གྲོགས་པོ་ཞིག་ལ།

གྲུབ་མཐའ་ལས་ཡར་ལོངས་ཤིག
ཆོས་ལུགས་ལས་ཕྱིར་ཐོན་ཤོག
འདི་དག་ཚང་མ་རྭ་བ་དང་རྭ་སྐོར་རྐྱང་རྐྱང་རེད།
རྭ་བར་བསྐོར་དོན་གང་རེད།

ར་ལུག་ནི་མ་རེད།
སྔ་ཆོས་དང་ད་ཆོས་ཀྱི་ལྕགས་གཟེབ་གསེང་ནས།
མགོ་བོ་ཡར་ལ་གཟེངས་སུ་བསྟོད་དགོས།
མ་གཞི་གདུག་རྩུབ་ཀྱིས་མགོ་ཁྲག་གཏོར་སྲིད་ཀྱང་།
བསྙས་སྨོན་ཀྱི་མཆིལ་ཞག་འཕེན་སྲིད་ཀྱང་།
འཇིགས་ཞུམ་གྱི་འཛུམ་མདངས་ཤོར་མི་ཉན་ལ།
ང་རྒྱལ་གྱི་དབུ་འཕང་དེ་བས་སྨད་མི་ཉན། །

ཁ་བརྡ།

🅸ད་བྱས་དུས་ཁྱེད་དགེ་བཤེས་གཡུང་དྲུང་རེད་འདུག་ག
🅸ལགས་སོ་་་དགེ་བཤེས་ལགས།
🆄ཧཧཧཧ་ཁྱོད་རང་གང་གནང་སོང་་་་པར་མཐོང་མ་སོང་ངམ།
🆄སྐབས་ཁ་ཤས་རིང་ང་ཚོས་མི་རབས་གསར་པར་གོ་སྐབས་ཕུལ་ཏེ་ཉམས་མྱོང་དང་ལས་འགན་ཁུར་དགོས་པར་སེམས། ད་ཆ་ནོར་འཁྲུལ་བྱུང་ན་ཡོ་བཅོས་བྱེད་མཁན་གྱི་རྒན་རབས་ཡོད།
🆄དེ་དངོས་གནས་རེད།

གསོལ་འདེབས།

དཀོན་མཆོག་ལགས་གང་ཞིག་ཏུ་བཞུགས་ཡོད།
ང་ཚོ་ཁྱེད་ཀྱི་སྒོ་འགྲམ་ན་ཡོད།
ཁྱེད་ཀྱིས་སྒོ་མི་འབྱེད་དོན་གང་ཡིན།
བོད་མིའི་སྡུག་བསྔལ་བསལ་རོགས་གྱིས། སྐུ་མཁྱེན།
ང་ཚོ་ལ་འདུག་གནས་མེད།
ང་ཚོ་ལ་རང་དབང་མེད།
ང་ཚོ་ལ་གང་མེད།
ཐ་ན་ཁྱེད་ལ་འབུལ་རྒྱུའི་མཆོད་པ་ཡང་མེད།
ད་དུང་མི་གསན་དོན་གང་རེད།
ངའི་རོགས་པ་ཚོ་ངུས་སོང་།
ངུས་པའི་མཆི་མ་ཁྲག་ཏུ་བབས་སོང་།
ཐུགས་རྗེས་གཟིགས་རོགས་གནོངས།
ད་དུང་སྒོ་མི་འབྱེད་དོན་གང་རེད།
ངའི་རོགས་པ་ཚོས་འཆི་བ་སྲོག་ལ་བབ་ཀྱང་།
སྒོ་འགྲམ་འདི་ནས་ཕྱིར་ལ་མི་འགྲོ་ཟེར།
ལག་ཐལ་མོ་སྦྱར་ནས།
མིག་མཆི་མང་གང་སྟེ།
ངག་མགྲིན་བརྣངས་ཏེ་འདུག
དཀོན་མཆོག་ལགས།
གལ་སྲིད་ཁྱེད་རང་ནང་དུ་བཞུགས་མེད་ན།
ང་ཚོར་བརྡ་ཞིག་མ་བསྐྱལ་བར་འདི་ལྟར་ཁུ་སིམ་མེར་ཕེབས་ནུས་སམ།
གང་ལྟར་ང་ཚོས་མ་ཤི་བར་དུ་ཁྱེད་བསྒུགས་ནས་འདུག
ད་དུང་སྐྱེ་བ་རྗེམ་མར་བསྒུག
བསྒུག བསྒུགས་ནས་འདུག

