2012/12/25

ཡེ་ཤུའི་འཁྲུངས་སྐར། christmas

སྟོན་པ་ཡེ་ཤུའི་འཁྲུངས་སྐར་ངོ་སྤྲོད་མདོར་བསྡུས། (ཁི་རི་སུ་མ་ Christmas)     


(ཊིན་ལམ་བྷརྚའི་། (Tim Lambert) རྩོམ་ལ་གཞི་བཅོལ་ཏེ་རིག་འཛིན་ཁྱུང་པོས་བགྱིས། རྒྱ་ཆེའི་ཀློག་པ་པོ་ཡོངས་རྫོགས་དུས་ཆེན་སྤྲོ་པོ་ཡོང་བར་སྨོན།)
Image result for merry christmas animated gifཁརིས་མསྶ་ (Christmas) ནི་སྟོན་པ་ཡེ་ཤུའི་འཁྲུངས་སྐར་གྱི་དགའ་སྟོན་ཉིན་མོ་ཞིག་ཡིན་ལ་དེའི་སྒྲ་དོན་ནི་ཡེ་ཤུའི་ཚོགས་འཁོར་ (Christ's mass) ཞེས་མིང་ཚིག་གཉིས་འདུས་ནས་བྱུང་བ་སྟེ་ཁརྶ་ཡེ་ཤུའི་མཚན་དང་མསྶ་ནི་ཚོགས་འཁོར་རམ་དུས་མཆོད་ལ་གོ་ཆོག་པར་སེམས། སྤྱིར་མསྶ་ཕུང་གསོག་དང་། ཚོགས། འདུ་ཚོགས། ཆོས་སྤྱོད་སོགས་ལ་གོ་བས་དུས་མཆོད་དང་ཚོགས་ལ་གོ་བ་བླངས་ན་ཆོག་པར་སེམས། 

2012/12/22

དེ་རིང་།


༼དེ་རིང་།༽
དེ་རིང་ནི་གནའ་མི་རྒད་པོའི་སྐར་རྩིེས་ལས།
བསྐལ་པ་ཡེ་ནས་སྟོངས་ཞིང་།
འཇིག་རྟེན་ཧྲིལ་གྱིས་འཇིག་འགྲོ་ཟེར།
ཡང་ན།
ཉིན་ལ་ཉི་མས་མཐུད།
མཚན་མོ་མཚན་མོས་བསྐྱལ་འགྲོ་རབས་ཟེར་ཨང་།
འོན་ཀྱང་།
ད་ནང་གི་ཉི་མ་ནི།
སྔར་བཞིན་ཤར་མཐའི་མལ་བཞེངས་ཏེ།
སྲིད་པའི་གངས་རྒན་གྱི་བཞུགས་གྲལ་ལ་མཇལ་འཕྲད་ཞུས།
ད་ལྟ་ཡང་སྔར་རྒྱུན་བཞིན་་་་་
ཞེན་ཆགས་ཀྱི་ཕྱི་མིག་འཕེན་གྱིན།
ཡོལ་བ་དམར་པོའི་ཕག་ན་གཟིམ་ལ་ཆས་སོང་།
འཇིག་རྟེན་ནམ་ཞིག་ལ་འཇིག་འགྲོ་འམ།
བསྐལ་པ་ནམ་ཞིག་ལ་སྟོངས་འགྲོ་འམ།་་་་་་་་རིག་འཛིན་ཁྱུང་པོ། 

2012/06/28

དེང་སང་།

ནད་ངན་གཅིག་གིས་མལ་སར་བསྒྱེལ་བའི་རྗེས།
གློ་བའི་ནང་ལྤགས་བཀོག་སོང་སྙམ་པ་ཡི། །
ལུ་བ་འདི་ནི་སྦུད་པ་འབུད་འབུད་རེད། །
ཚ་བ་འདི་ནི་ཆུ་ཚན་ཁོལ་ཁོལ་རེད། །

ཐུན་གསུམ་གཉིད་ཐེབས་ཆག་རྗེས་ཐོ་རངས་ལ། །
མགོ་མཇུག་མེད་པའི་ཟ་ཟི་རྨི་ལམ་རུ། །
མི་ཚོགས་མེད་པའི་གྲོང་ཁྱེར་རྙིང་སྒོག་གི །
གཡས་གཡོན་མེད་པར་མི་གཙང་ལྕག་ལྕིག་ཁྲོད། །

2012/06/09

ཡོ་རོབ་རྐང་སྦོལ་རྩེ་འགྲན་ཆེན་མོ།


ཡོ་རོབ་རྐང་སྦོལ་རྩེ་འགྲན་ཆེན་མོ་ཁ་སང་དངོས་སུ་འགོ་བཙུགས་ཡོད།European cup. ཐེངས་འདིར་ཡོ་རོབ་རྐང་སྦོལ་རྩེ་འགྲན་ཆེན་མོའི་བྱུང་རིམ་མདོར་ཙམ་བཤད་ན། རྩེ་འགྲན་འདི་ནི་ལོ་བཞི་རེའི་ནང་ཐེངས་རེ་རྩེ་བའི་འཛམ་གླིང་ནང་གི་སྙན་གྲགས་ཅན་གྱི་རིམ་བགྲོད་རྩེ་འགྲན་ཞིག་དང་། འཛམ་གླིང་རྐང་སྦོལ་རྩེ་འགྲན་ཆེན་མོ་དང་ཨོ་ལིམ་ཕིག་གཉིས་ཀྱི་མཚམས་ནས་ཨང་གསུམ་པ་དེ་ཡིན་པར་གྲགས། 

2012/06/07

རྐང་རྩེད་འཕང་ལོ།


དེང་རིང་སྟེ་༢༠༡༢། ཟླ་བ་༦། ཚེས་༥་རྒྱལ་ཡུམ་ཆེན་མོའི་རྐང་སྦོལ་རྩེ་འགྲན་ཐེངས་༡༨ པའི་རྟིང་མའི་འགྲན་རྩོད་ཨོ་རི་ས་ཕུན་ཚོགས་གླིང་གི་རུ་ཁག་ལ་ཐོབ་སོང་།རྒྱལ་དར་གྱོན་མཁན་འདི་པོག་རའི་ནོར་བུ་རྡོ་རྗེ་དང་། སྟོད་གོས་སེར་པོ་ཅན་འདི་ཨོ་རི་སའི་བྱང་ཆུབ་རྒྱལ་མཚན་རེད། ཁོང་གཉིས་པོས་པོ་ལོ་བདུན་རེ་བླུགས་སྟབས་བྱ་དགའི་བུམ་པ་རེ་ཐོབ་ཡོད།  ངས་ད་ལོ་གུང་སེང་དང་སྟབས་བསྟུན་ཏེ་རྒྱལ་ཡུམ་ཆེན་མོའི་རྐང་རྩེད་འཕང་ལོའི་ལྟད་མོ་ཕལ་ཆེར་ལྟ་རྒྱུ་བྱུང་སོང་། སྤྱིར་འདི་ལོར་སྔར་དང་མི་འདྲ་བར་རྩོད་རྙོག་སོགས་འགལ་རྐྱེན་གང་ཡང་མེད་པར་རྩེ་མོ་བདེ་ལེགས་ཀྱིས་མཇུག་གྲུབ་སོང་། དེ་མིན་དེ་སྔོན་རུ་ཁག་ཁ་ཤས་ཀྱིས་རུ་ཁག་གཞན་དག་ལ་འཇིགས་སྐུལ་བྱས་ནས་རྩེ་མོ་འཐོབ་ཐབས་ཀྱི་ཇུས་ངན་གཤམས་པ་དང་། དེའི་རྐྱེན་རྩ་ནི་བླ་མས་གལ་ཏེ་ཐོབ་ན་གསོལ་རས་ཧིན་སྒོར་འབུམ་གཅིག་གནང་རྒྱུའི་ཞལ་བཞེས་མཛད་པ་ལ་ཐུག་སོང་ཚུལ་གོ་མྱོང་། གང་ལྟར་ཐེངས་འདིའི་རྩེད་འགྲན་ཁྲོད་ལྷན་ཞུགས་གནང་མཁན་རུ་ཁག་༡༩ པོ་སྡེ་ཚན་དྲུག་ལ་བགོས་ཏེ་རྩེ་འགྲན་ཐེངས་གསུམ་རེའི་བྱས་མཐར་སྐར་གྲངས་མཐོ་བ་བརྒྱད་བདམས་པ་དང་། དེ་དག་ལས་བཞི། བཞི་ལས་གཉིས། གཉིས་ལས་ཐ་མའི་རྩེ་ཕུད་ཀྱི་རྒྱལ་ཁ་ལེན་དགོས་ཀྱི་ཡོད། སྤྱིར་ན་འཛམ་གླིང་ནུབ་ཕྱོགས་དང་ཁྱད་པར་དུ་ལྷོ་ཨ་རིའི་གླིང་དང་ཡོ་རོབ་ཤར་ནུབ་ཀྱི་རྐང་རྩེད་པོ་ལོའི་སྒྱུ་རྩལ་དང་དར་སྲོལ་ལ་བལྟས་ན་ད་ཆ་ང་ཚོ་བོད་པའི་རུ་ཁག་ཕར་ཞོག་གནས་ཚང་རྒྱ་ཚང་ཡང་ནར་མ་སོན་པའི་བྱིས་པ་མ་འབྱར་ཉག་གཅིག་སྟེ། འཛམ་གླིང་རྐང་རྩེད་པོ་ལོའི་གནས་རིམ་ཨང་ཚད་༡༦༤ སར་ལྷག་ནས་ཡོད་ཨང་། དེ་མིན་གནས་དུས་དང་འཁོས་ཀ་ལ་ལྟོས་པའི་རྩེ་མོའི་སྒྱུ་རྩལ་དང་། རྩེ་མོར་དང་དོད་སོགས་ཨོ་ཙམ་འདུག་བསམ་སོང་། ཁྱད་པར་དུ་ཨོ་རི་སའི་རུ་ཁག་གི་ཟུར་སྐྱོད་པ་ཨང་༡༠ པས་མུ་ཟུར་ནས་ངོ་མཚར་འོས་པའི་སྒྱུ་རྩལ་ཚར་གཉིས་ཙམ་བསྟན་སོང་ལ། བུ་ཆུང་བྱང་ཆུབ་རྒྱལ་མཚན་གྱིས་བར་སྣང་དུ་ཨ་ལོག་བརྒྱབ་ཏེ་རྒྱབ་ཕྱོགས་ཀྱི་དྲྭ་བར་པོ་ལོ་བླུགས་པ། དེ་བཞིན་དུ་ཨོ་རི་སའི་རུ་ཁག་གི་རྒྱབ་སྲུང་ཨང་གཉིས་པ་དང་། རུ་དཔོན་སོགས་ལ་མགྱོགས་པའི་བང་དང་འགོག་པའི་སྟོབས་སོགས་མི་དམན་པ་ཙམ་འདུག དེ་མིན་སྤོག་རའི་ནོར་བུ་རྡོ་རྗེ་ལ་ནུབ་ཤུགས་དང་སྒྱུ་རྩལ་མཆོག་ཏུ་གྱུར་འདུག་ལ། ཆེ་ནཱལ་གྱི་དབུ་རིལ་དང་། གྷོ་ཝའི་ཨ་ཧྥུ་རི་ཁ་སོགས་རྩེ་མོ་མཁན་ཅན་དུ་མ་འདུག རུ་ཁག་སྐྱོ་གྲས་ནི་ཝ་ན་མཐོ་སློབ་དང་། པུ་ནེ། ཌ་ལ་ཧོའོ་སུ། ཅོན་ཏ་ར། མེའོ། བྷེལ་ཀོབ། མན་པ་ཏི་སོགས་རེད་འདུག །

2012/05/21

གནས་རོགས་མ།

གནས་རོགས་མ།
Hope Sosnovikova. Tibetan girl

སྔོན་བསགས་ལས་དབང་ཞིག་ཀྱང་མི་ཤེས་ཏེ། །
བྱ་རྡོ་ལམ་དུ་ཐུག་པའི་རྐྱེན་དབང་གིས། །
འབག་མོའི་དབུཌ་རྐྱལ་འཁུན་པའི་ལྷ་ཁང་ནས། །
ཁྱེད་དང་ང་གཉིས་གནས་ཆེན་སྐོར་གྲོགས་རེད། །

གཡུ་མགོའི་མེ་ཏོག་བཞད་པའི་ཨ་ཅེ་ཁྱེད། །
བུ་ཆུང་ངུ་སྐད་རྒོད་པའི་ཨ་མ་ཁྱོད། །
ཁྱོ་བོ་ར་བཟི་ཁྲིད་པའི་ལས་ངན་མ། །
དེ་རིང་གློ་བུར་དྲན་དོན་ཅི་ཡིན་ནམ། །


2012/05/16

བྷོབ་མར་ལེས། Bob Marley

Image result for bobmarley

སྦྲང་ཆར་སིལ་མ་འདི་ལ་དགའ་གསུང་གིན། །
མགོ་བོ་ཆར་གདུག་འོག་ཏུ་འབྲལ་མེད་རེད། །
ཁྲི་གདུག་ཉི་མའི་འོད་ལ་དུང་གསུང་གིན། །
ལྗོན་པའི་བསིལ་གྲིབ་འཚོལ་བར་བྲེལ་བ་རེད། །
རེག་འཇམ་བསིལ་རླུང་གཡོ་བར་སྤྲོ་གསུང་གིན། །
ཁང་པའི་སྒེའུ་ཁུང་རྒྱག་པར་རྒྱུན་ལྡན་རེད། །
དེས་ན་ཁྱེད་ཀྱིས་ནམ་ཞིག་དགའ་གསུང་སྐབས། །
ཁོ་བོ་འཇིགས་སྐྲག་ཞིག་གིས་འདར་བར་བགྱིད། །
བྷོབ་མར་ལེས་ནས།
 Bob Marley:
"You say you love rain.
But you use an umbrella to walk under it. 
You say you love sun.
But you seek shelter when it is shining.
You say you love wind.
But when it comes, you close your windows. 
So that's why I'm scared when you say you love me."

ཁྱེར་སོང་།

༡། ཡ་ཀི་རི་རྩེས་སྤྲིན་ནག་གི་དོམ་ར་ཞིག་མནབ་ཀྱིན།
མ་ཀའི་ལུང་གཤོང་ན་དཔྱིད་རླུང་དྲག་ཏུ་འབུད་དུས།
རྡོ་གསེབ་ན་ཟུག་པའི་ལྕང་མ་ཞིག་ཤེད་ཀྱིས་འཐེན་སོང་།
ལྕང་མ་ལ་འཐམ་ནས་ཡོད་པའི་ངའི་སེམས་པ་ཕྲ་མོ།
ཁུག་རྣ་དང་དུད་སྤྲིན་འདྲེས་པའི་རྒྱང་རིང་གི་གནམམཐའ་ཞིག་ལ་ཁྱེར་སོང་།
ད་ཚོད་གང་ཞིག་ལ་བཀྱགས་སོང་བ་ཡིན་ནམ།
ངས་ཀྱང་ཤེས་མ་སོང་་་་་་་་་་་་།

གནམ་ཐང་ཆུང་ཆུང་ཞིག་ལ་བབས་ཡོད་དམ།
བསིལ་ལྷམ་ཆུང་ཞིག་ལ་འཁྲེན་ཡོད་དམ།
ལྕང་མ་རྫོབ་རྫོབ་གསེབ་ན་ཟག་སོང་ངམ།
དམར་མདོག་རི་བོའི་མཁའ་ནས་ལྡིང་སོང་ངམ།
རྫ་ཆུ་བསིལ་མའི་ལྷན་དུ་བཞུར་སོང་ངམ།
ངས་ཀྱང་དཔོག་མ་སོང་་་་་་།

2012/05/10

མཚན་ཉིད།

ཁ་བའི་མཚན་ཉིད། གཅིན་པ་བཏང་ན་འབྲོ་འཆོར་བའི་བཙོན་པ་གོས་སྐྱ་ཅན་ཞིག
མེ་ཏོག་གི་མཚན་ཉིད། བུ་མོ་དང་བྱིས་པས་མཐོང་ན་འཐོག་པར་འདོད་པའི་སྐྱེ་དངོས་ཤིག
ལྷ་ཡི་མཚན་ཉིད། དག་སྣང་གི་ངོགས་སུ་ཁྲ་སྤུངས་ངེར་འཚེར་བའི་འཇའ་ཚོན་ཟླུམ་ཀོར་ཞིག
མི་ཡི་མཚན་ཉིད། འགྲེངས་ཏེ་རྒྱུ་བའི་འབྱུང་པོ་སྟོབས་ཅན་ཁྱུ་གཅིག
ཆོས་ཀྱི་མཚན་ཉིད། གནའ་ནས་བསྐྱར་ཏེ་འོང་བའི་གཟུགས་སྔགས་ཟབ་མོ་ཞིག
སྲིད་ཀྱི་མཚན་ཉིད། བསྣོག་གིས་སྣོག་གིན་འབྲི་བའི་གན་རྒྱ་ཞིག
བོད་ཀྱི་མཚན་ཉིད། སྤྱང་ཀིས་ཟོས་ཚར་བའི་གོད་རོ་ལྷག་མ་ཞིག
རྒྱ་ནག་གི་མཚན་ཉིད། ཐུག་ཚད་རིལ་མིད་དུ་གཏོང་བའི་ཆུ་སྲིན་གཏུམ་པོ་ཞིག
ཨ་རིའི་མཚན་ཉིད། ཤོ་རྩེད་ལ་དགྱེས་པའི་རྒན་པོ་གཡོ་ཅན་ཞིག
བལ་པོའི་མཚན་ཉིད། གོང་མ་ཚང་གི་མངག་གཞུག་བའི་བྲན་གཡོག་ཅིག
བཙན་བྱོལ་བའི་མཚན་ཉིད། སྤྲང་ཟས་ལ་རྩོད་པའི་སྤྲང་མོ་མ་སྨད་གསུམ།
སྤྱི་ལྷན་གྱི་མཚན་ཉིད། འདྲུབ་མི་བཏུབ་པའི་རྟ་ཀོ་དམར་གྱོང་དུམ་བུ་གསུམ།
རྒྱ་གར་གྱི་མཚན་ཉིད། ཡོད་ཚད་བཅུག་ཡོད་པའི་སྒྱེ་སྣོད་ཆེན་པོ་ཞིག

2012/05/09

རིག་འཛིན་སྒྲོལ་མ།



གླུ་མ་རིག་འཛིན་སྒྲོལ་མ།

མགྲིན་པའི་གྲེ་ཕུག་ན།
ཁུ་བྱུག་དགོད་པ་ཁྱོད།
སེམས་པའི་ཞེ་ཕུག་ན།
ལྷགས་བསམ་འབར་བ་ཁྱོད།


