རྒྱ་ཡིག་ཤོའུ་ (shòu 壽) ངོ་སྤྲོད།

ངོ་སྤྲོད།

མཚོན་རྟགས་འདི་ནི་ལོ་རྒྱུས་ཡུན་རིང་ལྡན་པའི་རྒྱ་ཡིག་གི་ཡིག་གཟུགས་ཤིག་སྟེ། ཡིག་འབྲུ་འདིའི་ནང་དོན་ཚེ་རིང་ (shòu 壽) བར་མཚོན་ཞིང་། དུས་རབས་ཀྱི་འགྱུར་བ་བསྟུན་ཏེ་ཡིག་འབྲུ་ (壽) འདིའམ་སྟབས་བདེའི་ཡིག་འབྲུ་ (寿) འདི་བཀྲ་ཤིས་པའི་དུས་སྟོན་གྱི་ཉེར་མཁོ་སོགས་ཀྱི་ཐོག་ལ་རྣམ་པ་མི་འདྲ་བ་དུ་མ་བཀོད་ཡོད་པ་རེད། རྒྱ་ནག་གི་སྲོལ་རྒྱུན་བསམ་བློའི་ནང་། མི་ཚེའི་ནང་དམིགས་ཡུལ་གལ་ཆེ་ཤོས་གསུམ་སྟེ། བདེ་སྐྱིད་ (fú 福) དང་། དཔལ་འབྱོར་ཕུན་ཚོགས་པ་ (lù 祿) དང་། ཚེ་རིང་ (shòu 壽) བཅས་ཡིན་ཞིང་། ཡིག་འབྲུས་དེ་དག་མཚོན་པར་ཡིད་ཆེས་བྱེད། མཚོན་རྟགས་ལ་"སྐར་མའི་ལྷ་"གསུམ་ཞེས་གོན་ཆས་དང་། ལག་ཆ་མི་འདྲ་བ་བཟུང་བའི་སྐྱེས་པའི་གཟུགས་བརྙན་གསུམ་ཡོད། རྒྱ་ཡིག་ "ཚེ་" (壽 - Shòu) ཞེས་པ་འདི་གཙོ་བོ་རས་ཆ་དང་། ཁྱིམ་ཆས། རྫ་ཆས། རྒྱན་ཆ་བཅས་ཀྱི་སྟེང་དུ་མཐོང་རྒྱུ་ཡོད། ཡི་གེ་འདི་རྐྱང་པ་འབྲི་བའམ། ཡང་ན་མེ་ཏོག་དང་། སྲོག་ཆགས་ཕ་ཝང་། བཀྲ་ཤིས་པའི་མཚོན་རྟགས་གཞན་གྱིས་བསྐོར་ནས་འབྲི་སྲོལ་ཡོད།

འདིའི་འབྱུང་འབྱུང་ཁུངས་ནི།

དང་པོ། རུས་སྦལ་ལྐོག་པགས་ལ་བྲིས་པའི་ཡིག་འབྲུ་ནི་སྤྱི་ལོའི་སྔོན་གྱི་དུས་རབས་ 14–11 བར་སྐབས་སུ་བྱུང་ཞིང་། དེའི་ཐོག་མའི་རྣམ་པ་ནི་མི་ཞིག་གིས་འཁར་རྒྱུག་བཟུང་ཡོད་པས་རྒས་རྒོག་མཚོན་པ་དང་། སྐབས་རེར་ལག་པས་ཅ་དངོས་ཤིག་འབུལ་བ་མཚོན་པ་དེས་ཚེ་རིང་པོར་སྨོན་པའི་མཚོན་དོན་མཚོན་ཡིན་པར་བཤད།
གཉིས་པ། ཟངས་ཀྱི་བརྐོས་ཡིག་ལ་གསལ་བའི་ཡིག་འབྲུ་དེ་ནི་ཀྲོའུ་རྒྱལ་རབས་སྐབས་ (1046–771 BC) བྱུང་ཞིང་དེའི་རྣམ་པ་ནི་མི་ཞིག་དང་ཐིག་རིང་པོ་ལྟ་བུར་སྣང་བ་དེས་ཚེ་རིང་ཞིང་གསོན་ཤུགས་རྒྱས་པའི་མཚོན་དོན་ཡོད་པར་བཤད།
གསུམ་པ། ཐམ་ཁའི་ཡིག་འབྲུ་ནི་སྤྱི་ལོའི་སྔོན་གྱི་དུས་རབས་གསུམ་པ་ཆིན་རྒྱལ་རབས་སྐབས་སུ་བྱུང་ཞིང་། ཡི་གེ་དེ་དག་སྔར་ལས་ཚད་ལྡན་ཅན་དང་། དབྱིབས་རིང་དུ་བཏང་བ་མ་ཟད་རྒྱན་སྤྲོས་ཀྱི་ཡིག་གཟུགས་ཅན་ཞིག་ཡིན་པར་གསལ།
བཞི་པ། ཧན་རྒྱལ་རབས་ནས་བཟུང་གཞུང་གི་ལས་བྱེད་པའི་ཡི་གེ་དང་། དཔེ་དེབ། དེ་མིན་དངོས་རྫས་མི་འདྲ་བ་དུ་མ་ཞིག་ལ་ཡིག་འབྲུ་འདི་སྒྱུ་རྩལ་གྱི་རྣམ་པའི་ཐོག་ནས་བེད་སྤྱོད་བྱེད་པའི་རྣམ་པ་གཏན་འཁེལ་ལྟ་བུ་བྱུང་ཡོད་པར་བཤད།

བརྩེ་དུང་རྒྱལ་མོའི་ལོ་རྒྱུས་དངོས།

བརྩེ་དུང་རྒྱལ་མོའི་ལོ་རྒྱུས་དངོས།

Cambodian Journalists Alliance Association: 18 November 2025 7:34 PM.

གཟའ་མིག་དམར་ཉིན་སི་ཝེ་རིང་ (Svay Rieng) ཉེན་རྟོག་པས་དྲ་ཐོག་མགོ་སྐོར་དང་། ཁྲིམས་འགལ་བཀག་ཉར། བཟི་སྨན་དང་འབྲེལ་བའི་ནག་ཉེས་ཡོད་པའི་ཝི་ཏི་ནམ་གྱི་མི་སེར་ལྔ་དང་། ཁོང་ཚོ་བྲོས་བྱོལ་དུ་གཏོང་མཁན་བུད་མེད་གཅིག དེ་བཞིན་ཁམ་བྷོ་ཌི་ཡའི་སྐྱེས་པ་གཅིག་བཅས་བསྐྱར་དུ་འཛིན་བཟུང་བྱས་ཡོད། དེ་ནི་ཁོང་ཚོས་བཙོན་ཁང་ནས་བྲོས་བྱོལ་བྱེད་ཐབས་བྱས་རྗེས་ཡིན་པ་དང་། སྤྱི་དམངས་ཚོགས་པ་ཞིག་གིས་ཀྱང་གནད་དོན་འདིར་མཐིལ་ཕྱིན་པའི་ཞིབ་འཇུག་བྱེད་དགོས་པའི་འབོད་སྐུལ་ཞུས་ཡོད།

