2017/11/13

སྣང་བ་དཀར་རྐྱང་།

རུས་པའི་རྐང་གི་ན་ཟུག་འགའ།།
སྐྲ་དཀར་མཉམ་དུ་སྦས་བཞག་ཡོད།།
གདོང་ལྤཌ་ལྷོད་པའི་ལྟེབ་སུལ་ལ།།
དབུར་ཏི་རྒྱག་ལ་འགྲོ་ན་བསམ།།

སྣང་བ་དཀར་རྐྱང་འཕྱོ་ཚུལ་ནི།།
མུ་ཏིག་འོད་དུ་འཚེར་བ་འམ།།
སྒྲོལ་མ་དཀར་མོ་བཞད་འདྲ་བས།།
རྨི་ལམ་ཡིན་པ་ཁག་ཐེག་ཡིན།།

འོན་ཏང་དེ་ལ་ཅི་ཞིག་ནོངས།།
སྣང་བ་ཟ་ཟི་ལྡང་འདྲ་བའི།།
ང་དང་ང་ཚོ་ཡུད་ཡུད་པོ།།
རྨི་ལམ་ཡིན་པ་ཞེ་གཅིག་ཡིན།།

སྐོར་ལམ་ནང་གི་ཨ་ཕྱི་མ།།
ལྷ་ཡི་ཕོ་ཉ་ཡིན་ངེས་འདྲ།།
རྐང་པ་གྱོལ་སྟངས་རེ་རེ་ལ།།
མ་ཎི་དུང་གི་བྱིན་རླབས་གདའ།།

བསྐལ་ཆེན་སྟོང་གི་འཆར་འགོད་ཅིག།
འགྲུབ་པའི་གདིང་ཚོད་ང་ལ་མེད།།
གྲོང་པའི་འདབ་ཀྱི་མཆོད་རྟེན་ལ།།
རེས་འགར་དཀར་རག་འབྱུག་ན་འདོད།།

ཟླ་བའི་ཐོད་དུ་ཐེམ་སྐས་ཤིག།
འཛུགས་རྒྱུའི་ནུས་པ་བདག་ལ་མེད།།
རྡོག་པའི་འོག་གི་རྐང་ལམ་འདིར།།
གད་དར་ཅུང་ཟད་བགྱི་ན་བསམ།།
— ཁྱུང་ཨོ:རིག་འཛིན།

ཆོས་གྲོགས་ལ་ཕུལ་བའི་སེམས་གཏམ།

བདག་གིས་ངོ་ལོ་བཅོ་ལྔའི་གོང་ཙམ་ལ་བྲིས་པའི་སྙན་རྩོམ་ཞིག་ཉེ་ཆར་ལོ་ཤས་སྔོན་དུ། རྒྱ་གར་ལྷོ་ཕྱོགས་མཻ་སུར་སྔ་འགྱུར་རྙིང་མའི་ཆོས་སྡེ་ཆེན་པོ་རྣམ...