རྒྱ་གླུ་མི་ལེན་པའི།
ཨ་ཅེ་མགོ་མཁྲེག་ལགས།
ཕ་སྐད་མི་འགྱུར་བའི།
བོད་མོ་གདོང་དམར་མ།


ཡིད་འོང་མཛངས་མ་ཁྱེད།
དེང་རབས་ཆ་ལུཌ་འདིས།
ལྷ་མོ་བཞེངས་བ་འདྲ།
ཀླུ་མོ་འཕྱོར་བ་འདྲ།

2012/04/25

བཟའ་འཛིང་།

སྔོན་ཆད་ང་བོད་ལ་ཡོད་སྐབས། "མི་དྲག་ནད་པ་འཆི་ན་དགའ། མི་འདུག་མགྲོན་པོ་ཆས་ན་དགའ། མི་འགྲིག་བཟའ་ཚང་བྲལ་ན་དགའ།" ཟེར་བའི་གནའ་བོའི་ཕ་མྱེས་ཚོའི་བློ་ཐག་རྦད་ཆོད་ཀྱི་ལེགས་བཤད་འདིར་སེམས་གཏིང་ནས་ཡི་རང་བྱེད་ཅིང་། སྐྱེས་པ་སུ་ཞིག་གིས་གནད་འགག་ལ་ཐུག་དུས་བྱ་བ་འདི་ལྟར་སྒྲུབ་ཐུབ་སོང་ན་ཁོང་ནི་བླ་ན་མེད་པའི་ཕོ་རབ་གཅིག་ཏུ་བརྩིས་མྱོང་། སྐབས་དེར་ངའི་ཕ་ཡུལ་ན་གཉེན་སྒྲིག་ཐེངས་མ་གཉིས་གསུམ་རེ་བྱས་མཐར་ཁ་ཐུག་པའི་བཀྲ་ཤིས་བཟའ་འཚོ་གཉིས་ཀྱིས་འཚོ་བ་སྐྱེལ་སྟངས་ལ་ང་དང་ང་ཚོ་མང་པོ་ཞིག་གད་མོ་ཤོར་གྱི་ཡོད། གང་ཡིན་ཟེར་ན་ཁོང་གཉིས་པོ་སྔ་དགོང་དུས་དྲུག་ཀུན་ཏུ་འཁྲུག་འཛིང་ཆེ་མ་ཆུང་གསུམ་བྱེད་རྒྱུར་ལང་ཤོར་ཡོད། ཉིན་ཞིག་བཀྲ་ཤིས་ཨ་མས་བཀྲ་ཤིས་ཕ་ཉལ་བའི་རུམ་ལ་ཆུ་ཚན་འཕོས་པ་དང་། བཀྲ་ཤིས་ཨ་ཕས་ཆུང་མ་དབྱུག་པས་བརྡུངས་ཏེ་གཉིས་ཆ་ཉིན་ཤས་ཉལ་དགོས་པ་བཟོས་ཀྱང་ཁ་གཏན་ནས་འབྲལ་མི་ཐུབ། ང་ནི་ཁོང་གཉིས་པོ་བཟའ་འཛིང་ཤོར་བར་ཧང་སང་གི་མེད་ཀྱང་བཟའ་བྲལ་མི་ནུས་པ་དེར་ཞེ་ཁྲེལ་གི་ཡོད། འོན་ཀྱང་སྐབས་དེར་ཁོང་གཉིས་བར་གྱི་བུ་ཕྲུག་ཚོའི་འཚོ་བ་དང་མདུན་ལམ་སོགས་ལ་བསམ་གཞིག་དང་བཟའ་ཚང་བར་དུ་ཆེས་འབྲལ་མི་ཤེས་པའི་གཟུགས་མེད་འཆིང་ཐག་གིས་སྦྲེལ་ཡོད་པ་དེ་བས་ཚོར་མ་མྱོང་། མ་གཞི་རྩོད་འཛིང་བྱས་ཚད་འཁོན་འགྲས་མིན་ཏེ་ངོ་བོ་བརྩེ་ཞིང་རྣམ་པ་རྩོད་འཛིང་གི་ཟློས་གར་ (Love quarrel) ཡོད་པ་མིན་ནམ། 
དེང་སྐབས་གཞིས་ཆགས་ན་ཡོད་པའི་ངའི་ཉེ་འབྲེལ་ཞིག་དང་ཁོ་པའི་ཆུང་མ་གཉིས་བཟའ་འཛིང་བྱེད་རྒྱུར་སྐད་གྲགས་ཆགས་ཡོད། ཉེ་བའི་ཆར་ཁྱོ་བོས་ད་ནི་སེམས་ཐག་ཆོད་ཡོད་པས་བུ་ཕྲུག་ཚོ་ཁོས་གསོ་རྒྱུ་དང་ཆུང་མར་ཁ་འབྲལ་རྒྱུ་ཡིན་ཚུལ་བཤད་དུས་ང་ལ་བློ་བུར་དུ་ཕངས་སེམས་ཞིག་སྐྱེས་སོང་། གང་ཡིན་ཟེར་ན་གལ་ཏེ་ཁོས་བཤད་པ་དག་བདེན་ན་བུ་ཕྲུག་ཚོ་ལ་ཕ་མ་གཉིས་འཛོམས་ཀྱི་ཉི་མ་གཏན་ནས་གཏན་དུ་ནུབ་སོང་བ་མིན་ནམ། ད་རུང་ཁོ་གཉིས་པོས་མི་ཚེའི་བྱ་གཞག་གསར་པ་ཞིག་གཞི་ནས་འགོ་བརྩམ་དགོས་པ་མིན་ནམ། །

2012/04/18

ཉོབ་ཏོ།

ལྟད་མོ་བལྟས་ཏེ་མ་ཚར། །
མར་ཉལ་ཆུ་ཚོད་གཉིས་པ། །
སློབ་གྲྭ་འཚོགས་དུས་སྔ་བས། །
ཡར་ལངས་ཆུ་ཚོད་དྲུག་པ། །
ཆུ་ཚོད་བཞི་ཡི་གཉིད་ཀྱིས། །
ལུས་ཁམས་ངལ་གསོས་མ་འདངས། །
དཔྲལ་བའི་མེ་ལོང་གཟེར་སོང་། །
རྒྱབ་དང་དཔུང་ཚིགས་གཟེར་སོང་། །

ཉི་འོད་གློག་འོད་གདོང་ལ། །
མིག་ཟུང་ངོ་ཚས་སྐྱེངས་སོང་། །
ལས་རོགས་སློབ་མའི་མདུན་དུ། །
ཉོབ་སྣང་ཕྱི་རུང་མངོན་སོང་། །

2012/04/16

ངའི་ཕ་ཡུལ་ཆོས་ལ་དགའ།

མི་ལོ་བཅོ་བརྒྱད་ལ་ཉེ་བའི་ཡར་སྔོན་ཞིག་ན་ངའི་ཕ་ཡུལ་གྱི་ཡུལ་ན་བསོད་ནམས་དམ་པའི་བགོ་སྐལ་དུ་རྒྱ་གར་འཕགས་པའི་ཡུལ་ནས་དགེ་བཤེས་ཆེ་མོ་གེ་མོ་ཞིག མ་བསྒུལ་གསེར་གྱི་ཕ་བོང་སྒོ་ལ་འགྲིམས་ཞིང་མ་བསྐུལ་དོལ་གྱི་རྒྱལ་པོའི་ཆོས་འཁོར་བསྐོར་ཏེ་སྲིད་པ་གསུམ་པོ་ཡོམ་ཡོམ་ཤིག་ཤིག་གིས་འདར་བར་བྱས་སོང་། གཡོ་བར་བྱས་སོང་། སྐར་དེར་ཁོ་བོ་ལ་མཚོན་ན་སྲོལ་རྒྱུན་ལྟར་ལོ་རེ་བཞིན་རྙིང་མའི་བན་སྔགས་འདྲེས་མའི་དགོན་ཆུང་སྣ་ཁུང་འདྲ་ཞིག་ལ་«ཞི་ཁྲོ་ངེས་དོན་སྙིང་པོ་»དང་«རཏ་ཕུར་ཡང་གསང་བླ་མེད་»ཀྱི་སྒྲུབ་ཆེན་རེ་དང་། ཟླ་རེ་བཞིན་ཚེས་བཅུ་ཉེར་ལྔ་འཚོགས་པ་ཙམ་ལས་རྒྱུན་པར་ནང་ཆོས་ལ་སློབ་གཉེར་བྱས་མ་མྱོང་བའི་བྱིས་པ་ཞིག་ཡིན་སྟབས་ནང་ཆོས་ཀྱི་གོ་རྟོགས་མེད། ཐ་ན་ངས་སྐབས་དེར་ཕྱི་ནང་གི་གྲུབ་མཐའི་ཁྱད་པར་ཙམ་ཡང་མི་ཤེས་མོད། 
རྒྱལ་ཆེན་རྡོ་རྗེ་ཤུགས་ལྡན་ཟེར་བ་དེ་ཡ་ང་བའི་ཤི་འདྲེ་ཞིག་དང་འཇིགས་སུ་རུང་བའི་གདོན་འདྲེ་ཞིག་ཡིན་ཚུལ་གོ་མྱོང་ཡོད། སྤྱིར་ན་ངའི་ཕ་ཡུལ་ན་བན་ཞྭ་སེར་བསྟན་པའི་དབུ་འཕང་མཐོང་ཞིང་ལྷ་རྒྱལ་ཆེན་རྡོ་རྗེའི་བསྭོ་སྒྲ་འུར་ས་ཞིག་པས་དེའི་སྐོར་ལ་ཚིག་སྦྲང་སྐད་ཙམ་ཡང་བཤད་ཕོད་པར་དཀའ། ད་རུང་དེང་སང་ནི་གལ་ཏེ་སུ་ཞིག་གིས་ལྷ་འདྲེ་དེར་མ་དད་པའི་རྣམ་འགྱུར་ཙམ་ཞིག་བསྟན་ནའང་ཚར་གཅོད་ནན་པོ་བྱ་ཆེད་ཕོ་རྒོད་ ༢༠༠ སྐོར་ཞིག་ཆེད་གཉེར་བསྐོ་གཞག་བྱས་ཡོད་རབས། 

གང་ལྟར་ལོ་ངོ་ཉི་ཤུའི་རིང་དགེ་བཤེས་ལགས་ཀྱིས་ནུས་ཤུགས་ཡོད་དགུས་མི་དམངས་ལ་གོ་བསྐོན་དང་སློབ་གསོའི་འོག་བསམ་ཡུལ་འདས་པའི་བསྒྱུར་བཅོས་འཕོ་འགྱུར་བྱུང་ཞིང་འབྱུང་བཞིན་པ་ལ་བལྟས་ན་ཧང་སང་དགོས་པ་ཞིག་སྟེ། སྔ་སོར་ཁྱིམ་ཚང་གཅིག་གི་བུ་རྒན་གཞོན་གཉིས་གསར་རྙིང་གི་དགོན་པ་སོ་སོར་འགྲོ་སྲོལ་ཡོད་པ་ནས་དེང་སང་གསར་རྙིང་གི་ཁྱིམ་ཚང་གཉིས་ཀྱི་བུ་བུ་མོ་གཉེན་སྡེབ་མི་ཆོག་པ། སྔོན་ཆད་རྒན་རིན་པོ་ཆེས་ (སྔོན་ཆད་ཁོང་ཚོའི་བླ་མ་) བཀའ་ཆོས་གནང་སྐབས་སྒོ་བཤས་སྤོང་བའི་སྲོལ་བཟང་ཡོད་པ་ནས་དེང་སང་སྟག་གཟིག་གི་ལྤགས་པ་མ་གྱོན་ན་ཆོས་ལུགས་མི་གཙང་བའི་ཚད་འཛིན་བྱེད་པ སོགས་ཀྱི་སྒོ་ནས་བསྒྱུར་བཅོས་ལེགས་སྒྲུབ་དངོས་སུ་བྱུང་འདུག ངོ་མ་ཡ་མཚན་སྐྱེ་འོས་པ་ཞིག་རེད། 
ངས་འདི་དག་བཤད་དོན་ཁ་སང་ངའི་སྤུན་མཆེན་བཙུན་མ་ཞིག་གིས་ཕ་ཡུལ་གྱི་འོད་སྡེར་ཁག་གཅིག་ལས་དགེ་བཤེས་རིན་པོ་ཆེའི་གཟེངས་སུ་ཐོན་པའི་གྲུབ་འབྲས་མཐོང་བྱུང་། ངས་འོད་སྡེར་འདི་དག་ལ་ལྟ་བཞིན་ཆོས་ལུགས་རྨོངས་དད་པ་ལ་ཡི་ཆད་སོང་། ལྷ་གསོལ་འདྲེ་གསོལ་ལ་ཞེ་མེར་སོང་། 

2012/03/23

འདས་མཆོད།

རྩ་བའི་བླ་མ་མཁྱེན་ནོ། 

རྣམ་གླིང་གསེར་གྱི་ལྷ་ཁང་ཆེན་མོ། 
དེ་རིང་ནི། དཔལ་གསང་ཆེན་སྔ་འགྱུར་བའི་གདན་ས་ཆེན་པོ་“སྟོད་ན་རྡོར་སྨིན་གཉིས། བར་ན་ཞེ་རྫོགས་གཉིས། སྨད་ན་ཀཿ་དཔལ་གཉིས།” དྲུག་གི་ཡ་གྱལ་ཤར་རྒྱལ་བ་དཔའ་ཡུལ་བའི་གདན་རབས་བཅུ་གཅིག་པ་དང་། སྐྱབས་རྗེ་གྲུབ་དབང་རིན་པོ་ཆེ་སྐུ་ཕྲེང་གསུམ་པ། ཁྱད་ཆོས་ཆེ་བ་དྲུག་གིས་བླ་ན་མཛེས་པའི་དཔའ་སྔ་འགྱུར་བའི་ཁྲི་འཛིན་གསུམ་པ་སྟེ་དོན་གྱི་སླད་དུ་མཚན་ནས་སྨོས་ན་༸སྐྱབས་རྗེ་འཇིགས་མེད་ཐུབ་བསྟན་བཤད་སྒྲུབ་ཆོས་ཀྱི་སྒྲ་དབྱངས་དཔའ་བཟང་པོ་གང་ཉིད་ཕྱི་ཚུལ་གཟུགས་སྐུའི་བཀོད་པ་ཆོས་དབྱིངས་སུ་ཐིམ་ཚུལ་བསྟན་ཏེ་བགྲང་བྱ་གསུམ་འཁོར་བའི་རྗེས་དྲན་འདས་མཆོད་ཀྱི་ཉིན་མོ་ཁྱད་པར་ཅན་ཞིག་ཡིན། དེའི་སྟབས་ཀྱིས་དེ་རིང་གི་ཉིན་མོ་འདིར་གདན་ས་ཆེན་པོ་མེ་སོོར་རྣམ་གྲོལ་གླིང་གཙོས་པའི་རྒྱལ་ཕྱི་ནང་གི་དཔའ་ཡུལ་བའི་དགོན་གཞིས་ཆོས་ཚོགས་ཆེ་མ་ཆུང་གསུམ་གཅིག་མཐུན་གྱིས་འདས་མཆོད་འཚོགས་ཀྱིན་ཡོད།

2012/03/19

ཆང་གི་ཆེད་དུ་ཐམས་ཅད་བློས་བཏང་བ།

བཙན་པོ་ཕེབས་པའི་ཞབས་རྗེས་ནང་དུ་བོད་མིང་ནག་ག་ནོག་གེ་ཡོད། །
བོད་པ་མེད་པའི་ཡུལ་ལུང་འདི་ན་བོད་འདྲ་ཐ་རེ་ཐོར་རེ་ཡོད། །
མུ་སྟེགས་བྱེད་ཀྱི་རྒྱལ་ཁམས་འདི་ན་ནང་པ་ཆ་འདྲ་ཡ་འདྲ་ཡོད། །
རྒྱ་གར་རྐྱང་པའི་རྒྱ་གྲོང་འདི་ན་བོད་པའི་ཟ་ཁང་རྐང་གཅིག་ཡོད། །

ཡིད་ཆེས་བརྟན་བའི་བོད་རྒན་ཨ་ཕ་ཁང་ཆུང་སྦུག་ན་བཞུགས་ལ་དགའ། །
རང་དབང་ཐོབ་པའི་རྒྱ་གར་གཡོག་པོ་ཟ་ཁང་ནང་གི་དངུལ་ལ་དགའ། །
ལས་ངན་ང་རང་བག་ཆགས་ཤིག་གིས་བྲོ་བ་མེད་ཀྱང་ཟས་འདིར་དགའ། །
རང་རང་དགའ་བའི་ལས་ལ་ཞུགས་འདི་ནོར་འཁྲུལ་རེད་ཟེར་བཤད་པར་དཀའ། །

2012/03/08

ཧོ་ལི། holi festival


ཧོ་ལི་ནི་ཆེས་གནའ་བོའི་དུས་ནས་བརྒྱུད་དེ་འོངས་བའི་རྒྱ་གར་དམངས་ཁྲོད་ཀྱི་དུས་ཆེན་ཞིག་ཡིན། ཧོ་ལི་སྒྲ་དོན། བསྲེག་པ་སྟེ་གནའ་བོའི་ལྷ་སྒྲུང་གྱི་གཏམ་རྒྱུད་ལ་བརྟེན་ནས་བྱུང་།

ཁྱབ་འཇུག་གི་ལུགས་ལྟར་ན། 


Bhāgavata Purāṇ
Bhāgavata Purāṇ
ཧུན་དྷུའི་ཆོས་ལུགས་ཀྱི་གཞུང་ཆེན་མོ་«བྷཱ་ག་ཝ་ཏ་པུ་རཱཎ་»भागवतपुराण (Bhāgavata Purāṇ) {བཅོམ་ལྡན་འདས་ཀྱི་རྟོགས་པ་བརྗོད་པ་} [1][2] པའི་ལེའུ་བདུན་པའི་ནང་གསལ་བ་ལྟར་ན། གནའ་སྔ་མོ་རྒྱ་གར་གྱི་ཡུལ་གྲུ་འདིར་བདུད་ཀྱི་རྒྱལ་པོ་ཧི་རན་ཡ་ཀ་ཤི་པུ་ (Hiranyakashipu) ཞེས་པ་ཞིག་དང་ཁྱབ་འཇུག་འཁོན་ཏེ་ལྷ་ཆེན་ཁྱབ་འཇུག་གིས་དེའི་གཅུང་པོ་བསད་པ་དང་། དེའི་རྐྱེན་གྱིས་རྒྱལ་པོ་རབ་ཏུ་འཁྲུགས་ཤིང་དགྲ་ཤ་ལེན་ཆེད་ལོ་མང་རིང་དཀའ་ཐུབ་སྤྱད་མཐར་བདུད་ཀྱི་རྒྱལ་པོ་ཨ་སུ་རས་ཀྱིས་དངོས་གྲུབ་རྣམ་པ་ལྔ་བསྩལ། འོན་ཀྱང་རྒྱལ་པོའི་རང་གི་བུ་པྲ་ཧ་ལ་དས་ (Prahladaཁྱབ་འཇུག་ལྷ་རུ་བསྟེན་པར་ཞེ་སྡང་གིས་མ་བཟོད་དེ། རྒྱལ་པོ་ཉིད་ཀྱི་སྲིང་མོ་ཧོ་ལི་ཀར་ (Holikaབུ་དེ་གསོད་པར་བསྐུལ་བ་ལྟར། དེས་ཀྱང་དུར་ཤིང་བརྩེགས་ཏེ་བུ་བཅིངས་ཚར་བ་དང་། མེ་སྦར་ཏེ་བསྲེག་པར་བརྩོན་ཚེ་མེ་སྦར་མ་ནུས་པ་ཙམ་མ་ཟད། དེ་ལས་ལྡོག་སྟེ་ཧོ་ལི་ཀ་རང་ཡང་ཚིག་སྟེ་ཐལ་བའི་ལྷག་མ་ཙམ་ཞིག་ཏུ་གྱུར། དེ་རྗེས་ལྷ་ཆེན་ཁྱབ་འཇུག་རང་ཉིད་ན་ར་སིཾ་ཧ་ (Narasimha) མི་ཕྱེད་སེང་གེའི་རྣམ་པར་སྤྲུལ་ཏེ་བསད་པར་གྲགས། རྒྱུ་མཚན་བདུད་དེ་འཆི་བ་མེད་པའི་དངོས་གྲུབ་ཐོབ་ཀྱང་ཁོ་གསོད་པའི་ཐབས་ཤིག་ཡོད་པ་སྟེ། གསོད་མཁན་དེ་མི་ཡང་མིན་ལ་དུད་འགྲོ་ཡང་མིན་པ། གསོད་བྱེད་མཚོན་ཆ་ལག་པས་བཟུང་བ་མིན་ལ་འཕང་པ་ཡང་མིན་པ། དུས་ཚོད་ཉིན་མོ་ཡང་མིན་ལ་མཚན་མོ་ཡང་མིན་པ། གསོད་པའི་གནས་སྒོ་ཕྱི་ཡང་མིན་ལ་ནང་མིན་པ། གསོད་པའི་ཡུལ་ས་སྟེང་དུ་མིན་ལ་རླུང་དང་རྒྱ་མཚོར་མིན་པ་ཞིག་ཏུ་གསད་ན་ཐུབ་པར་འགྱུར་བ་དེ་ཤེས་ཏེ། ཁྱབ་འཇུག་རང་ཉིད་མི་དང་དུད་འགྲོ་གཉིས་ཀ་མིན་པ་མི་མ་སྟག་ཅིག་ཏུ་སྤྲུལ། ཉིན་མཚན་གཉིས་ཀ་མིན་པ་ས་སྲོད་ཀྱི་དུས་སུ། སྒོ་ཕྱི་ནང་གཉིས་ཀ་མིན་པ་ཐེམ་པའི་སྒང་ལ། ས་དང་རྒྱ་མཚོ་མིན་པ་རང་གི་པང་དུ་བླངས་ཏེ། མཚོན་ཆ་བཟུང་འཕེན་གཉིས་ཀ་མིན་པ་སྟག་གི་སྡེར་མོས་བསད་པར་གྲགས། 
དེ་མིན་ཀྲིཥྣའི་ (Krishna legend) སོགས་བཤད་རྒྱུན་སྣ་ཚོགས་པ་ཞིག་འདུག་ཀྱང་འདིར་བརྗོད་ཀྱིས་མི་ལང་ཞིང་དགོས་པ་ཡང་དེ་ཙམ་མེད་པས་དེ་ཙམ་གྱིས་ཆོག་པར་བྱེད། །