དྲ་ཐོག་ཏུ་ཁྱབ་གདལ་ཆེན་པོ་ཕྱིན་པའི་བརྙན་ཐུང་ཞིག་གི་ནང་དུ། མི་དྲུག་གིས་སི་ཝེ་རིང་(Svay Rieng) ཞིང་ཆེན་ཁྲིམས་ཁང་དུ་རླངས་འཁོར་ནས་བབས་སྐབས་ཉེན་རྟོག་པ་དང་མེ་མདའ་རྒྱག་རེས་བྱས་ཏེ་བྲོས་བྱོལ་གྱི་ཐབས་ཤེས་བྱས་པ་མཐོང་རྒྱུ་ཡོད། དེ་ནི་གདོང་ཁེབས་དང་གོས་ནག་པོ་གྱོན་པའི་བུད་མེད་ཅིག་གིས་བཙོན་པ་ཞིག་ལ་མེ་མདའ་སྤྲད་དེ། ཉེན་རྟོག་པར་མེ་མདའ་རྒྱག་བཞིན་བྲོས་བྱོལ་བྱེད་ཐབས་བྱས་ཡོད་ཀྱང་སུ་ལའང་རྨས་སྐྱོན་ཕོག་མེད།

བཙོན་ཁང་སྤྱི་ཁྱབ་ལས་ཁུངས་ཀྱི་མགྲིན་ཚབ་པ་ཁ་ཨང་སོ་ན་དིན་ (Kheang Sonadin) གྱིས་བཤད་དོན་ལྟར་ན། རྗེས་འདེད་བྱས་རྗེས་སྐྱེས་པ་གཅིག་དང་ཁྲིམས་ཁང་དུ་འཁྲིད་པའི་ཁམ་བྷོ་ཌི་ཡའི་བཙོན་པ་དེ་བཟུང་ཡོད་པ་དང་། ལྷག་འཕྲོས་ཀྱི་སྐྱེས་པ་བཞི་དང་ངན་རོགས་བུད་མེད་དེ་དག་ཆུ་ཚོད་ཁ་ཤས་ཀྱི་རྗེས་སུ་འཛིན་བཟུང་ཐུབ་པ་བྱུང་ཡོད། ཁོང་གིས་མུ་མཐུད་དུ་"ཉེས་ཅན་དྲུག་པོ་དེ་དག་ནི་བཟི་སྨན་དང་། ཁྲིམས་འགལ་གོ་མཚོན་ཉར་ཚགས། མི་གཏའ་བཙན་ཉར་བྱས་པའི་ཉེས་ཅན་པ་རེད་"ཅེས་བཤད། ཁོང་ཚོ་ནི་ ༢༠༢༥ ལོའི་ཟླ་ ༡ པོའི་ནང་བཀག་ཉར་བྱས་ཡོད་པ་རེད།

གཞུང་འབྲེལ་མིན་པའི་ཐོབ་ཐང་ཚོགས་པ་ལི་ཁ་དྷོ་ (Licadho) ཡི་འགན་འཛིན་ཨམ་སམ་ཨ་ཏཱ་ (Am Sam Ath) ཡིས་ཉེན་རྟོག་པར་གནད་དོན་འདིར་ཞིབ་འཇུག་ནན་པོ་དང་བཙོན་ཁང་གི་བདེ་འཇགས་དོ་དམ་ཤུགས་ཆེ་རུ་གཏོང་དགོས་པའི་འབོད་སྐུལ་ཞུས་ཡོད། ཁོང་གིས་"གནད་དོན་འདི་ནི་བཙོན་པར་དོ་དམ་དང་བདེ་འཇགས་སྲུང་སྐྱོབ་བྱེད་ཕྱོགས་ཐད་ཀྱི་སློབ་གསོ་ཞིག་ཏུ་འགྱུར་དགོས། བདེན་པ་གསལ་རྟོགས་དང་ཁྲིམས་མཐུན་གྱི་ཐག་གཅོད་ཡོང་ཆེད་ཞིབ་འཇུག་ནན་པོ་བྱེད་དགོས་"ཞེས་དང་། ཁོང་གིས་སྔོན་མ་སིམ་རེབ་ (Siem Reap) ཞིང་ཆེན་དུ་ཐེ་ཝན་གྱི་བཟི་སྨན་ནག་ཚོང་བ་ཞིག་སོ་སྨན་བཅོས་བྱེད་སྐབས་བྲོས་བྱོལ་དུ་སོང་བའི་གནད་དོན་དྲན་གསོ་བྱས་ཡོད།

སི་ཝེ་རིང་ཁྲིམས་ཁང་གི་མགྲིན་ཚབ་པ་ལས་ཆུང་ཧེང་ (Lay Chungheng) གིས་ཉེན་རྟོག་པས་གནད་དོན་འདིའི་ཐོག་ལས་ཀ་བྱེད་བཞིན་ཡོད་ཅེས་མདོར་བསྡུས་ཤིག་བཤད་པ་ལས་འགྲེལ་བརྗོད་གཞན་བྱས་མེད། དེ་བཞིན་འབྲེལ་ཡོད་དཔོན་རིགས་གཞན་ཁག་ཅིག་གིས་ཀྱང་མཆན་འགྲེལ་གནང་རྒྱུར་ཁས་ལེན་བྱས་མེད་པ་རེད།

Cambodian Journalists Alliance Association

མེེ་སོར་ནས་མ་ཌི་ཀེ་རི་བར་གྱི་མགྱོགས་ལམ།

མེེ་སོར་ནས་མ་ཌི་ཀེ་རི་བར་གྱི་མགྱོགས་ལམ་“དཔལ་འབྱོར་ལམ་ཆེན་” (Mysore-Madikeri Economic Corridor Expressway) ཞེས་པ་དེ་ད་ལྟ་དངོས་སུ་ལས་འགོ་ཚུགས་འདུག

གཞི་རྒྱ་ཆེ་བའི་གཞུང་ལམ་འཛུགས་སྐྲུན་གྱི་ལས་འཆར་ (NHAI) འདིར། ལམ་གྱི་རིང་ཚད་ལ་སྤྱི་ལེ་ 115 དང་། བཟོ་སྐྲུན་མ་དངུལ་ཧིན་སྒོར་ཀ་རོར་དྲུག་སྟོང་ (6,000 crores) ཡིན་པར་བཤད་ཅིང་ཀ་རོར་ཞེས་པ་ནི་འབུམ་བརྒྱ་ཐམ་པ་ཀ་རོར་གཅིག་ཡིན་པ་རེད། ལན་ཆེན་འདི་ནི་ཤྲི་རང་ག་པཊ་ན་ནས་མ་ཌི་ཀེ་རི་ (Srirangapatna to Madikeri) བར་མཐུད་རྒྱུ་ཡིན་པ་དང་། ད་ཆ་གྲོང་ཁྱེར་བྷེང་ལོར་ནས་ཀོ་ད་གུ་ (Banglore-Kodagu)ཡི་འགྲུལ་བཞུད་དུས་ཚོད་ཆུ་ཚོད་ 7 ཡིན་ཡང་གཞུང་ལམ་གྲུབ་རྗེས་ཆུ་ཚོད་ 5 ཡི་ནང་འབྱོར་ཐུབ་པར་བཤད།