དེ་རིང་།

གོམས་ན་སླ་བར་མི་འགྱུར་བའི། །
དངོས་དེ་གང་ཡང་ཡོད་མ་ཡིན། །
ནན་གྱིས་ཉན་ན་མི་གོ་བའི། །
སྐད་དེ་གང་དུ་ཡོད་མ་ཡིན། །
བསྟེན་ན་འགོ་བར་མི་བྱེད་པའི། །
ལྷ་ཞིག་ཡེ་ནས་ཡོད་མ་ཡིན།།
འདྲིས་ན་བྱམས་པར་མི་འགྱུར་བའི། །
མི་ཞིག་སྲིད་འདིར་མཆིས་མ་ཡིན། །
ཤིན་ཏུ་མི་སྙན་ཚིག་དག་གིས། །
རྣམ་པ་དུ་མས་སྤྱོས་གྱུར་ཀྱང་། །
རྡོ་ལ་བརྡབ་པའི་ཐལ་མོ་བཞིན། །
ང་ཡ་བག་ཚ་བྲག་སོང་ངོ་། །

ཆོས་༨

རི་མགོ་མཐོན་པའི་ཡང་སྟེང་ནས། །
ལྷ་བསང་གཏོང་བའི་ནང་ཆོས་དེར། །
རིགས་པས་བརྡར་ཤ་ཇི་ལྟར་གཅོད། །
ཨ་མཆོད་འབོད་པའི་ཞོགས་པ་ལ། །
ཤབ་གཟན་བཤའ་བའི་སྔོན་འགྲོ་དེར། །
རིགས་པས་བརྡར་ཤ་ཇི་ལྟར་གཅོད། །
བདག་མོ་མཛེས་མའི་བཞིན་རས་ལ། །
མཆོད་གནས་སྤྱན་ཟུང་ལྷུང་བ་དེར། །
རིགས་པས་བརྡར་ཤ་ཇི་ལྟར་གཅོད། །
བླ་མའི་ལུང་དུ་སྦྱིན་བདག་མ། །
མཁའ་འགྲོའི་མཚན་དང་ལྡན་རབས་ཟེར། །
བདག་པོའི་ལག་ནས་འཕྲོག་པ་འདིར། །
རིགས་པས་བརྡར་ཤ་ཇི་ལྟར་གཅོད། །
བླ་མའི་ལུང་ལས་ཁྱིམ་ཚང་འདིར། །
མགྱོགས་མྱུར་གོད་ཆག་འོང་ངེས་པས། །
རྒྱུ་ནོར་འགངས་ཆེན་གཏོང་དགོས་ཞེས། །
གཡོ་ཐབས་འཚོ་བའི་ལམ་ལུགས་འདིར། །
རིགས་པས་བརྡར་ཤ་ཇི་ལྟར་གཅོད། །
དགོན་ཆེན་ཁྲ་མོའི་གྲྭ་རྒོད་དག །
མཇེ་རྒོད་སྲུང་བའི་ཐབས་ལམ་ལ། །
ཨན་ཆུང་བརླ་ཤ་དཀྲུག་སྲོལ་འདིར། །
རིགས་པས་བརྡར་ཤ་ཇི་ལྟར་གཅོད། །
ཨ་ནེ་མཛེས་མའི་མངལ་ཁྱིམ་དུ།།
ལན་ཆགས་འཁོར་བའི་གསང་བ་དེར། །
རིགས་པའི་བརྡར་ཤ་ཇི་ལྟར་གཅོད། །
མི་ཚེ་ཧྲིལ་པོར་ཆོས་ལ་བརྩོན། །
ཆོས་བརྒྱད་ང་རྒྱལ་འཕེལ་བ་འདིར། །
རིགས་པས་བརྡར་ཤ་ཇི་ལྟར་གཅོད། །
མདོར་ན་ཆོས་ནས་བཤད་ཚད་དག །
ཆོས་པས་ལག་ཏུ་མ་ལོན་དུས། །
རིགས་པས་བརྡར་ཤ་ཇི་ལྟར་གཅོད། །