དུས་ཆེན་འདིའི་བྱེད་སྒོ་ནི་ཆུ་ལ་མཚོན་སྣ་ཚོགས་བསྲེས་ཏེ་སྐྱེ་བོ་ཕན་ཚུན་དང་ཁོར་ཡུག་གང་སར་འཐོར་ཞིང་དགའ་འབོད་དང་ཀུ་ཀོ་བྱེད། དུས་ཆེན་ཀྱི་དགོས་པ་ནི་མི་མཐུན་པའི་ཕྱོགས་ལས་ཀུན་ཏུ་རྒྱལ་ཏེ་མཐར་ཐུག་གི་དགའ་བདེའི་དཔལ་ལ་རོལ་བར་རྟེན་འབྲེལ་འགྲིག་པར་ཡིད་ཆེས་བྱེད། དུས་ཚེས་ནི་རྒྱ་གར་ལོ་ཐོར་གཞི་བཅོལ་ཏེ་དཔྱིད་ཀའི་ཟླ་གསུམ་པའི་ནང་གི་ཕར་ཆེར་སུམ་ཅུའི་དུས་དྲན་གྱི་སྔོན་རྗེས་ཙམ་ལ་ཡིན།

2012/03/05

ཞིང་ཁམས་ལ་ཕུལ་བའི་འཕྲིན།

དྲིན་ཅན་གྱི་བླ་མ་ལགས། 
མི་ཚོས་བཤད་སྲོལ་ལྟར། ངས་ཉིན་མཚན་དབྱེར་མེད་ཀུན་ཏུ་མགོ་སྤྱི་གཙུག་ན་ཁྱེད་སྒོམ། ངག་གསོལ་འདེབས་ནས་ཁྱེད་འབོད། ཡིད་སྐྱོ་གདུང་གིས་ཁྱེད་མ་གཏོགས་དྲན་རྒྱུ་མི་འདུག་ཅེས་ངས་བཤད་གཏན་ནས་མི་ཕོད། གང་ཡིན་ཟེར་ན་དེ་ལྟ་བུའི་སྐལ་ལྡན་གྱི་སྐྱེས་བུ་ཞིག་ང་གཏན་ནས་མ་ཡིན་པས་རེད། འོན་ཀྱང་རིན་པོ་ལགས། ཁྱེད་ཀྱི་བཅོས་མིན་བཞིན་གྱི་འཛུམ་མདངས་དྭངས་མ་དེ་ངའི་ཡིད་ངོར་ཡང་སེ་འཆར་འོང་ཞིང་འཆར་རིམ་བཞིན་དུ་དྲན་གདུང་གི་སྐྱོ་སྣང་འགོག་མེད་རེ་སྐྱེ་འོང་བ་ཞིག་རེད། དེ་ནི་ཏན་ཏན་ཉིད་ཀྱིས་ངའི་ལྟོ་སྟོང་ཟས་ཀྱིས་བརྒྱངས་ཞིང་། ཀླད་སྟོང་ཤེས་ཡོན་ཀྱིས་བརྒྱངས་ཏེ་ད་ཆ་འཕྲིན་ཡིག་འབྲི་ཤེས་ཙམ་ཞིག་དང་རང་ཁ་སོས་ཙམ་ཞིག་བྱུང་བའི་བདག་རྐྱེན་དམ་པ་གང་ཉིད་ཁོ་ན་ལ་ཐུག་ཡོད་ཙང་ལོས་ཡིན། དྲན་གདུང་འདི་འདྲ་ཞིག་ནི་བདག་པོ་བོར་བའི་སྒོ་ཁྱི་ཞིག་ལའང་སྐྱེ་ངེས་པས་ངས་སྐྱབས་མ་དྲན་པའི་ཁ་ཕོ་རུ་ནམ་བཤད་མི་འོས་པས་མ་ཚད་ངོ་ཚ་དགོས་པ་ཞིག་རེད་ཨང་།

2012/03/03

སེང་གེ the lion

Image result for བློ་བཟང་སེང་གེ

སྨྲ་བའི་ལྗག་ལ་བདེན་ཚིག་གྲུབ་དང་གཅིག །
རྣམ་དཔྱོད་བློ་ཡི་ཁོ་ལག་རྫོགས་དང་གཉིས། །
ཆབ་སྲིད་རིག་པའི་མཆོང་རྩལ་རྒོད་དང་གསུམ། །
སེང་གེ་ཁྱོད་ཉིད་དོན་གྱི་སེང་གེ་ཡིན། །

2012/03/02

ལྷ་བཤད་རིང་མོ། ༤།


རྨེ་རུ་དགེ་བསྙེན།
། །དུས་དེ་རིང་ལྷ་ཞིག་འབོད་ལེ་དེ། །
ཞལ་དགྱེས་པའི་འཛུམས་མདངས་ཡ་ལ་ལ། །
གསུང་འགྱུར་མེད་བདེན་ཚིག་ལྷང་སེ་ལྷང་། །
ཐུགས་བརྩེ་བས་འགྲོ་ཀུན་བུ་བཞིན་སྐྱོང་། །
སྐྱབས་བསླུ་མེད་བསྟན་འཛིན་རྒྱ་མཚོ་མཁྱེན། །
ལྷ་དེ་བའི་ཡན་ན་ལྷ་ཞིག་མེད། །
ཡང་མཁའ་འགྲོའི་གཙོ་གཅིག་པདྨ་མཚོ། །
བུ་མོས་གུས་ཅན་གྱི་མདུན་དེར་བྱོན། །
ངའི་གླུ་སྣ་དྲང་མོ་མདའ་ལྟར་སྲོངས། །
བདེན་མདའ་མོ་མཁའ་འགྲོའི་ཕྱག་མཚན་ཡིན། །
ས་འདི་ཡི་ས་ངོ་མ་ཤེས་ན། །
ལྷོ་རྒྱ་གར་ཚ་བའི་ཡུལ་ལྗོང་རེད། །
མགོན་ཏ་ལཱའི་བླ་མའི་བཞུགས་གནས་རེད། །
བོད་དབུ་ནག་སྐྱབས་བཅོལ་ཞུ་ས་རེད། །
ཕོ་ང་འདྲ་བཤད་རིན་ཅི་ཞིག་ཡོད། །
རྒྱབ་ཕ་ས་ཤོར་བའི་འཁྱམ་པོ་ཡིན། །
དྲིན་ཕ་མ་གཡུགས་པའི་ཁྲེལ་མེད་ཡིན། །
བོད་སྤྱི་དོན་མ་འགྲུབ་མདོ་མེད་ཡིན། །
རང་སྒེར་དོན་མ་འགྲུབ་སྤྲང་པོ་ཡིན། །
ཆོས་ཉམས་ལེན་མེད་པའི་བསོད་ཟད་སྟེ། །
རྔོན་པ་རི་ལུ།
ཡིན་ངོ་མ་རིག་འཛིན་ཁྱུང་པོ་ཡིན། །
དུས་དེ་རིང་སྒྲུང་ཞིག་བཤད་ལེ་འདི། །
བཙན་ཤ་གདོང་ཅན་གྱི་ལོ་རྒྱུས་ཡིན། །
གནའ་སྔ་མོ་སྔར་གྱི་དུས་ཚོད་ལ། །
བཙན་དགེ་བསྙེན་འདྲེ་ལ་མ་སྐྱེས་སྔོན། །
གཞིས་འཁོར་བ་སྤངས་བའི་བན་དེ་ཞིག །
སྒོམ་ཟབ་མོའི་འཚམས་ལ་བཞུགས་པའི་དུས། །
གཟུགས་སྐྱེ་ཡག་གྲོང་གི་བུད་མེད་གསུམ། །
དབེན་རི་ཁྲོད་མཚམས་ཐོ་གོམ་པས་འགམས། །
བན་སེར་མོར་འདོད་པའི་དབང་ཡོད་བཤད། །
ཆང་ཕོར་གང་འཐུང་ངམ་ར་གསོད་དམ། །
ཡང་མིན་ན་ཁོང་ཚོར་དགའ་མགུར་སྤྱོད། །
དེ་གསུམ་ལས་གང་དགའ་འདེམས་དགོས་བཤད། །
བན་མཚམས་པས་མནོ་བསམ་བསྐོར་བའི་དོན། །
ར་བསད་ན་སྲོག་གཅོད་ཉེས་པ་ཡོད། །
འདོད་སྤྱད་ན་སྡོམ་པའི་རྩ་བ་ཤོར། །
ཆང་འཐུང་ན་ཉེས་པ་ཡང་ངོ་བསམ། །
ཆང་དམ་འབི་གང་དེ་ཞབས་དག་བརྒྱབ། །
ར་རོ་རྗེས་མཚམས་པས་ར་དེ་བསད། །
མཚམས་དེ་ནས་བུད་མེད་གསུམ་ཡང་སྤྱད། །
བཟི་དྭངས་སྐབས་འགྱོད་པའི་སྡུག་བསྔལ་ཏེ། །
བྲག་མཐོན་པའི་སྟེང་ནས་གཡང་ལ་མཆོང་། །
ལུས་མགོ་མེད་རྔོན་པའི་ཕུག་པར་ལྷུང་། །
ཕ་རྔོན་པའི་ཤ་བའི་མགོ་ཐོག་ལ། །
ཟན་ཀོང་བུར་ཚིལ་ཁུའི་སྒྲོན་མེ་སྦར། །
དེ་རྩེ་མཚར་བམ་རོའི་སྐེ་དང་བསྒྲིགས། །
འདི་ལངས་ན་ཅི་འདྲའི་མཚར་རམ་བཤད། །
བཤད་མ་ཚར་གོང་ནས་རོ་དེ་ལངས། །
ཆེས་གདུག་པའི་བདུད་འདྲེ་ཞིག་ཏུ་གྱུར། །
དུས་རྒྱུན་པར་མིང་འབོད་མི་ནུས་ཀྱང་། །
བོས་བཞག་ན་རྨེ་རུ་དགེ་བསྙེན་ཟེར། །
མི་མ་ཤི་སྲོག་དབུགས་སྡུད་མི་རེད། །
ཁོ་གནས་སའི་རྨེ་རུ་བྲག་འགག་འདིར། །
མཚན་མེ་འོད་ཤོར་ན་སྲོག་ཆད་ཡིན། །
ཉིན་ཐབ་གསུར་ཤོར་ན་སྲོག་ཆད་ཡིན། །
ཀི་འུར་སྒྲ་ཤོར་ན་སྲོག་ཆད་ཡིན། །
ཁོང་ཁྲོས་ན་གྲྭ་པའི་གཟུགས་སུ་སྟོན། །
ཤ་ཁྲག་གི་བསོད་སྙོམ་སློང་བས་ཟེར། །
དེ་བསླངས་ན་དགེ་བསྙེན་འཁོན་རྟགས་ཟེར། །
དུས་སྐབས་གཅིག་དམག་སྒག་སྟག་ལྷ་དེས། །(དམག་སྒག་དུད་ཚང་དང་སྟག་ལྷ་མི་མིང་། པར་རིས་ནང་གི་བྲག་ཐོ་འཁྲིས་ཀྱི་ལུང་ཤུར་དེའི་སྟོད་ན་ཁོང་ཚོའི་ཁྱིམ་ཚང་ཡོད།)
འགག་འདི་ནས་ཤ་བ་འཛེམ་མེད་བརྔོན། །
དེའི་རྐྱེན་པས་དགེ་བསྙེན་ཐུགས་ཁྲོས་ཏེ། །
བན་སྤྲང་པོ་ཞིག་ཏུ་སྤྲུལ་ནས་ཡོང་། །
ཤ་བསད་པའི་ཤ་ཞིག་སྦྱིན་རོགས་བཤད། །
བཙན་དམག་སྒག་སྟག་ལྷས་ངོ་ཤེས་ཏེ། །
ཁྲག་དམར་པོ་འཛར་བའི་ཤ་བའི་གློ། །
སྤྲང་བན་དེའི་ལུས་ལ་ཤེད་ཀྱིས་བསྣུན། །
བཙན་ཤ་མགོ་སྐྲག་སྟེ་འཇུས་ལ་བྲོས། །
ཁམས་གློ་བའི་ཐང་ལ་སླེབས་པའི་སྐབས། །
ལུང་སྟེང་གི་གློ་བ་གཞི་ནས་ཟག །
ས་དེའི་མིང་གློ་བ་ཐང་ཞེས་ཆགས། །
ལོ་མང་པོར་ཞེད་དེ་འཇུས་ལ་བསྡད། །
དུས་ནམ་ཞིག་རྨེ་རུའི་ཨ་སྐྱོ་ཞིག །
གནས་ཁ་བ་དཀར་པོར་མཇལ་སྐོར་སླེབས། །
བཙན་ཤ་མགོས་སྟག་ལྷའི་ལོ་རྒྱུས་དྲིས། །
ཕོ་སྟག་ལྷ་རྒས་ཞིང་རྒུད་རབས་ཐོས། །
འདྲེ་ཡུལ་ལ་ཡོང་རྒྱུའི་སེམས་ཤུགས་སྐྱེས། །
རྒན་ལོ་ལོན་དམག་སྒག་སྟག་ལྷ་དེ། །
མཐོ་ཡ་གིར་བྲག་སྟེང་ཉལ་བའི་ཚེ། ། (པར་ནང་གི་བྲག་འདི་ཡིན།)
འདྲེའི་རྡོག་པས་བྲག་ཉག་ཧྲག་བར་བཅད། །
རྒས་སྟག་ལྷ་བཀྲེས་ལྟོག་གཉིས་ཀྱིས་བསད། ། (སྟག་ལྷས་རི་ཕར་ཁའི་ལམ་འགྲུལ་བ་དག་ལ་“ཆུ་ཕོར་གང་འཐུང་རོགས།” ཞེར་འབོད་སྐད་བྱེད་རབས།)
ཁོ་དགའ་ན་ཕོ་གསར་གོས་དཀར་ཅན། །
མགོ་སྐྲ་ཤུབ་དཀྲིས་པའི་རྣམ་པ་སྟོན། །
དེ་མཐོང་ན་སྡོང་གྲོགས་མཛད་རབས་ཟེར། །
སྡེ་རྨེ་རུའི་ཁྱིམ་ཚང་འགའ་རེ་ནང་། །
ཁྱོ་མེད་སྐབས་ཆུང་མ་འགའ་ལ་འགྲོགས། །
བཙན་བུ་རྒྱུད་ཤོ་ཏོ་སྐྱེ་རབས་ཟེར། །
དེ་བཤད་ཀྱིན་བཤད་རྒྱུ་ཇེ་མང་རེད། །
གདོན་འདྲེ་བཤད་འདི་འདྲ་མ་ཡོད་ན། །
བོད་འདྲེ་ལ་སྐྲག་དོན་ཅི་ཞིག་ཡོད། །
ཤིང་ཡར་སྐྱེས་བསང་ཤིང་གཅོད་དོན་ཅི། །
འབྲུ་རྩམ་པ་བསུར་ལ་བསྲེག་དོན་ཅི། །
ཆོས་ཟོག་པོའི་གཡོ་རྫུན་བཤད་ས་གང་། །
འདྲེའི་དུས་རབས་རྫོགས་ཀྱང་འདྲེ་ལ་དགའ། །
འདི་སྒང་པ་བོད་ཀྱི་བག་ཆགས་རེད། །

2012/02/28

ལྷ་བཤད་རིང་མོ། 3

རྟ་ཤོད་ཟལ་མོའི་རི་རྒྱུད། 









ངེད་རྟ་ཤོད་རྨེ་རུ་གཤོང་ཆེན་འདིའི། །
ཕྱི་སྣོད་ཀྱི་ཆགས་ཚུལ་གེ་སར་ཐུག །
དེའི་ལོ་རྒྱུས་ལེའུ་དང་པོར་གསལ། །
དེ་མིན་པའི་ལོ་རྒྱུས་འགའ་རེ་སྟེ། །
ལུང་ཤུར་གཉིས་རྟ་ཆེན་རྟ་ཆུང་ལ། །
སྔོ་ལྡེམ་ལྡེམ་ན་བ་རྟ་འདྲ་ཡོད། །

