2011/06/18

བྷར་མར་ནང་ཆོས་དར་ཚུལ།

Thai Dharmachakra
༄༅། །གནའ་བོའི་བོད་ཀྱི་ཁྱིམ་མཚེས་རྒྱལ་ཁབ་དང་དེང་སང་ཡོངས་གྲགས་སུ་བྷར་མ་ (Burma) འམ་མ་ཡན་མའི་ (Myanmar) རྒྱལ་ཁབ་ཏུ་ནང་ཆོས་དར་ཁྱབ་བྱུང་ཚུལ་རོབ་ཙམ་ཞུ་ན། སྤྱིར་ལོ་རྒྱུས་སྨྲ་བ་དག་གིས་རྡོ་བརྐོས་བྲག་རིས་དང་ཏ་ལའི་ལོ་མར་བྲིས་པའི་ཡིག་རིགས་རྙིང་པ་སོགས་སུ་གསལ་བ་ལྟར་ན་བྷར་མར་ནང་ཆོས་སྔ་ཕྱི་ལན་མང་བྱུང་ཡོད་པར་འདོད་པ་སྟེ།
༡༽དང་པོ་ནི། བྷར་མའི་ནང་དུ་སྟོན་པའི་བསླབ་པ (Buddha a Sasana) སྟེ་ཐོག་མ་ནི་ཤེ་ཝེ་དྷ་གྷོནཕ་གོ་དྷ་ (Shwe-Dagon Pagoda) བྷར་མའི་ཡང་སྒོན་ས་གནས་སུ་གཞུ་འདོམ་གོ་བརྒྱད་ (98) ཡོད་པའི་གསེར་གྱི་མཆོད་རྟེན་ཞིག་གྲགས་ཅན་ཞིག ལོ་རྒྱུས་ལྟར་ན་མ་ཧཱ་ས་ཀར་ཏིའི་ལོ་རབས་ ༡༠༣ སྟེ་སྟོན་པ་ཞལ་བཞུགས་བཞིན་པའི་སྐབས་སུ་བྷར་མའི་ར་མན་ན་དྷེ་སེའི་ཏབ་ཕཱུ་སའི་ (Taphus in Ramanades) ས་གནས་བྷལ་ལི་ཀ་གྲོང་ནས་ཡིན་པའི་བྷག་ལི་ཀ་དང་ཨུག་ཀལ་ལ་པ་ Baglika and Ukalpala) ཞེས་པའི་ཚོང་པ་སྤུན་གཉིས་ཤིག་སྟོན་པར་ཕྱག་མཆོད་བྱེད་དུ་སྟོན་པ་ཉིད་ཆུ་བོ་ནི་རན་ཇ་ནའི་ (Niranjana) ཉེ་འགྲམ་གི་ནགས་ཚལ་ཨུ་རུ་ཝེ་ལའི་ར་རྗ་ཡ་ཏ་ན་ལིན་ལུན་༽ལྗོན་ཤིང་དྲུང་དུ་༼ཕ་ལ་སམྨ་ཨཔྟི་༽ཏིན་ངེ་འཛིན་ལ་བཞུགས་བཞིན་པའི་སྐུ་གམ་དུ་འབྱོར་ཞིང་གུས་པ་ཆེན་པོས་སྟོན་པར་སྦྲང་རྩིའི་སྤྲི་གོར་ (honey cake) ཕུལ་བ་དང་སྟོན་པ་མཆོག་གིས་ཀྱང་ཆོས་ཀྱི་བདུད་རྩིས་ཚིམས་པར་མཛད་ཅིང་ཁོང་གཉིས་པོའི་རེ་འདོད་ལྟར་དད་རྟེན་དུ་ཉིད་ཀྱི་དབུ་སྐྲ་ཉག་མ་བརྒྱད་ཀྱང་གནང་། ཕྱིས་སུ་ཁོང་གཉིས་རང་ཡུལ་དུ་འབྱོར་སྐབས་རི་དེའུ་ཆུང་ངུ་གི་སྒང་དུ་སྟོན་པའི་དབུ་སྐྲ་ནང་རྟེན་དུ་བཞུགས་སུ་གསོལ་བའི་མཆོད་རྟེན་༼ཏམ་པ་གུ་ཏ་༽ཞེས་པ་ཞིག་བཞེངས་པ་དེར་དེང་སང་༼ཤེ་ཝེ་དྷ་གྷོན་ཕ་གོ་དྷ་༽(ShweDagon Pagoda) ཟེར།། 《རྒྱལ་པོ་དྷམ་མ་ཛེ་དྷིས་(AD 1472-1492) བཙུགས་པའི་རྡོ་རིང་ཞིག་ལ་གསལ་》
༢༽གཉིས་པ་ནི། ལུང་ལས་རྒྱལ་པོ་༼ར་མེན་ན་དྷེ་སའི་༽དུས་སྐབས་ཏེ་མ་ཧཱ་ས་ཀར་ཏིའི་ལོ་རབས་༡༡༡་ནང་དུ་དགྲ་བཅོམ་པ་༼ཐེ་ར་ཤིན་གྷ་ཝམ་པྟི་༽ཞེས་པས་སྟོན་པ་ཉིད་བྷར་མའི་ལྷོ་ཕྱོགས་ས་ཁུལ་༼སུ་དྷམ་མ་པུ་ར་༽སྟེ་དེང་སང་༼ཐེ་ཏྲོན་༽ཡུལ་དུ་ཕེབས་པར་བསྐུལ་བ་བཞིན་ཞལ་གྱིས་བཞེས་ཏེ་ཆོས་འཁོར་བསྐོར་བར་གྲགས།