ལར་ནས་འདི་ས་ཆའི་བདག་དབང་གི་རྐྱེན་པས་བར་སྐབས་འགོར་འགྱངས་བྱུང་ཡང་ད་ལྟ་གནད་དོན་ཐག གཅོད་བྱུང་ཟིན་པས་ལས་འགོ་དངོས་སུ་བཙུག་ཟིན་འདུག་ལ། འཆར་གཞི་ལྟར་ན་སྤྱི་ལོ་ 2027 ཟླ་ 4 ནང་མཇུག་བསྒྲིལ་རྒྱུར་འབད་ཀྱིན་ཡོད་པར་བཤད་ཅིང་། ལས་གཞིའི་དམིགས་ཡུལ་ནི་བྷེང་ལོར་ནས་མ་ཌི་ཀེ་རི་ (Banglore-Medikeri) བར་གྱི་འགྲུལ་བཞུད་དུས་ཚོད་ཧ་ཅང་ཉུང་དུ་གཏོང་རྒྱུ་དང་འཚང་ཁ་ཆུང་དུ་གཏོང་རྒྱུ་དེ་ཡིན་པར་བཤད།

ལོ་སོ་དྲུག་རིང་སྐྱེས་པར་བརྫུས་ཏེ་འཚོ་ལ་བསྐྱལ་བའི་ཏ་མིལ་གྱི་བུད་མེད་ཅིག

ཁུངས། རྒྱ་གར་ཚགས་པ། (New Indian Express)

ལོ་སོ་དྲུག་རིང་སྐྱེས་པར་བརྫུས་ཏེ་འཚོ་ལ་བསྐྱལ་བའི་ཏ་མིལ་(TN)གྱི་བུད་མེད་ཅིག་གིས་ཉེ་ཆར་རོགས་རམ་འཚོལ་བ། བུ་མོ་ཤན་མུ་ག་སུན་ད་རི་ (Shanmugasundari) ད་ལྟ་གཉེན་སྒྲིག་བྱས་ཟིན་ནའང་། ཨ་མ་པེཏྕི་ཅི་ཨམ་མལ་(Petchiammal) གྱིས་ཁོ་མོའི་ཆས་གོས་བརྗེ་སྒྱུར་བྱེད་པར་གྲ་སྒྲིག་མེད་པར་བཤད།

གནས་ཚུལ་གྱི་སྙིང་དོན།

རྒྱ་གར་ཏ་མིལ་ན་དུའི་གྲོང་རྡལ་ཐཽ་ཐུ་ཀུ་དི་ (Thoothukudi) ནས་ཡིན་པའི་བུད་མེད་པེཏ་ཅི་ཨམྨལ་ (S. Petchiammal) གྱིས་བུད་མེད་ལོ་ན་ 57 ཅན་ཞིག་གིས་ལོ་ 36 རིང་རང་ཉིད་ཀྱི་བུ་མོ་གསོ་སྐྱོང་བདེ་ལེགས་ཡོང་ཆེད་སྐྱེས་པའི་རྣམ་པར་བརྫུས་ནས་འཚོ་བ་བསྐྱལ་ཡོད་པ་རེད། དེ་ཡང་ཁོ་མོས་"ཕོ་དབང་རིང་ལུགས་ཀྱི་སྤྱི་ཚོགས་ནང་ཁོ་མོའི་བུ་མོ་གཅིག་པུ་དེ་ཉེན་མེད་ངང་གསོ་སྐྱོང་བྱེད་པའི་ཆེད་དུ་ཡིན་"ཞེས་བཤད། ཁོ་མོ་ནི་ཐཽ་ཐུ་ཀུ་དི་ནི་གྲོང་རྡལ་ནི་སྤྱི་ལེ་ 30 ལྷག་ཙམ་གྱི་སར་ཡོད་པའི་ཀཏྟུ་ན་ཡ་ཀན་པཏྟི་ (Kattunayakanpatti) གྲོང་ཚོ་ནས་ཡིན་འདུག་ལ། སྐབས་དེར་ཁོ་མོའི་ཁྱོ་ག་གློ་བུར་དུ་འདས་རྗེས་ཁོ་མོ'མུ་ཐུ་ (Muthu) སུ་ཞེས་པའི་སྐྱེས་པ་ཞིག་གི་ངོ་བོར་འགྱུར་དགོས་བྱུང་བ་རེད།

པེཏ་ཅི་ཨམྨལ་གྱིས་དྲན་གསོ་བྱེད་བཞིན་"ངས་གཉེན་སྒྲིག་བྱས་ནས་ཉིན་ 15 ལས་མ་འགོར་བར་ངའི་ཁྱོ་ག་སི་ཝ་འདས་གྲོང་དུ་སོང་ལ་སྐབས་དེར་ང་ལོ་ 20 ཡིན། མི་འགྱངས་བར་ང་ལ་བུ་མོ་ཤན་མུ་ག་སུན་དྷ་རི་ (Shanmugasundari) བཙས། ངས་གཉེན་བསྐྱར་སྒྲིག་མི་བྱེད་པར་ཐག་བཅད། འོན་ཀྱང་ང་གཙིག་པུས་ཕྲུ་གུ་གསོ་སྐྱོང་བྱེད་རྒྱུ་དེ་ཧ་ཅང་དཀའ་བ་སྟེ། སྐབས་དེར་ངས་འཛུགས་སྐྲུན་ས་ཚིགས་དང་། མགྲོན་ཁང་། ཇ་ཁང་བཅས་སུ་ལས་ཀ་བྱས་པ་ཡིན། འོན་ཀྱང་། ས་ཆ་དེ་ཚོ་ཚང་མ་ནས་ང་ལ་ཆགས་སྲེད་དང་འབྲེལ་བའི་བརྙས་བཅོས་རབས་དང་རིམ་པར་བྱུང་།" ཞེས་བཤད།

སྐྱེས་པའི་རྣམ་པར་བརྫུས་པའི་གནས་ཚུལ།

ཁོ་མོར་ཆགས་སྲེད་ཀྱི་བརྙས་བཅོས་དང་དཀའ་ངལ་དུ་མ་རིམ་པར་ཕྲད་རྐྱེན། པེཏ་ཆི་ཡམ་མལ་གྱིས་ཏི་རུ་ཆེན་དུར་མུ་རུ་གན་ལྷ་ཁང་ (Tiruchendur Murugan Temple) དུ་ཕྱིན་ནས་བུད་མེད་ཀྱི་གྱོན་ཆས་དག་སྟོད་ཐུང་དང་ལུང་གི་ (shirts & Lungi) རུ་བརྗེས་ཤིང་མིང་"ཡང་མུ་ཐུ་"ཞེས་སྐྱེས་པའི་མིང་ཞིག་ཏུ་བསྒྱུར། ཡང་ཁོ་མོས། "ལོ་ 20 ལྷག་གི་སྔོན་ལ་ང་ཚོ་ས་གནས་ཀཏྟུ་ན་ཡཀྐན་པ་ཏྟི་ (Kattunayakkanpatti) ལ་གནས་སྤོས་ནས་གཞིས་བཟུང་། ངའི་ནང་མི་ཉེ་འབྲེལ་ཚོ་དང་ངའི་བུ་མོ་གཉིས་ཀྱིས་མ་གཏོགས་ང་བུད་མེད་ཡིན་པ་མི་གཞན་སུས་ཀྱང་ཤེས་"ཟེར།

