2014/02/28

གནས་ཁྲ་མོཿ




འགྲོ་དྲུག་གི་རྣམ་ཤེས་ཡོད་ཚད།
གཟུངས་སྔགས་ཟབ་མོ་རུ་བསྐོས་པའི་རྡོ་འབུམ་ཆེན་མོ།
བློས་བསླངས་ཀྱིས་བཞེངས་པའི་པོ་ཏ་ལའི་མཛེས་པ་མཐའ་དག
ཡིག་འབྲུ་རེ་རེའི་རྒྱབ་ལོགས་ལ་གབ་བསྡད་ཡོད།
ཨོྃ་མ་ཎི་པདྨེ་ཧཱུཾ་ཧྲཱིཿ གནས་ཁྲ་མོ།
མི་རབས་ནས་མི་རབས། ཚེ་རབས་ནས་ཚེ་རབས་ཀུན་ཏུ།
རེ་བ་ལྕི་མོ་རེ་རེས། གསོལ་འདེབས་དྲག་པོ་རེ་རེས།
ཁ་ནང་གི་ལྕེ་དམར་པོ་དེ་ཇོ་དར་དུ་སྒྲོན་དུས།
སྒོ་གསུམ་གྱི་རྩོལ་བ་ཡོད་ཚད་མཎ་དབྱངས་ལ་ཐིམ་སོང་།
ཨོྃ་མ་ཎི་པདྨེ་ཧཱུཾ་ཧྲཱིཿ གནས་ཁྲ་མོ།
དཀའ་ཐུབ་རྩུབ་མོ་རེ་རེས། སྡུག་རུས་དྲག་པོ་རེ་རེས།
ས་འབུ་རྐང་མེད་དང་ལྷན་དུ་བརྐྱངས་ཕྱག་ནུད་དུས།
སྨུག་ནག་གི་ངོ་གདོང་ན་འཁོར་བའི་རྔུལ་ནག་གི་ཐིགས་པ་ཡོད་ཚད།
ས་རྡུལ་གྱི་ཕུང་པོ་རེ་རེ་ཁུར་ཏེ་སློག་པའི་གོང་བ་ནས་མར་འཛུལ་སོང་།
ཨོྃ་མ་ཎི་པདྨེ་ཧཱུཾ་ཧྲཱིཿ གནས་ཁྲ་མོ།

2014/02/21

སྐད་ཡིག་དཔྱད་རྩོམ།

༄༅། སྐད་ཡིག་ཤུགས་འབྱུང་དང་སྐད་ཡིག་འབད་སྦྱོང་གི་མཐུན་རྐྱེན་སྐྲུན་ཐབས།
མཁན་པོ་ཨོ་རྒྱན་རིག་འཛིན་ནམ། རིག་འཛིན་ཁྱུང་པོ།

སྔོན་གླེང་། 
དགོངས་མངའ་ལྟར་དེང་གི་དུས་སུ་རང་རེའི་བོད་ཀྱི་སྐད་ཡིག་དང་། མི་རིགས། རིག་གནས་དང་བཅས་པ་འཇིག་ཉེན་གྱི་གནས་སུ་གྱར་བཞིན་པ་འདིའི་ཐོག་བོད་ཕྱི་ནང་གང་ས་ནས་ལྷག་བསམ་དང་ཤེས་འཇོན་ལྡན་པའི་མི་སྣ་མི་ཉུང་བ་ཞིག་གིས་སྒེར་དང་ཚོགས་པའི་རྣམ་པ་གང་འོས་ཀྱི་ལམ་ནས་སྐད་རིགས་སྲུང་སྐྱོབས་ཀྱི་ལས་ལ་འབད་བཞིན་པ་སྟེ། དཔེར་ན་བོད་དུ་མཁན་ཆེན་ཚུལ་ཁྲིམས་བློ་གྲོས་མཆོག་གིས་རང་མི་རིགས་ཀྱི་སྐད་རིགས་སྲུང་སྐྱོབས་ཐད་ཀྱི་ཆེད་རྩོམ་«ལུག་རྫི་རྒན་པོའི་ཀི་སྒྲ»དང་། སྐད་ཡིག་སློབ་གསོའི་འཆད་ཁྲིད་«དུས་རབས་ཀྱི་རྔ་སྒྲ»ཚིག་མཛོད་«རྒྱ་བོད་དབྱིན་གསུམ་གསར་བྱུང་རྒྱུན་བཀོལ་མིང་མཛོད»འདྲ་བའི་རིན་ཐང་གཞལ་དུ་མེད་པའི་བརྩམ་བྱ་དང་འཆད་ཁྲིད་རེ་རེས་ཀྱང་སྐམ་རྙིད་ལ་ཕྱོགས་པའི་བོད་ཀྱི་སྐད་ཡིག་ལ་གསོན་ཤུགས་གསར་པ་ཞིག་སྦྱིན་བཞིན་པ་ལྟ་བུ་རེད། 