ལྷ་བཤད་རིང་མོ། 2



སྡེ་རྨེ་རུ་ཤོག་ཁ་གསུམ་པོ་འདི། །
ཐག་རྒྱང་རིང་གང་ནས་འོངས་མིན་དང་། །
དུས་སྔ་ཕྱི་ནམ་ཡིན་མ་ངེས་ཀྱང་། །
ཡུལ་གཞན་ནས་གྱར་བའི་ཇག་པ་བདུན། །
གཞིས་ཆགས་པའི་མི་རྒྱུད་ཡིན་རབས་ཟེར། །
ཁ་རྒྱུན་དུ་"རྨེ་རུ་དུད་བདུན་མ། རྐུན་མ་སྐྱ་བདུན་མ། ཞེས་རླུང་ལྟར་གྲགས།"
ཁྱུང་དཀར་ནག་སེར་གསུམ་མ་ཐེ་བའི། །
ཁམས་ཁྱུང་པོའི་མི་སྡེ་འཁྲུལ་མེད་རེད། །
ཁ་འཚོ་ཐབས་ས་མ་འབྲོག་སྡེ་རེད། །
གནའ་དེང་རབས་ཤེས་ཡོན་མེད་ས་རེད། །
བོད་སྒང་པའི་སྤྱི་དོན་མེད་ས་རེད། །
གནའ་བོན་ཆོས་དར་བའི་དགོན་ཤུལ་མོད། །
དེང་བན་གསར་ལྷ་གསོལ་རྟེན་མཁར་མང་། །
སྔགས་རྙིང་མ་མེ་སྟག་ཙམ་ཞིག་ཡོད། །
བན་གསར་མའི་བསྟན་པ་དར་ས་རེད། །
ཆོས་གྲུབ་མཐའི་ཆགས་སྡང་ཆེ་ས་རེད། །
མི་ཡོད་ཚད་ཆོས་པ་ཤ་སྟག་ཡིན། །
ཆོས་བྱས་ཚད་ཕྱོགས་རིས་འཐེན་འཁྱེར་ཡིན། །
ཡུལ་འདི་ནི་ང་ཡི་ཕ་ཡུལ་ཡིན། །

2012/02/27

ཕ་ཡུལ་གྱི་ལྷ་བཤད་རིང་མོ། 1


རོམ་ཐང་གནས་ཁྲ་མོ། 
ལེའུ་དང་པོ། རྨེ་རུ་ཡུལ་ལུང་ཆགས་རབས།
གླིང་གེ་སར་ལོ་རྒྱུས་ལྷ་ལས་འཕྲོས། །
བོད་སྒང་པའི་ལོ་རྒྱུས་གླིང་ནས་བཤད། །
དགོས་རྨེ་རུའི་ལོ་རྒྱུས་གླིང་དང་འབྲེལ། །
གནའ་འབྲུག་མོས་ལྷ་རྟ་བཟུང་བའི་ཡུལ། །
གནས་སྤེ་ནེ་རི་བཀྲ་རྒྱབ་རི་ཡིན། །

ངའི་ཕ་ཡུལ།

ཁྱུང་པོ་སྟེང་ཆེན་རྫོང་། གྱང་སྔོན་ཡུལ་ཚོ། རྨེ་རི་ཡུལ་པའི་སྲིབ་པ།
༄། །ངའི་སེམས་ཁོངས་ནས་གཅེས་པའི་ཕ་ཡུལ་འདིར་གཟིགས་དང་། དྭངས་ཤིང་གཙང་བའི་གཡུ་མདོག་གི་ནམ་མཁའ་སྔོན་པོ་དུ་རྡུལ་གྱིས་མ་སྦགས་ཤིང་། ཡུལ་པའི་ས་ཞིང་གི་རེའུ་མིག་རྒྱ་འཚོའི་རླབས་ཕྲེང་བཞིན་མུ་མཐའ་དང་ཡོངས་སུ་བྲལ། འདི་ནི་ངའི་ཕ་ཡུལ་རེད།







རོམ་ཐང་གྲོང་ཚོ།
༄། །ཕ་ཀིའི་ཉིན་གྱི་གྲོང་པ་དེ། །
རྨེ་རུ་རོམ་ཐང་གྲོང་ཚོ་རེད། །
གཤམ་ནས་མཐོང་བའི་ཁང་ཞིག་དེ། །
ཆུ་འཐག་འཐོར་བའི་རྗེས་ཤུལ་རེད། །
ཕུག་གུའི་ཁེངས་བའི་བྲག་དམར་དེ། །
མང་ཕུག་སྒོམ་པའི་སྒྲུབ་གནས་རེད། །
གྲོང་པའི་འགབ་ཀྱི་རྒྱུག་ཆུ་དེ། །
མར་བབས་རྟ་ཆུ་སྔོན་མོ་ཟེར། །
རྒྱང་གི་གནམ་མཐའི་རི་བོ་དེ། །
རྒྱབ་རི་མོ་གོམ་ཀླད་མེད་རེད།
བྲག་དམར་རྒྱབ་ཀྱི་ལྕང་རྒན་དེ། །
ཁོ་བོ་སྐྱེས་པའི་བླ་ཤིང་རེད། །
ལྕང་མའི་འགྲམ་གྱི་དུད་ཚང་དེ། །
འཁྱམ་པོ་ང་ཡི་ཕ་ཁྱིམ་ཡིན། །

2012/02/26

ལོ་གསར།

མི་ཡུལ་ས་མཐར་འཁྱར་ནས། །
མི་ལོ་བཅོ་བརྒྱད་ཟད་སོང་། །
མི་སེམས་སྤྲོ་བའི་ལོ་གསར། །
མི་རྐྱང་ང་ལ་མ་བྱུང་། །

མི་བཀྲེན་མ་བྱན་ཞིག་གིས། །
མི་འཕྲོད་ཁམ་ཟས་བླུགས་པའི། །
མི་ཞིམ་དགུ་ཐུག་ཞིག་གིས། །
མི་འདོད་ཞེ་མེར་བསླངས་སོང་། །

མི་མེད་བྱང་ཐང་འདྲ་བའི། །
མི་ཡུལ་ཁང་སྟོང་ཞིག་ཏུ། །
མི་རྐྱང་ལོ་གསར་གཏོང་བ། །
མི་སེམས་སྐྱོ་རོགས་མིན་ནམ། །

2012/02/15

ཡེ་ཤེས་ནོར་བུའི་བླ་རྒྱུད།









ཤཱཀྱ་ཐུབ་པས་ཤས་ཙམ་མ་གསུངས་ཤིང་། །
གྲུབ་ཆེན་བརྒྱད་ཅུས་ཟུར་ཙམ་མ་ཐོས་པའི། །
གསང་ཆེན་ཐེག་པའི་རྒྱུད་ཚུལ་གསར་པ་ཞིག །

ཤར་ཕྱོགས་ཐཱེ་ཝན་གླིང་ན་བབས་སོང་ལོ། །

རྡོ་རྗེ་ཐེག་པའི་རིང་ལུགས་མཐའ་དག་ལས། །
རྡོ་རྗེའི་བཀའ་ལུང་ཉེ་བར་བརྒྱུད་པའི་སྲས། །
རྡོ་སྐོན་བླ་མ“ཡེ་ཤེས་ནོར་བུ”ཁོང་། །
རྡོ་རྗེ་འཆང་ནས་བརྒྱུད་པ་གསུམ་པ་རེད། །

གོའུ་ཏ་མས་བདེན་བཞིའི་གནད་ཙམ་གསུངས། །
ཀླུ་ཐོགས་གཉིས་ཀྱིས་གཞུང་ལུགས་འབུམ་ཕྲག་གསུངས། །
གྲུབ་ཆེན་བརྒྱད་ཅུས་ས་ཡ་གྲངས་མེད་གསུངས། །
གསུངས་པའི་ཆོས་ལ་དབྱེ་འབྱེད་སུ་ཡིས་ནུས། །

གསང་བ་སྔགས་ཀྱི་དམ་ལ་འདུག་བསམ་ན། །
ཡེ་ཤེས་ནོར་བུ་བླ་མ་བསྟེན་པར་འོས། །
ཐུན་མིན་སྔགས་ཀྱི་དག་སྣང་སྦྱོང་འདོད་ན། །
ཡེ་ཤེས་ནོར་བུ་ཧེ་རུ་ཀ་དཔའ་ཉིད། །

འདི་ན་འགའ་རེས་ཕུང་གསུམ་བསྐྲད་པའི་ཚིག །
བབ་ཅོལ་སྨྲས་བའི་འུད་གཏམ་འདི་དག་ཀྱང་། །
དཀར་གཙང་འདོད་པས་སོལ་བ་བཀྲུས་པ་ལྟར། །
བྱས་ཚད་ངལ་བ་དོན་མེད་ཙམ་དུ་ཟད། །

མདོ་དོན“གང་ཟག་ཚོད་ནི་གང་ཟག་གིས། །
བཟུང་མི་རུང་བའི”ལུང་ཚིག་འདི་གཅིག་གིས། །
བླང་དོར་འབྱེད་པའི་རྒྱ་མ་བཅག་ཚར་ན། །
ད་རུང་བཟང་ངན་གང་གིས་དཔོག་པར་ནུས། །

དེ་བས་དད་པའི་གཏམ་རྒྱུད་མངར་མོ་ལས། །
རྒན་མོས་བསྲེལ་བའི་ཁྱི་སོ་ཇི་བཞིན་དུ། །
ཡེ་ཤེས་ནོར་བུ་བླ་མ་བསྟེན་བྱས་ན། །
མཆོག་ཐུན་དངོས་གྲུབ་བསྩལ་བར་གདོན་མི་ཟ། །

2012/02/12

སློབ་མ་བསམ་མེད།

Related imageང་ཚོ་སློབ་གྲྭའི་སློབ་མ་ག་གེ་མོ་ཞིག་འཛིན་གྲྭ་བརྒྱད་པ་ཚར་ཏེ་དགུ་པ་དེ་བོད་གཞུང་སྃ་བྷོ་ཊའི་སློབ་གྲྭ་ཆེ་ཤོས་གཅིག་གི་ནང་བཏང་བ་བཞིན་ཉེ་ཆར་འབྱོར་ཐོ་འགོད་དུ་སྐྲ་དམར་པོ་གྱེན་ལ་བརྫེས་ཏེ་སློབ་གྲྭར་སླེབས་ཡོད་པ་འདྲ། སློབ་གྲྭའི་ཉལ་ཁང་ཨ་ཕའམ། ཉལ་ཁང་དོ་དམ་པས་སྐྲ་གཙང་མ་བཟོ་དགོས་པར་བསྐུལ་ཀྱང་། ཁོས་དེ་ཉན་རྒྱུ་ཕར་བཞག་སློབ་གྲྭ་གཡུགས་ཏེ་རྡེ་ར་དྷུན་ལ་བྱོལ་སྟེ་སོང་།
དེས་མ་ཚད་ནང་གི་ཕ་མར་ཁ་པར་བཏང་སྟེ་ཁོ་རང་"མཚན་གུང་བར་སློབ་གྲྭའི་སྒོ་འགྲམ་ནས་བསྒུགས་བསྡད་ཀྱང་སློབ་གྲྭས་ཡ་བྱེད་གི་མི་འདུག"ཅེས་བཤད་ཡོད་པ་རེད། ལེ་བར་ཁྲི་སྟོང་གི་ཆོད་པའི་ཕ་རོལ་ནས་སྙིང་ཉེ་བའི་ཕ་མ་གཉིས་ལ་དངངས་སྐྲགས་དང་སྡུག་བསྔལ་ག་ཚོད་བྱུང་རུང་། ནམ་ཕྱེད་རྒྱལ་བའི་དཀྱིལ་འཁོར་ལ་ཁོ་པར་རོགས་གང་ཞིག་བྱེད་དགོས་སམ། གང་བྱེད་ཐུབ་ཀྱི་རེད། ཕ་མ་འུ་ཐུག་སྟེ་འདི་གའི་སློབ་གྲྭར་སློབ་སྦྱོང་བྱེད་ཀྱིན་པའི་ཁོང་ཚོའི་བུ་མོ་རྒན་པ་ལ་ཁ་པར་ནས་ཁོ་རང་སྐྱོབ་ཐབས་དགོས་པར་བཤད། 
གཅེན་མོ་སེམས་སྡུག་གིས་ངུ་བཞིན་སློབ་གྲྭའི་ལས་ཁུངས་ནང་བརྒྱུགས་ཏེ"རོགས་པ་གནང་རོགས"ཞུས་པ་དང་ལྟར་འདི་གའི་ལས་བྱེད་ཀྱིས་སློབ་གྲྭ་དེའི་ལས་ཁུངས་ལ་གནས་ཚུལ་དྲིས་རྗེས་གནས་ཚུལ་ངོ་མ་དེ་ཤེས་རྟོགས་བྱུང་བ་རེད། 
སྤྱིར་བཙན་བྱོལ་ནང་གི་བུ་ཕྲུག་ཕལ་མོ་ཆེ་༸གོང་ས་མཆོག་གིས་དབུ་ཁྲིད་པའི་བཙན་བྱོལ་གཞུང་གིས་ཆུང་སྦར་མོ་གང་ནས་གསོ་སྐྱོང་འོག་གནའ་དེང་ཤེས་ཡོན་གྱིས་སྐྱེད་སྲིང་བྱེད་མུས་ལ་ཁོ་དང་ཁོ་ལྟ་བུའི་བུ་ཕྲུག་བསམ་མེད་དག་འབྱུང་བཞིན་པའི་གནད་དོན་གང་ཞིག་ལ་ཐུག་ཡོད་པ་རེད། །

2012/02/11

བྱ་བྱལ་སངས་རྒྱས་རྡོ་རྗེ།

Image result for jadrel sangay dorji rinpoche
བྱ་བྲལ་སངས་རྒྱས་རྡོ་རྗེ།
ཁྲོ་རྒྱལ་རྟ་མགྲིན་བཞིན། །
སྟག་ལྤགས་རློན་པའི་སྟེང་། །
ཁམས་འབྲོག་རྒན་པོ་ཁྱེད། །
སེངས་གེ་འགྱིང་བ་འདྲ། །

དུང་གི་འཛར་ལོ་ཞིག །
མ་ནེའི་རྒྱན་ཏུ་བཏགས། །
ཕྱག་ཟུང་ཕྱག་སྟབས་ཀྱིས། །
ངལ་གསོའི་ཕྱག་རྒྱ་སྟོན། །

ཁྱེད་ཀྱི་སྐུ་ཚེའི་རྒྱུན། །
ཡར་ཆབ་གཙང་པོར་སྦྲེལ། །
སྲོག་གི་རྟེན་མཁར་དེ། །
ཇོ་མོ་གླང་མར་སྦས། །

ཚེ་ཡི་དངོས་གྲུབ་དེ། །
བརྙེས་མིན་མ་ངེས་ཀྱང་། །
ལོ་བརྒྱའི་ཐེམ་གྲངས་ཤིག །
ཕྱག་ཏུ་བཞེས་པར་དགའ། །

ཡབ་རྗེ་ཀློང་ཆེན་པའི། །
གདམ་པའི་ཕ་ཕོག་སྟེ། །
མཁའ་འགྲོའི་ཁ་རླངས་ཀྱི། །
ངད་པ་མ་ཡལ་བ། །

ངེས་དོན་སྙིང་ཐིག་གི །
སྙིང་ཁྲག་སྙིང་པ་གང་། །
ངག་དགའི་ངག་སྒོ་ནས། །
ཁྱེད་ལ་བསྩལ་བ་དག །

སྔ་འགྱུར་རིང་ལུགས་ཀྱི། །
ཕྱི་རབས་སྐལ་ལྡན་ལ། །
གདམ་པའི་མན་ངག་དེའི། །
ཉིང་ཁུ་ནམ་ཤིག་བསྩལ། །

དུས་རབས་ཉི་ཤུ་པའི། །
དུས་འགྱུར་རླུང་འཚུབ་ཁྲོད། །
ཁྱེད་དང་གངས་རྒན་གྱི། །
གཟི་མདངས་ཉམས་པ་མེད། །

སྔར་སོང་རྭ་སྒྲེང་རྗེ། །
སྟག་གིས་མ་ཟོས་སྔོན། །
དབུ་ཡི་མཆོད་གནས་དེ། །
ཁྱེད་ཀྱིས་མཛད་ནས་བཟུང་། །

བླ་ཆེན་མི་དཔོན་ལ། །
གུས་ཚུགས་མི་སྟོན་ཅིང་། །
ཆོས་སྲིད་ཟུང་འབྲེལ་ལ། །
དང་བ་མི་སྟེར་ཟེར། །

སྤྱིར་ན་རྒྱལ་ཞེན་གྱི། །
འུར་ཆེམ་མི་སྒྲོགས་ཀྱང་། །
རུས་པ་དཀར་པོ་ཞིག །
སྙིང་ན་ད་རུང་སྦྲུམས། །

བདག་མོ་གཞན་རྗེས་ལ། །
འབྲངས་བའི་ཉིན་མོ་ཡང་། །
མི་འདོད་མིག་སེར་གྱི། །
རྣམ་འགྱུར་ཡེ་མེད་ཅིང་། །

ཤོར་བའི་ཌཱ་ཀི་མ། །
གཞན་གྱིས་དོར་བའི་རྗེས། །
ངོ་ཚའི་ངོ་གདོང་དེ། །
ཕྱིར་ལ་བསྟན་གྱུར་ཀྱང་། །

མིག་སེར་ཁོང་ཁྲོ་ཙམ། །
ཡེ་ནས་མེད་པ་འདིས། །
རྒྱལ་སྲས་སེམས་དཔའ་ཞིག །
ར་སྤྲོད་མ་བྱས་ཀྱང་། །

འགྱུར་མེད་བློ་དཀྱིལ་དེ། །
མཁའ་ལས་ཡངས་བ་ཞིག །
ངོས་འཛིན་མ་བྱས་པར། །
འཇོག་ཐབས་ཨེ་ཡོད་ན། །

ཕྱི་ཡི་ན་བཟའ་ནི། །
རས་དཀར་ཡུལ་གཅིག་དང་། །
ནང་གི་ཞེ་སེམས་ནི། །
དྲང་བདེན་ཡུག་གཅིག་ཡིན། །

སྦྲང་དཀར་རྩམ་པ་ནི། །
ཁྱེད་ཀྱི་གསོལ་བ་ཡིན། །
རྩམ་པ་རྩམ་ཧྲུལ་དག །
ད་རུང་དགའ་ཤོས་ཡིན། །

དཀར་གསུམ་གསོལ་བ་འདི། །
ཁྱེད་ཀྱི་འཚོ་བ་ཡིན། །
འགྲོ་བའི་སྲོལ་སྐྱབས་དེ། །
ཁྱེད་ཀྱི་ཕྲིན་ལས་ཡིན། །

དད་རྫས་ཡོད་ཚད་དག །
ཉ་སྐྱོབས་འགྲོ་གྲོན་ཡིན། །
དེ་མིན་ལྷག་མ་དག །
སྒྲུབ་གྲྭའི་འཚོ་རྟེན་ཡིན། །

ཁྱེད་ནི་སྔ་འགྱུར་བའི། །
རེ་ལྟོས་ཁོ་ན་དང་། །
གདམ་པའི་མཛོད་ཆེན་གྱི།
ལྡེ་མིག་ཉག་གཅིག་ལགས། །

2012/02/08

ལྷ་མོའི་བླ་མཚོ།

Image result for lhamo la-tsoལྷ་མོའི་བླ་མཚོ། དེ་རིང་ངོ་དེབ་དྲ་བར་ཤེས་རབ་བློ་བཟང་གིས་ལྷ་མོའི་བླ་མཚོའི་འདྲ་པར་འདི་བཀོད་ཡོད་པ་མཐོང་དུས། ངས་གློ་བུར་མི་ལོ་༡༦ གི་ཡར་སྔོན་དུ་ང་དང་གཅུང་པོ་ས་དེར་གནས་སྐོར་ལ་སོང་བའི་ལོ་རྒྱུས་མིག་སྔོན་དུ་བཀྲ་ལམ་ལམ་དུ་འཁོར་སོང་། རྒྱུན་ལྡན་ནས་བོད་པའི་ཞིང་འབྲོག་མང་ཚོགས་མང་པོ་ཞིག་སྟོན་ལས་ཚར་རྗེས་བོད་ཟླ་དགུ་པ་བཅུ་པ་ཡན་མན་ལ་གནས་སྐོར་དུ་འགྲོ་སྲོལ་ཡོད་པ་ལྟར། ངེད་གཅེན་གཅུང་གཉིས་ཀྱང་༡༩༩༥ ལོའི་སྟོན་རྒྱབ་ཏུ་གནས་སྐོར་ལ་འོངས་བ་ཡིན། 