ད་ལྟ་བུ་མོ་ཤན་མུ་ག་སུན་ད་རི་གཉེན་སྒྲིག་བྱས་ཟིན་ནའང་། ཨ་མ་པེཏ་ཅི་ཨམ་མལ་གྱིས་ཁོ་མོའི་ཕོ་ཡི་གྱོན་ཆས་དེ་བརྗེ་སྒྱུར་བྱེད་པར་གྲ་སྒྲིག་མེད་པ་དང་། དེའི་རྒྱུ་མཚན་བཤད་དོན། "ཆ་ལུགས་འདིས་ངའི་བུ་མོར་ཉེན་མེད་ཀྱི་འཚོ་བ་ཞིག་འགན་ལེན་བྱས་སོང་། ང་མ་ཤི་བར་དུ་མུ་ཐུ་ཞེས་པའི་མིང་ཐོག་རང་དུ་གནས་རྒྱུ་ཡིན།" ཞེས་བཤད། ཁོ་མོའི་ཨ་དྷཱར་བྱང་བུ་ (Aadhaar card) དང་། ཟ་འབྲུའི་བྱང་བུ་ (ration card) ། འོས་ཤོག་བྱང་བུ་ (voter ID) བཅས་ཀྱི་ནང་ཁོ་མོ་སྐྱེས་པ་ཡིན་པར་བཀོད་ཡོད།

རོགས་རམ་འཚོལ་བ།

ད་ཆ་པེཏ་ཅི་ཨམ་མལ་གྱིས་དཀའ་ཚེགས་ཆེ་བའི་ལས་ཀ་བྱེད་མི་ཐུབ་པར་བརྟེན། མོས་ལོ་གཅིག་གི་སྔོན་ལ་བུད་མེད་ཀྱི་ངོ་བོའི་ཐོག་ (on a female identity) ལ་ཨེམ་ཇི་ཨེན་ཨར་ཨི་ཇི་ཨེསེ་ (MGNREGS) ལས་ཀའི་བྱང་བུ་ཞིག་བླངས་པ་རེད། མོས་བཤད་དོན། "ང་རང་ཉིད་ལ་དབང་བའི་ཁང་པ་མེད་ལ་གསོག་དངུལ་ཀྱང་མེད། ཡུག་སའི་ལག་ཁྱེར་ཡང་ཞུ་ཐབས་མེད་རྐྱེན། ངས་གཞུང་ལ་ང་ལ་དངུལ་དངོས་ཀྱི་རོགས་སྐྱོར་གནང་རོགས་ཞུ་རྒྱུ་ཡིན།" ཞེས་བཤད། ས་གནས་སྒྲིག་འཛིན་པ་ཌོག་ཊར་ཀེ་སེན་ཐིལ་རཱཇ་ (Dr. K. Senthil, Raj) ལགས་ཀྱིས་པེཏ་ཅི་ཨམ་མལ་ལ་སྤྱི་ཚོགས་བདེ་དོན་གྱི་ལས་འཆར་གང་ཡང་རུང་ཞིག་གི་འོག་ནས་རོགས་སྐྱོར་ཐུབ་མིན་བརྟག་དཔྱད་བྱ་རྒྱུ་ཡིན་ཞེས་བཤད་ཡོད།

སྤྱི་ལོ་༢༠༢༥་ལོའི་ནོ་བེལ་ཞི་བདེའི་གཟེངས་རྟགས།

སྤྱི་ལོ་༢༠༢༥་ལོའི་ནོར་ཝེ་ནོ་བེལ་ཚོགས་ཆུང་གིས་འདི་ལོའི་ནོ་བེལ་ཞི་བདེའི་གཟེངས་རྟགས་དེ་ཝེ་ནི་ཛུ་ཝེ་ལའི་བུད་མེད་མ་རི་ཡ་ཀོ་རི་ན་མ་ཆ་ཌོ་ (Maria Corina Machado) ལགས་སུ་འབུལ་རྒྱུའི་ཐག་གཅོད་གནང་ཡོད་པ་དང་། མོའི་བྱས་རྗེས་ནི་ཝེ་ནི་ཛུ་ལའི་རྒྱལ་ཁབ་ཏུ་དབང་ཆ་གཅིག་སྡུད་ལམ་ལུགས་ལ་ཁ་གཏད་དུ་ལངས་ཏེ། དྲང་བདེན་དང་ཞི་བདེའི་ལམ་ནས་ཡང་དག་པའི་དམངས་གཙོའི་ལམ་ལུགས་འཛུགས་པར་འབད་བརྩོན་དང་ནུས་པ་ཤུགས་ཆེར་བཏོན་ཡོད་པ་རེད།

ཕ་སྐད་ཀྱི་རྩོད་གླེང་ལས་འཕྲོས་པའི་གཏམ། (ཚུལ་ཁྲིམས་བློ་གྲོས།)