བཙན་པོ་སྐྱོ་གླུ།

ཀྱེ། རི་བོའི་ནི་ཕར་ནང་ན།།

ཡུལ་གྱི་ནི་མྱིང་བཏགས་པ།།

པུར་རྒྱལ་ནི་བོད་ཀྱི་ཡུལ།།

ཡར་བལྟས་ནི་ཡར་གྱི་ནི།།

གངས་རི་ནི་མཐོ་ཡེར་ཡེར།།

མར་བལྟས་ནི་མར་གྱི་ནི།།

གཙང་ཆབ་ནི་སྔོ་ལྡེམ་ལྡེམ།།

ཕར་བལྟས་ནི་ཕར་གྱི་ནི།།

འབྲོག་རུ་ནི་ཕྱུགས་ཀྱིས་གང་།།

བོད་མྱི་ནི་སྐྱིད་སྐྱིད་ན།།

དགྱ་མྱིས་ནི་བདེ་མ་སྟེར།།

ཡར་ཀི་ནི་གངས་དང་བྲག།

བྲུས་བྲུས་ནི་ཁོག་སྟོང་མཆིས།།

མར་ཀི་ནི་གཙང་ཆབ་ན།།

དུག་ཀྱིས་ནི་བཙོག་བཏབས་སོ།།

ཕར་ཀི་ནི་འབྲོང་དང་ཤྭ།།

བསད་བསད་ནི་ཁྲག་མི་འབོག།

ཡར་བཞེངས་ནི་མཁར་དང་རྫོངས།།

གཏོར་གཏོར་ནི་གྱང་ཧྲུལ་པོ།།

གོང་གི་ནི་རྗེ་དང་བླ།།

བཞུགས་སའི་ནི་མཁར་མི་དབང་།།

འོག་གི་ནི་འབངས་དང་ཁེང་།།

འཚོ་བའི་ནི་ཡུལ་མ་མཆིས།།

ཀྱེ་རི་བོ་ནི་ཚུར་ནང་ན།།

བོད་མྱིས་ནི་སྐྱབས་འཚོལ་ཡང་།།

སྐྱབས་མྱི་ནི་གཞར་མ་མཆིས།།

ཡར་བཙལ་ནི་ལྷ་ལ་བོས།།

ལྷ་ཆེན་ནི་སྙན་མི་གཡར།།

ཕར་བཙལ་ནི་མྱི་ལ་བོས།།

མྱི་ཡིས་ནི་ཁེ་མྱེད་ན།།

ར་མདའ་ནི་སྲོལ་མ་མཆིས།།

གདོང་ནག་ནི་གནས་ཚང་ན།།

བོད་མྱི་ནི་བསྒུགས་ནས་བགྲེས།།

ཀྱེ་རྒྱ་མཚོ་ནི་ཕ་རོལ་ན།།

ཨ་རིའི་ནི་རྒྱལ་ཁབ་མཆིས།།

ཨ་རིའི་ནི་རྒྱལ་ཁམས་ལ།།

བོད་མྱི་ནི་འགྱོ་བསམ་ནས།།

རེ་བ་ནི་མྱེ་འདྲ་མཆིས།།

རེ་བ་ནི་མྱེ་འདྲ་འདིས།།

མདུན་ལམ་ནི་བསྲེག་སྙམ་པོ།།

རང་རྒྱུད་ནི་གཅད་སྙམ་པོ།།

རང་སྐད་ནི་བརྗེད་སྙམ་པོ།།

ང་དང་གཏམ་ཉོག་མའི་ལོ་རྒྱུས།

ཆེས་ཐོག་མར་ང་ཆུང་ཆུང་ལག་རྒྱབ་སག་རིའི་སྦལ་ཀོ་གྱོན་དུས་ནས།
འཆལ་གཏམ་མས་གཡོན་མའི་ཟུར་མིག་ཅིག་ཁྱེར་ཏེ་ང་རྩེ་རར་བྲིད་དེ།
ནོར་ལུག་རི་མགོར་ལུས་གྲངས་དང་ཨ་མས་བརྡུངས་གྲངས་ཉུང་ཉུང་ཁྱོན་ནས་མིན།
གང་ལྟར་ཀྱང་དུས་དེ་ནས་བཟུང་གཏམ་ཉོག་མས་ངའི་ནམ་ཟླ་བརྐུས།
ངའི་ལང་ཚོ་འཕྲོག ངའི་མདུན་ལམ་གཏོར།
ངའི་འཚོ་གནས་དཀྲུགས་སོང་ཡང་།
