོང་སྲིན་འབྱུང་པོའི་བར། །
སྣོད་བཅུད་དབང་མཛད་ལྷ་འདྲེ་རྡུལ་ལས་མོད། །

མ་གཞི་ལྷ་འདྲེ་མཐོང་བའི་དུས་མེད་ཀྱང་། །
ལྷ་འདྲེ་འདོད་པའི་དུང་པ་མ་བཟོད་པར། །
སྐྱེས་པའི་གཟུགས་ལ་ལུས་ལྷ་ཞེ་དགུ་དང་། །
བུད་མེད་ཡོད་ཚད་འདྲེ་མོ་ཡིན་རབས་ཟེར། །

སྲོད་དུ་གྲོང་གསུམ་མདོ་དང་ལམ་མདོ་རུ། །
ཕྱག་མ་འཐག་ཁྲི་ཞོན་པའི་བུད་མེད་ཚོགས། །
འཛོམས་ཏེ་མི་ཤ་ཟ་བའི་གདོན་གཏམ་དག །
བུ་མེད་ཁོང་ཅག་གིས་ཀྱང་ཁས་ལེན་བྱེད། །