2020/02/16

ཆོས་གྲོགས་ལ་ཕུལ་བའི་སེམས་གཏམ།


བདག་གིས་ངོ་ལོ་བཅོ་ལྔའི་གོང་ཙམ་ལ་བྲིས་པའི་སྙན་རྩོམ་ཞིག་ཉེ་ཆར་ལོ་ཤས་སྔོན་དུ། རྒྱ་གར་ལྷོ་ཕྱོགས་མཻ་སུར་སྔ་འགྱུར་རྙིང་མའི་ཆོས་སྡེ་ཆེན་པོ་རྣམ་གྲོལ་གླིང་གི་དུས་དེབ་«པདྨའི་རང་མདངས་ཀྱི་ལེགས་རྩོམ་གཅེས་བཏུས་དཔེ་ཚོགས་»ལས་«སྙན་རྩོམ་དབྱངས་ཅན་མགྲིན་གླུ་»ནང་དུ་ཚུད་འདུག་པ་དེ་འདིར་བཀོད་ཡོད། «སྙན་རྩོམ་དབྱངས་ཅན་མགྲིན་གླུ་» Byalakuppe, Mysore: «སྔ་འགྱུར་རིག་མཛོད་རྩོམ་སྒྲིག་ལྷན་ཁང་» 2016, pp. 135––140. 
Origzin, from Namdroling Monastery, Bylakuppe, Myore. KS. Imdia

ཆོས་མཐུན་བྱ་བར་དུས་དྲུག་གི་འཁོར་མོར། ། 
ཆོས་བཞིན་སྤྱོད་པའི་ཆོས་ལྡན་གྱི་གྲོགས་པོ། ། 
སྙན་ཚིག་ཉམས་བརྒྱའི་འགྱུར་ཁུགས་རང་མེད་ཀྱང༌། ། 
བཅོས་མིན་སེམས་ཀྱི་ཁ་བརྡ་འདིར་གསོན་དང༌། ། 

ཉམས་དགའི་དབེན་གནས་ནགས་ཁྲོད་དང་བས་མཐར། ། 
རྩེ་གཅིག་སྒོམ་པའི་རྣལ་འབྱོར་འདི་མེད་ཀྱང་། ། 
བཟང་ངན་འཛིངས་པའི་སྤྱི་ཚོགས་ཀྱི་ཁྲོད་དུ། ། 
ཡ་རབས་དམ་པའི་ངང་ཚུལ་འདི་མ་ཤོར། ། 

ཆེ་རྒུའི་མདུན་དུ་ངོ་སྲུང་གི་བཅོས་འཛུམ། ། 
ཉམ་ཆུང་ཐོག་ཏུ་འཕྱ་སྨོད་ཀྱི་ཁྲེལ་འཛུམ། ། 
སོ་ཕྲེང་ངོམས་པའི་རྣམ་འགྱུར་འདི་ཁོ་ནས། ། 
བྱམས་སྡང་སྒྱུ་མའི་གར་རྩེད་དག་མ་སྟོན། །