ལན་ཆགས་མ་བྱང་བའི་བཟའ་ཚང་དང་འདྲ་བར་ང་ནི་མོ་ལ་དུང་ཞིང་བརྩེ།
ཡར་བླ་མའི་དབང་གྲལ་དུ་སྡོད་དུས་ཆོས་གྲོགས་མོ་རང་ཡིན་ལ།
མར་འཛིན་གྲྭའི་སློབ་ཚན་ཉན་སྐབས་འཛིན་གྲོགས་ཀྱང་མོ་རང་ཁོ་ན་ཡིན།
མོ་ནི་ཟད་དུ་མེད་པ་གཏེར་དང་མཚུངས་ཤིང་།
རྒྱུན་ཆད་མེད་པའི་རྦ་རླབས།
འབད་མེད་དུ་གྲུབ་པའི་དག་ཞིང་གི་འདོད་ཡོན་ཡང་མོ་ལ་རྫོགས་ནས་འདུག
དྲང་མོར་ཞུས་ན་མོ་ནི་ཁ་ནམ་ཡང་འབྲལ་མི་ཤེས་པའི་ངའི་འཚོ་བའི་
ཆ་ཤས་གལ་ཆེན་ཞིག་ཏུ་གྱུར་ཟིན་འདུག

ང་དང་བོད་མི་རིགས་ཀྱི་གཤིས་ཀ།

དྲྭ་ནང་གི་གྲོགས་པོ་ཁག་ཅིག་གིས་མུན་པའི་ཕག་ནས་མདའ་རྩེ་གཟས་ཀྱིན་པའི་སྣང་ཚུལ་ཞིག་ལས་འཕྲོས་པའི་བསམ་གཞིག་ཅུང་བྱེད་འདོད། དང་པོ་ང་རང་ཉིད་ཀྱི་གཤིས་སྤྱོད་ནས་འགོ་བཙུགས་ནས་བཤད་ན་ང་ཡང་ཚོད་ཚོད་གཅིག་ལས་མེད་དེ། སྔོན་མ་བོད་དུ་ཆོས་དད་རང་མོས་འགོ་བཙུགས་རྗེས་དགོན་པ་བཤིག་ཤུལ་གྱི་ས་རྡོ་བསལ་སྐབས་ངའི་སྤུན་ཆུང་གིས་གཟི་ཆག་ཞིག་རྙེད་སོང་། ང་དགའ་སྤྲོས་རྒྱུག་ཤར་ཐེངས་གཅིག་གིས་ལྟ་བར་ཕྱིན་ཀྱང་ཕ་དམ་པས་རེ་དོགས་ཅི་ཡང་མེད་པར་དགོན་པའི་ལས་བྱེད་ཀྱི་ཕྱག་ཏུ་ཕུལ་ཚར་སོང་། ངའི་སེམས་སུ་“སེམས་ཅན་ལ་ཁ་ནས་རྙེད་ཀྱང་རྙེད་པ་མིན། གཡུ་ཆུང་གོ་ཁ་ནས་རྙེད་ཀྱང་རྙེད་པ་ཡིན་”ཞེས་པའི་གཏམ་དཔེ་དེ་རྒྱབ་ལྗོངས་སུ་བཞག་ཏེ་དེ་ཕར་ཕུལ་དགོས་དང་མི་དགོས་ལ་ཐེ་ཚོམ་ཞིག་སྐྱེས་མྱོང་། ཉིན་དེའི་དགོང་མོར་དགོང་ཟས་ཟ་སྐབས་ཕ་དམ་པས་ཨ་མ་དང་གླེང་མོལ་གནང་ཁུལ་གྱིས་“ང་ཚོའི་བུ་དེ་རིང་བརྒྱུག་ཡོང་སྟངས་ལ་བལྟས་ན་ཕལ་ཆེར་དགོན་པའི་རྒྱུ་ཕར་འབུལ་རྩིས་མེད་པ་འདྲ། བུ་ཡི་རྒྱུ་དག་ཀྱང་ཚོད་ཚོད་གཅིག་ལས་མི་འདུག་”གསུངས་པ་དང་འཕྲོ་མཐུད་དེ་ཨ་མས་ཀྱང་གཟབ་ནན་མེད་པའི་ཉེས་སྐྱོན་མང་པོ་ཞིག་བགྲངས་སོང་། མིས་རང་སྐྱོན་མཐོང་རྒྱུ་དངོས་གནས་ཁག་པོ་རེད། ངས་དེ་སྔོན་རང་ཉིད་མི་བཟང་བའི་གྲས་སུ་ཡོས་ཤག་ཡིན་ཡང་། དུས་དེ་ནས་བཟུང་ང་རང་ཉིད་མི་ཡག་པོ་ཞིག་ཡིན་བསམ་ཕོད་མ་མྱོང་། 

