ལས་ཀ

༄། ལས་ཀ

བྱས་ན་མི་འགྲིག་རྙོག་སྒྲ་ཡོངས་ཀྱི་གཞི།
མ་བྱས་མི་ཆོག་ལྟོ་གོས་གཉིས་ལ་ཐུག
མ་ཐོབ་ཤོར་ན་འཚོ་བའི་མུ་གེར་འགྱུར།
ཐོབ་ནས་གཤིབ་དུས་ལུས་སེམས་བསྲེག་པར་བྱེད།

ཉེན་ཁ་ཞིག

འུག་པ་དགོད་པའི་ཧ་སྒྲ་མ་ཡིན་ཞིང་། །
ལྟས་ངན་འདྲེ་མོས་འབོད་སྐད་མ་ཡིན་པར། །
བསམ་ངན་གདུག་འདྲེའི་ཆོ་འཕྲུལ་ཐེང་གཅིག་གིས། །
སྤྲོ་དགའི་མེ་ཏོག་སད་ཀྱིས་ཧད་དེ་ཁྱེར། །
མི་ཚེའི་ཆེ་ཐང་བསད་པའི་རིན་ཆེན་ཞིག །
ཁ་ལྕེ་མཚམས་ནས་འདྲེ་ཡིས་ཁྱེར་བ་འདི། །
བསམ་པ་གནག་པའི་མི་ཞིག་མ་ཡིན་ན། །
དངོས་མེད་འབྱུང་པོས་བྱས་སོང་ཟེར་ས་ཅི། །
ཁ་བྱང་གསལ་བའི་འཕྲིན་ཡིག་དངོས་མ་ཞིག །
ཁ་ལག་བར་ནས་རླུང་ལ་གྱུར་སོང་ཞེས། །
ཧམ་བཤད་འདི་དག་བདུད་འདྲེས་བྱིན་ནམ་ཅི། །
ཧ་ལམ་རྣ་བར་ཐོས་ལ་ཡིན་མ་ཆེས། །

སྐྱ་མདངས།

གདུང་ཤུགས་ཀྱི་འབོད་པ། །
སེམས་ཁོང་ན་རྙིད་སོང་། །
རེ་འབྲས་ཀྱི་རྨི་ལམ། །
ཀླད་རྒྱ་ལས་ཡལ་སོང་། །
ཉི་འོད་ཀྱི་བཀྲག་མདངས། །
དུ་རྡུལ་གྱིས་སྦག་སོང་། །
མིག་ཟུང་གིས་གཟི་མདངས། །
རབ་རིབ་ཀྱིས་སྒྲིབ་སོང་། །
ཁོག་སྟོད་ན་འཚང་བའི་དབུགས་རིང་། །
འཁུན་སྒྲ་ལ་ཐིམ་སོང་། །
ཚ་བས་ཡི་ངོ་གདོང་། །
རྔུལ་ཆུ་ཡིས་བསྐྱམས་སོང་། །

ལོ་གསར་རེད་དམ།

སྐྱིད་པོ་མི་འདུག ལོ་གསར་ལགས།
ཁ་བས་སྐྲ་ལོ་མནན་ཐོག་ལ།
ཁུ་འཕང་ཉིལ་སོང་།
བུ་ཡུལ་འཚུབ་སོང་།
འདི་ལོ་གསར་རེད་དམ།
རྐང་མགོ་ལྷག་རླུང་གིས་བརྡུང་དུས།
ཁབ་སོ་དང་ཚེར་མ་ཤ་གསེང་དུ་འཛུལ་སོང་།
རུས་གསེང་དུ་བསྟིམས་སོང་།
སྐྱིད་པོ་རེད་དམ།
ནག་ཐིབ་ཐིབ་ཀྱི་མུན་པ་སེམས་ཁོང་ན་དཀྲིག་དུས།
ཀླད་གཏིང་ན་དུ་ཞག་དཀྲིགས་སོང་།
སྤྲིན་ནག་འཁོར་སོང་།
ལོ་གསར་རེད་དམ།
མོ་མོ་དང་བག་ལེབ།
རྩྭ་སྐྱ་དང་ཕུར་མའི་ཕུང་པོ་རེད།
འདི་དག་ལོ་གསར་རེད།