ད་ལམ་བོད་ཀྱི་ན་གཞོན་འགའ་རེས་བོད་ཀྱི་སྐད་བཤད་ན་གོ་བརྡ་མི་འཕྲོད་པའམ། ཚིག་ལ་ནུས་པ་མེད་པ་སྐམ་པོ་ལྟ་བུའི་སྣང་བ་འདུག་ཅེས་སྨྲས་སོང་ཞེས་ཟེར་ཏེ། མི་མང་པོ་ཁྲོས་ནས་དེ་ལ་དགག་གཏམ་གཏོང་བའམ་འགའ་རེས་དེ་ལ་ལན་འདེབས་པ་སོགས་ཀྱིས་འུར་འུར་ཟིང་ཟིང་བྱེད་ཀྱིན་འདུག། སྐད་ཆ་དེའི་དོན་དེ་ལྟར་ཡིན་མིན་མ་ཤེས་མོད། ཡིན་ཡང་རུང་མིན་ཡང་རུང་གནས་ཚུལ་འདི་ལྟ་བུ་ནི་གང་སར་ཁྱབ་ནས་འདུག །དེའི་ཕྱིར་རང་ཅག་གིས་ཉིན་འགའ་ཞིག་གི་རིང་ལ་ན་གཞོན་འདི་དག་ལ་ཁ་རུབ་བརྒྱབ་ནས་འུར་ཞོགས་ཤིག་བྱས་པ་གཅིག་པུས་ཕན་པ་ཅི་ཡང་མེད། ཕྱོགས་གཅིག་ནས་བཤད་ན་ན་གཞོན་འདི་རྣམས་ལ་ཁག་མེད་དེ། ཆུང་ལོ་གཉིས་ལོན་པ་ནས་བཟུང་ཕ་མ་སོགས་ཁྱིམ་མི་རྣམས་ཀྱིས་ཕ་སྐད་སློབ་སྦྱོང་གི་ཕྱོགས་ལ་དོ་སྣང་ཡེ་མ་བྱས་ཤིང་། ཉེན་ཁ་ཅན་གྱི་བྱ་བ་མང་པོ་ཞིག་མདུན་ན་མངོན་བཞིན་དུ་སྣང་མེད་བྱས་པའི་དབང་གིས་ད་ལྟ་མཇུག་འབྲས་འདི་ལྟ་བུ་ཞིག་བྱུང་བ་རེད། རྒྱུ་འབྲས་རྟེན་འབྲེལ་གྱི་ཆོས་ཉིད་ལ་རྩོད་རྒྱུ་ཅི་ཡང་མེད། ད་དུང་འདི་ལས་ཀྱང་སྡུག་པ་མང་པོ་ཡོད་པ་ཤེས་པར་གྱིས། ད་ཐེངས་ཀྱི་བྱ་བ་འདིའི་ནང་ནས་རང་རེས་ངེས་པར་དུ་གོ་དགོས་པ་གཅིག་ནི། གལ་ཏེ་ན་གཞོན་རྣམས་ཀྱིས་རང་གི་ཕ་སྐད་ལ་བརྡ་སྤྲོད་ཀྱི་ནུས་པ་མེད་སྣང་སྐྱེས་པ་སྟེ། ཚིག་སྐམ་པོའམ་བྲོ་བ་མེད་པ་ལྟ་བུའི་ཚོར་བ་ཞིག་བྱུང་བ་ཡིན་ན། དེའི་ཚེ་སྐད་ཡིག་དེ་ཉམས་པའི་ཚད་མཐོན་པོ་ཞིག་ཏུ་སླེབས་ཚར་བའི་མཚོན་རྟགས་ཡང་དག་པ་ཞིག་ཏུ་ཤེས་དགོས་ཏེ། སྐད་ཡིག་ཉམས་པ་ལ་གནས་ སྐབས་གསུམ་ཡོད་པ་ལས། གནས་སྐབས་དང་པོ་གཉིས་ཀ་བརྒལ་ཚར་ནས་ད་གནས་སྐབས་གསུམ་པའམ་ཐ་མའི་དུས་སུ་སླེབས་པའི་མཚོན་རྟགས་དངོས་སུ་བྱུང་བ་ཡིན་པའི་ཕྱིར་ཏེ། ཁོ་བོས་བྲིས་པའི་འཛམ་གླིང་སྐད་ཡིག་གི་སྐྱེ་འཆིའི་ལོ་རྒྱུས་བསྡུས་པ་ལུག་རྫི་རྒན་པོའི་ཀི་སྒྲ་ཞེས་བྱ་བ་ལས། གནས་སྐབས་གསུམ་པ་ནི། དེ་ལྟར་སྐད་གཉིས་པོ་བཤད་པས་ན་གཞོན་རྣམས་ཀྱི་ཕྱི་སྐད་འཆད་པའི་ནུས་པ་ཇེ་བས་ཇེ་བཟང་དུ་འགྱུར། མི་ཐམས་ཅད་ཀྱིས་ཕྱི་སྐད་སྨྲ་བ་ལ་ལྟ་སྟངས་ཀྱང་ཇེ་བཟང་དུ་ཕྱིན་ནས་ཀུན་གྱིས་ཁས་ལེན། ཅི་ཞིག་ན་ལོ་ཆུང་རྣམས་ཕ་སྐད་ཀྱི་མིང་ཚིག་རྣམས་ལ་ཆ་རྒྱུས་ཇེ་ཆུང་དང་ཕྱི་སྐད་ཀྱི་དེ་ལ་འདྲེས་ཆ་ཆེ་བས་ཕ་སྐད་འཆད་པ་བས་ཀྱང་ཕྱི་སྐད་འཆད་པ་ལ་མཁས་པར་འགྱུར། དེ་ཚེ་བརྗོད་ བྱ་མང་པོ་ཞིག་ཕ་སྐད་ཀྱིས་བཤད་ན་བརྗོད་མི་ཐུབ་ལ་ཕྱི་སྐད་ཀྱིས་བཤད་ན་བརྗོད་ཐུབ་པའི་སྣང་བ་འཆར་ཞིང་། ཕ་སྐད་ཀྱི་ནང་དུ་ཕྱི་སྐད་ཀྱི་མིང་ཚིག་ཤིན་ཏུ་མང་པོ་འདྲེས། ཕྱི་སྐད་སྨྲ་མ་ཤེས་ན་རིག་གནས་མེད་པ་དང་མཐོང་རྒྱ་མེད་པའི་གྲལ་དུ་འཇོག དེས་ན་ཕ་སྐད་སྨྲས་ན་ངོ་ཚ་དགོས་པ་དང་རང་ཉིད་མི་གཞན་རྣམས་ལས་རིག་གནས་ཀྱི་རིམ་པ་གཅིག་གིས་དམན་པའི་སྣང་བ་འགོག་མེད་དུ་འཆར། དེའི་དབང་གིས་ན་གཞོན་རྣམས་འདུ་འཛོམས་བྱ་སའི་གནས་ཕལ་མོ་ཆེ་ཞིག་ཏུ་ཕྱི་སྐད་ཁོ་ན་བཤད། དེར་མ་ཟད་ཐ་ན་ཁྱིམ་ཚང་གི་ནང་དུའང་ཕ་སྐད་བཤད་པ་ཇེ་ཉུང་དུ་འགྲོའོ། །དེ་ནས་རིམ་གྱིས་མི་རིགས་དེའི་ནང་ནས་རྒན་པོ་དང་དར་མ་རྣམས་ཀྱིས་ཕ་སྐད་གཙོ་བོར་སྨྲ་ཞིང་ན་གཞོན་རྣམས་ཀྱིས་ཕྱི་སྐད་གཙོ་བོར་སྨྲ་སྟེ། སྐད་སྨྲ་ཚུལ་གྱི་སྒོ་ནས་ཚོ་གཉིས་སུ་གྱེས། དེ་ལྟར་དུ་མུ་མཐུད་ནས་སོང་བས་ཕ་སྐད་གཙོ་བོར་བྱེད་པའི་མི་རྣམས་རིམ་གྱིས་ཤི་བ་དང་རྒས་པས་ཇེ་ཉུང་དུ་འགྱུར། ཕྱི་སྐད་གཙོ་བོར་བྱེད་མཁན་གྱི་མི་ཚོགས་དེ་ཇེ་མང་དུ་འགྱུར། དེ་རྣམས་ཀྱིས་རང་གིས་ཕ་སྐད་གཙོ་བོར་མི་བྱེད་པར་མ་ཟད་རང་གི་བུ་ཚ་རྣམས་ལ་ཕ་སྐད་མི་སློབ། དེ་ནས་ཡུན་མི་རིང་བར་མི་རིགས་དེའི་སྐད་དེ་ཉེན་ལྡན་སྐད་རིགས་སུ་གྱུར་ནས་ནུབ་པར་འགྱུར་རོ། །ཞེས་སྨྲས་པ་དེ་ཉིད་མངོན་སུམ་དུ་བྱུང་སྟེ། དེས་སྐད་རིགས་འདི་སྨྲ་བའི་མི་ཡོངས་རྫོགས་ལ་ཉེན་བརྡ་ཛ་དྲག་ཅན་ཞིག་བཏང་བ་ཡིན་ནོ། །