མཚམས་འདིར་ཨ་ཕ་དྲན་ནས་ངུ་ཤོར་སོང་། ད་ནི་ངུས་ཚར། ངས་བཤད་ཀྱི་ཡིན། ང་ཚོའི་བོད་ལ་མཁས་མཛངས་ཀྱི་སྙན་གྲགས་ཆེ་བའི་བློན་པོ་མགར་ལ་བསམ་ན་ངལ་བརྒྱའི་ཁུར་གྱིས་བླངས་བའི་རྒྱ་ཡི་ཚ་མོ་དེའི་ལང་ཚོ་བརྐུས་ཏེ་སྲོང་བཙན་ལ་དབུ་སྐོར་ཞུས་སོང་པས། ཁོང་མཛངས་བློན་ཟེར་བའི་ཁོངས་སུ་ཡོད་པའི་མི་ཞིག་གི་རྒྱུ་འབྲས་དྲང་གཞག་དེ་ཙམ་རེད། བོད་ཀྱི་བླ་ཆེན་མི་ཆེན་ཚོས་སོག་པོའི་དམག་དཔུང་ཁྲིད་ནས་རང་རིགས་དམར་གསོད་བྱས་པ་དེས་བོད་ཀྱི་ཆེན་པོ་ཚོ་ལ་ཁྲེལ་གཞུང་དང་སྙིང་རྗེ་དེ་ཙམ་མེད་པ་མངོན་གསལ་མིན་འགྲོ།

ད་ཡང་མང་ཚོགས་ཚོ་ཡག་པོ་ཞེ་དྲག་་ཡོད་བསམ་ན་ངས་བརྗོད་པར་བྱ་སྟེ། ཡུན་རིང་མ་སོང་བའི་ལོ་ཤས་སྔོན་ལ། བོད་སྨད་ཕྱོགས་ཀྱི་ཡུལ་ལུང་ག་གེ་མོར་དངོས་ཟོག་གིས་བཀང་བའི་བོད་པའི་དོལ་སྐྱེལ་འཁོར་ལོ་ཞིག་བརྡབ་སྐྱོན་བྱུང་སྐབས། ཉེ་འཁྲིས་ཀྱི་བོད་མི་ཚོས་སྨས་མ་ཚོར་རོགས་སྐྱོར་བྱེད་རྒྱུ་ལྟ་ཞོག བྱ་རྒོད་ཤ་ལ་འཐབ་པ་བཞིན་དུ་དུས་སྐད་ཅིག་གི་རིང་ལ་དངོས་རྫས་ཚང་མ་རྐུ་འཕྲོག་བྱས་ཚར་སོང་ཟེར། སྙིང་རྗེ་གང་ན་འདུག རྒྱུ་འབྲས་གང་ན་འདུག ནང་ཆོས་གང་དུ་སོང་བ་རེད།

