རྡོར་གདན་གནས་སྐོར།

—ཁྱུང་རིག་འཛིན།

སྟོན་པ་མཆོག་དེས་བདུད་རྩི་བརྙེས་པའི་ཡུལ།།
རྡོ་ཡི་མཆོད་རྟེན་བརྗིད་ཀྱིས་འགྱིངས་བའི་ས།།
བྱང་ཆུབ་ལྗོན་པ་འཕྲེད་ལ་གྱེས་པའི་གནས།།
བྷོ་དྷི་གྷ་ཡའི་གནས་སུ་ད་ལོ་འབྱོར།།


མི་ལོ་བཅུ་ཕྲག་ཡུན་ལ་མ་མཇལ་རིང་།།
བྱང་ཆུབ་མཆོད་རྟེན་གཟི་བྱིན་ཇེ་ཆེ་རེད།།
བྱང་ཆུབ་སྡོང་རྒན་ཡལ་འདབ་ཇེ་རྒྱས་རེད།།
རྒྱན་དང་བཀོད་པ་ཕུན་སུམ་ཇེ་ཚོགས་རེད།།

མཆོད་རྟེན་ནང་གི་ཐུབ་པ་ཆེན་པོའི་དྲུང་།།
ལྷ་མོ་ཨུ་མའི་པདྨ་བཙུགས་པ་འདི།།
ནང་པའི་ངོས་ནས་གྱོང་གུད་ཆེ་བ་སྟེ།།
སྟོང་གསུམ་གསེར་གྱིས་བཀང་ཡང་སྤོ་ཐབས་དཀའ།།

སྤྱིར་ན་གནས་མཆོག་རྡོ་གདན་འདི་ན།།
དགེ་སློང་སེར་པོའི་ཁ་གྲངས་ཇེ་མང་རེད།།
དགེ་སློང་དམར་པོའི་འདུ་ཚོགས་ཇེ་རྒྱས་རེད།།
ཕྱི་ནང་བར་གསུམ་སྲུང་བྱ་ཇེ་མང་རེད།།

དར་ཐང་དཔེ་ཆ་གནང་སྦྱིན་སྔར་ལྟར་རེད།།
ཕྱོགས་བཞིའི་སྨོན་ལམ་འདུ་འགོད་སྔར་མུས་རེད།།
འགྱེད་དང་མང་ཇའི་གཏོང་བ་སྔར་འདྲ་ཟེར།།
བདེན་དང་མི་བདེན་ཁྱེད་ཚོས་ཤེས་ལོས་ཤེས་སྙམ།།

རྒྱ་དང་འཇར་པན་ཤར་ཕྱོགས་ཀོ་རི་ཡ།།
ཐའི་ཐ་ཝཱན་དཔལ་གྱི་ལང་ཀ་སོགས།།
ནང་བསྟན་དར་རྒྱས་ཆེ་བའི་ཡུལ་གྲུ་ནས།།
དད་ལྡན་མི་སྣ་འཛོམས་པ་ཇེ་མང་འདྲ།།

སྒོ་ཆེན་དྲུང་གི་ཁ་གཏགས་འཚོང་མཁན་དང་།།
དེའི་ཉེ་འཁོར་བག་ལེབ་ཚོང་པ་དང་།།
དེ་དང་འདབ་འབྲེལ་ལ་ཧྥིན་འཚོང་མཁན་དང་།།
དེ་ལས་ལྷག་པའི་པར་ཁང་ཚོང་ཁང་སོགས།།

དུས་འཁོར་ཐང་གི་བོད་རིགས་ཟ་ཁང་།།
དེ་ཡི་རྒྱབ་ཕྱོགས་བོད་པའི་ཁྲོམ་ར་དང་།།
རྒྱ་གར་ཡུལ་མིའི་མངར་ཟས་ཟ་ཁང་སོགས།།
འདི་ནས་ཕུད་དེ་ལོ་མང་སོང་རབས་འདུག།

མཆོད་རྟེན་སྒྱོཌ་ཀྱིས་བསྣད་པའི་གནས་ཚུལ་དེ།།
ཁོར་ཡུག་གཙང་མ་བཟོ་བའི་ཐབས་བྱུས་ཞེས།།
ཨ་རོགས་ཁ་མཁས་འགའ་ཡིས་བཤད་པ་ཐོས།།
ཕལ་ཆེར་ཕལ་ཆེར་བདེན་པ་ཡིན་ཡང་སྲིད།།

སྐྱ་སེར་གྲྭ་ཇོ་འདྲེས་པའི་མི་ཚོགས་ཀྱིས།།
ཕྱག་འཚལ་གསོལ་འདེབས་བསྔོ་སྨོན་ཟློ་བ་དང་།།
རས་གུར་ནང་དུ་སྒོམ་ལ་བརྩོན་པ་སོགས།།
མཆོད་རྟེན་ཕྱོགས་བཞིར་ཆོས་ཀྱི་འདུ་འགོད་མང་།།