ལོ་གསར།

གློག་སྒྲོན་བྲོས་ཚར་བའི་དགོང་མོ་དེ་ནི།
ཏག་ཏག་ལོ་གསར་ཚེག་གཅིག་རེད།
མུན་ནག་གི་རེ་བ་ཉིན་མོ་ལ་བཏུག་ཀྱང་།
གློག་སྒྲོན་ལོག་མ་བྱུང་།
ངས་ད་དུང་བསྒུགས་ནས་བསྡད།
མི་ལོ་ཉི་ཤུའི་རིང་ཁ་བྲལ་བའི་སྦྲང་དཀར་ལྷ་མོས།

ཇ་སྲུབ་དཀར་གང་བཏེགས་ཀྱང་།
ཡིན་ག་འཆུན་ནས་འཐུང་ཐུབ་མ་སོང་།
གློག་སྒྲོན་ལགས།
ངས་ད་དུང་ཁྱེད་བསྒུགས་ནས་ཡོད།

ཉོབ་ཏོ།

ཉོབ་ཏོ།
ནམ་ཉོབ་ཐོལ་ལེ་བ་དེ་གསལ་ནས་ཡུན་རིང་སོང་ཡང་།
ང་ནི་གཉིད་ཀྱི་ཉོབ་འོག་ནས་ལང་མ་ཚར།
ལང་གིན་ལང་གིན་ཉལ་འདོད་ལ་ཉལ་གྱིན་ཉལ་གྱིན་གཉིད་འདོད་སོང་།
གཉིད་ཀྱིན་གཉིད་ཀྱིན་འགུལ་མི་འདོད་ན་ལང་ག་ལ་འདོད།
ཉོབ་ཏོ།
ཕྱེ་མི་འདོད་པའི་མིག་ཟུང་བཙན་གྱིས་འདེགས་དུས།
བརྡར་མི་འདོད་པའི་སོ་འཁྲུད་མཆུ་ཟུར་ནས་ངལ་སོང་།
གོམ་པས་འདེགས་འགྱོགས་ཉོབ་འགྲོས་ཀྱིས་བསྐྱོད་དུས།
འགྲོ་བའི་རོགས་པ་ཆད་སྣང་བཟི་སོང་།
ཉོབ་ཏོ།
ཉོབ་ཏོའི་མུན་པ་ཀླད་རྒྱ་ལ་དཀྲིག་དུས།
སྤྲོ་བའི་འོད་སྣང་མེ་སྟག་ཙམ་ཡང་མ་མཆིས།
ཞིམ་པའི་བཟའ་བཏུང་ལྕེ་ཐོག་དུ་བཞག་ཀྱང་།
མྱོང་བའི་བྲོ་བ་ལྕེ་གཏིང་ནས་ཡལ་སོང་།
ཉོབ་ཏོ།

ཚེར་མ།

དེ་རིང་༼ཚེར་མ་དང་འདྲ་བའི་ཚོར་བ་༽
སེར་དྲག་དང་འདྲ་བའི་ཚེར་མ་འདི་དག་གིས་ང་ལ་བྲབ་ཀྱིན་བྲབ་ཀྱིན།
ལྕགས་སྒྲོག་དང་འདྲ་བའི་ཚེར་མ་འདི་དག་གིས།
སྡོམ་གྱིན་སྡོམ་གྱིན་ང་ཚེར་མའི་གཟེབ་ཏུ་བསྟིམས་སོང་།
མ་གཞི་ཚེར་མ་འདིའི་རྩ་བ་གང་ལས་འབུས་ཡོང་བ་མ་ཤེས་ཀྱང་།
ཁབ་རྩེ་དང་འདྲ་བའི་རྩེ་མོ་སྙིང་གཏིང་དུ་བསྡིགས་ནས་རུས་རྐང་ལ་ཐིམ་སོང་།
ཚེར་མ་དང་འདྲ་བའི་མིག་ཆུ་མཁུ་གོང་ནས་བ་ལྷུང་བ།
སྣ་གཏིང་ན་ལྕགས་གཟེར་བཞིན་ཟུག་སོང་།