འོ་ན་ཇི་ལྟར་བྱ་དགོས་ཞེ་ན། གནད་དོན་འདི་རྩོད་གླེང་གིས་ཐག་གཅོད་རྒྱུ་ཞིག་རྩ་བ་ནས་མ་རེད། ཇི་ལྟར་བྱ་དགོས་པ་མ་ཤེས་ན། ཐོག་མར་ཁྱེད་ཅག་གིས་རང་རེའི་ཕ་སྐད་འདི་ཤོག་བུ་མཐའ་ནས་ཚིག་པ་བཞིན་དུ་སུམ་ཆ་གཅིག་ལ་ཉེ་ཙམ་ཞིག་སྐད་རིགས་གཞན་གྱིས་ཟོས་ནས་མེད་པར་འགྱུར་བཞིན་པའི་དངོས་ཡོད་ཀྱི་གནས་ཚུལ་གསལ་བར་སྟོན་པའི་དན་གྲངས་འདི་རྣམས་ལ་ཞིབ་ཏུ་གཅིག་ལྟོས་ལ་མནོ་བསམ་ཞིག་ཐོངས་དང་དེ་ནས་སྙིང་ལ་ཚ་ཤར་རྒྱག་པ་དང་མཉམ་དུ་གོ་རྟོགས་ཤིག་སད་རྒྱུ་ཡོད་ན་ཐང་། དན་གྲངས་འདི་རྣམས་ནི་སྐད་བརྡ་རིག་པའི་ཚན་རིག་གི་ཞིབ་འཇུག་བྱེད་ཐབས་ལ་བརྟེན་ནས་གཏན་ལ་ཕབ་ཅིང་། ནོར་འཕྱུག་གང་ཡང་མེད་པར་བྱས་ཡོད་པས་ཡིད་རྟོན་ཕེར་ངེས་ཡིན། དེ་ཡང་ཉེ་བའི་ལོ་༩་ཡི་རིང་ལ་ང་ཚོས་མདོ་དབུས་ཁམས་གསུམ་གྱི་རྫོང་ཁག་༥༣་གྱི་ནང་ནས་ལོ་༢་ནས་༡༨་བར་གྱི་མི་༦༡༦༢་ཀྱིས་བཤད་པའི་སྐད་ཆ་ལས་ཐ་སྙད་༣༩༥༤༤་ལ་དན་གྲངས་དབྱེ་ཞིབ་ཀྱིས་ཞིབ་འཇུག་བྱས་པས། ཐ་སྙད་དེ་རྣམས་ཀྱི་ནང་དུ་ཕ་སྐད་ཀྱི་ཐ་སྙད་༢༨༧༩༩་ལས་མི་འདུག། གཞན་ཐ་སྙད་༡༠༧༤༥་དེ་སྐད་རིགས་གཞན་པ་རེད། གཞན་སྐད་ཀྱི་ཐ་སྙད་དེས་ཐ་སྙད་སྤྱི་འབོར་གྱི་༢༧་༡༨ % ་ཟིན་ཏེ། ཐ་སྙད་ཡོངས་ཀྱི་སུམ་ཆ་གཅིག་ལ་ཉེ་བཞིན་ཡོད། དེས་ན་ཕལ་ཆེར་ཐ་སྙད་༣་རེའི་ནང་དུ་གཞན་སྐད་རེ་རེ་འདྲེས་པའི་ཚད་ལ་སླེབས་ཉེར་ཡོད་པར་མ་ཟད། ཐ་སྙད་དེ་ རྣམས་ཀྱང་ཉིན་རྒྱུན་འཚོ་བའི་ནང་དུ་འབྱུང་ཚད་མཐོ་བའི་མིང་ཚིག་དང་བྱ་ཚིག་གི་སྐོར་རྣམས་སུ་སྣང་བས་གནས་

ཚུལ་འདི་ནི་ཤིན་ཏུ་འཇིགས་སུ་རུང་བ་ཞིག་རེད། གཤམ་གྱི་རེའུ་མིག་འདི་ལ་ལྟོས་དང་གསལ་བར་ཤེས་པར་འགྱུར་ཏེ། དཔེར་ན། བོད་ཡུལ་གྱི་རྫོང་ཁག་༡༧་ནས་ལོ་༢་ཅན་གྱི་བྱིས་པ་༨༨་གྱིས་བཤད་པའི་ཐ་སྙད་ཁྱོན་༡༢༣༠་ལ་དན་གྲངས་དབྱེ་ཞིབ་བྱས་པས་དེའི་ནང་དུ་ཕ་སྐད་ཀྱི་ཐ་སྙད་༡༡༦༦་ཡོད་ཅིང་། གཞན་སྐད་ཀྱི་ཐ་སྙད་༦༤་ཡོད། གཞན་སྐད་ཀྱི་ཐ་སྙད་དེས་ཐ་སྙད་སྤྱིའི་༥་༢༠%་ཟིན་པ་ལྟ་བུ་སྟེ་གཞན་རྣམས་ལ་དེས་མཚོན་ནས་ཤེས་པར་བྱའོ། །

གནས་ཚུལ་འདི་ལེགས་པར་རྟོགས་རྗེས་ད་གཟོད་ན་གཞོན་འགའ་ཞིག་ལ་དགག་པ་བཏང་བ་ཙམ་གྱིས་ཕ་སྐད་སྐྱོབ་ནུས་མི་ནུས་གསལ་བར་ཤེས་པར་འགྱུར་རོ། །དེས་ན་དགོས་ངེས་པ་ཁྱིམ་བདག་རྣམས་ཀྱིས་ཁྱིམ་ཚང་གི་སློབ་གསོ་ཞེས་པ་འདི་ཁ་ཙམ་མ་ཡིན་པར་ནན་ཏན་གྱི་སྒོ་ནས་ལག་བསྟར་དུ་བྱ་བ་འདི་ཡིན་ཏེ། བྱིས་པ་ཆུང་ངུའི་དུས་ནས་ཕ་སྐད་མ་ཡིག་ཡང་དག་པ་ཤེས་ངེས་བྱ་དགོས། འདི་ཕ་མ་དག་གི་ཕྲག་ཁ་ན་ཡོད་པའི་འགན་བཟློག་ཏུ་མེད་པ་དེ་ཡིན། གལ་ཏེ་ཕ་མས་ཁྱིམ་སློབ་ལེགས་པོ་བྱས་ན། ཕྱི་རོལ་གྱི་ཁོར་ཡུག་གི་ཆ་རྐྱེན་ཇི་ལྟར་ཞན་ཡང་ཕ་སྐད་ལེགས་པོ་ཤེས་པར་འགྱུར་ཏེ། འདི་འདྲའི་དཔེ་མཚོན་ཤིན་ཏུ་མང་པོ་ཡོད། དེས་ན་ཕ་མ་རྣམས་ཀྱིས་ཅིས་ཀྱང་འདི་ལ་དོ་ཁུར་ནན་མོའི་སྒོ་ནས་རང་གི་འོས་འགན་དེ་སྣང་མེད་དུ་མི་འཇོག་པར་བསྒྲུབ་པར་ཞུ།

མདོར་ན་བྱིས་པ་རྣམས་ཀྱིས་རྒྱ་སྐད་དང་དབྱིན་སྐད་སོགས་སྐད་རིགས་ཅི་ཙམ་ཤེས་ཀྱང་དེ་ལ་སྐྱོན་གཏན་ནས་མེད། སྐྱོན་མེད་པར་མ་ཟད་སྐད་ཡིག་དེ་དག་ལེགས་པར་ཤེས་ཀྱང་དགོས། སྐྱོན་གྱི་གཙོ་བོ་ནི་རང་གི་སྐད་མི་ཤེས་པ་དང་མི་བཀོལ་བ་དེ་རེད། དེའི་རྩ་བ་བཙལ་ན་ཁྱིམ་བདག་རྣམས་ལ་ཐུག་ཡོད་པ་འདི་ཤེས་པར་བྱ་དགོས་སོ། །རབ་གནས་ཤིང་སྦྲུལ་༢༠༢༥་སྟོན་ཟླ་ར་བའི་ཚེས་༡༩་ལ་ཚུལ་ཁྲིམས་བློ་གྲོས་ཀྱིས་བྲིས་པ་དགེ་ལེགས་སུ་གྱུར་ཅིག