༣༽ གསུམ་པ་ནི། མ་ཧཱ་ས་ཀར་ཏིའི་ལོ་རབས་༡༢༣་པའི་ནང་དགྲ་བཅོམ་པ་༼མ་ཧཱ་པུན་ནས་༽ཇི་ལྟར་གསོལ་བ་བཏབ་པ་ལྟར་སྟོན་པ་ཉིད་འཁོར་ལྔ་བརྒྱ་བཅས་པ་དང་ལྷན་གཅིག་ཏུ་༼སུ་ན་པ་རན་ཏ་ཝན་ནིཀྐ་གྷ་ན་༽ཞེས་པའི་ས་གནས་སུ་ཕེབས་ཏེ། སྐབས་དེར་སྟོན་པ་མཆོག་ལ་བསྙེན་བཀུར་ཞུ་སའི་ཙན་དན་གྱི་གཙུག་ལག་ཁང་ཞིག་ཀྱང་བཞེངས་ཤིང་གནས་དེའི་བསམ་གཏན་པ་༼ན་མན་ཏ་༽དང་ཁོང་གི་ཆོས་གྲོགས་གཉིས་ཀྱང་སྟོན་པར་གུས་ཕྱག་ཞུ་རུ་ལྷག་པ་དང་ཆབས་ཅིག་ཕྱག་མཆོད་ཀྱི་རྟེན་ཞིག་བསྩལ་བར་ཞུས་པ་ལྟར། སྟོན་པའི་ཞབས་གཡོན་མའི་རྗེས་ཟུང་ཞིག་སྟེ། གཅིག་ནི་རི་ཕྲན་༼མིན་བྷུ་༽དང་གཞན་ཞིག་དེ་ལས་ཅུང་གཟེངས་མཐོ་བའི་རི་དེའུ་ཞིག་གི་སྒང་དུ་བཞག་གནང་མཛད་པ་དག་གསེར་གྱི་ཞབས་རྗེས་ཤེས་དེང་སང་ཤིན་ཏུ་གྲགས་ཆེ་བར་མཆི།།
༤༽བཞི་པ་ནི། འདས་ལོ་༢༣༥་ལོར་ཆོས་རྒྱལ་མྱ་ངན་མེད་པས་རྒྱལ་བསྟན་སྟོབས་ཀྱིས་སྤེལ་བཞིན་པའི་སྐབས་སུ། ནང་བསྟན་ཕྱོགས་མཐའ་ཀུན་ལ་ཁྱབ་སྤེལ་གཏོང་མཁན་གྱི་ཕོ་ཉ་བ་ཡུལ་གྲུ་དགུ་དང་ས་གནས་དགུ་ལ་མངགས་པའི་ནང་གི་༼མ་ཧཱ་ཏེ་ར་སོ་ན་༽དང་༼ཨུ་ཏྲར་ར་༽གཉིས་དགྲ་བཅོམ་པ་གསུམ་དང་འགྲོགས་ཏེ་༼སུ་ཝམ་ན་བྷུ་མི་སྟེ་ཏེ་ཏྲོན་༽ཡུལ་དུ་ཕྱགས་ཕེབས་ཤིང་བསྟན་པ་རྒྱ་ཆེར་སྤེལ་ལོ།།
༥༽ ལྔ་པ་ནི། སྟོན་པའི་འདས་ལོ་༩༣༩་དང་སྤྱི་ལོ་༣༨༦་ཙམ་ལ་བྱུང་བའི་ཤྲི་ལང་ཀའི་རྒྱལ་པོ་༼མ་ཧཱ་ན་མ་༽དང་དུས་མཉམ་པའི་བྷར་མའི་གནའ་བོའི་གྲོང་ཁྱེར་༼བྷ་གྷན་གྱི་ཐི་ལིག་ཡང་༽གི་རྒྱལ་པོ་༼མ་ཧཱ་ཐེ་ར་བྷུངྡྷ་གྷོ་ས་༽༼ར་རྗ་གྷ་ཧན་རྒྱུད་པ་ལས་མཆེད་པར་གྲགས་༽རང་གི་བཤེས་གཉེན་དམ་པ་༼མ་ཧཱ་ཐེ་ར་རེ་ཝ་ཏས་༽བོས་པ་ལྟར་ཤྲི་ལང་ཀར་ཕེབས་ཤིང་མ་ཧཱ་བི་ཧར་ (Mahā vihar) ནང་བཞུགས་ཏེ་པ་ལིའི་སྐད་ཐོག་ཏུ་བཞུགས་པའི་ནང་ཆོས་དག་མངྒྷ་དྷའི་སྐད་དུ་བསྒྱུར་རོ། །མདོར་ན་བྷར་མའི་ཡུལ་གྱི་ནང་ཆོས་ཕལ་མོ་ཆེ་ནི་གནས་བརྟན་སྡེ་པའི་ལུགས་སུ་ཡོད་ཅིང་གནའ་ཤུལ་རྟོག་ཞིབ་པས་གནའ་རྫས་གསར་རྙེད་ལ་འཇུག་བྱས་པ་ལྟར་ན་གནའ་བོའི་ཕཱུ་ (Pyu) རྒྱལ་པོའི་མངའ་ཁོངས་སུ་ཐེག་པ་ཆེན་པོ་དང་གནས་བརྟན་སྡེ་པའི་ལུགས་གཉིས་ཟུང་འབྲེལ་དུ་བྱུང་ཡོད་པར་བཤད་ལ་ཡུལ་གྲུ་གཞན་དག་ལ་ནང་ཆོས་ཇི་ཙམ་དར་བ་དག་གནས་བརྟན་པའི་ལུགས་ཉག་གཅིག་ཏུ་སྣང་།


