2011/06/02

འུ་ཅག་བོད་མིར་དགོས་པ་སྟེ།།

ཉིན་རེའི་འཚོ་བའི་ཆ་རྐྱེན་དུ། །
ཞོགས་པའི་ལུས་རྩལ་རྩེ་བ་དང་། །
འཕྲོད་པའི་ཁ་ཟས་བསྟེན་པ་སོགས། །
ཚན་རིག་ནང་གི་ཉམས་ལེན་རེད། །

རྨོ་རྨོའི་ལག་གི་འཐག་ཟོང་གིས། །
བལ་སྐུད་འཐག་པའི་རིག་པ་དང་། །
གཡག་རྒོད་རོག་པའི་རྩིད་པ་ལས། །
སྦྲ་གུར་འཚེམ་པའི་བཟོ་ལས་དང་། །

སྔགས་པས་སད་སེར་སྲུང་བ་དང་། །
གྲྭ་པས་གླུད་ཡས་བསྔོ་བ་ཕུད། །
ས་གཤིས་ཡུལ་དུས་དང་འཚམས་པའི། །
ཞིང་ལས་ཐོན་སྐྱེད་སྤེལ་ཚུལ་འདི། །
ཚན་རིག་གཞུང་དང་མཐུན་པར་སྣང་། །

དགུན་ཁར་སྦྲ་ནག་འབུབས་པ་དང་། །
ལྕི་ཁང་ནང་དུ་སྡོད་པ་ནས། །
གནས་ཁང་དེང་རབས་རྩིག་སྟངས་བར། །
བཟོ་བཀོད་རིག་པའི་ཚན་རིག་རེད། །

བྱིས་པའི་ཚ་རྒོད་གཅོག་ཐབས་དང་། །
དར་མའི་གླད་ཁྲག་འབྱེད་ཐབས་དང་། །
རྒས་པོའི་ཁྲག་འགགས་གཤང་ཐབས་སོགས། །
གསོ་བ་རིག་པའི་ཚན་རིག་རེད། །

གང་ལྟར་ཚན་རིག་སྦྱང་དགོས་ན།།
རྩིས་དངོས་རྫས་གསུམ་མཐུན་པ་དགོས། །
ལྷ་ཆོས་ཚན་རིག་མཐུན་པ་ཡི། །
ལུར་སྒྲོགས་འདི་དག་སྟོང་འུར་ཡིན། །