ཡུལ་བྱོལ་ལམ།

སྒྲོལ་མ་ལ་ནས་རླུང་རྟ་མཉམ་དུ་གཏོར།།
དར་ཆེན་མདུན་ནས་སྨོན་ལམ་ལྷན་དུ་བཏབ།།
གངས་རིའི་གཙང་པོ་འཕྲད་ལ་མཉམ་དུ་བཅད།།
མི་རྒན་ངེད་གཉིས་དེ་རིང་ཐུག་ཙམ་བྱུང་།།

ཆར་ནག་ཁྲོད་དུ་གུར་ཆུང་ཕུབ་ནས་བཞག།

རྒྱབ་ཁུར་ནང་དུ་རྒྱཌ་ཆས་ཉུམ་ཙམ་བླུགས།།
ཉིན་མོ་སོ་སྲུང་རྒོད་པས་མཚན་འགྲུལ་བྱས།།
གངས་ཆུས་མར་ཙམ་ཁྱེར་ཡང་ལངས་ཏེ་འོངས།།

བྱིའུ་དགོན་ནས་བྱི་བ་འཛུལ་བཞིན་འོངས།།
ཁྲུས་སྒོ་དགོན་ནས་ནམ་ཕྱེད་ལངས་ཏེ་འོངས།།
གཡའ་སྤང་ཁུག་ཏུ་རྐྱང་ཁྱུ་འགའ་དང་ཐུག།
གླེ་མི་ཡུལ་དུ་ཉིན་གུང་རྒྱབ་ཏུ་འབྱོར།།

སྦྲ་ཆུང་གཡག་རྒན་ཙམ་རེ་ཕུབ་པ་ཡི།།
མཁུར་ཚོས་དམར་པོ་ཅན་གྱི་མི་འགའ་མཐོང་།།
ད་བ་ཞིམ་པོ་ཕོར་པ་འགའ་རེ་སྟེར།།
གཞུང་ལམ་མ་འདེད་ས་སྲུང་བཙན་ནོ་ཟེར།།

ངེད་ཅག་དེ་ནས་གྲོག་རོང་བརྒྱུད་དེ་སོང་།།
གྲོག་ཆུར་ཧུར་བས་ཁྱེར་གྲབས་ཁྱེར་གྲབས་ཡིན།།
ཕར་རིའི་ཟམ་སྣེར་ཉེན་རྟོག་རུ་ཁག་གི།
གློག་འོད་འོག་ཏུ་ཁྱི་འགའ་ཟུག་གིན་མཆིས།།

ས་ཚིགས་དེ་ནི་ཉེན་ཁ་ཆེ་ཤོས་ཟེར།།
དེ་སྔོན་མང་པོ་འཛིན་བཟུང་བྱས་རབས་འདུག།
བྱིས་པ་ངུས་ན་ཉེན་རྟོག་རུ་ཁག་གིས།།
འཛིན་བཟུང་བྱེད་པར་སྐྲག་ཀྱང་སྐྱོན་མ་བྱུང་།།

དེ་ནས་འུམ་ལར་པདྨ་རིག་དགོན་མཇལ།།
དད་པ་ཆེ་ནས་མཇལ་སྐོར་མ་ཡིན་ཡང་།།
གྲོད་པ་ལྟོགས་ནས་སློང་མོ་བྱེད་དུ་སོང་།།
དགོན་པའི་ངོས་ནས་རྩམ་པ་བྲེ་འགའ་གནང་།།

གཞུང་ལམ་ཀྲག་ཛེར་(Simikot)སོང་ན་བདེ་མོད་ཀྱང་།།
ཉེན་རྟོག་པ་ཡིས་བཟུང་རྒྱུར་ཉེན་ཆེ་བས།།
ཤར་ལྷོའི་ཕྱོགས་ཀྱི་ལུར་ཤུར་དེད་ནས་སོང་།།
ལ་དེ་བརྒལ་རྗེས་བོད་རིགས་ཧ་ཅང་དཀོན།།

རོང་པའི་ཤོད་ཁང་ཞིག་ཏུ་ཉིན་གང་བསྒུགས།།
མུན་པ་སྲོད་སྐབས་རྐང་ལམ་དེད་ནས་ཡོང་།།
ཡུལ་ལུང་པོ་སྐྱིད་པོ་ཀོང་པོ་འདྲ་ཞིག་རེད།།
ནམ་ཕྱེད་མིན་ཙམ་གྲོང་སྡེ་ཞིག་ཏུ་འབྱོར།།

གྲོང་དེར་ལམ་ཁྲིད་པ་ཡི་ངོ་ཤེས་ཏེ།།
བོད་སྐད་མི་ཤེས་འདོན་ཆོག་ཤེས་མཁན་ཞིག།
ལུས་ལ་གྲྭ་ཆས་ཡ་མ་ཟུང་གྱོན་ཞིང་།།
ཁྱིམ་དུ་བུད་མེད་བུ་ཕྲུག་སྐྱོང་མཁན་ཞིག།

ཡུལ་དེའི་མོ་འདེབས་སྐུ་ཡོན་རིམ་གྲོ་སོགས།།
ཡོད་ཚད་ཁོང་གི་ཕྱག་ཏུ་ཡོད་པ་འདྲ།།
བོད་ནས་འོང་པའི་གསར་འབྱོར་ལག་པ་ནས།།
དངུལ་དངོས་མང་པོ་ལོན་པའི་ཉམས་མྱོང་འདུག།

བདག་གིས་བལ་རྩག་ལ་སོགས་དངོས་འགའ་བཙོང་།།
རིན་ལ་རྩམ་ངན་པོར་པ་འགའ་རེ་གནང་།།
དེ་ཡི་དགོང་མོར་ལམ་པ་ཆང་གིས་མྱོས།།
རང་གི་གྲོགས་པོ་ཞིག་དང་འཁྲུག་རྩོད་ཤོར།།

གཅིག་གིས་གཅིག་ལ་རྡུང་ངོ་གསོད་དོ་ཟེར།།
དམྱལ་བའི་ཡུལ་དུ་ད་ལྟ་སྐྱེལ་ལོ་ཞེས།།
གྲོང་ཚོ་སྟོད་སྨད་འུར་གྱིས་བསླངས་གྱུར་ཡང་།།
ཐ་མ་ཨ་རོགས་སྤྱང་པོ་ཞིག་གིས་བསྡུམས།།

ར་བཟི་ཆུང་བ་ཞིག་གི་རལ་གྲི་དེས།།
ཏོག་ཙམ་མིན་ན་བདག་གི་གྲོད་པ་ཕུག།
བདག་ཀྱང་འཚུབ་ཆ་ལངས་པའི་རྐྱེན་ཡིན་ནམ།།
མགོ་ལ་འཇོར་མགོས་བསྣུན་ཀྱང་བསྒྱེལ་མ་ནུས།།

ཕྱིན་ཉིན་ལམ་ལ་ཆས་པའི་སྔ་དྲོའི་ཆར།།
ཉི་འོད་དྲོས་པའི་ཉིན་ཁུག་དགའ་མོ་ཞིག།
འབབས་ཆུ་དྭངས་མོའི་རོལ་མོ་སྙན་ས་དེར།།
ཇ་ཞིག་བསྐོལ་བཞིན་ངལ་གསོ་བྱེད་པའི་སྐབས།།

བཙུན་མས་མེ་ཤིང་བསྒུལ་བས་ཐབ་རྡོ་འཁྲུགས།།
ལྷོག་ལྷོག་ཁོལ་བའི་ཇ་རྡིག་ཁ་བུབ་ལོག།
རླུང་རྟ་མེད་པའི་ཕོ་རྒོད་རྐང་པར་བྱོ།།
ཧེ་ལྷམ་ཕུད་མ་ཐག་ནས་ལྤགས་པ་བུད།།