དེང་གི་ཆར་བྷར་མའི་ཆོས་ལུགས་སོ་སོའི་མི་འབོར་གཤམ་གསལ།

༡༽ ནང་པ་བརྒྱ་ཆའི་་་་་་་་་་་་་་་་་་་་་་་་་་་་་་་་་་་་་་་་་་་་(89.20%),
༢༽སེམས་གཙོ་སྨྲ་བ་་་་་་་་་་་་་་་་་་་་་་་་་་་་་་་་་་་་་་་་་་་་་་་(1.27%)
༣༽ཡེ་ཤུ་པ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་(5.05%),
༤༽ཁ་ཆེ་བ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་(3.78%),
༥༽ཧིན་དྷུ་བ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་(0.55%),
༦༽སིག་དང་རྒྱ་མའི་ལི་ཕེའན་ཧྥུ་རྗེན་ཧེལ་སོགས་་་་་་་་་་་(0.61%).
ཙམ་ཡོད་ཅིང་གྲངས་ཉུང་ཆོས་ལུགས་པ་དག་ཕལ་མོ་ཆེ་སྔོན་ཆད་རྒྱ་གར་ནས་ཡོང་བ་གཙོ་ཆེར་ཡིན་ཚོད་སྣང་།
༼ས་ག་ཟླ་བར་སྟོན་པ་རྗེས་དྲན་དུ་སྤེལ།༽
མཁྱེན་ལྡན་གྱི་ཀློག་པོ་རྣམ་པ། ཕྲན་གྱི་དབྱིན་ཇིའི་ཆུ་ཚད་དམན་པས་ཚིག་དོན་གང་ཐན་ནས་ནོར་འཁྲུལ་མི་ཉུང་བ་ཞིག་ཡོད་ངེས་པས་ཡོ་བསྲང་གནོངས་རོགས་ཞུ།