2012/02/05

འབྲུག་གི་ལོ་རྒྱུས།


དང་པོ་བོད་འབྲུག་གི་སྐོར།
ཁ་དོག་དང་དབྱིབས། བོད་པའི་བསང་གསོལ་དང་། ཁ་འདོན། ངག་རྒྱུན་སོགས་ན་"གཡུ་འབྲུག་སྔོན་མོ་དང་། གཡུ་འབྲུག་སྔོན་མོ་ཟངས་ཀྱི་ཟེ་བ་ཅན"ཟེར་བ་དང་། ས་དཔྱད་སྲུང་བཞི་ལས་"ལྷོ་གཡུ་འབྲུག་སྔོན་མོ་དོང་ན་མ་ལྷུང་"ཟེར་བ་དང་། ཡང་སྲོལ་རྒྱུན་རི་མོ་འབྲི་ཚུལ་སོགས་ན་ཁ་དོག་སྔོ་ལ་པགས་པ་ཆུ་སྲིན་གྱི་ལྐོག་པགས་སམ་ཉ་ཁྲབ་ཅན་ཞིག་ཡིན་པ་ཡོངས་སུ་གྲགས་ནས་འདུག །

2012/02/02


Egypt football violence leaves many dead in Port Said
སྤྱི་ལོ་ (2012) ཟླ་བ་ 2 ཚེས་ 1 ཉིན་ལ་དཀྱིལ་ཤར་ཡུལ་གྲུ་ཨེ་རྗིབ་གྲོང་ཁྱེར་པོར་ཊ་སཱཌེ་ (Port Said) ས་གནས་སུ་རྐང་བྷོལ་ལམ་རྐང་གྲུག་རུ་ཁག་མ་སརཱས། ཨལ་ཨཧླས་ (al-Masry and al-Ahly) རྩེ་འགྲན་མཇུག་གྲུབ་རྗེས། རུ་ཁག་སོ་སོའི་ཕྱོགས་ཞེན་པ་དག་རྩེ་ཐང་དུ་འཛུལ་ཏེ་འཁྲུད་འཛིངས་ཤོར་བས་ཉུང་མཐར་མི་གྲངས་ 74 རྐྱེན་ལམ་དུ་བཏང་ཡོད་པ་དང་། ད་རུང་གོད་ཚད་དེ་ལས་མང་བ་ཡིན་སྲིད་པའི་དོགས་གནས་ཡོད་ཚུལ་འདུག འདིའི་ཐད་ལ་ཨེ་རྗེབ་འཕྲོད་བསྟེན་བཀའ་བློན་གཞོན་པས"འདི་ནི་རྒྱལ་ཁབ་ཀྱི་རྐང་རྩེད་པོ་ལོའི་ལོ་རྒྱུས་ཐོག་གོད་ཆག་ཆེ་ཤོས་དེ་རེད"ཅེས་བཤད་ཡོད། གསར་གནས་མཉམ་འབྲེལ་ལས་ཁང་གིས་འདས་པོའི་གནས་ཚུལ་ཕྱིར་བསྒྲགས་ལས་ཁུང་གི་གསལ་བསྒྲགས་ལུང་འདྲེན་གནང་གསལ་ལྟར་ན། དོན་རྐྱེན་དེའི་ནང་ཉེན་རྟོག་མི་སྣ་ཁ་ཤས་ཡང་ཤི་གོད་བྱུང་ཚུལ་འདུག འདས་པོ་མང་ཆེ་གྲིས་རྨས་པ་དང་། འཚང་ཁས་དབུགས་སུབ་བྱས་ཚུལ་འདུག བྷི་བྷི་སི་གསར་འགོད་པ་རྗོན་ལཱེན་གྱིས་རྩེ་ཐང་ན་ཕྱོག་ཞེན་པ་འགས་གྲི་ཁྱེར་བ་སོགས་ཀྱིས་ཟིང་འཁྲུག་འདི་ལྟར་བསླངས་བ་ནི་ཉེན་སྲུང་ལས་རིགས་ཀྱིས་མ་འདང་བའི་སྐྱོན་ཏེ། ལོ་སྔོན་མར་སྲིད་འཛིན་མུ་བྷརག་ལས་གནས་ནས་ཕྱིར་ཕུད་ཀྱི་དྲག་ཟིང་སྐབས་སུ་ཡང་ཉེན་རྟོག་པའི་སྲུང་སྐྱོབ་ནུས་ཚད་ཀྱིས་མ་འདང་བ་མངོན་གསལ་བྱུང་ཡོད། སྤྱིར་ན་ཨེ་རྗིབ་ཀྱི་རྩེད་མའི་ཕྱོགས་ཞེན་པ་དག་ནི་རྩུབ་སྤྱོད་ཆེ་བ་ཡོངས་གྲགས་ཡིན་པས་དེ་ལུགས་ཀྱིས་ལྟ་སྲུང་དོ་ནན་མ་བྱུང་བའི་རྐྱེད་ཡིན་པ་འདྲ།

2012/01/28

དགོང་མོ།



གཉིད་ཀྱི་ཞིང་ཁམས་ནས་ཧར་གྱིས་ལངས་དུས། །
མུན་པའི་སྒོ་ཆེན་རྦད་དེ་བརྒྱབ་འདུག །
འདྲུད་ལྷམ་ཟད་པོ་རྐང་པས་ཉུག་སྐབས། །
དཔྲལ་བའི་མེ་ལོང་སྒོ་དང་བརྡབས་སོང་། །

རྣ་བའི་བུ་ག་སིལ་སྒྲས་བཀང་དུས། །
མེ་སྟག་ཕྲོམ་ཕྲོམ་མིག་ནས་མཆེད་ཅིང་། །
ཁ་མངར་སྐྱུར་གསུམ་ཁ་ལ་བྲོ་སྐབས། །
ཟུག་རྔུའི་ཚོར་སྣང་དལ་གཅིག་འགག་སོང་། །

འགྲམ་ཆུ་ལུ་མས་མངར་ཇ་འབོད་དུས། །
ཐབ་ཚང་འོ་སྣོད་སྟོངས་པས་བསྒུགས་འདུག །
འབྲས་དཀར་རྡིག་ལ་དབུགས་སུབ་གཏོང་དུས། །
ཚོད་མ་བྲོས་པའི་ཤུལ་ཙམ་མི་འདུག །

ཕྱི་སྒོ་ཕྱེས་ཏེ་ཁྲོམ་ལ་འགྲོ་སྐབས། །
མུན་ཁྲོད་ཁ་བ་ལྷ་མོས་བསྒུགས་འདུག །
ལྷ་མོ་ཡུས་པའི་འཆི་མའི་འབབ་རྒྱུན། །
མར་བབས་གཙང་པོའི་རླབས་དང་འདྲེས་འདུག །

2012/01/23

མཛད་པ་བཅུ་གཉིས།

འོག་མིན་སྟོངས་པའི་ཚོམས་ཆེན་ན། །
རྒྱལ་ཀུན་མ་བགྲོས་གྲོས་ཆོད་དུ། །
དགའ་ལྡན་ལྷ་བུ་ཏོག་དཀར་པོ། །
མི་ཡུལ་འདུལ་བའི་ཕོ་ཉར་བབས། །

2012/01/17

ཐའེ་ལན་ཌའི་ནང་ཆོས་དར་རྒྱས།

 གཉིས་པ།
ཐའེ་ལན་ཌར་ནང་ཆོས་དར་རྒྱས་བྱུང་ཚུལ་རོབ་ཙམ་བཤད་ན། དེང་སང་ཐའེ་ལན་ཌ་ཞེས་གྲགས་པའི་རྒྱལ་ཁབ་འདི་ཉིད་དུས་རབས་༡༣ པའི་ཡར་སྔོན་དུ་རྒྱལ་ཕྲན་སིལ་མ་ཞེ་གཅིག་གིས་བདག་བཟུང་བྱས་ཡོད་པར་སྣང་། སྐབས་དེ་ཤེད་ནས་ཉེ་སྐོར་ཁྱིམ་མཚེས་ཡུལ་གྲུའི་ཤུགས་རྐྱེན་གྱིས་ཐ་ལན་དུ་ནང་པ་གང་འཚམ་ཞིག་མཆིས་མོད། རིང་མིན་དུས་རབས་༡༣ པའི་མཇུག་ཐོག་ན་ཐ་ལན་ཌིའིརྒྱལ་ཁམས་སུ་གནས་བརྟན་སྡེ་པའི་རྒྱལ་བསྟན་གྱི་རྒྱལ་མཚན་དེ་ཉིད་སྟོབས་ཀྱི་རྒྱལ་པོ་རམ་ཁམ་ཧའང་(༡༢༧༠—༡༢༩༨) (Ramkham Haeng) སོག་པོའི་རྒྱལ་རྒྱུད་དུ་གྲགས་ཤིང་སུ་ཁོ་ཐའེའི་རྒྱལ་རབས་དགུ་པོའི་ནང་གི་རྒྱལ་ཐོག་གསུམ་པའི་རྒྱབ་སྐྱོར་དང་དཔུང་གྲོགས་ལ་བརྟེན་ནས་ཡོངས་སུ་བསླངས་བ་སྟེ། རྒྱལ་པོ་རང་ཉིད་ཀྱི་རྒྱལ་ས་སུ་ཁོ་ཐའེ་ (sukhothai དེང་སང་རྒྱལ་ས་བྷེང་ཀོག་གི་བྱང་ཕྱོགས་སུ་ཡོད་)རུ་ནང་པའི་དགེ་འདུན་པ་སྤྱན་དྲངས་ཏེ་ནང་ཆོས་སློབ་གཉེར་ཞུས་པ་དང་། དམིགས་བསལ་དུ་སིང་ག་ལའི་རྒྱལ་ཁབ་དང་འབྲེལ་ལམ་བཙུགས་ཤིང་ཡུལ་དེའི་གནས་བརྟན་དག་སྤྱན་དྲངས་ཞིང་ནང་ཆོས་དར་སྤེལ་ཁྱོན་ཡོངས་ནས་བཏང་། དེ་ཙམ་མ་ཟད་ཆོས་སྡེ་དགོན་གནས་ཁག་འཛིན་སྐྱོང་འོང་ཆེད་དགེ་འདུན་པ་གཙོ་བོ་རེ་འགན་འཛིན་དུ་བསྐོ་གཞག་བྱེད་པའི་སྲོལ་གསར་གཏོད་ཀྱང་བྱས། མདོ་དོན་ཁོང་གི་རླབས་ཆེན་མཛད་ཕྲིན་འོག་ནས་རང་ཉིད་ཀྱི་རྒྱལ་ཁམས་ཡོངས་རྫོགས་ནང་བསྟན་དཀའ་འཇམ་ཡུག་གཅིག་ཏུ་གྱུར་ཏོ་ཞེས་བརྗོད་ཆོག །

དེ་ནས་དུས་རབས་ཕྱེད་ཙམ་གྱི་རྗེས་སུ་སླར་ཡང་ཆོས་སེམས་དཀར་བའི་རྒྱལ་པོ་ལུ་ཐའེ་(Luthai) ༼༡༣༩༩—༡༤༡༩། སུ་ཁོ་ཐའེའི་རྒྱལ་ཐོག་བརྒྱད་པ)ཞེས་པ་ཞིག་བྱུང་སྟེ་ནང་བསྟན་ལ་སྲི་ཞུ་དང་དར་སྤེལ་བགྱི་བའི་རོགས་དན་མཛད་དེ་ནང་བསྟན་བླ་ནས་བླ་རུ་སྤེལ། ཁོང་རང་ཉིད་ཀྱང་དངོས་སུ་དུས་བཅད་སྡོམ་ཁྲིམས་བླངས་ཤིང་རབ་ཏུ་བྱུང་སྟེ་དམ་པའི་ཆོས་ཉམས་ལེན་ལ་འབད་པར་བཤད། དུས་བཅད་སྡོམ་ཁྲིམས་ནི་ཐའེ་ནང་པའི་ཕྱག་ལེན་ལྟར་ན་སྔོན་འགྲོའི་སྡོམ་ཆོག་ཅིག་ཡིན་པར་བཤད་ལ་དུས་ཡུན་སྤྱིར་བཏང་ཟླ་བ་གསུམ་ཡིན། འདི་ནི་གཞི་ཐམས་ཅད་ཡོད་པར་སྨྲ་བའི་ལུགས་སུ་ལག་ལེན་མི་གནང་ཞིང་ཕར་བལྟས་ཚོད་ལ་དུས་ཡུན་རིང་བའི་བསྙེན་གནས་ཤིག་དང་འདྲ་ཙམ་མ་འཆིས་སམ། ཡུལ་འདིའི་ནང་པ་ཕལ་མོ་ཆེ་མི་ཚེའི་ནང་མ་མཐར་བདུན་ཕྲག་རེ་སྡོམ་པ་ལེན་དགོས་ཤིང་གལ་ཏེ་མ་བླངས་ན་ཤི་རྗེས་རོ་ལས་བྱེད་མཁན་ཡང་རག་དཀའ་བར་གྲགས།
གང་ལྟར་སུ་ཁོ་ཐེའེའི་རྒྱལ་ཐོག་གསུམ་པ་ནས་དགུ་པའི་བར་(༡༤༣༨)དང་། དེ་བཞིན་དུ་སྤྱི་ལོ་༡༣༥༠ ནས་༡༧༦༧ བར་བྱུང་བའི་ཨ་ཡུ་ཐའེའི་དུས་རབས་ཀྱི་རྒྱལ་ཐོག་༣༥། སྤྱི་ལོ་༡༧༦༧ ནས་༡༧༨༢ བར་གྱི་ཐོན་བྷུ་རིའི་དུས་རབས་ཀྱི་རྒྱལ་ཐོག་༡། ༡༧༨༢ ནས་༡༩༣༢ བར་གྱི་བྷེང་ཀོག་ར་ཏ་ན་ཀོ་སིན་དུས་རབས་ཀྱི་རྒྱལ་རྒྱལ་ཐོག་༩ བཅས་རྒྱལ་པོས་དབང་འཛིན་དང་། དུས་ཕྱིས་དབྱིན་ཇིས་མི་སེར་སྤེལ་ཡུལ་ལས་ཐར་རྗེས་མང་གཙོས་སྲིད་བསྐྱངས་པའི་བར་ཏེ། ཀྱག་ཀྱོག་གི་དུས་རབས་དུ་མ་ཞིག་གི་རིང་དམག་འཁྲུག་དང་དུས་ཟིང་ཇི་སྙེད་གཅིག་བརྒྱུད་པའི་ཁྲོད་ནས་ད་བར་ནང་བསྟན་གྱི་མུ་ཏིག་འོད་འཚེར་འཚེར་དུ་བཞུགས་ཀྱིན་པ་ལགས་སོ། དེང་སང་ཐ་ལན་གྱི་ཆོས་བྱེད་དགེ་འདུག་པ་དག་ལ་མཚོན་ན་དམ་པའི་ཆོས་ཕྱོགས་ཀྱི་ཆོས་དཔེ་ཙམ་མིན་པར་འཇིག་རྟེན་སྲིད་པའི་ལུགས་ཀྱི་ཤེས་རིག་ལའང་སློབ་གཉེར་གནང་སྟེ་ཁག་གཅིག་དམའ་འབྲིང་སློབ་གྲྭར་སློབ་འཁྲིད་གནང་སྟོབས་ཀྱིས་དམངས་ཁྲོད་དུ་ནང་ཆོས་ཀྱི་གོ་རྟོགས་འཕེལ་ཞིང་རྒྱལ་ཁམས་སྟོད་སྨད་བར་གསུམ་དུ་ནང་པའི་ཆོས་སྡེ་དགོན་གནས་རྩ་འཛུགས་གནང་མུས་དང་། ཁག་གཅིག་མུ་མཐུད་དེ་ནང་པའི་མཐོ་སློབ་ཆེ་ཁག་འགྲིམས་ཏེ་སློབ་མཐར་ཕྱིན་རྗེས་ལོ་ངོ་བཅུ་ཕྲག་རིང་ཕྱི་རྒྱལ་ཡུལ་གྲུ་ཁག་ཏུ་ནང་ཆོས་འཆད་འཁྲིད་གནང་བར་ཆེད་དུ་ཕེབས་ནས་རྒྱལ་བསྟན་ཕྱོགས་ཀུན་ཏུ་སྤེལ་བཞིན་པ་ལགས་སོ། །

2012/01/15

ལྷོ་ཤར་ཨེ་ཤ་ཡའི་ཁུལ་གྱི་ནང་ཆོས་དར་རྒྱས།

ལྷོ་ཤར་ཨེ་ཤ་ཡའི་ཁུལ་གྱི་ནང་ཆོས་དར་རྒྱས།
༼བྷར་མ། ཐ་ལན་ཌི། ཁམ་བྷོ་ཌི་ཡ། ལའོ་སུ། ཝེཊ་ནམ། ཨིན་ཌོ་ནི་སི་ཞི་ཡ། མ་ལས་པེན་ནིན་སུ་ལར།༽

ནང་བསྟན་ནི་རྒྱལ་སྲས་གཞོན་ནུ་དོན་འགྲུབ་གང་ཉིད་སྲིད་པའི་ཁམས་ན་ཆེས་འཇིགས་སུ་རུང་བའི་སྐྱེ་རྒ་ན་འཆིའི་སྡུག་བསྔལ་མཐའ་དག་ལས་རྣམ་པ་ཀུན་ཏུ་རྒྱལ་ཏེ་ཐར་པའི་གོ་འཕང་ལ་བདེ་བླག་ཏུ་གཤེགས་ཤིང་ཐབས་ལམ་དེ་ཉིད་གཞན་གདུལ་བྱའི་ཁམས་དབང་བསམ་པ་དང་མཐུན་པར་གདམས་པའི་མན་ངག་ཞིག་ཡིན་པར་འདོད། དེ་ལྟ་བུའི་བསྟན་པ་དེ་ཉིད་རྒྱ་གར་འཕགས་པའི་ཡུལ་ནས་ཤར་ཙི་ནའི་ཁུལ། བྱང་ཁ་བ་ཅན། ལྷོ་ལང་ཀའི་གླིང་། ཤར་བྷར་མ་དང་ཐ་ལན་ཌིའི་ཁམས་སོགས་ཨེ་ཤ་ཡའི་ཤར་ནུབ་ཀྱི་ཡུལ་གྲུ་གང་སར་དར་ཁྱབ་བྱུང་ཚུལ་ཀྱི་ངོ་མཚར་བའི་ལོ་རྒྱུས་བརྗོད་ཀྱིས་མི་ལང་བ་ཡོད་ཀྱང་། སྐབས་སུ་བབ་པའི་གཏམ་ལྷོ་ཤར་ཨེ་ཤ་ཡའི་མངའ་ཁུལ་ན་རྒྱལ་བསྟན་རིན་པོ་ཇི་ལྟར་དར་ཚུལ་མདོར་ཙམ་བརྗོད་ན། གནའ་དུས་སུ་ལྷོ་ཤར་ཨེ་ཤ་ཡའི་ཡུལ་གྲུ་ཁག་གི་ནང་དུ་ནང་ཆོས་དར་རྒྱས་བྱུང་བ་དག་ཕལ་མོ་ཆེ་རྒྱ་གར་གྱི་ཚོང་པ་དག་ཉེ་སྐོར་ཁྱིམ་མཚེས་ཡུལ་ཁག་ཏུ་ཚོར་སྐོར་ལ་འོངས་ནས་རིན་ལྡན་ཟང་ཟིང་གི་ཅ་དངོས་གསེར་དངུལ་ལ་བཙོང་ཞོར་རིན་མེད་དམ་ཆོས་ཀྱི་བདུད་རྩི་ལེགས་སྐྱེས་སུ་ཕུལ་བ་ལས་བྱུང་ཡོད་ལ། ཆོས་རྒྱལ་མྱ་ངན་མེད་ཀྱིས་དྲག་པོའི་དབང་ཤུགས་ལས་ཀྱང་བྱུང་ཡོད་པར་བཤད་ཅི་དགོས། གང་ལྟར་ཡུལ་གྲུ་དེ་དག་གི་ནང་དུ་སྔར་ཡོད་རང་རང་གི་རིག་གཞུང་ལ་ཕྱིར་དར་ནང་ཆོས་ཀྱིས་ཤུགས་རྐྱེན་ཐེབས་ཏེ་ཧིན་དྷུ་དང་ནང་ཆོས་འདྲེས་མར་ཉམས་ལེན་བྱེད་པ་དང་། མཚམས་རེར་སྔར་ཡོད་རིག་གཞུང་རྙིང་པར་རྒྱུན་སྐྱོང་བྱས་པ་ཡང་བྱུང་ཡོད་པར་སྣང་། 

