དེང་སང་།

ནད་ངན་གཅིག་གིས་མལ་སར་བསྒྱེལ་བའི་རྗེས།
གློ་བའི་ནང་ལྤགས་བཀོག་སོང་སྙམ་པ་ཡི། །
ལུ་བ་འདི་ནི་སྦུད་པ་འབུད་འབུད་རེད། །
ཚ་བ་འདི་ནི་ཆུ་ཚན་ཁོལ་ཁོལ་རེད། །

ཐུན་གསུམ་གཉིད་ཐེབས་ཆག་རྗེས་ཐོ་རངས་ལ། །
མགོ་མཇུག་མེད་པའི་ཟ་ཟི་རྨི་ལམ་རུ། །
མི་ཚོགས་མེད་པའི་གྲོང་ཁྱེར་རྙིང་སྒོག་གི །
གཡས་གཡོན་མེད་པར་མི་གཙང་ལྕག་ལྕིག་ཁྲོད། །

ཐོག་མར་རྐང་གསུམ་ཞོན་ཏེ་འགྲོ་བཞིན་དུ། །
གློ་བུར་གླང་གིས་འཐེན་པའི་ཤིང་རྟར་གྱུར། །
གླང་དང་མ་ཧེ་ཞོན་ན་འཆི་རྟགས་ཟེར། །
བག་ཆགས་འདི་ནི་རྨི་ལམ་ཡིན་ཡང་དྲན། །

གློ་བུར་འགྱོད་སེམས་ཞིག་གིས་གླང་ངུ་དེ། །
སྨ་ར་སྟུག་པའི་རྒྱ་གར་སྦ་སྦུར་གྱུར། །
ངལ་བ་ཆེར་སྐྱེད་འཁོར་གསུམ་འཐེན་བཞིན་མཆི། །
ཀྱེ་མ་རྨི་ལམ་ནང་གི་རྨི་ལམ་འདི། །

བག་ཆགས་རྙིང་པའི་རེ་དོག་དག་ལས་བྱུང་། །
གནའ་མི་མྱེས་པོའི་གནའ་སྒྲུང་དག་ལས་བྱུང་། །
ལྷ་ཆོས་མོ་རྩིས་ཕྲ་རྟགས་དག་ལས་བྱུང་། །
འདྲེ་ཆོས་གཏོར་བཟློག་མདོས་གསུམ་དག་ལས་བྱུང་། །

བག་ཆགས་འདི་ཡི་ངོ་གདོང་མཐར་ཐུག་ན། །
རྨི་ལམ་ནང་གི་གླང་ལ་འཇིགས་པ་དང་། །
རྐྱེན་ངན་བཟློག་པའི་གཏོར་ཆོག་རིམ་གྲོ་གཉིས། །
བག་ཆགས་འདི་ཀོ་མེད་ན་གཏན་མེད་ཡིན། །

ཟླ་གསུམ་ཚ་བའི་ཁྲོད་ནས་ངང་བསྒུགས་པའི།
ཤག་ཤག་ཆར་པ་འབབ་པའི་རོལ་དབྱངས་དང་། །
དབྱར་ཆུ་རྦབ་ལ་ལྷུང་བའི་འུར་ཆེམ་གྱིས། །
རེ་དོགས་འཛིངས་པའི་རྨི་ལམ་དེ་ཡང་དཀྲུགས། །

མེ་ཏོག་དམར་པོ་བཏུ་བ་དང་། །
ཡུལ་ལུང་དམར་པོ་ཕྱིན་པ་དང་། །
སྒྲེན་མོར་ཕྱི་རུ་ཐོན་པ་དང་། །
འདས་པོ་དག་དང་ལྷན་གཅིག་ཏུ། །
གཏམ་བྱ་བ་དང་ཆང་འཐུང་དང་། །

མར་མེ་རླུང་གིས་བསད་པ་དང་། །
ཉི་ཟླ་གློ་བུར་ནུབ་པ་སོགས། །
ངེས་པར་འཆི་བའི་རྟགས་སུ་བཤད།