2011/06/14

བུད་མེད་མཛངས་མ།

བོད་པའི་སྤྱི་ཚོགས་འདིར་སྤྱིར་བཏང་ནས་བུད་མེད་དག་ལ་མཐོང་ཆུང་དང་ཁྱད་གསོད་བྱེད་པའི་གོམས་སྲོལ་ངན་པ་ཞིག་རྒྱུན་འབྱམས་སུ་ཡོད་པ་སྟེ།

དང་པོ་ལུས་རྟེན་དམན་པར་འདོད་པ།
1. དེ་སྔོན་བསྐལ་པ་ཡར་ཐོག་གདོད་མའི་གནས་སྐབས་ནས་རང་བཞིན་གྱིས་བུད་མེད་དག་དམན་ས་འཛིན་དགོས་དོན་ནི་རི་དྭགས་རྔོན་རྒྱུ་དང་ཤིང་གཅོད་རྒྱུ་ལྟ་བུའི་ཤུགས་ལས་ཁོ་ནར་བརྟེན་ནས་འཚོ་བ་སྐྱེལ་དགོས་སྟབས་ཆ་སྙོམས་སུ་བུ་ལས་བུད་མེད་དག་ལུས་སྟོབས་ཞན་པའི་གནས་སྟངས་འདིའི་འོག་ནས་ཕོ་མཆོག་མོ་དམན་ལྟ་བའི་ས་བོན་ཙམ་བྱུང་ཡོད་པར་སྙམ།

2. ཤུགས་ཆེ་བ་ནི་ཆོས་ལུགས་པ་ཚོས་ལྷན་སྐྱེས་ཀྱི་ལྕགས་སྒྲོག་ལ་ཀུན་གཏགས་ཀྱི་གཟེར་བུ་སྣ་ཚོགས་པ་ཞིག་བཏབ་ཡོད་པ་སྟེ་དཔེར་ན་སྐྱེ་རྒུའི་བདག་མོ་རབ་ཏུ་ཕྱུང་བའི་ཉེས་སྐྱོན་གྱིས་བསྟན་པའི་གནས་ཚད་འགྲིབས་སོང་ཚུལ་དང་། སྐྱེས་པར་འགོ་བའི་ལུས་ལྷ་ཡོད་ཀྱང་བུད་མེད་ལ་མེད་ཟེར་བ་དང་། སྤྱིར་བུད་མེད་མི་གཙང་ཡང་འཁྲིག་པ་སྤྱོད་སྐབས་གཙོག་པ་མིན་རབས་སོགས་དགོད་ཤོར་སྤྱད་རྐྱང་བཤད་འདུག དམིགས་བསལ་དུ་ཞི་བ་ལྷས་བུད་མེད་ནི་རྫས་ངན་སོ་དྲུག་གིས་ཡོངས་སུ་ཁེང་བའི་མི་གཙང་བའི་ཕུང་པོ་རེད་ཟེར་བ་དང་། «སྤྱོད་འཇུག་

སྨོན་ལམ་»ནང་། "འཇིག་རྟེན་བུད་མེད་ཇི་སྙེད་པ། །དེ་དག་སྐྱེས་པ་ཉིད་གྱུར་ཅིག །" ཅེས་པ་ལྟ་བུའི་རང་ལྟ་མཆོག་འཛིན་གྱི་དྲི་ངན་ཐུལ་ལེ་བ་དག་བཤད་ནས་བུད་མེད་རྣམས་ནམ་ཡང་ཡར་ལྡང་ས་མེད་པའི་ཧོམ་ཁུང་གཏིང་རིང་ཞིག་གི་མཐིལ་ན་དམོད་ཚིག་རྒྱ་རིམ་པ་དགུ་ཡིས་བཏབ་ནས་མནན་བཞག་འདུག

3. དེ་མིན་ནང་ཆོས་དང་འབྲེལ་ལ་མ་འབྲེལ་པའི་བོད་པའི་ཡུལ་སྲོལ་གོམས་གཤིས་ནང་"སྐྱེས་པ་བརྒྱ་ལས་འདྲེ་ཕོ་གཅིག་དང་། བུད་མེད་བརྒྱ་ལས་ལྷ་མོ་གཅིག་ལས་མེད་སྟབས་བུད་མེད་བརྒྱ་ཆའི་དགུ་བཅུ་གོ་དགུ་ནི་མི་ཤ་ཟ་མཁན་གྱི་འབྱུང་པོ་ཡིན་ཚུལ་དག་"བུད་མེད་ཁོ་རང་ཚོས་ཀྱང་བཤད་ཅིང་རང་ཉིད་མི་མ་ཡིན་པར་འདྲེ་ཡིན་པར་ཁས་ལེན་བྱེད་པས་མཚོན་ཡོད།