དང་པོ། བྷར་མར་ནང་ཆོས་དར་ཚུལ་ནི་ཁོ་བོས་ཞིབ་ཕྲ་ཞིག་བྲིས་ཟིན་ཀྱང་འདིར་འདོད་ཚུལ་ཅུང་མི་འདྲ་བའི་དབང་གིས་ས་བཅད་མ་སྟོང་ཙམ་དུ་ཅུང་ཟད་བརྗོད་ན། སྤྱི་ལོའི་སྔོན་༢༧༣ ནས་༢༣༢ བར་བྱུང་བའི་སྙན་གྲགས་ཆེ་བའི་རྒྱལ་པོ་ཨ་ཤོག་ཀ་སྟེ་མྱ་ངན་
ཕ་གྷན་དྷ་གསེར་གྱི་མཆོད་རྟེན།
མེད་ཀྱི་དམ་ཆོས་སྤེལ་བའི་ཕོ་ཉ་བ་(misonaries)དག་སྐབས་དེའི་བྷར་མའི་ཚོང་འབྲེལ་ལྟེ་གནས་ཐེ་ཊོན་(Thaton)ས་གནས་སུ་ཚོང་པ་ཁག་དང་འགྲོགས་ཏེ་རིམ་པས་འབྱོར་ཞིང་། དེ་དུས་ཕྱོགས་གཅིག་ནས་རྒྱ་གར་དང་བྷར་མའི་ཚོང་འབྲེལ་ཡར་རྒྱས་ཕྱིན་དང་པ་དང་ཆབས་གཅིག་ཕྱོགས་གཞན་ཞིག་ནས་ཐེ་ཊོན་ས་གནས་ཀྱི་ཡུལ་མི་དག་དམ་པའི་ཆོས་ལ་དད་གུས་ཐོབ་ཏེ་མི་རིང་བར་ནང་པའི་ཡུལ་གྲོང་ཞིག་ཏུ་གྱུར། རྒྱ་གར་ནས་བཏང་བའི་ཆོས་ཀྱི་ཕོ་ཉ་བ་ཕལ་མོ་ཆེ་ཡང་གནས་འདིར་ཕྱག་ཕེབས་ཤིང་ཐེ་ཊོན་ས་གནས་ནི་བརྟན་སྡེ་བའི་གལ་ཆེའི་ལྟེ་གནས་ཤིག་ཏུ་གྱུར་ཡོད་པར་བཤད། དེ་རྗེས་དུས་རབས་འོག་མར་བྷར་མ་བྱང་ཕྱོགས་ཁུལ་དུ་གསང་སྔགས་རྡོ་རྗེ་ཐེག་པ་འཆད་ཉན་རགས་རིམ་བྱུང་བར་མངོན། གནས་བརྟན་པས་གསུངས་ན་བྱང་ཕྱོགས་པས་ཧིན་དྷུ་དང་དམངས་ཁྲོད་ཀྱི་རིག་གཞུང་མཉམ་བསྲེས་ཀྱིས་ཉམས་ལེན་བྱས་པ་ཞིག་ཡིན་པར་འདོད་ལ་དྲང་མོར་བཤད་ན་བདེན་རྒྱུ་ཞིག་ལོས་ཡོད། སྤྱི་ལོའི་དུས་རབས་༡༡ པའི་དཀྱིལ་དུ་ཕེབས་ཞིང་སྟོབས་ཤུགས་དང་མངའ་ཐང་ཆེ་བའི་བྷར་མའི་རྒྱལ་པོ་ཨ་ནྭ་ར་ཐས་ (Anawratha) བྷར་མ་ལྷོ་བྱང་གཉིས་ཀར་སྟོབས་ཀྱིས་དབང་དུ་བསྒྱུར། མ་ཟད་ཁོང་ཉིད་གནས་བརྟན་སྡེ་པའི་ནང་བསྟན་ཀྱི་ཕྱོགས་གཏོགས་སམ་རྒྱབ་རྟེན་སྟོབས་ཅན་ཞིག་ཏུ་གྱུར་པ་ཏེ། དཔེར་ན་རི་བོ་དགེ་ལྡན་པ་བོད་རྒྱལ་ཁབ་ཀྱི་ཆོས་ལུགས་ཡིན་པ་བཞིན་དུ་སྐབས་དེའི་གནས་བརྟན་སྡེ་པ་ཡང་བྷར་མའི་རྒྱལ་ཁབ་གཞུང་གི་ཆོས་ལུགས་སུ་རྦད་དེ་བསྒྱུར། ཁོས་ལྷོ་ཕྱོགས་ལང་ཀའི་གླིང་ནས་རྒྱལ་བའི་གསུང་རབས་དང་སྐུ་གདུང་རྩ་ཆེན་དག་ཆེད་དུ་བསྒྲུབས་ཤིང་དམ་ཆོས་དར་སྤེལ་བཏང་། བྷར་མའི་ཡུལ་དུ་གཙུག་ལག་ཁང་དུ་མ་བརྩིགས་པ་དང་ཁྱད་པར་དུ་ཆེས་སྙན་གྲགས་ཆེ་བའི་ཕ་གྷན་ཡུལ་གྱི་གསེར་གྱི་མཆོད་རྟེན་ཡང་ཁོང་གིས་བཞེངས་པར་གྲགས། གང་ལྟར་མི་རིང་བར་ཕ་གྷན་ས་གནས་ནི་ནང་ཆོས་ཀྱི་ལྟེ་གནས་གཙོ་བོ་ཞིག་ཏུ་ཆགས། དམིགས་བསལ་སྟབས་ལེགས་པ་ཞིག་ལ་བར་སྐབས་བྷར་མར་ཆས་སྲིད་དང་དམག་གི་དུས་ཟིང་འགའ་ཤས་བྱུང་ཡང་རྒྱལ་བསྟན་རིན་པོ་ཆེ་ལ་ཉམས་རྒུད་བྱུང་མེད་པ་སྟེ། བྷར་མའི་རྒྱལ་པོ་འདྲ་མིན་གང་ཞིག་བྱུང་རུང་དམངས་ཕལ་པའི་དཔུང་གཉེན་ཉག་གཅིག་ཏུ་བཞེངས་ཏེ་ཁོང་ཚོའི་འདོད་དོན་བསྐངས་བ་སྟེ་དགོན་པར་སློབ་གྲྭ་བཙུག་ཅིང་དགེ་འདུན་པས་ནང་ཆོས་ཀྱི་རྨང་གཞི་དང་ཡི་གེ་འབྲི་ཀློག་སློབ་པ་ལྟ་བུའི་རྒྱུད་སྲོལ་འོག་ནས་ནང་བསྟན་ཀྱི་རྩ་བ་ཚུགས་ཤིང་རྩེ་མོ་ཡོངས་སུ་རྒྱས་ཡོད། ཉེ་ཆར་དུས་རབས་༡༩ པའི་ནང་དབྱིན་ཇིས་མི་སེར་སྤེལ་ཡུལ་གྱི་རྡོག་འོག་ན་ཤོར་ཏེ་བྷར་མའི་ཆོས་དང་རིག་གཞུང་གང་ཐད་ནས་ཉམས་ཆག་ཤོར་ཡོད་ཀྱང་དུས་རབས་༢༠ པའི་ནང་སླར་ཡང་བྷར་མར་རང་བཙན་ཐོབ་ཏེ་ནང་པའི་ཆོས་དང་དེ་དང་འབྲེལ་བའི་རིག་གཞུང་ཉམས་པ་སླར་གསོས་དང་མ་ཉམས་གོང་འཕེལ་དུ་གཏོང་བཞིན་ཡོད། 
༼མུ་འགོད་་ཐའེ་ལན༽

2012/01/12

ལེ་ནལ་མེ་སི།Lionel Messi

ལཱེ་ནལ་མེ་སི་ནི་དེང་སྐབས་འཇིག་རྟེན་ཟླུམ་པོ་འདིའི་སྟེང་གི་ཆེས་མཚན་སྙན་ཆེ་ཤོས་ཀྱི་རྐང་རྩེད་པོ་ལོ་བ་ཡིན། འདི་ལོ་བརྩིས་པའི་ལོ་གསུམ་གྱི་རིང་སྟེ་ ༢༠༠༩། ༢༠༡༠། ༢༠༡༡ བཅས་བསྟུད་མར་ཆེས་ཕུལ་གྱི་རྩེ་འགྲན་པའི་བྱ་དགའ་གཟེངས་བསྟོད་ཐོབ་ཡོད། སྤྱིར་ན་འཛམ་གླིང་འདིར་རྩེད་མོའི་རྣམ་གྲངས་བཤད་ཀྱི་མི་ལང་བ་ཡོད་ཅིང་དེ་དག་སོ་སོར་ཕུལ་བྱུང་གི་རྩེ་འགྲན་པ་ནམ་མཁའི་སྐར་ཚོགས་ལས་གྲངས་མང་བ་ཡོད་ཀྱང་། དམིགས་བསལ་རྐང་རྩེད་པོ་ལོ་ནི་འཛམ་གླིང་ཤར་ནུབ་གང་སར་ཆེས་དར་སྲོལ་དང་དགའ་བསུ་ཐོབ་པའི་རྩེད་མོ་ཞིག་ཡིན་སྟབས། སྒྱུ་རྩལ་ལ་མཆོག་ཏུ་མཁས་པའི་རྩེ་འགྲན་པ་ཡང་ས་ཁའི་རྡུལ་གྲངས་ལས་མང་བའི་ཁྲོད་ནས་ཆེས་རྩེ་ཕུད་ཅིག་འཐོན་རྒྱུ་ནི་ཤིན་ཏུ་དཀའ་བ་ཡིན་པ་བཤད་མི་དགོས་པ་ཞིག་རེད། ལཱེ་ནལ་མེ་སིའི་ལོ་རྒྱུས་མདོར་ཙམ་བཀོད་ན། ཁོང་སྤྱི་༡༩༨༧། ཟླ་བ་༦། ཚེས་༧ ལ་ལྷོ་ཨ་རིའི་རྒྱལ་ཁབ་ཨར་རྗེན་ཊི་ནའི་རོ་སར་རིའོ་ (Rosario, Argentina) ཞེས་པའི་ས་གནས་སུ་ཕ་རྗོར་རྗི་དང་མ་གསི་ལི་ཡའི་བུ་རུ་སྐྱེས། (Jorge and Celia Messi) ཁོང་ཉིད་ལོ་གྲངས་ལྔ་ལ་སོན་མ་ཐག་པའི་ནུ་ཞོ་འཐུང་བའི་བུ་ཆུང་ཁྲུ་གང་མ་ཞིག་ཡིན་སྐབས་ནས་ཨ་ཕས་གཉེར་བའི་རྐང་སྦོལ་རུ་ཁག་ཆུང་ངུ་ཞིག་ཏུ་རྩེ་མགོ་བཙུགས་ཏེ་སྒྱུ་རྩལ་གྱི་མཛེས་པའི་མེ་ཏོག་གི་ཞལ་ཁ་ཕྱེས། ལོ་བརྒྱད་ལ་སླེབས་དུས་ནེ་ཝལ་བུ་རྒན་པའི་རུ་ཁག་ལ་ཞུགས་ཏེ་སྒྱུ་རྩལ་གྱི་རྨང་གཞི་ལྷུན་གྱིས་གྲུབ་ཚར་ཞིང་ལོ་ངོ་དེ་དག་གི་རིང་ཁོ་རང་ཉིད་ཀྱི་རུ་ཁག་ལ་རྒྱལ་ཁ་བླངས་བ་ཉུང་ཉུང་ཁྱོན་ནས་མིན། འོན་ཀྱང་སྟབས་མ་ལེགས་པར་ལོ་གྲངས་ ༡༡ ལ་སོན་སྐབས་གཟུགས་ཁམས་ལ་རྨེན་བུའི་སྐུལ་རྒྱུ་ཉམས་པའི་ནད་གཞི་ (hormone deficiency) ལྕི་མོ་ཞིག་ཕོག་སྟེ་ཟླ་རེའི་སྨན་རིན་ཡོ་སྒོར་༥༠༠ ཐམ་པའི་འགྲོ་གྲོན་ནི་ནང་མིས་ཕར་ཞོགས་རང་རྒྱལ་ནང་གི་རྐང་སྦོལ་རུ་ཁག་མིང་གྲགས་ཅན་གཙང་པོའི་སྡེར་མ་སྟེ་ (river plate) རི་ཝལ་པེ་ལེ་ཊིས་ཉར་འདོད་ཀྱང་སྨན་རིན་ལ་འཛེམས་ཏེ་བདག་མ་ཐུབ་པའི་གནས་སུ་གྱར། སྐབས་དེར་དེང་དུས་འཛམ་གླིང་ནང་གི་ཆེས་རྩེ་ཕུད་དུ་གྲགས་པའི་སུ་པན་རྒྱལ་ཁབ་ཀྱི་སྒེར་གཉེར་རྐང་སྦོལ་རུ་ཁག་བྷར་སི་ལོ་ནའི་འགན་འཛིན་ཀར་ལོ་སུ་རེ་སེག་གིས་གནས་ཚུལ་དེ་ཤེས་མ་ཐག་མེ་སིའི་སྒྱུ་རྩལ་ལ་ཡིད་རབ་ཏུ་མགུ་སྟེ་བྷར་སི་ལོ་ནས་ཉོ་རྒྱུར་ཐག་བཅད་པ་དང་ཕ་མས་ཀྱང་མོས་མཐུན་བྱུང་ནས་སུ་པན་ལ་འོངས། ཐོག་མར་བྷར་སར་ལོ་ནའི་རུ་ཁག་འོག་མར་རྩེས་ཀྱང་ཡུན་རིང་མ་འགོར་བར་རྨད་དུ་བྱུང་བའི་སྒྱུ་རྩལ་དེས་རུ་ཁག་རྒན་པའི་<ཁ་སྡེ་>ཡི་ནང་དུ་གནས་སྤར་ཐོབ། ཁ་སྡེའི་རྩེད་འགྲན་ཐེངས་སུམ་ཅུར་པོ་ལོ་༣༧ བླུགས་ཏེ་<ཀ་སྡེར་>སྤར་རྒྱུའི་ལྟ་གོན་ལེགས་པར་གྲུབ་སྟེ་སྤྱི་ལོ་ ༢༠༠༤ ལོར་ལོ་གྲངས་ ༡༧ སྐབས་རུ་ཁག་ཀ་པའི་མིང་ཐོར་དངོས་སུ་འཁོད་དེ་ད་བར་རྩེ་འགྲན་གྱི་རྒྱལ་ཁ་བླངས་བ་གྲངས་ཀྱི་མི་ལང་ཞིང་ལྟད་མོ་བས་དགའ་གསུའི་ཐལ་སྒྲ་དང་དགྱེས་པའི་ཀུ་ཅོ་དག་གིས་ལྗོངས་ལྔ་གླིང་བཞི་ཡོམ་ཡོམ་དུ་གཡོ་བཞིན་ཡོད། གང་ལྟར་རྒྱལ་ཁབ་རྩེ་སྐབས་ཨར་རྗེན་ཊི་ན་དང་སྒེར་གཉེས་རུ་ཁག་རྩེ་དུས་བྷར་ས་ལོ་ནར་རྩེ་ཞིང་གང་ཞིག་ཏུ་རྩེས་ཀྱང་རུ་ཁག་གི་རྩེ་མོའི་ལྡེ་མིག་ཉག་གཅིག་དུ་བརྩི་བཞིན་ཡོད། ཁོང་གིས་རྩེས་པའི་ལྟད་མོར་གཟིགས་ཤིག