2014/01/30

སྐྱོ་གླུ།

གླུ་གཞས།


སྐྱིད་ཉི་མ་དྲོ་ན་བསམ་དུས། །
དགུང་ཨ་སྔོན་སྤྲིན་པས་གཡོགས་སོང་། །
ཆར་སིལ་མ་བབས་ན་བསམ་དུས། །
རླུང་ནག་པོས་མཐའ་ལ་གཏོར་སོང་། །
འདི་སྲིད་པའི་མནར་གཅོད་ཨེ་རེད། །

དཀར་འོ་མ་འཐུང་ཁ་ལ་མོར། །
ཉམས་ཆུང་བའི་བྱི་ལ་སླེབས་སོང་། །
ལྟོགས་ཞི་ལས་འཐུང་ན་བསམ་དུས། །
མངར་འོ་མ་ཐང་ལ་འཕོས་སོང་། །
ཡིད་ཕངས་བའི་ལས་ཤིག་ཨེ་རེད། །

ང་ཁ་རོག་འདུག་ན་བསམ་དུས། །
སྨན་བུ་མོས་གཡས་སྐོར་གཡོན་སྐོར། །
ངའི་འཁྲིས་ལ་འཁོར་ན་བསམ་དུས། །
སྨན་ཁྲེལ་མེད་གཞན་དང་བསྡེབས་སོང་། །
འདི་སྐྱོ་བའི་ལས་ཤིག་ཨེ་རེད། །

2014/01/21

ཨ་ཁུའི་རྗེས་དྲན།











ངའི་བརྩེ་བའི་ཨ་ཁུ་དྲིན་ཅན།
ཁྱེད་ཀྱིས་དང་ཐོག་བསླབས་པའི་འབྲུ་དེད་ཀྱི་ཁ་ལྕེ་རྡེབ་སྟངས།
ཁྱེད་ཀྱིས་བར་དུ་ཁྲིད་པའི་ཚག་དེད་ཀྱི་དབྱངས་འགྲོས་དལ་མོ།
ཁྱེད་ཀྱིས་ཐ་མར་གདམས་པའི་བསྡོམས་དེད་ཀྱི་འདོ་བའི་འགྲོས་ཆེན་དལ་མོས་དག
ངས་ད་ལྟའང་རྡེབ་ཀྱིན་འགུགས་ལ་འདོན་བཞིན་ཡོད།
ཨ་ཁུ་ལགས།
ཁྱེད་ཀྱིས་བསླབས་པའི་ཤིང་ལོ་རླུང་རྡེབ་མའི་ཆོས་དབྱངས་སྙན་མོ་དེ་ངའི་རྣ་ལམ་ད་རུང་ཡལ་མེད།
ཨ་ཁུ་ལགས།
ཁྱེད་ཀྱི་ཨག་ཚོམ་དཀར་པོའི་འོག་ནས་ཞག་རིལ་མ་སྣུམ་པོ་ཟོས་པའི་བྲོ་བ་དེ་ད་རུང་ལྕེ་གཏིང་ན་འཁྱིལ་ནས་ཡོད།
ཨ་ཁུ་ལགས།
ང་རྒྱུན་དུ་རླངས་འཁོར་གྱིས་མཁྲིས་ནད་སློང་རིམ་བཞིན་
ངས་ཁྱེད་ཀྱིས་གནང་བའི་འབྲི་བཟོ་སེར་པོ་དེ་ཟ་བར་འདོད་སོང་། ཨ་ཁུ་ལགས་
ཁྱེད་ཧ་ཅང་དྲན།