གཉིས་པ་བློ་རིག་དམན་པར་འདོད་པ་སྟེ།
བུད་མེད་བློ་མི་བརྟན་པའི་རང་གཞིན་ཡིན་པས་སྡོམ་པ་སྲུང་མི་ཐུབ་པར་བཤད་པ་དང་། "བུད་མེད་བློ་དང་ཆུ་བོ་གཉིས། །གྱེན་དུ་མི་འགྲོ་ཐུར་དུ་འགྲོ །" ཞེས་དང་། «གླིང་སྒྲུང་»ལས། "སྨན་བུ་མོའི་བློ་ལ་བློ་ཕུགས་མེད། །རྟ་རྒོད་མའི་འགྲོས་ལ་འགྲོས་ཕུགས་མེད་"ཅེས་དང་། "ཤིག་བུད་མེད་གཉིས་ལ་རུས་པ་མེད། །"ཟེར་བ་སོགས་ཚད་ལས་བརྒལ་བའི་སྨ་འབེབས་འདི་དང་འདི་བཞིན་བཤད་ན་མི་ཚར་བ་བྱས་ཡོད། གང་ལྟར་མགོ་བོ་རེ་དགྱེ་ན་ཐོ་བས་འབུར་འཇོམ་བྱེད་ལ་རྐང་པ་རེ་བརྐྱངས་ན་སྐམ་པས་ཤ་གཅུར་བྱེད་པའི་སྤྱི་ཚོགས་དོག་པོ་འདི་ལྟ་བུའི་ཁྲོད་དུ། 
ད་ལན་ 2011 ལོའི་བོད་ཀྱི་མཛེས་མ་ཁོང་ཚོས་སྤོབས་པས་མགོ་བོ་གྱེན་དུ་བཏེགས་པར་དགའ་བསུ་དང་མཛེས་སྡུག་གི་ལང་ཚོ་ཕྱི་རུ་ངོམ་པར་ཡི་རང་ཡོད།

2011/06/05

ཆང་བཟི་དོན་འགྲུབ།

ཉིན་ཞིག་གི་དགོང་མོར་དོན་འགྲུབ་ཆང་གིས་བཟི་སྟེ་ངུ་སྐད་སྒྲོག་ཀྱིན་ཆང་ཁང་ནང་དུ་འཛུལ་ཡོང་། དེའི་སྐབས་བཀྲ་ཤིས་དང་ཚེ་རིང་གཉིས་ཆང་ཁང་ནང་དུ་ཆང་འཐུང་བཞིན་ཡོད་པའི་དུས་དང་ཏག་ཏག་ཁེལ་བས་བཀྲ་ཤིས་ལམ་སང་ཡར་ལངས་ཏེ། “ཡ། གྲོགས་པོ་དོན་གྲུབ་གང་བྱུང་སོང་ངམཞེས་དྲིས་པར་ཁོས་ངུ་ཅོར་འབྱིན་བཞིནངས་ཚབ་ཆེ་བའི་བྱ་བ་མ་རུང་པ་ཞིག་བྱས་ཚར། སྐར་མ་ཁ་ཤས་སྔོན་དུ་ངས་ང་རང་གི་ཆུང་མ་ཆོས་མཚོ་ལགས་ཆང་ཤེལ་དམ་གང་གི་ཆེད་དུ་བཙོངས་པ་ཡིན"ཞེས་བཤད་པ་དང་བཀྲ་ཤིས་ནི་རྦད་དེ་ཧང་སང་སྟེ། ཨོ་ཁྱད་མཚར་ལ། འོ་ཏག་ཏག་རེད། ད་ལྟ་མོ་མིས་ཁྲིད་ཚར་དུས་ཡང་ཁྱེད་ཀྱིས་ཚུར་དགོས་འདོད་བྱེད་གི་ཡོད་དམ"ཞེས་དྲིས་པར་དོན་འགྲུབ་ཀྱིས་ཉམ་ཐག་པའི་ཚུལ་ཞིག་བསྟན་ནསཡོདཅེས་ལན་བྱིན། བཀྲ་ཤིས་ཀྱིས་སླར་ཡང་། སྙིང་རྗེ། ཁྱོད་ཀྱིས་མོ་ཁེ་བཟང་ཅུང་ཟད་ཅིག་གི་ཆེད་དུ་བཙོངས་ཚར་བ་རེད་ལ་ད་ནི་གང་བྱས་ཀྱང་ཕྱི་དྲགས་པ་རང་རེད་གདའ། འོ་རེད། ཁྱོད་ད་རུང་མོ་ལ་དགའ་པོ་ཡོད་དམ། ཞེས་དྲིས་པར་ཁོས་ཐེ་ཚོམས་མེད་པར། མེད། ང་མོ་ལ་དགའ་པོ་ཁྱོན་ནས་མེད། ཡིན་ནའང་མོ་ང་ལ་དགོས། གང་ཡིན་ཟེར་ན་ང་ཁ་སྐོམ་གྱི་འདུག།” ཅེས་བཤད།
དབྱིན་ཡིག་ཕབ།།