ངས་འདི་གོ་དུས་གནའ་བོའི་ཀློ་པ་ཚོ་ནང་ཕན་ཚུན་འཁྲུག་སྐབས་ཀི་ཙིར་རྒྱག་གིན་རྒྱུག་ཡོང་བ་དེའི་རྣམ་པ་ཞིག་མིག་ལམ་དུ་ཤར་སོང་། མི་རིགས་གཞན་པ་ཞིག་ཡིན་ན་མ་མཐར་ཡང་གནད་ཡོད་མི་སྣར་སྙན་གསང་འབུལ་བ་དང་། ནད་པ་ཚོར་སྨན་གཡོག་གང་ཐུབ་བྱེད་པ་དེ་ཚིག་ཐག་བཅད་ནས་ངས་བཤད་ཐུབ། གྲོང་པ་དེའི་ནང་དུ་དུད་ཚང་ལྔ་བཅུ་ཡས་མས་ཡོད་པ་མང་ཆེ་བས་ཁྱེར་སོང་ཟེར། གལ་ཏེ་མང་ཆེ་བས་འཕྲོག་མེད་ན་གཅིག་གཉིས་གིས་འཁྱེར་ཕོད་ཀྱི་མ་རེད།

དེ་དང་འདྲ་བ་ཞིག་ངའི་ཕ་ཡུལ་གྱི་ཡུལ་མི་ཁག་ཅིག་གིས་བྱས་འདུག་ཀྱང་བསམ་ཡོད་གཅིག་གཉིས་ཀྱིས་བཀག་འགོག་བྱས་ཚུལ་འདུག དེ་བཞིན་དུ་དྲྭ་ནང་གི་མིང་མེད་པའི་གྲོགས་པོ་ཚོར་གཟིགས་དང་དོན་དངོས་ཐོག་སྙན་ཞུ་ཡག་པོ་ཞིག་འབྲི་རྒྱུའི་ཤེས་ཚད་མེད་ཀྱང་མི་ལ་ཚིག་མཚོན་འཕེན་རྒྱུའི་ལྟ་གོན་ལ་ཞུགས་རྐྱང་རེད། མདོར་ན་ང་ཚོའི་མི་གཤིས་དེ་ཚོད་ཚོད་གཅིག་རེད་འདུག་ཞུ་རྒྱུ་ཁེལ་སོང་།

ནང་ཆོས་བྱ་དགོས་ན།

གོ་ཐོས་ལྟར་ན་ཐཱ་ལན་གྱི་རྒྱལ་ཁབ་དེ་ནང་པའི་རྒྱལ་ཁབ་ཁམས་གཙང་གཅིག་ཏུ་བརྩི་སྲོལ་འདུག་མོད། དེང་སང་ཐཱ་ལན་དུ་ཁ་ཆེའི་བསྟན་པ་ཡང་ཤུགས་ཆེན་དར་བ་ཙམ་མ་ཟད་དྲག་པོ་འཇིགས་སྐུལ་གྱི་ལམ་སྲོལ་ཡང་དབུ་ཡོངས་སུ་བརྙེས་ཚར་ཡོད། དེའི་རྒྱུ་རྐྱེན་ངོ་མ་དེ་གྲྭ་པ་སེར་པོ་རྣམས་སྤྱི་ཚོགས་དང་འབྲེལ་འདྲིས་མེད་པར་རི་ཁྲོད་དུ་རྩེ་གཅིག་སྒོམ་ལ་གཞོལ་སོང་ནས་རྒྱ་ཆེའི་མི་མང་ཚོར་ལྟ་གྲུབ་ཀྱི་སྲོག་དང་ལྡན་པའི་ནང་ཆོས་ཀྱི་གོ་རྟོགས་མ་སྤེལ་པས་རེད་ཟེར།