2014/01/17

དྲིན་ཆེན་གྱི་ཨ་ཕ་ལགས།


བུ་ངན་ང་བྱེས་ལ་འཁྱར་ཚེ། །
ཨ་ཕ་ཁྱེད་ཕྱི་མར་བུད་སོང་། །
མ་སྨད་ཚོ་ནང་དུ་ལུས་སོང་། །
སྐྱོ་གདུང་དེ་རྒྱ་མཚོར་འཁྱིལ་ཡོད། །
ཨ་ཕ་་ལགས།

དགུན་གསུམ་གྱི་ནམ་ཟླ་རེ་རེའི། །
སྒང་གསུམ་གྱིས་ཚར་ཞྭ་གོན་དུས། །
དབུ་སྐྲ་ལ་བ་མོ་འཁོར་བའི། །
ཨ་ཕ་ཁྱེད་སེམས་ནས་དྲན་སོང་། །
ཨ་ཕ་་ལགས།

དཔྱིད་གསུམ་གྱི་ནགས་མའི་པང་དུ། །
ཡིད་འོང་གི་ཁུ་བྱུག་དགོད་དུས། །
སྙན་འཇེབས་ཀྱི་ཨ་ཕའི་ཞལ་གསུང་། །
རྣ་ལམ་དུ་ལྷང་ལྷང་འཁོར་འོང་། །
ཨ་ཕ་་ལགས།

དབྱར་གསུམ་གྱི་སྦྲང་ཆར་འཁྲབས་རྗེས། །
འཇའ་འོད་ཀྱི་གུར་ཁང་བཞེངས་དུས། །
ཕ་རྒན་ཁྱེད་བུ་ལ་དུང་བའི། །
ཟོལ་མེད་ཀྱི་འཛུམ་དཀར་དྲན་སོང་། །
ཨ་ཕ་་ལགས།

སྟོན་གསུམ་གྱི་ལོ་མ་སྐམ་པོ། །
དྲག་རླུང་གིས་ཤེད་ཀྱིས་དེད་དུས། །
དུས་མིན་ཀྱི་འཆི་བ་སླེབས་པའི། །
ཨ་ཕ་ཁྱེད་དྲན་བཞིན་སྐྱོ་སོང་། །
ཨ་ཕ་་ལགས།

རི་རབ་འདི་རྒས་ནས་རྒུད་སོང་། །
གཙང་པོ་འདི་བཞུར་ནས་ཟད་སོང། །
འཇིག་རྟེན་འདི་བརྗེས་ནས་འགྱུར་སོང་། །
དྲན་གདུང་འདིར་འཕོ་འགྱུར་མི་གདའ། །
ཨ་ཕ་་ལགས།

རིག་འཛིན་ཁྱུང་པོ།

ཆོས་གྲོགས་ལ་ཕུལ་བའི་སེམས་གཏམ།

བདག་གིས་ངོ་ལོ་བཅོ་ལྔའི་གོང་ཙམ་ལ་བྲིས་པའི་སྙན་རྩོམ་ཞིག་ཉེ་ཆར་ལོ་ཤས་སྔོན་དུ། རྒྱ་གར་ལྷོ་ཕྱོགས་མཻ་སུར་སྔ་འགྱུར་རྙིང་མའི་ཆོས་སྡེ་ཆེན་པོ་རྣམ...