2011/06/04

གྱེར་གཏམ།

དེང་རབས་གསར་པའི་དཔལ་ཡོན་འདི་བཞད་དུས། །
རིག་གཞུང་རྙིང་པའི་རྫུན་འབག་དེ་བུད་སོང་། །
ཨ་གསར་གཞོན་ནུས་ཧོལ་རྒྱུག་ཅིག་བྱས་ཏེ། །
ཕ་མྱེས་ཤུལ་གཞག་ཐལ་དོང་དུ་བསྐྱུར་སོང་། །
ཁ་བའི་ཟུངས་ཁྲག་བྱེ་ཐང་ལ་ཐིམ་དུས། །
གདོང་དམར་བོད་ཕྲུག་ཕྱི་གླིང་ན་འཐོར་སོང་། །
མགོ་སེར་རྨོ་མོའི་རྨོང་སྤུ་ཡི་གསེབ་ཏུ། །
གངས་རིའི་ཕོ་རྒོད་མགོ་ཡོར་ཞིག་འཁོར་འདུག །
ན་གཞོན་བོད་མོའི་ལང་ཚོ་ཡི་མེ་ཏོག །
དབྱིན་རྒན་འཁྱམ་པོའི་ཉལ་གྲོགས་སུ་སྤྱོད་འདུག །
ཨ་ཁུ་གྲྭ་པའི་གྲྭ་ཤམ་གྱི་ཁུག་ཏུ། །
ཨ་ནེ་མཛེས་མ་སྐྱིད་ཉལ་ལ་རོལ་འདུག །
ཨ་རོགས་བོད་པའི་བྱ་སྤྱོད་ལ་བསམ་ན། །
ཨ་ཁུ་སྟོན་པའི་ལྷ་སྒྲུང་དང་འདྲ་འདུག །

ཞོགས་པ།


མཐའ་མེད་གཉིད་ཀྱི་ཞིང་ལས་གློ་བུར་དུ།།
དྲིལ་བརྡ་གཟན་མོ་རྣ་བའི་གཏིང་དུ་ལྷུང༌།།
མི་འདོད་སུན་སྣང་ཞིག་གིས་དབང་མེད་དུ།།
མགོ་བོ་གོས་ཀྱིས་བཏུམས་ཏེ་ཉལ་འདོད་ཀྱང༌།།

ང་དང་མི་ཚོ།

མི་ཚོ་སྐྱེ་གཟུགས་ལ་དུང་གི །
ངས་ནི་གཤིས་བཟང་ལ་སྨོན་གི །
ང་དང་ཁོང་ཚོ་གཉིས་བརྩད་དེ། །

ཕམ་ཁ་ང་རང་ལ་སྤྲད་སོང་། །
མི་ཚོས་འཇོན་ཐང་རང་གླེང་གི །
ང་ནི་ཁྲེལ་གཞུང་རང་བསམ་གི །
ཁྲེལ་དང་འཇོན་ཐང་གཉིས་བརྩད་དེ། །

རྒྱལ་ཁ་འཇོན་ཐང་གིས་ཁྱེར་སོང་། །
མི་ཚོས་དེང་རབས་རྐྱང་བསྟོད་གི། །
ངས་ནི་རིག་གཞུང་འདྲ་དྲན་འདུག །
གནའ་རབས་དེས་དུས་དང་རྩོད་པས། །

མཐེ་བོང་དེང་རབས་ལ་བསྒྲེངས་སོང་། །
མི་ཚོས་རྒྱུ་ནོར་རང་གསོག་གི །
ངས་ནི་བདེ་སྐྱིད་རང་འཚོལ་འདོད། །
བདེ་སྐྱིད་རྒྱུ་ནོར་དང་རྩོད་དུས། །
གྱོང་གུད་ང་རང་ལ་རག་སོང་། །