རྣམ་དཀར་མཛད་བཟང་སྒྲུབ་ལ་ཕར་བལྟས་ན།།
ཡོངས་རྫོགས་དག་པའི་ཞིང་ལ་ཨེ་འགྲོ་བསམ།།
ང་དང་ང་འདྲའི་སྐྱེ་བོ་ཐ་མལ་འགའ།།
མངར་ཇ་འཐུང་བཞིན་ལྷག་སོང་ཨེ་ཡིན་བསམ།།

རོགས་པ་མེད་པར་ཁྲོམ་སྐོར་ཐེངས་གཅིག་སོང་།།
ངོ་ཤེས་མེད་པའི་མི་ཚོཌ་ཡོམ་ཡོམ་གཡོ།།
ཕར་ལ་མཐོང་ཡང་ཚུར་མི་མཐོང་བའི།།
སྐྱེ་བོ་འགའ་རེ་དེའི་ཁྲོད་དུ་སྣང་།།

བར་དོའི་སྲིད་པ་ཟེར་བའི་སེམས་ཅན་ཞིག།
རི་བྲག་ཐོགས་མེད་བགྲོད་པའི་ནུབ་མཐུ་ཅན།།
ཕར་མཐོང་ཚུར་མི་མཐོང་བའི་གཏམ་རྒྱུད་དེ།།
དེ་ཡང་འདི་འདྲ་ཨེ་ཡིན་བསམ་ཏེ་བློང་།།

སྐྱེ་བོ་ཁག་གཅིག་སྐོར་ལམ་ཟ་ཟུར་ན།།
མགོ་རས་འོག་ཏུ་དབུ་སྐྲ་དམ་དུ་སྦས།།
ཕྱུ་བའི་སྟོད་ལ་རས་གཟན་དམར་པོ་ངོམ།།
སྔར་བཞིན་ཡོང་འབབ་གསོག་ལ་ཧ་ཅང་བྲེལ།།

ཨ་ཤོ་ཀ་ཡི་རྡོ་རིང་ཆག་པའི་རྩེར།།
ལྕགས་ཀྱི་ཊམ་ཀ་འཕེན་པའི་ལམ་སྲོལ་དེ།།
ངོ་གདོང་འཛུམས་ཀྱིས་འཁྱུད་པའི་བྱིས་པ་འགས།།
དུ་རུང་མི་ཉམས་རྒྱུན་འཛིན་བྱེད་ཀྱིན་མཆི།།

སྔོན་དང་བསྡུར་ན་ཁ་གྲངས་མི་མང་ཡང་།།
གདོང་ལ་ཐལ་མདོག་ཁུར་བའི་སྤྲང་སློང་དག།
ཕོར་པར་དངུལ་ཊམ་དཀྲུགས་པའི་སིལ་སྒྲ་དེ།།
ལྕགས་རིའི་ཕྱི་སྐོར་གང་སར་གོ་རྒྱུ་འདུག།

ཀུན་ཏུ་རྒྱུ་བ་རྐུ་ཐབས་གནས་སམ་ཅི།།
ན་བཟའ་སེར་པོ་གྱོན་པོ་ཁ་ཅིག་གིས།།
སྟོན་པས་གནང་བའི་ཕོར་པ་ནག་པོ་དེ།།
གང་སར་གཟེད་འདི་ཡེ་ནས་མི་མཛེས་སྙམ།།

རྙིང་མའི་ཆོས་སྒར་ནང་གི་ཁང་བརྩེགས་དག།
མཐོ་བ་བྲག་རིའི་རྔམས་ལ་བལྟས་དང་མཚུངས།།
ཐོག་འོག་ཐང་གསུམ་གྲྭ་ཇོས་འདུ་ལོང་ནི།།
གྲོག་མའི་གྲོག་ཚང་ཁད་ཀྱིས་བརྡོལ་བ་འདྲ།།

གསོལ་ཁ་དྲག་ཏུ་འདོན་པའི་སྒྲ་འདྲ་ཞིག།
ཕར་ཀིའི་ལྷ་ཁང་ནང་ཐོས་སྙམ་བྱུང་།།
མི་ལོ་བཅུ་ལ་མཐོང་བར་མ་གྱུར་བའི།།
གྲྭ་རྒན་མགོ་མཁྲེགས་དེའང་རྒྱང་ནས་མཐོང་།།

གསོལ་ཐབ་མདུན་གྱི་ཤིང་རའི་བསྟར་པ་ནས།།
དགེ་འདུན་རུ་ཆེན་བསྒྲིགས་པའི་ལམ་སྲོལ་དེ།།
བཛྲ་ས་ཏྭ་ཞུ་བར་མི་ཕོད་ཀྱང་།།
ཕྱུགས་ལ་གཟན་རྩྭ་སྦྱིན་པའི་ཚུལ་དང་འདྲ།།
༢༠༡༦/༡/༢༢ ལ།