དེའི་གནས་སྟངས་དང་གཅིག་མཚུངས་རང་ཅག་གངས་ཅན་པའི་སྤྱི་ཚོགས་སུ་བྱུང་དང་འབྱུང་མུས་ཡིན་པ་སྟེ། དགོན་སྡེ་ཁག་ཏུ་གྲྭ་པ་ཚོས་མདོ་སྔགས་ཀྱི་གཞུང་ལུགས་རྒྱ་མཚོ་ལྟ་བུར་འཆད་རྩོད་རྩོམ་གསུམ་གྱི་སྦྱང་བ་ཇི་ལྟར་གནང་ཡང་། རྒྱ་ཆེའི་མང་ཚོགས་ཀྱི་ཁྲོད་དུ་བསམ་ན་དཀོན་མཆོག་གསུམ་པོའི་ཁོངས་སུ་ཨ་ཁུ་དགྲ་ལྷ་བགྲང་མཁན་ལྟ་བུ་མང་པོ་ཡོད།

དེས་སྟབས་ཀྱིས་ནང་ཆོས་ཀྱི་གོ་རྟོགས་མེད་པར་ནང་ཆོས་བྱེད་ཚུལ་ནི་སྤྲེའུས་མི་ཡི་ལད་མོ་བྱས་པ་དང་འདྲ་བར་ཁ་ཆོས་མ་ཎི་འདོན་པ་དང་ལུས་ཆོས་གནས་སྐོར་དང་ཕྱག་འཚལ་བ་ཙམ་གྱིས་ཡིད་ཚིམས་ཤིང་༼རྡེལ་དཀར་༽སྦར་མོ་གང་ཞིག་ཨ་ཞང་ཆོས་རྒྱལ་ལ་རྩིས་སྤྲོད་བྱ་རྒྱུ་ཙམ་ཞིག་བསམ་ནས་ཡོད།

མདོར་ན་ནམ་མཁའི་མཐོངས་སུ་ཁྲ་ལམ་ལམ་གྱི་ལྷ་ཚོགས་ལ་འདོད་སྲེད་དང་། ས་འོག་ཏུ་དམར་འུར་འུར་གྱི་དམྱལ་བའི་མེ་དཔུང་གཉིས་ལ་འཇིགས་སྲེད་སྐྱེས་ཏེ། མི་ཡུལ་དུ་འུར་ལྷང་ལྷང་གི་ཆོས་བརྒྱད་སྒྲུབ་ཀྱིན་ཡོད། གནས་ཚུལ་དེ་དག་ལ་གཞིགས་ནས་༌༸གོང་ས་མཆོག་གིས་མང་ཚོགས་ཀྱི་ཁྲོད་དུ་ནང་ཆོས་ངོ་མའི་གོ་རྟོགས་སྤེལ་རྒྱུ་གལ་ཆེན་ཡིན་ཚུལ་གསུངས་འདུག།

ངར་རང་དབང་མི་འདུག

ནམ་ཞིག་ཏུ་ངས་ཁྱེད་ལ་ལྟ་མི་བཟོད་པའི་གནས་ཚུལ་འདི་བྱུང་སོང་བ་ངས་ཀྱང་མི་དྲན་མི་སོས། གང་ལྟར་དེང་སང་ང་ལ་ཁྱོན་ནས་ལྟ་མི་ཕོད་པའི་ན་ཚ་ཞིག་ཕོག ཐ་ན་བསམ་ཡང་མི་ཕོད། གལ་སྲིད་བསམ་སོང་ན་དེ་ནི་ཟུག་གཟེར་ཉག་གཅིག་རེད། ཉིན་མ་རེ་རེའི་ཞོགས་པའི་ལས་བྱ་ལ་འགྲོ་དུས་སྒོ་སྲུབ་ནས་བསྒྲགས་འོང་བའི་ཞལ་འདོན་པའི་དབྱངས་རྟ་སྙན་མོ་དེ། དེང་སང་རྦད་དེ་ཆད་སོང་འདུག གཅིག་བྱས་ན་ངས་ཁྱེད་རང་གིས་ལས་འགན་སྒྲུབ་སྟངས་ཐད་ལ་ལྐོག་ནས་བསྔགས་པ་ཙམ་དེས་ཨེ་ཡིན་ན། དེང་སང་གང་ལྟར་ཕར་འགྲོ་དང་ཚུར་འོང་གི་ལམ་ཁ་གང་ཞིག་ཏུ་ཁྱེད་དང་ཐུག་སོང་ན་ང་ནི་ནག་ཅན་ཀྱི་རྐུན་མ་ཞིག་ཉེན་རྟོག་པས་རིག་སོང་བ་དང་ཆ་རེད་འདུག དོན་ངོ་མ་ངས་ཉེས་པ་གང་ཞིག་བསགས་འདུག