2012/01/08

ཆུ་ཚན། རང་བྱུང་གི་གསོ་དབྱད།

སྟོད་གངས་རིའི་ཉེ་འདབས་ཀྱི་པྲེ་ཏ་པུ་རིའི་ཆུ་ཚན།

ན་མོ་གུ་རུ་བྷཻ་ཥ་ཛ་ཡ།
 དེ་ལ་འདིར་འགྲོ་བའི་བསོད་ནམས་དཔའ་ལས་གྲུབ་པའི་རང་བྱུང་གི་གཏེར་ཁ་སྨན་ཆུ་དང་ཆུ་ཚན་ལས་གཉིས་ལས་འདིར་ཆུ་ཚན་ཀྱི་སྐོར་ཅུང་ཟད་བརྗོད་ན། སྤྱིར་ན་ཆུ་ཚན་ནི་བོད་ཀྱི་གསོ་བ་རིག་པའི་གཞུང་ལས་གལ་ཆེར་བཟུང་སྟེ་དབྱེ་བ་དང་དེའི་ཕན་ནུས་སོགས་རྒྱ་ཆེར་བརྗོད་ཡོད་པ་དག་ལས་མདོར་ཙམ་བཀོད་ན། ཆུ་ཚན་ལ་མུ་ཟི། རྡོ་ཞོ། རྡོ་ཆུ། ཅོང་ཞི། མཚུར་བཅས་རྩ་བའི་དབྱེ་བ་ལྔ་དང་དེ་དག་རེ་རེ་ལའང་མཆོག་དམན་ལྔ་རེ་དབྱེ་བའི་བརྒྱ་ཐམ་པ་དང་། རྡོ་སོལ་རྐྱང་པའི་ཆུ་ཚན་བཅས་བརྒྱ་དང་གཅིག་ཡོད་ཅིང་ད་རུང་དེ་དག་བྲག་ཞུན་སོགས་རིགས་གཞན་དང་འདྲེས་མ་འདྲེས་ཀྱི་རྣམ་གཞག་དུ་མ་མཆིས་པ་དག་ལས།
01. དང་པོ་རིགས་དང་ཕན་ནུས་ནི།
༡། 
མུ་ཟིའི་ཆུ་ཚན་གྱིས། འབྲས་དང་། ཟས་མ་ཞུ་བའི་སྟོབས་ཀྱིས་ལུས་ལ་རྨ་འཁྲེག་པོ་རེ་ཆགས་པའི་ནད་ཅིག ལྷོག་པ། མི་ཕྱུགས་གཉིས་ཀར་རྨ་ཆགས་པའི་འགོ་ནད ཤ་བཀྲ མདོག་སྐྱ་ཁྲར་འགྱུར་བའི་པགས་ནད་ཅིག དུག་ནད། གླང་ཤུ། པགས་མདོག་སྐྱ་བོ་འབྲུམ་ཆུང་སྐྱ་གསོབ་ཡོད་པ་ཟ་འཕྲུག་ལྡང་བའི་པགས་ནད་ཅིག་དང༌། ཤ་རོ་གླང་གི་གཉའ་བ་ལྟར་མཐུག་ཅིང་སེར་ག་འབྱུང་བའི་མཛེ་ནད་རིགས་ནང་ནས་གཅིག་དང་གཉིས་ལ་འཇུགའབྲུམ་ཐོར། ལྷ་འབྲུམ། ཁྱེ་མ། པགས་ནད་ཀྱི་བྱེ་བྲག་ཅིག་སྟེ།  ཡུལ་སྐད་དུ་ཁྱི་རྨ་ཟེར་ཞིང་། སྨན་གཞུང་དུ་གླང་ཤུ་ཟེར་བ་དེའི་མིང་། ཤུ་ཐོར། གཉན་ནད་ཤུ་བའི་རང་བཞིན་གྱི་ཐོར་པ་ཞིག མཛེ་རིགས་ཡོངས། ཆུ་སེར་ནག་པོ་དང་གཉན་སྲིན་པརྤ་ཏ་གཉིས་འདོམས་པ་ལ་རྒྱབ་རྟེན་ཀླུས་བྱས་པར་གྲགས་པའི་ལུས་ཀྱི་གནས་ཀུན་མ་རུང་བ་རུལ་མྱག་ལྟར་འགྱུར་བའི་ནད་དེ། ནང་གསེས་སུ་དབྱེ་ན་མཛེ་ནད་རིགས་བཅོ་བརྒྱད་དམ་སུམ་ཅུ་རྩ་དྲུག་མཆིས་སོ། ། ཆུ་སེར་ནད། ཚིགས་མིག་དང་ཤ་པགས་བར་སོགས་སུ་གནས་པའི་ཁྲག་གི་སྙིགས་མ་དང༌། མཁྲིས་པའི་དྭངས་མ་ལས་བྱུང་བའི་མདོག་དམར་སེར་ཆུ་ལྟར་སླ་ལ་འབྱར་བག་གི་རྩི་དང་ལྡན་པ་དེ་ལ་ཟེར་ཏེ། དེ་འཕེལ་ཟད་དུ་གྱུར་ན་ཆུ་སེར་གྱི་ནད་དུ་འགྱུར་བ་ཡིན། དྲེག་གྲུམ། ལག་པའི་གྲུ་མོ་གཉིས་དང་རྐང་པའི་བོལ་ཚིགས་གཉིས་བཅས་ན་བ་དྲེག་ནད་དང༌། ཡན་ལག་གི་ཚིགས་ཀུན་ན་བ་གྲུམ་བུའི་ནད་དང་གཉིས་སོ། ། སྙིང་ཚད། ཟག་ཆུ། ཆབ་ཆེ་ཆུང་མི་ཐུབ་པའི་ནད་ཅིག སྐྱ་རྦབ་ལུས་ཀྱི་མེ་དྲོད་ཉམས་པ་སོགས་ལས་བྱུང་བའི་པགས་མདོག་སྐྱ་ཞིང་སྐྲངས་པ་རྦབ་རྦབ་ཏུ་འབྱུང་བའི་ཆུ་ནད་ཅིག སོགས་མདོར་ན་པགས་ནད་རིགས་ལ་ཕན་པར་བཤད། ༢། རྡོ་ཞོའི་ཆུ་ཚན་གྱིས། བད་ཀན། ལུས་ཀྱི་ཆ་ཤས་སུ་གཏོགས་ཤིང༌། རྐྱེན་དང་ཕྲད་ན་རྩ་བའི་ནད་གསུམ་གྱི་ཡ་གྱལ་དུའང་འགྱུར་བ་ཞིག གྲང་བ། མེ་དྲོད་ཉམས་པ། མ་ཞུ་བ། ལྷན་སྐྲན་སོགས་གྲང་ལན་ལ་ཕན། ༣། རྡོ་ཆུའི་ཆུ་ཚན་བསྟེན་ན། ཆག་གྲུམ་སྦྱོར། རུས་པ་ཆག་གྲུམ་སྦྱོར། རེངས་འཁུམས་འདུལ། ལུས་ཀྱི་རྩ་རྒྱུས་རིང་ཐུང་ཤོར་བ། རྩ་འགྲམ་རྩ་ཆད་མཐུད་པ་སོགས་མདོར་ན་རྩ་ནད་ལ་ཕན།  ཅོང་ཞིའི་ཆུ་ཚན་བསྟེན་ན། དུག སྨུན་པོའི་རིགས། ཁྲག་དང་མཁྲིས་པ་ཤུགས་དྲག་པའི་ནག་གཅིག་ཡིན་པ་ཡོད། ཚད་རྙིང་། གྲང་མཁྲིས། སྐྲན་རིགས་ཐམས་ཅད་ལ་ཕན་པར་བཤད། ༥། མཚུར་གྱིས། ཁོང་སྐྲན་དང་སྨུག་པོ། ཁོང་སྲིན་སོགས་ལ་ཕན་པར་བཤད།
02.              གཉིས་པ་ཆུ་ཚན་བཟང་ངན་གྱི་མཚན་ཉིད།
ཆུ་ཚན་ཡོད་པའི་ས་བབ་དེ་སྐམ་གཤེར་སྙོམས་པ། དུག་རིགས་ཉུང་བ། ནགས་ཚལ་ཧ་ཅང་འཐུག་མ་དྲགས་པ། ཆུ་གཞན་དང་མ་འདྲེས་ཤིང་ཆུ་ཚན་རང་གི་ངོ་བོ་གསལ་བ། རྒྱུན་རིང་འཁྱིལ་ཏེ་རུལ་བ་མ་ཡིན་པ། རླངས་པ་མ་སྤྱིལ་བར་ཕྱིར་ཐོན་ས་ཡོད་པ་དག་བཟང་ཞིང་དེ་ལས་ལྡོག་ན་ངན་པར་བཤད་དོ། །
03.              གསུམ་པ་བསྟེན་པའི་ནམ་དུས།
དཔྱིད་ཀ་དང་སྟོན་མཇུག་དང་། ཁྱད་པར་སྨན་རྩིས་ལུགས་ལྟར་ན་སྟོན་ཁའི་དྲང་སྲོང་སྐར་མ་རྀ་ཥིའི་དུས་ལ་སྨན་དཔྱད་བྱས་ན་ལེགས་པ་ཙམ་མ་ཟད་སྐབས་དེར་ཆར་ཆུ་ཐམས་ཅད་སྨན་ཡིན་པར་བཤད། ཕ་ཡུལ་གྱི་གཏམ་དཔེར་(སྐར་མ་རྀ་ཥི་ཤར་ཉིན་མོ། །སྡེ་གཞན་པས་རྟ་ཕོ་འདར་ལ་འདོན། ངེད་ཚང་གིས་ར་ཕོ་འདར་ལ་འདོན།)ཞེས་ཁྱིམ་ཚང་འཁོས་ཀ་བཟང་ངན་ཡང་སྐར་མ་རྀ་ཥི་དང་སྦྱར་ནས་བཤད་སྲོལ་ཡོད། སྨན་ཆར་ལ་བསྟེན་ཞིང་དབྱར་ཁའི་དུག་ཆར་སྐབས་སུ་སྤངས་ན་བཟང་བ་སོགས་འབྱུང་བཞི་ལྷ་རུ་གོམས་པའི་སྐྱེ་བོ་དག་གི་བག་ཆགས་ལྟར་བྱས་ཀྱང་སྐྱོན་ཆེར་མ་མཆིས། །
04.              བཞི་པ་ཆུ་ཚན་བསྟེན་ཚུལ།
ལུས་སྟོབས་ཆེ་ཆུང་དང་། ནད་གཞི་ལྕི་ཡང་། ཁྲག་ཤེད་མཐོ་དམན་དང་རླུངས་ཁམས་སོགས་ལ་ལྟོས་ཏེ། ཆུ་ཚ་ཞན། ཡུན་རིང་ཐུང་། ཟས་འཟའ་ཕྱོགས་སོགས་ལ་དོ་སྣང་དགོས་པ་སྟེ་གལ་ཏེ། ནད་པ་གཟུགས་གཞི་སྐྱོ་ཞིང་ནད་བབ་ལྕི་བ། ཁྲག་ཤེད་དང་རླུང་ཁམས་མཐོ་ན། ཆུ་དྲོད་འཇམ་ལ་རྒྱུན་ཐུང་ངུར་ཉལ་དགོས། དམིགས་བསལ་ཅོང་ཞི་དང་རྡོ་སོལ་ཆུ་ཚན་ཡིན་ན་ཆུ་དེས་ཟས་གཡོས་སྦྱོར་དང་གང་ཐུབ་འཐུང་དགོས་པར་བཤད། རེངས་འཁུམས་རྙིང་པར་འཕུར་མཉེ་དང་། སྒུར་སྐྱོག་ཚོར་དལ་བུར་བསྲང་། ཁོག་སྐྲན་ཅན་ལ་རན་པར་བརྡེག་པ། ཆུ་སེར་ཅན་དང་ལུང་ཟུང་ཞན་ཆེ་བ་རྣམ་སྔོན་ལ་གཡེར་མའི་ཆུ་ཡིས་བཀྲུ་བ། ཆུ་ཚན་ཁྲོན་པར་ཡོད་ན་རས་བཀབ་པའི་རླངས་པས་རྔུལ་ཆུ་འདོན་གང་ཐུབ་དགོས། གང་ལྟར་ལྟོ་སྟོང་དང་ཚ་བ་ན་སྐབས་སུ་ཆུ་ཚན་ལ་གཏན་ནས་འཇུག་མི་རུང་། ཁྲག་ཤེད་ཅན་དང་རླུང་ཁམས་མཐོ་རིགས་ཆུ་ཚན་བསྟེན་སྐབས་ཐོག་མར་ཆུ་ཚན་ལ་མགོ་བོ་སྦངས་ཏེ་ཞུགས་ན་ཉེན་ཁ་ཆུང་བར་བཤད། །
05.              ལྔ་པ་བསྟེན་པའི་དུས་ཡུན།
ཉུང་མཐར་ཞག་པོ་ཉེར་གཅིག་སྟེ་བདུན་ཕྲག་གསུམ་ཙམ་དགོས་པར་བཤད་ལ་དེ་ལས་མང་ན་མི་ཆོག་རྒྱུ་མེད་ལ་ཞག་བཅུ་དགུ་དང་ཉི་ཤུ་ཐམས་པ་ཡིན་ནའང་སྐྱོན་མེད་པར་བསམ། ལྷས་བཀོད་པའི་བདུན་ཕྲན་མ་ཚང་ན་ནད་གཞི་མི་དྲག་པ་ག་ལ་སྲིད། 
06.              དྲུག་པ་ནད་དྲག་པའི་རྟགས་མཚན།
གསོ་རིག་གཞུང་གི་ལ་ལག་ལེན་ལ་བྱང་ཞིང་ལོ་མང་ཉམས་མྱོང་ཅན་གྱི་མན་ངག་ལྟར་ན། ཉིན་གསུམ་བཞིའི་མཚམས་སུ་སྔར་གྱི་ནད་རྙིང་པ་ཚང་མ་བསླངས་སོང་བའི་ཚོར་སྣང་དང་། ཟུག་གཟེར་བྱུང་ན་ནད་གཞི་དྲག་པའི་མངོན་རྟགས་གསལ་པོ་བྱུང་བ་སྟེ་མུ་མཐུད་ནས་ཞུགས་ན་མགྱོགས་པོ་དྲག་སྐྱེད་འོང་བར་བཤད། ། 
ཝར་ཎ་མཐོ་སློབ་སྨན་གསོ་རིག་སྡེ་ཚན་གྱི་སློབ་དཔོན་བློ་བཟང་བསྟན་འཛིན་གྱིས་བྲིས་པའི་རང་བྱུང་ཆུ་ཚན་སྐོར་དེར་གཞི་བཅོལ་ཏེ་བྲིས་པ་ཡིན། །

2012/01/06

རྐང་བགྲོད།

དེང་སང་ང་ཁོམ་པ་ཡོད་པའི་སྐབས་དང་བསྟུན་ཏེ་དྲ་རྒྱ་འདི་འགེངས་དགོས་བསམ་སོང་ཡང་། སུ་ཡང་མེད་སའི་ཁོར་ཡུག་གཅིག་ན་རི་ཁྲོད་ཀྱི་མཚམས་པ་བཞིན་འདུག་དུས། ཡང་འབྲི་བསམ་པའི་བརྗོད་བྱ་ཞིག་གཏན་ནས་རག་གི་མི་འདུག རྒྱུན་པར་ཁོ་བོ་རི་ཁར་འཁྱམ་འཁྱམ་རེ་འགྲོ་ན་དོན་དག་རེ་བློ་ལ་འཁོར་གྱི་ཡོད་མོད་དེང་སང་གདོན་གྱིས་ཁྱེར་སོང་བ་ལྟར་དེ་ཡང་ཡོང་གི་མི་འདུག ཁ་སེང་རེ་བ་དེ་བྱས་ཏེ་སྤྱི་ལེ་བཞིའི་ལམ་ཁར་གོམ་བགྲོད་སྤྱད་དེ་བསམ་བློ་བཏང་ཡང་ཀླད་རྒྱ་ལ་གང་ཡང་འཁོར་མ་སོང་། ངའི་འགྲོ་ལམ་གཡས་གཡོན་དུ་ནང་པའི་ཁྱིམ་ཚང་ཐར་ཐོར་མེད་ས་གཏན་ནས་མི་འདུག ཚང་མས་མཁྱེན་གསལ་ལྟར་ཧི་མ་ལའི་ནང་པ་ཞིག་ཡིན་ཕྱིན་ཁ་ནས་སྐྱབས་འགྲོ་མི་ཤེས་རུང་ཁང་ཐོག་ཏུ་ཇོ་དར་འདོམ་གང་བསྒྲོན་ཤེས་ཀྱི་ཡོད་སྟབས་གྲོང་པའི་ནང་གི་ནང་པ་བརྩི་བ་ནི་ཆེས་སླ་ཤོས་དེ་རེད། ཁོང་ཚོ་ཕལ་མོ་ཆེ་གར་ཞྭ་དང་། ལ་ཧོར། ཁུ་ནུ། རྒྱ་གར་ཁམས་པ་སོགས་ཡོད་ཅིང་དེ་ལས་ཀྱང་ཁུ་ནུ་དང་ལ་ཧོར་མང་ཆེ་བ་རེད། ང་འགྲོ་སའི་ལམ་ཁ་འདི་ནི་སྐད་གྲགས་ཅན་གྱི་ཆུ་ཚན་ཡོད་སའི་མ་ཎི་རན་ལ་འགྲོ་སའི་ལམ་ཁ་དང་འཁེལ་སྟབས་སྒྱུ་འགྲུལ་ཧ་ཅང་མོད། 

རྒྱ་གར་བ་གཞན་དང་མི་འདྲ་བར་ཁོང་ཚོ་དང་ཐུག་ན་མང་ཆེ་ལས་ཇུ་ལེ་ཟེར་ཞིང་འཚམས་འདྲི་བྱེད། ཇུ་ལེ་ནི་ཕལ་ཆེར་བཀྲ་ཤིས་བདེ་ལེགས་ཞེས་པའི་དོན་ཡིན་པ་འདྲ། གང་ལྟར་ངོ་རིས་ཁྲག་རྒྱུན་གཅིག་པའི་གཅིག་པའི་སྟབས་ཀྱིས་གཞན་ལས་སེམས་ཐག་ཅུང་ཉེ་བ་ཡིན་པ་སྟོན་གྱི་འདུག སྤྱིར་རྒྱ་གར་ནི་མི་འབོར་ལུད་ནས་ཡོད་པའི་ཡུལ་གྲུ་ཞིག་ཡིན་སྟབས་ས་གནས་འདིར་ཡང་མཐོ་རི་བོའི་རྩེ་ནས་དམའ་གཙང་པའི་ཁུག་སོགས་གང་སར་གྲོང་པ་མེད་ས་མེད་ཅིང་མཚན་མོ་གནམ་ས་འགབ་འདྲེས་པའི་ཁྲོད་དུ་སྐར་ཚོགས་དང་གློག་སྒྲོན་མ་བུ་འདྲེས་ཏེ་དབྱེར་མི་ཆོད་པའི་ཚོད་དུ་ཡོད། 

གྲོང་ཚོ་རེར་མ་མཐར་ཇ་ཁང་ཚོང་ཁང་གཅིག་གཉིས་རེ་མེད་པ་ཕལ་ཆེར་མེད་པས་ངས་ལམ་ཟུར་དུ་ཡོད་པའི་ཇ་ཁང་ཆུང་ངུ་ཞིག་གི་ནང་ནས་ཇ་མངར་དང་སེ་ཌུ་ཟོས་པ་ཡིན། སེ་ཌུ་ནི་ལུང་པ་འདིའི་དམིགས་བསལ་ཟས་རིགས་ཤིག་སྟེ་ནང་དུ་སྨན་སྣས་སྦག་པའི་ཚལ་རིགས་ཅུང་དྲིལ་བའི་མོ་མོ་ཆེན་པོ་ཞིག་ཡིན་ཞིང་བཟའ་སྐབས་མར་ཁུ་དང་སྦག་དགོས་སྲོལ་འདུག །

