ནང་ཆོས།

ཁ་བཤད་ཀྱི་ནང་ཆོས།
ཚིག་བུ་རམ་ལས་མངར་ཞིང་སྦྲང་རྩི་ལས་ཞིམ་པའི་ནང་ཆོས།
ནང་དོན་གློ་བ་བཞིན་སྟོངས་ཞིང་ཤོག་བུ་ལས་ཡངས་བའི་ནང་ཆོས་དག་སྟེ།
སྒྲུབ་ཁང་དུ་མིག་ཟུང་ཟིམ་ཟིམ་གྱི་གཟེབ་ནས་ཁ་ཆར་བཞིན་འཐོར་ཡོང་བའི་ནང་ཆོས།
ཕྱག་ཟུང་ཐལ་མོ་སྦྱར་གསེབ་ནས་ལུ་མ་བཞིན་བརྡོལ་ནས་ཡོང་བའི་ནང་ཆོས།
ཁྲི་སྟེང་ན་སེང་གེ་བཞིན་འགྱིང་སྟེ་འབྲུག་སྒྲ་ལྟར་བསྒྲགས་པའི་ནང་ཆོས།
སྒོ་འགྲམ་ན་ཌ་དྲིལ་གྱི་ཀང་སྒྲའི་ཁྲོད་ནས་སྤྲང་འབོད་བྱས་པའི་ནང་ཆོས།
དགོན་སྡེ་རུ་རྔ་སྦུབ་དང་དུང་སྐད་ཁྲོད་ནས་འུར་སྒྲོགས་བྱས་བའི་ནང་ཆོས།
རྨོ་རྨོའི་མ་ཎི་འདོན་དབྱངས་དང་སྡེབ་པའི་ནང་ཆོས།
ཨ་མྱེས་ལག་འཁོར་བསྐོར་འགྲོས་དང་སྡེབ་པའི་ནང་ཆོས།
ཨ་ཕས་ནང་སྔ་མོར་ལྷ་གསོལ་བཏང་བའི་ནང་ཆོས།
ཨ་མས་དགོང་ཕྱི་མོར་རྨི་ལམ་བརྟག་པའི་ནང་ཆོས།
འདི་དག་ཚང་མ་ཁ་བཤད་ཙམ་གྱི་ནང་ཆོས་རེད།
གཟུགས་བརྙན་ཙམ་གྱི་ནང་པ་རེད།