2011/08/08

བཀའ་ཁྲི་གསར་པ།




སྐུ་དྲག་དཔོན་རྒྱུད་མིང་སྐམ་མ་ཁྱེར་ཞིང་། །
རྒྱུ་དང་འབྱོར་བའི་ལྐོག་ནས་མ་སྐྱོར་པར། །
ངལ་བརྒྱས་བཀྲུན་བའི་ཤེས་རིག་འོད་སྣང་འདིས། །
ཆེས་མཐོའི་སྲིད་སྐྱོང་བཞུགས་ཁྲི་མཛེས་པར་བྱས། །

དེང་སྲོལ་མཁས་ཟེར་སྙན་པ་སྒྲོགས་ཀྱང་སྲིད། །
གནའ་སྲོལ་མི་མཁྱེན་སྨོད་པ་བྱེད་ཀྱང་སྲིད། །
བླ་མ་མིན་པས་ཡིད་ཆེས་མེད་ཀྱང་སྲིད། །
ཐམས་ཅད་མགུ་བ་འཇིག་རྟེན་འདི་ན་མེད། །

འཆི་མ་གསོད་དུ་ལུས་པའི་བོད་དོན་འདི། །
ཕྱག་སྟོང་སྤྱན་རས་གཟིགས་ཀྱིས་བསླུ་དཀའ་ན། །
ཕྱག་གཉིས་བློ་བཟང་སེང་གེས་བདེ་བླག་ཏུ། །
ལེན་པར་བསམ་ན་བྱིས་པའི་བློ་ལས་ཅི། །

དབུ་མ་རང་བཙན་ཆོས་བཤད་མ་བྱས་གོང་། །
སྟོང་ལ་ཉེ་བའི་གངས་རིའི་མི་འུ་དང་། །
ནུབ་ལ་ཉེ་བའི་བྷོ་ཊའི་ཕ་སྐད་གཉིས། །
འཕྲལ་དུ་བསྐྱབ་རྒྱུ་ཐོག་མའི་འོས་འགན་སྙམ། །