2012/01/03

ཨ་ཕའི་དཀའ་སྡུག

 དེ་རིང་ངས་ཨ་ཕའི་དཀའ་སྡུག་བཤད་དྲན་སོང་། 
ངའི་དྲིན་ཅན་གྱི་ཕ་རྒན་དང་ཨ་ཁུ་<ཨ་ཕའི་ཨ་ཁུ>གཉིས་ས་ནི་མི་ལོ་བཅུ་ཕྲག་གི་སྔོན་ཞིག་ནས་ཉིན་མ་བཅུ་གྲངས་ཀྱི་ནང་ཚུད་དུ་གཅིག་རྗེས་གཉིས་མཐུད་དུ་འཇིག་རྟེན་གཞན་ཞིག་ཏུ་བཞུད་ཟིན་པ་རེད། སྐབས་དེར་ང་དང་གཅུང་པོ་གཉིས་ལྷོ་ཕྱོགས་མེེ་སོར་རྣམ་གྲོལ་གླིང་གི་བཤད་གྲྭར་ཆོས་ཞུགས་བྱས་ཏེ་ལོ་རིམ་གཉིས་པར་སླེབས་ནས་ཡོད། སྤྱིར་སྐྱེ་འགྲོ་ཚང་མས་སྐྱེ་འཆིའི་གོ་རིམ་འདི་གཉིས་སུས་ཀྱང་བརྒྱུད་དགོས་པར་བསམ་སྟེ་ཁོག་ཡངས་ཅུང་ཟད་རེ་བྱ་ཆོག་མོད། ངའི་ཨ་ཕར་བསམས་ན་སྡུག་བསྔལ་ལ་ཚོད་འཛིན་ཐུབ་ཐབས་མི་འདུག ངའི་ཕ་རྒན་གྱིས་ཉྭ་ཕྲ་བའི་ང་ཚོ་བུ་ཕྲུག་དགུ་དང་ངའི་ཨ་མ་ལགས། ད་རུང་བགྲེས་ལོ་ལོན་གྱི་ཨ་མྱེས་གཉིས་བཅས་བཟའ་མི་བཅུ་གྲངས་ཤིག་གསོ་སྐྱོང་གི་ཆེད་དུ་ཉིན་གྱི་མི་དང་མཚན་མོའི་ཁྱི་ཞེས་པའི་དཔེ་ལྟར་ཞིང་འབྲོག་གཉིས་ཀྱི་བྱ་བ་ཐབས་ཅད་པོའི་འགན་ཁུར་དགོས་པ་རེད། ཁ་དཔེར་༼གངས་མ་ཆར་ལས་འཁྱགས་སུ་མེད། །ས་མ་འབྲོལ་ལས་དཀའ་བ་མེད།༽ཅེས་པ་ལྟར་ཞིང་འབྲོག་གཉིས་ལྡན་གྱི་ཡུལ་མི་དག་ནི་དཀའ་ཚེགས་ཧ་ཅང་ཆེ་བའི་ཚད་ལ་བརྩི་ཞིང་། དགོས་སུ་ངའི་ཕ་རྒན་ལ་མཚོན་ན་མི་གཅིག་གི་ཕྲག་ཏུ་ཡོད་ཚད་པོ་ཁུར་དགོས་དུས་དཀའ་ཚེགས་ཅི་འདྲའི་ཆེ་ཚུལ་ངས་བཤད་མ་ཤེས་རུང་དོན་དུ་གསལ་ནས་ལོས་ཡོད་ཨང་། རྒྱུན་དུ་པ་ཕས་གོས་ལྷམ་གསར་པ་རེ་བྱུང་ན་གྱོན་པར་མི་སྤྲོ་བའི་ཟོལ་གྱིས་ང་ཚོར་གནང་གི་ཡོད། ངས་སྐབས་དེར་ལོ་ན་རྒས་ཏེ་འཕྱོར་གཟུགས་ལ་དོ་སྣང་མེད་པར་བསམ་མྱོང་། ང་ནི་ཅི་འདྲའི་བསམ་མེད་ཅིག་རེད་ཨང་། 

ང་ལོ་ངོ་བཅུ་གྲངས་ཟིན་པ་ནས་བཟུང་༼བུ་ཆེ་མགོ་དང་། གཡག་རྡང་མགོ་༽ཟེར་བའི་དཔེ་ལྟར་ཕ་དང་ལྷན་དུ་ཤིང་འཐུ་བ་དང་ཚོང་སྐོར་སོགས་ཀྱི་ཆེད་དུ་བྱེས་ལ་ཡང་ཡང་འགྲོ་དགོས་ལ་སྐབས་དེའི་དྲན་ངོ་གསལ་ཤོས་ཀྱི་ཉི་མ་ཞིག་སྟེ། ཨ་ཕ་ངེད་གཉིས་པོས་རི་ཁ་ལ་བསྐོལ་བའི་ཇ་ཐང་དེའི་བྲོ་བ་བདུད་རྩི་དང་འདྲ་ཟེར་ན་བཤད་མི་བདེ་ཡང་རྗེས་སོར་ཇ་དེའི་བྲོ་བ་ངས་གཏན་ནས་བསྐོལ་མི་ཤེས་ལ་གཞན་ལས་ཀྱང་ཁྱོན་ནས་རག་མ་མྱོང་། 

མཚན་མོ་ཉལ་ཐུལ་གཅིག་གི་འོག་ན་ཨ་ཕ་ངེད་གཉིས་ལྷན་དུ་ཉལ། ངའི་ཡིད་ངོ་ན་ཆེས་གསལ་བ་ཞིག་ལ་ཁོང་གན་རྐྱལ་དུ་ཉལ་དུས་མིག་ཟུར་ནས་འཆི་མ་འོང་བ་ཞིག་ཡིན། སྐབས་དེའི་འཆི་མ་ནི་ཡིད་སྐྱོ་བའི་མཆི་མ་ཞིག་མ་ཡིན་པར་གཟུགས་ཁམས་ཀྱི་རང་བཞིན་ཞིག་ཏན་ཏན་རེད། ཨ་ཕས་སྤྲིན་པ་མེད་པའི་མཚན་མོའི་སྐར་ཚོགས་ལ་གཟིགས་ཀྱིན་<དུ་དགོང་ནམ་མཁའ་དྭངས་བ། ལི་ངར་མ་ཤྭ་སྡིག་༼ཤ་བའི་པགས་པ་༽གིས་ཕྱིས་འདྲ་རེད་གདའ་ར> གསུངས། སྐབས་དེའི་སྐད་གདངས་ཀྱི་ཉམས་འགྱུར་ལས་སེམས་ཁོངས་ན་བརྗོད་མི་ཤེས་པའི་སྤྲོ་སེམས་ཞིག་འཁོལ་ནས་ཡོད་པ་ཤེས་ཐུབ་ཀྱིན་འདུག  མཚམས་དེར་ཨ་ཕས་རང་འགུལ་གྱིས་<ཕ་ཀའི་སྐར་མ་སྔོན་རྗེས་བདུན་པོ་དེར་རྔོན་པ་སྤུན་བདུན་ཟེར། སྐར་མ་འདི་དག་བྱང་ནས་ཤར་ཞིང་བྱང་དུ་ནུབ་འགྲོ ༼བྱང་གི་རྔོན་པ་སྤུན་བདུན་དེ། བྱང་ནས་ཤར་ཞིང་བྱང་ནས་ལ། སྨན་གོ་ལོག་མ་ཡི་སྐྱེ་བ་རེད།༽བརྫོ་རེད། ཡ་ཀའི་རི་རྩེ་ན་འཆར་ཡོད་པའི་སྒྱུ་སྐར་དེར་སྨལ་པོ་ཟེར། ཧོར་གུར་དཀར་རྒྱལ་པོ་གླིང་གེ་སར་གྱིས་དམ་ལ་འཇོག་སྐབས་གུར་དཀར་གྱི་འདོད་པ་ལྟར་ནམ་མཁར་བཞག་པ་དེ་སྐར་མ་འདི་རེད། ཚུར་ཕྱོགས་ཀྱི་སྐར་མ་གཡས་ལག་དམར་བ་སྡིག་སྒྲིབ་ཆེ་བ་མཚོན་པ་དང་། ཕར་ཕྱོགས་ཀྱི་སྐར་མ་སྔོན་པོ་གཡོན་ལག་སྡིག་པ་ཆུང་བ་དང་། འོག་གི་སྐར་ཕྲེང་རིམ་པ་གཉིས་པོ་ནི་སྐད་གྲི་དང་མཇུག་མ་རེད།>གསུངས། སྤྱིར་ང་ནི་གནའ་གཏམ་ཉན་རྒྱུར་ཤིན་ཏུ་དགའ་ཞིང་སྐབས་དེའི་སྒྲུང་གི་མི་སྣ་དག་བློས་བསླངས་གསལ་པོ་རེ་བྱས་ནས་ཡོད། ད་རུང་ཨ་པས་མུ་མཐུད་དེ་<ཕར་ཀའི་སྐར་མ་བཞི་ཚོམས་གྲུ་བཞི་ཟུར་ཡོན་མ་དེ་ལ་སྐག་བྱ་རོག་ཟེར་༼སྐག་བྱ་རོག་གཡག་ཤ་རྐང་པ་འདྲ། །དཔྱད་ཤེས་ན་མགར་བའི་ཏི་ཚ་འདྲ།༽བརྫོ་དར། དེའི་གཡས་ཟུར་གྱི་སྔོ་ཆེམ་ཆེམ་བྱེད་པའི་སྐར་ཚོམས་ཆེས་མི་གསལ་བ་དག་ལ་སྐར་མ་སྦོ་ཟེར། ༼སྦོ་སྔོན་མོ་ཕུག་ཁྱུ་འདྲ་ཡོད།༽བརྫོ་རེད། སྐར་མ་སུམ་ཚོམས་དེར་བྲ་ཉེ་ཟེར། རྟ་ཡི་གཡང་སྐར་རེད། ༼སྒྲོག་སུམ་ལག་རྟ་ཡི་གཡང་སྐར་ཡིན།༽ཟེར་དར།>ཞེས་དང་། ད་རུང་ལག་སོར་དང་སྨིན་དྲུག་སོགས་མང་དག་གཅིག་ངོ་སྤྲོད་གནང་མྱོང་། ད་ཚོད་བསམ་ན་ང་ཚོའི་གནའ་མི་དག་གནམ་རིག་ལ་ཞིབ་འཇུག་གཏན་ནས་མེད་པ་མིན་པ་འདྲ་དེ་ཨ་པས་<གནམ་དཀྱིལ་ན་གསལ་ལ་མི་གསལ་བའི་སྐར་མ་སྔོན་པོ་ཞིག་དང་དམར་པོ་གཉིས་དེར་རྟ་བྲའུ་དང་རྐྱང་ངུ་ཟེར་ཞིང་དེ་གཉིས་ཀྱིས་མཚན་མོར་རྟོད་ཕུར་ལ་སྐོར་བ་ཞིག་འཁོར་བ་དང་ནམ་ཏག་ཏག་ལང་།>ཚུལ་གསུངས་པ་དེས་ཀྱང་མཚོན་ནུས་པར་སྙམ། གང་ལྟར་ཨ་ཕས་ང་ལ་སྒྱུ་སྐར་དག་གི་ངོ་སྤྲོད་གནང་བ་འདི་ནི་ངས་སེམས་གཏིང་ནས་ནམ་ཡང་བརྗེད་མི་སྲིད་པའི་ལག་ལེན་དམར་ཁྲིད་ཀྱི་སློབ་ཚན་ཞིག་ཏུ་གྱུར་འདུག
སྤྱིར་ན་ངས་ཨ་ཕར་བརྩི་ཐང་ཤིན་ཏུ་ཆེ་བསམ་ཡང་ཕ་མས་ཇི་ལྟར་གཅེས་ཚུལ་བུ་ཕྲུག་གི་ཚོར་མི་ཐུབ་པ་ནི་༼ཕ་སེམས་བུ་དང་། བུ་སེམས་རྡོ།༽ཟེར་བའི་དཔེ་ལས་མ་འདས་པ་རེད།
དེ་ལྟར་མི་ཚེ་གང་པོར་བསྐྱངས་བསྐྱངས་བའི་བུ་རྒྱུད་ནར་མ་སོན་པའི་སྔོན་ནས་བརྩེ་བའི་བཟའ་ཟླ་དང་གཅེས་པའི་བུ་ཕྲུག དགའ་བའི་གཉེན་ཉེ་སོགས་མི་འདོད་བཙན་གྱིས་བཞག་ནས་འགྲོ་དགོས་པའི་སྡུག་བསྔལ་འདི་འདྲ་ཞིག་ངའི་ཕ་རྒན་གྱི་མགོ་ཐོག་ཏུ་བབས་སོང་བ་ནི་ཅི་འདྲའི་སྙིང་རྗེ་བ་ཞིག་དང་ཤ་ཚ་འོས་པ་ཞིག་རེད། ཐོག་མར་ང་ལ་འཕྲིན་ངན་དེ་འབྱོར་སྐབས་ང་དང་གཅུང་པོ་གཉིས་ནི་ཆ་རྒྱུས་མེད་ཀྱི་ས་མཐར་འབྱོར་ནས་མཐོང་མྱོང་བ་ཡ་ཀའི་ཨ་སྔོན་གནམ་དང་འདྲིས་ཆེ་མ་ཀའི་ས་དོག་མོ་ས་གཞི་གཉིས་ལས་སུ་ཡང་མེད། སྐབས་དེར་ངེད་སྤུན་གཉིས་ཀྱིས་མིག་ཆུ་དྭངས་མོའི་མཆོད་མེ་རེ་སྦར་ཏེ་གདུང་ཡུས་དྲག་པོའི་ངུ་སྐད་རེ་སྒྲོགས་པ་ལས་བྱ་ཐབས་ཅི་ཡང་མ་མཆིས། །

2012/01/02

ཁྱུང་པོ་དང་རལ་པ།


དེ་རིང་ངས་བལ་ཡུལ་ན་བཞུགས་པའི་དྲྭ་གྲོགས་ཞིག་ལ་མི་བཅུ་དྲུག་གི་རིང་ལ་རིག་མ་མྱོང་བའི་ཕ་ཡུལ་ཁྱུང་པོའི་སྐོར་རང་འགུལ་གྱིས་ངོ་སྤྲོད་གང་མང་ཞིག་ཞུས་པ་ཡིན། དེ་ལྟར་བྱེད་དོན་ནི་གཅིག་བྱས་ན་བྱ་རྒས་ན་ཤིང་དྲན། མི་རྒས་ན་ཕ་ཡུལ་དྲན་ཟེར་བའི་དཔེ་ལྟར་ཕ་ཡུལ་དང་ཕ་མ་སྤུན་མཆེད་དྲན་དྲགས་པའི་སྟབས་ཀྱིས་མིན་འགྲོ  དེས་རྐྱེན་བྱས་ཏེ་ཁྱུང་པོའི་ལོ་རྒྱུས་གསལ་བའི་དྲྭ་བ་ཞིག་བཙལ་བཙལ་གྱིས་ཐ་མ་ཀྲུང་གོའི་བོད་ཀྱི་དྲྭ་བ་རུ། དེང་སྐབས་བོད་ནང་གི་གསར་འགོད་བ་ཞིག ལམ་ཞོར་དུ་སྟབས་འཁེལ་ཏེ་ངའི་ཕ་ཡུལ་ཁྱུང་པོ་རུ་ཚར་གཅིག་སོང་མྱོང་འདུག་པ་དེས་ཁྲལ་གསོད་ཙམ་དུ་བྲིས་པའི་ངོ་སྤྲོད་ཅིག་ལས་གཞན་རྩ་བ་ནས་རག་མ་སོང་། རྒྱ་ཡིག་གིས་ཐར་ཐོར་བྲིས་ཡོད་ན་མི་ཤེས། གོང་གི་པར་འདི་ཡང་ཁོས་བླངས་པ་རེད། པར་ནང་གི་འཁྲབ་སྟོན་པའི་མགོ་ཐོག་ཏུ་ལྡིང་ནས་འདུག་པའི་སེམས་ཅན་དེ་ཁྱུང་ཡིན་ཞིང་ཁྱུང་ནི་ཁྱུང་པོ་ཡུལ་གྲུ་མཚོན་རྟགས་ཡིན།  
གནའ་གཏམ་བཤད་སྲོལ་ལྟར་ན་ཁྱུང་པོ་སྟེང་ཆེན་དང་ཁྱུང་པོ་གསེར་ཚའི་དབར་གྱི་ལ་དེ་ལ་ཁྱུང་ཉལ་ལ་ཟེར་བཏགས་དོན། གནའ་སྔ་མོ་ཡུལ་འདིར་འགྲོ་བ་མི་མ་ཡོད་པའི་ཡར་སྔོན་དུ་བྱ་ཁྱུང་གིས་བདག་པའི་ལུང་པ་ཡིན་རབས་དང་། ཁྱུང་གི་སྒོ་ང་དཀར་ནག་སེར་གསུམ་བརྡོལ་བའི་ནང་ནས་ཁྱུང་པོ་དཀར་ནག་གསེར་གསུམ་གྱི་མི་རྒྱུད་བྱུང་བའི་ལྷ་སྒྲུང་བཤད་སྲོལ་ཡོད། དོན་དངོས་ཀྱིས་བཤད་ན་ཁྱུང་ལས་མཆེད་པའི་མི་རིགས་ཕར་བཞག  ཁྱུང་ཟེར་བའི་བྱ་འདི་འདྲ་ཞིག་ཡོད་མྱོང་བའི་ཁུངས་ལུང་རྒྱུ་མཚན་ཞིག་ད་བར་རག་མེད། 

གཅིག་བྱས་ན་གནའ་བོའི་སེམས་ཅན་{dinosaur}ཌི་ནོ་སོར་སྟེ་གཏུམ་འབྲུག་གམ་རྨིག་པ་གླང་གཟུགས་ཟེར་བ་དག་ཡིན་མི་ཆོག་གམ་སེམས། དེ་མིན་གལ་ཏེ་ཁྱུང་པོ་བ་དག་ཁྱུང་ལས་བྱུང་བར་ཆ་བཞག་ན་ཁྱུང་པོ་བ་བོད་མི་རིགས་མ་ཡིན་པར་ཐལ་བ་སྟེ་བོད་མི་རིགས་ཚང་མ་བྲག་སྲིན་དང་སྤྲེལ་རིགས་ལས་བྱུང་བར་ཡོངས་གྲགས་ཡིན་པས་སོ། །འོག་གི་ཕོ་གཞོད་དག་གིས་རལ་པ་འཁྲབ་ཀྱི་ཡོད་པ་སྟེ་རལ་པའི་སྒྱུ་རྩལ་གྱི་ཕ་ཡུལ་ནི་ཁྱུང་པོ་ཁོ་ན་ཡིན་པར་རླུང་ལྟར་གྲགས་ནས་ཡོད། ༼ཁ་སྐད་དུ་རེད་པ་ཟེར་༽ ངས་རང་ཉིད་ཕ་ཡུལ་དུ་བསྡད་སྐབས་རལ་པའི་སྒྱུ་ལ་མཁས་པའི་ཁྱིམ་རྒྱུད་དེ་འདྲ་མཐོང་མྱོང་ཡོད། ཁོང་ཚོའི་བུ་དང་བུ་མོ། ཕ་རྒན་དང་མ་རྒན་ཚང་མས་འཁྲབ་སྟོན་བྱེད།  ཁོང་ཅག་སྟོད་མངའ་རིས་སྐོར་གསུམ་ནས་སྨད་དར་རྩེ་མདོ།  དབུས་ཉི་མ་ལྷ་ས་སོགས་བོད་ཀྱི་ས་གནས་གང་སར་བསྐོར་ཏེ་རལ་པ་འཁྲབ་སྟོན་ཀྱི་འཚོ་བ་ལ་རོལ་གྱི་ཡོད། ང་ཚོའི་གྲོང་པ་དང་སྡེ་དགོན་ཚང་མ་ལ་འང་ལོ་ལྟར་འཁྲབ་ཏུ་ཡོང་གི་ཡོད། རལ་པ་འཁྲབ་སྐབས་བཙོག་གཏམ་བཤད་དེ་གནའ་སྲོལ་ལ་གོམས་པའི་གྲོང་གསེབ་པའི་ཕ་མ་སྤུན་མཆེད་ལྷན་དུ་བལྟས་ན་མི་བཟོད་པ་ཞིག་ཡོད། གང་ལྟར་ཁྱིམ་ཚང་དེ་དག་ལ་ཡོང་སྒོ་ཆེ་བ་སྟེ་དགོན་པ་དང་ཁྱིམ་ཚང་ཆེ་རིགས་ཀྱིས་གྲོ་ནས་ཀྱི་སྒྲོ་བ་བརྩེགས་ཏེ་བརྔན། ཟངས་དཀར་ཇ་ཆང་གིས་བསྐྱིལ་སྟེ་འབོད་དགོས་ཀྱི་ཡོད། གལ་ཏེ་གནང་སྤྱིན་ཉུང་དྲགས་སོང་ན་རལ་པ་འཁྲབ་སྐབས་བཞད་གད་བསླངས་ཞོར་ཟུར་ཟ་དང་འཕྱ་སྨོད་བྱས་པ་ངས་ཀྱང་དངོས་སུ་གོ་མྱོང་ཡོད། །