2011/06/03

འཛམ་གླིང་ནང་གི་མི་སྤྱང་ཤོས།

ཉིན་ཞིག་གི་ཕྱི་དྲོར་སྒེར་བདག་གནམ་གྲུ་ཆུང་བ་ཞིག་གི་ནང་དུ། སྐུ་ཞབས་སྨན་རམས་པ་མཁས་ཅན་ཞིག་དང་ཁྲིམས་རྩོད་པ་གྲགས་ཅན་གཉིས་པོ། འཁོས་མེད་ཉམ་ཆུང་གི་གྲྭ་རྐྱང་གཅིག་དང་བུ་ཚ་ཆུང་ངུ་ཞིག་དང་འགྲོགས་ཏེ་བར་སྣང་ལ་སྤྲོ་འཁྱམ་དུ་སྐྱོད་བཞིན་པའི་སྐབས། གློ་བུར་དུ་སྟབས་མ་ལེགས་པར་གནམ་གྲུའི་འཕྲུལ་ཆས་ལ་སྐྱོན་ཤོར་ཏེ་མར་ལྷུང་བའི་གནས་སུ་གྱར། ཁ་ལོ་བས་ཐབས་ཤེས་གང་དྲག་བྱས་ཀྱང་ཕན་ནུས་གང་ཡང་མ་ཐོན་པའི་ཐ་མ་དེར་འུ་ཐུག་སྟེ།མཆོང་གདུགས་(parachute)ཤིག་ལག་ཏུ་བཟུང་ནས་སྐད་ཤུགས་ཆེན་པོས་“འགྲུལ་པ་རྣམ་པ་ཚོ་ཚང་མ་མཆོང་རོགས་གྱིས། མཆོང་ན་ཡག་གི་རེད་”ཅེས་འབོད་ཀྱིན་རྒྱངས་སེ་སྔོན་དུ་མཆོང་སོང་། ད་རུང་བྱུས་མ་ལེགས་པ་གཞན་ཞིག་སྟེ་གནམ་གྲུའི་ནང་དུ་མཆོང་གདུགས་གསུམ་མ་གཏོགས་ལྷག་མེད། སྐུ་ངོ་སྨན་པས་ལམ་སང་གནས་ཚུལ་དེ་རྟོགས་ཏེ་“མི་མང་གི་ཚེ་སྲོག་སྐྱབས་རྒྱུའི་ཆེ་དུ་ང་ངེས་པར་དུ་གསོན་དགོས་”ཟེར་ནས་མཆོང་གདུགས་ཤིག་དམ་དུ་བཟུང་སྟེ་ལྡིང་སོང་དེ་མ་ཐག་ཁྲིམས་རྩོད་པས་ཀྱང་མཆོང་གདུགས་ཤིག་ཧབ་ཐོས་བྱས་ཏེ་“འཛམ་གླིང་ནང་གི་བློ་རིག་སྤྱང་ཤོས་དེ་ཁྲིམས་རྩོད་པ་དག་ཡིན་པས་ང་ཡང་ངེས་པར་དུ་གསོན་འོས་པ་རེད་”ཅེས་བཤད་དེ་ཐེ་ཚོམས་ཙམ་ཡང་མེད་ལྡིང་སོང་། ད་ནི་གནམ་གྲུའི་ནང་དུ་ཡ་ང་བའི་རྒན་བྱིས་གཉིས་པོ་ལས་སུ་ཡང་ལྷག་མེད་སྟབས་གྲྭ་རྒན་དེས་གཅེས་པར་འོས་པའི་བྱིས་པ་ཆུང་ངུ་དེའི་ངོ་གདོང་ལ་གཟིགས་ཀྱིན་ངག་འཇམ་པོས་“ངའི་བུ་ཆུང་། ང་ནི་འཇིག་རྟེན་འདིར་རྒྱུན་རིང་བསྡད་ལ་མི་ཚེ་ཡང་ཕལ་ཆེར་འཁྱོལ་ཚར་བས་ཡིད་ཚིམས་སོང་། བུ་ཁྱེད་རང་ནི་ད་ལྟ་ལོ་ན་ཆུང་ཞིང་མི་ཚེ་བསྐྱལ་རྒྱུ་གཞི་ནས་ཡིན་པས་མཆོང་གདུགས་འདི་ཁྱེད་ཀྱིས་ཁྱེར་ལ་མི་ཚེ་བདེ་སྐྱིད་དང་ལྡན་པ་ཞིག་སྐྱོལ་དང་”གསུངས་པ་དང་། བུ་དེས་མཆོང་གདུགས་ཞིག་གྲྭ་པའི་ཕྱག་ཏུ་ཕུལ་ཏེ་“རྒན་ལགས། སེམས་ཁྲལ་མ་གནང་དང་། འཛམ་གླིང་ནང་གི་མི་སྤྱང་ཤོས་དེས་ངའི་རྒྱབ་ཁུག་ཁུར་སོང་བ་ལས་འཆོང་འདུག་ཁྱེར་མི་འདུག་”ཅེས་བཤད་དེ་ཁོང་གཉིས་པོ་ཉེ་ཞོ་མེད་པར་ལྡིང་སོང་།།