ཉི་སྐྱ།

དྲོད་ཁོལ་མེད་པའི་ཉི་འོད་མོག་པོ་མགོ་ཐོག་ན་འབབ་ཀྱིན།
སྐོར་རླུང་གིས་དེད་པའི་ཐལ་རྡུལ་སྐྱ་མོ་ངོ་གདོང་ལ་བྲབ་ཀྱིན།

བསིལ་ལྷམ་གྱི་ཤིང་རྟ་འདྲེན་པའི་རྐང་པའི་གླང་ངུ་དོར་གཅིག་པོ།
ཅི་འདྲའི་ངལ་ཞིང་དུབ། 

ཅི་འདྲའི་འགོར་ཞིང་དལ།
བྱ་བྲུན་གྱིས་སྦག་པའི་ལྕགས་ཟམ་བཙའ་མ་དེའི་འཁྲིས་ནས།
གཟི་འོད་ཤོར་བའི་མིག་ཟུང་གཉོམ་པོས།
མིག་ལྤགས་ལྕི་མོ་འདི་ཡར་འདེབས་པར་ཅི་འདྲའི་དཀའ་ཚེགས་ཤིག
ཟམ་འོག་གི་གཙང་པོ་དྭངས་མོ།
ངའི་སེམས་པ་དང་འདྲེས་ནས་འབབ་ཀྱིན།
གཙང་པོ་ངའི་སེམས་ཁོང་ནས་འབབ་ཀྱིན།

གྲྭ་པ་ལགས།

སེམས་ཁོང་ནས་གཟེར་བའི་གནོད་པ་ཞིག་བྱུང་ན། །
ནམ་ཞར་དུ་དྲན་པའི་ན་ནད་གཅིག་བྱུང་ན། །
དྲན་སེམས་ཀྱི་གློག་བརྙན་འགོག་མེད་དུ་ལྟ་དུས། །
གྲྭ་པ་ཁྱེད་རིམ་གྲོ་ལ་ཕེབས་དགོས་ཤིང་བྱུང་ཡང་། །
ཁྱིམ་བདག་མའི་འཛུམ་ཞལ་གསོལ་ཇ་དང་བསྡོངས་ཀྱང་། །
དམ་ཚིག་གི་བཅད་ཁྲ་ཀློག་རྒྱུ་དེ་མ་བརྗེད། །
ཁྱིམ་སྦུག་གི་གཡང་སྒམ་ཟུར་མིག་གིས་གཟིགས་ཀྱང་། །
ལག་ཟུང་གི་ཕྱག་རྒྱ་མདུད་རྒྱ་རུ་སྡོམས་དང་། །
དད་ལྡན་གྱི་མིག་ཟུང་ཡིད་ཆེས་ཀྱི་བཙུམས་དུས། །
ཁྲིགས་ལྡན་གྱི་གྲྭ་པས་གསོན་མིག་དག་མ་བྲུས། །
ཁྱིམ་ཆེན་ཀྱི་ཕ་མ་བློས་གཏོང་རང་ཐུབ་ཀྱང་། །
ཁྱིམ་ཆུང་གི་གྲྭ་ཕྲུག་སྐྱུར་ཐབས་འདི་མེད་ན། །
འཇིག་རྟེན་ཀྱི་འཚོ་བ་ངོ་མ་དེར་རོལ་དང་། །
རང་བཞིན་གྱི་དྲོ་སྐྱིད་ཐོབ་རྒྱུ་རང་ངེས་སོ། །