དབྱར་རྩྭ་དགུན་འབུ།

དང་པོ།
དབྱར་རྩྭ་དགུན་འབུ།
གངས་ལྗོང་གི་རྩ་ཐང་ནས་བརྡོལ་བའི་གསེར་རྡོག
དབུ་ནག་བོད་ལ་རང་བྱུང་ཁམས་ཆེན་མོས་གནང་བའི་ཁྱད་ནོར།
རྒྱ་ནག་པོའི་ལུས་ཁམས་གསོའི་བཟང་དྲུག་གི་སྨན།
ཁམས་སྨུག་གི་རྭ་རྩེ་རྩ་གསེང་ནས་མངོན་དུས།
བོད་ཕྲུག་གི་བླ་ཡིད་རི་རྩེ་ན་འཕུར་སོང་།

གཉིས་པ།
ཤོག་སྒོར་གྱིས་ཨམ་ཕྲག་ཧོབ་ཏེ་གང་དུས།
སྦུ་ཆང་གི་བྲོ་བཅུད་སྦྲང་རྩི་ལས་མངར་དུས།
སྦག་སྦག་གིས་མགྱོགས་ཚད་རླུང་དང་འགྲན་དུས།
བོད་ཕྲུག་གི་ཀླད་ཁྲག་རྒྱ་ལམ་དུ་གཏོར་དུས།
ཕ་མ་ཚོའི་མིག་ཟུང་མཆི་མ་ཡིས་བཀང་སོང་།

གསུམ་པ།
ཕ་ཞིང་དང་ཕ་ནོར་མི་ལ་བཙོང་སྟེ།
རྒྱ་གྲོང་དང་རྒྱ་སྲང་ཁྱི་བཞིན་ཉུལ་དུས།
ཕ་མེས་ཀྱི་རུས་རྐང་རུལ་ནས་ཟད་སོང་།
༢༠༠༩། ༡། ༢༧།