དབྱིན་ཡིག་ལས་ཕབ།

2011/06/02

འུ་ཅག་བོད་མིར་དགོས་པ་སྟེ།།

ཉིན་རེའི་འཚོ་བའི་ཆ་རྐྱེན་དུ། །
ཞོགས་པའི་ལུས་རྩལ་རྩེ་བ་དང་། །
འཕྲོད་པའི་ཁ་ཟས་བསྟེན་པ་སོགས། །
ཚན་རིག་ནང་གི་ཉམས་ལེན་རེད། །

རྨོ་རྨོའི་ལག་གི་འཐག་ཟོང་གིས། །
བལ་སྐུད་འཐག་པའི་རིག་པ་དང་། །
གཡག་རྒོད་རོག་པའི་རྩིད་པ་ལས། །
སྦྲ་གུར་འཚེམ་པའི་བཟོ་ལས་དང་། །

སྔགས་པས་སད་སེར་སྲུང་བ་དང་། །
གྲྭ་པས་གླུད་ཡས་བསྔོ་བ་ཕུད། །
ས་གཤིས་ཡུལ་དུས་དང་འཚམས་པའི། །
ཞིང་ལས་ཐོན་སྐྱེད་སྤེལ་ཚུལ་འདི། །
ཚན་རིག་གཞུང་དང་མཐུན་པར་སྣང་། །

དགུན་ཁར་སྦྲ་ནག་འབུབས་པ་དང་། །
ལྕི་ཁང་ནང་དུ་སྡོད་པ་ནས། །
གནས་ཁང་དེང་རབས་རྩིག་སྟངས་བར། །
བཟོ་བཀོད་རིག་པའི་ཚན་རིག་རེད། །

བྱིས་པའི་ཚ་རྒོད་གཅོག་ཐབས་དང་། །
དར་མའི་གླད་ཁྲག་འབྱེད་ཐབས་དང་། །
རྒས་པོའི་ཁྲག་འགགས་གཤང་ཐབས་སོགས། །
གསོ་བ་རིག་པའི་ཚན་རིག་རེད། །

གང་ལྟར་ཚན་རིག་སྦྱང་དགོས་ན།།
རྩིས་དངོས་རྫས་གསུམ་མཐུན་པ་དགོས། །
ལྷ་ཆོས་ཚན་རིག་མཐུན་པ་ཡི། །
ལུར་སྒྲོགས་འདི་དག་སྟོང་འུར་ཡིན། །

2011/06/01

འབུ།

དབྱར་རྩ་དགུ་འབུ་བརྐོ་རྒྱུར་བྲེལ་བས། །
མྱེས་པའི་ཕ་ཞིང་རྩ་སྐྱས་བརྒྱངས་སོང་། །
བརྐོས་པའི་འབུ་ཤ་རྒྱ་ལ་བཙོང་སྟེ། །
འཁོར་རིགས་སྟོང་གིས་ལུང་པ་བཀང་སོང་། །

སྐྱུར་རྩི་བསྒོས་པའི་རོ་འཛིན་དིག་པོས། །
ཚིག་གསུམ་གཏམ་སྒོ་མ་ཕྱེས་སྔོན་ནས། །
གློ་འདོགས་གྲི་གུ་ཤུབ་ནས་ཕྱུང་སྟེ། །
སྤུན་ཟླའི་ཟུང་ཁྲག་ཐང་ན་འཕོས་སོང་། །

ཤ་རུལ་དྲི་ངན་གང་དུ་འཐུལ་སར། །
སྦྲང་ནག་འཚང་བ་དངོས་པོའི་གཤིས་ལྟར། །
མ་རབས་ཤོ་རྒྱན་གང་དུ་འཛུགས་སར། །
བསགས་པའི་འབུ་དངུལ་བསྐྱེལ་དུ་བྲེལ་འདུག །