ཀྱེ་མ་ད་ནི་ཅི་བྱེད་གང་བྱེད་ཟེར།།
བཙུན་མ་ཞེད་ནས་སྐད་ཀྱང་མི་ཐོན་འདྲ།།
ལམ་པས་ཟེར་ན་གཡུགས་ནས་འགྲོ་ན་ཟེར།།
གཞན་པས་ཁུར་དགོས་བྱུང་ཡང་མི་བསྐྱུར་བྱས།།

མཐའ་དོན་ནད་པ་འཁར་བར་བརྟེན་ཏེ་སོང་།།
ཁོ་པའི་ཁུར་པོ་ང་ཚོས་བགོས་ཏེ་ཁུར།།
དེ་ནས་ཅི་ནུས་ལམ་དུ་བགྲོད་པར་བརྩོན།།
ཉིན་རེ་སོང་བཞིན་རྒྱགས་ཆས་ཇེ་ཉུང་རེད།།

ཉིན་ཤས་རྗེས་ནས་རྐང་པའི་རྨ་ནི་རུལ།།
དྲི་མས་ཉེ་སར་བཅར་ནི་དཀའ་བར་གྱུར།།
ཆུ་རྒོད་ནང་དུ་འབྲུ་རྒོད་ཨ་ཤོམ་བཙོས།།
ཚྭ་དང་ཚོད་མ་ཟེར་བ་གཏན་ནས་མེད།།

ཉིན་མོ་ནགས་སུ་གབ་ཀྱིན་མཚན་མོར་འོངས།།
གཞུང་བསྐྱུར་ནས་གསེབ་ལམ་བརྒྱུད་དེ་འོངས།།
སྐབས་དེའི་ཆར་པ་ཆུ་ཟོམ་བྱོ་བ་བཞིན།།
ཉིན་མཚན་དུས་དྲུག་ཀུན་ཏུ་ཆད་པ་མེད།།

གྱོན་ཆས་རློན་པ་ཆུ་ཐིགས་འཛར་འཛར་དག།
གོན་ནས་ཉིན་མཚན་ལྟོས་མེད་འོངས་པའི་རྐྱེན།།
འགའ་རེའི་ལུས་ལ་གྲང་བའི་ནད་གཞི་བྱུང་།།
འོན་ཀྱང་ངལ་དུབ་ཆེ་བས་གཉིད་ནི་འོངས།།

ཁྱོན་བསྡོམས་ཞག་པོ་ཉི་ཤུ་སོང་བའི་མཐར།།
སུར་ཁེ་ཊའི་(Surkhet)གྲོང་དང་ཉེ་བར་གྱུར།།
དྲིལ་པས་བཤད་ན་ལ་རྒྱབ་ཉེན་རྟོག་པར།།
བོད་པ་ཡོང་བའི་གསང་བརྡ་འབྱོར་ཟིན་ཟེར།།

དེ་བས་ངེད་ཅག་གསེབ་ལམ་གཞན་ནས་སོང་།།
རླུང་རྟ་རྒྱུག་པས་ལམ་དེ་ཧ་ཅང་བདེ།།
ཚྭ་དང་ཚོད་མ་མེད་པའི་ཨ་ཤོམ་གྱི།།
ཐུག་པ་པོར་པ་རེ་རེའང་བཏུང་རྒྱུ་བྱུང་།།

དེ་ནས་དངོས་སུ་གྲོང་བརྡལ་ཞིག་ཏུ་འབྱོར།།
ལམ་པས་ངེད་ཅན་ཤིང་ནགས་ཁྲོད་དུ་སྦས།།
ཁོ་དང་དགའ་རོགས་ཨ་རོགས་སྤྱང་པོ་གསུམ།།
བལ་པོའི་ཁྲོམ་དུ་ཉིན་གང་སྤྲོ་འཁྱམ་བྱས།།

ནད་པའི་གཙོས་པའི་སྐྱེ་བོ་བཅོ་བརྒྱད་པོ།།
ཟས་ནི་ཕར་ཞོག་ཆུ་ཡང་ཁམ་གང་ཙམ།།
མེད་པར་ཆུ་ཚོད་བཅུ་གཉིས་ལྷག་ཙམ་ལུས།།
ཕྲུ་གུ་དག་ཀྱང་ངལ་བས་ངུ་མི་ནུས།།

ཐ་མ་མུན་པ་སྲོད་སྐབས་ཁོང་ཚོ་བྱུང་།།
ངེད་ཅག་གསང་བའི་སྒོ་ནས་གྲོང་དུ་འཛུལ།།
ཚེ་འདིར་སྲན་ཚོད་དལ་(dal)ནི་ཐོག་མ་འཐུང་།།
བཙུན་མ་ཞིག་གིས་བྱ་ཤའི་ཐང་འདྲ་ཟེར།།

དེ་ནུབ་ཨར་འདམ་ཞལ་བཅལ་སྟེང་དུ་ཉལ།།
དུག་སྦྲང་མོད་ཅིང་ཚ་བ་ཆེ་ནའང་།།
ངལ་དུབ་ཆེ་བས་གཉིད་རྒྱུར་སྐྱོན་མ་བྱུང་།།
ཕྱི་ཉིན་འགྲུལ་འཁོར་ཞིག་ཏུ་བརྫངས་ནས་ཡོང་།།

དགོང་མོ་ཚ་འབོག་སྐབས་སུ་ཟ་ཟུར་ནས།།
ཡི་དྭགས་བཞིན་དུ་བསྒུགས་ནས་སྡོད་དགོས་བྱུང་།།
ཕྱི་ནང་སྔ་དྲོ་ཐང་གུ་ལ་རུ་འབྱོར།། 
ཉེན་རྟོག་འགལ་རེ་འགྲུག་འཁོར་བསྔོག་ཏུ་བྱུང་།།

བོད་གོས་བྱོན་ཁར་མཁུར་ཚོས་དམར་བ་ཡི།།
བུ་མོ་དེ་ཚོ་ངོ་རྟགས་ཆོད་སླ་བས།།
འགྲུལ་འཁོར་སྟོད་སྨད་བར་གསུམ་སོ་སོར་བཀྲམ།།
ཉེན་རྟོག་པ་ལ་དོགས་སྣང་གང་མ་བྱུང་།།

བདག་ནི་རྒྱབ་ཏུ་བཀལ་པའི་ཁུར་ཆེན་ཞིག།
ས་ལ་ཕོག་པའི་གོ་སྐབས་བྱུང་བ་བཞིན་དུ།།
སེམས་ལ་བརྗོད་མི་ཤེས་པའི་བདེ་སྣང་བྱུང་།།
འོན་ཏེ་སྐབས་དེར་ལྟོགས་ནས་འཆི་གྲབས་ཡོད།།

དེ་ནས་ཆུ་ཚོད་གཉིས་ཙམ་སོང་བའི་་རྗེས།།
བལ་ཡུལ་འཕགས་པ་ཤིན་ཀུན་ཐད་དུ་འབྱོར།།
ད་རུང་སྐྲག་པའི་སྣང་བ་ཡལ་མ་གྱུར།།
ཐ་མ་བལ་ཡུལ་སྣེ་ལེན་ཁང་དུ་འབྱོར།།