2013/04/13

ཧི་མ་ལ་ཡའི་སྲས་མོ།

 Image result for yangchuk tso

ཧི་མ་ལ་ཡའི་སྲས་མོ་མཛེས་མ། །
མཐོན་མཐིང་རྒྱལ་མོའི་བདག་མོ་མཛེས་མ། །
མི་ལ་རས་པའི་དགའ་རོགས་མཛེས་མ། །
གངས་ཅན་བོད་ཀྱི་བུ་མོ་མཛེས་མ། །

གངས་རི་དཀར་པོའི་ཐེམ་སྐས་བཙུགས་ཏེ། །
སྤྲིན་པ་དཀར་པོའི་ཕོ་བྲང་བཞེངས་ནས། །
ཉི་མའི་འོད་ལ་ཟམ་པ་བྱས་ནས། །
དེ་རིང་ཁྱེད་རང་བྲོ་ལ་ཕེབས་སམ། །

ཟ་འོག་དམར་ཁྲའི་བོད་སྟོད་ནང་དུ། །
རིག་ཞེན་དྭངས་མའི་དྲོད་ཁུལ་ཨེ་འཁྱིལ། །
སེང་རས་དོར་མའི་མཛེས་དབྱིབས་ངོས་སུ། །
དེང་རབས་གསར་པའི་གཟི་ཉམས་འབར་འདུག །

རྒྱུད་དྲུག་པི་ཝང་གཞན་གྱིས་དཀྲོལ་སོང་། །
ཚིགས་དྲུག་གླིང་བུ་རང་གིས་བུས་སོང་། །
ལྡེམ་ལྡེམ་ཞབས་བྲོ་རོགས་པས་འཁྲབས་སོང་། །
འཇོ་སྒེག་སྟངས་སྟབས་ཁྱེད་ཀྱིས་ངོམ་སོང་། །

༼སྙིང་སྡུག་གཡུ་ཆུང་དྲུག་དཀར་༽འགུགས་དུས། །
སྒེག་པའི་ཟུར་མིག་འཛུམ་དུ་འཁྱིལ་དུས། །
དྲན་པའི་གཏིང་གི་སེམས་པ་ཆུང་ཆུང་། །
དགའ་བ་འབུམ་གྱིས་བཟི་རུ་བཅུག་སོང། །

སྨན་ལྷའི་གཞས་ཚིག་སྤྲོ་ཚོགས་སྟེང་ལ། །
ཁྱེད་རང་མགུར་གྱི་ལྷ་མོར་བཞེངས་ཏེ། །
གཞོན་པའི་སེམས་པ་གླུ་རུ་ལེན་དུས། །
ཚེ་སྐྱིད་དར་བའི་སྒང་གི་སྒང་རེད། །

དྲ་ཚིགས་ཤིག་གི་བརྡ་ཁྱབ་ནང་དུ། །
ལྷ་སརགློག་བརྙན་འཁྲབ་རྒྱུ་གོ་དུས། །
རེ་བ་ཞིག་གིས་དགའ་རུ་བཅུག་སོང་། །
དགའ་བ་ཞིག་གིས་ངུ་རུ་བཅུག་སོང་། །

2 comments:

  1. རང་བཙུགས་མ་ཞོར་།
    གཞན་སེམས་མ་དཀྲུགས་

    ReplyDelete
  2. གྲོགས་པོ་གཅིག་གིས་འདི་འདྲ་ཞིག་གསུངས་འདུག
    ༼རང་བཙུགས་མ་ཞོར་།
    གཞན་སེམས་མ་དཀྲུགས་༽འདིས་ང་ལ་གང་བཤད་ཀྱིན་ཡོད་མེད་ཤེས་མ་སོང་།
    ངས་རང་གི་བོད་པའི་གཞས་མ་ལ་སྐུལ་ཕྱག་གཏོང་མི་ཆོག་པ་རེད་དམ། གཞས་ལ་དགའ་མི་ཆོག་པ་རེད།

    ReplyDelete

གལ་ཏེ་དགོངས་འཆར་ཡོད་ན་གཤམ་གྱི་ཤོག་སྟོང་དེར་བྲིས། google account ཡོད་ན་དེས་ཆོག མེད་ན་དྲ་ཤོག་གཤམ་གྱི་ anonymous བདམས་སྟེ་ post comment ཐོག་ལ་མནན་ཞིང་སླར་ཡང་ཨང་ཡིག་གི་ལྡེའུ་མིག་དག་མནན་ན་ཆོག