བསོད་ནམས་དབང་ཆེན་ནས།

“ཨོ་རྒྱན་རིགས་འཛིན་ལགས་སུ། །
སྙན་འཇེབས་ཚིག་གི་སྡེབ་སྦྱོར་དེ་མཐོང་དུས། །
ཞྭ་དམར་ཅོད་པཎ་ཁྱེད་ཉིད་ལ་མཛེས་འདུག །
དྭངས་གཙང་ཁོར་ཡུག་ཧི་མ་ལའི་ལྗོངས་སུ། །

ཉམས་འགྱུར་བཞོ་སའི་བ་མོ་ཞིག་མེད་དམ། །

འཁྲུངས་སྐར་དུས་ཆེན་ངོ་སྤྲོད།

སྟོན་པའི་འདས་ལོ་༢༥༥༦་དང་བོད་རྒྱལ་ལོ་༢༡༣༩ སྣྲོན་ཟླ་བའི་ཚེས་པ་ལྔ། ཕྱི་ལོ་༢༠༡༢། ༧། ༦། ཉིན་མོ་འདི་ནི་འཛམ་གླིང་ཞི་བདེའི་དེད་དཔོན་རང་ཅག་གངས་ཅན་པ་རྣམས་ཀྱི་ཁོག་པའི་སྙིང་དང་དཔྲལ་བའི་མིག་ལྟར་དུ་གཅེས་པར་འོས་པའི་དབུ་ཁྲིད་དམ་པ་དོན་གྱི་སླད་དུ་མཚན་ནས་སྨོས་ན། ༸གོང་ས་སྐྱབས་མགོན་རྒྱལ་བའི་དབང་པོ་བསྟན་འཛིན་རྒྱ་མཚོ་གང་ཉིད་དགུང་གྲངས་༧༧་ཧྲིལ་པོར་ཕེབས་པའི་སྐུ་ཡི་འཁྲུངས་སྐར་གྱི་དུས་ཆེན་ཁྱད་པར་ཅན་གྱི་ཉིན་མོ་འདིར་མགོན་པོ་གང་ཉིད་ཀྱི་མཛད་རྣམ་མདོར་བསྡུས་ཤིག་ངོ་སྤྲོད་ཞུ་ན།
ཕྱི་ལོ་༡༩༣༥་ལོའི་ཟླ་བ་༧་ཚེས་༦་ཉིན་མོར་བོད་མདོ་ཁམས་སྟག་འཚེར་ཞེས་པའི་གྲོང་སྡེ་ཞིག་གི་ནང་དུ་ཡབ་ཆོས་སྐྱོང་མགོན་པོ་དང་ཡུམ་བསོད་ནམས་མཚོ་གཉིས་ཀྱི་སྲས་སུ་སྐུ་འཁྲུངས། ལྷ་བླའི་ལུང་བསྟན་དང་ལྷ་མོའི་མཚོ་གཟིགས་སོགས་ལས་གསལ་བ་ལྟར་དབུས་ཕྱོགས་ནས་རྒྱལ་བའི་ཡང་སྲིད་རྩད་གཅོད་ཞུ་མཁན་སྟག་འཚེར་ས་གནས་སུ་འབྱོར་བ་དང་ཆུང་སྲིད་རིན་པོ་ཆེས་ཀྱང་མི་སྣ་ཁག་དང་སྐུ་ཆས་སོགས་འཁྲུལ་མེད་དུ་ངོས་འཛིན་གནང་བར་བརྟེན་རྒྱལ་བའི་ཡང་སྲིད་འཁྲུལ་བྲལ་དུ་ངེས་པ་རྙེད། སྐབས་དེར་སྟག་འཚེར་ས་གནས་རྨ་ཕུ་ཧྥང་གི་བདག་བཟུང་འོག་ཚུད་ཡོད་སྟབས་ཕེབས་ལམ་བདེ་མིན་གྱི་སྐུ་ངལ་ཡོད་གཤིས་སྤྱི་ལོ་༡༩༣༩་ལོར་གསང་སྟབས་ཀྱིས་ལྷ་ལྡན་གྲོང་ཁྱེར་དུ་ཆིབས་བསྒྱུར་བསྐྱངས་ཤིང་ཕྱི་ལོ་ ༡༩༤༠་ལོར་གྲུ་འཛིན་གཉིས་པའི་གཞལ་མེད་ཁང་དུ་གསེར་ཁྲི་མངའ་གསོལ་གྱི་མཛད་སྒོ་ཟབ་རྒྱས་ཞུས།
ལྷ་ལྡན་ཡུལ་དུ་ཕྱག་ཕེབས་པ་ནས་བཟུང་ཡོང་འཛིན་རྣམ་གཉིས་གཙོས་པའི་མཁས་བཙུན་བཟང་གསུམ་ལྡན་པའི་དགེ་བའི་བཤེས་གཉེན་དུ་མའི་ཞལ་སྔ་ན་གཏུགས་སྟེ་ཐུན་མིན་ནང་ཆོས་ཀྱི་གཞུང་བཀའ་པོད་ལྔ་དང་ཐུན་མོང་རིག་པའི་གཞུང་ལུགས་ཀུན་ལ་སྦྱང་བ་མཐར་སོན་ཏེ་མཚན་དོན་གཉིས་ལྡན་གྱི་ལྷ་རམས་དམ་བཅའ་ཕུལ་བ་སོགས་མཁས་པའི་གོ་འཕང་མཐོན་པོར་གཤེགས་པ་ཙམ་མ་ཟད། སྐུ་ན་ཕྲ་མོའི་སྐབས་སུ་ཆུ་ཚོད་འཁོར་ལོ་བཅོས་སྒྲིག་གནང་རྒྱུར་དགའ་ཞིང་རྒྱང་ཤེལ་ལས་ཟླ་བའི་འཇིག་རྟེན་ལ་ལྟ་རྒྱུར་སྤྲོ་བའི་མི་བུ་ཤེས་རིག་གི་འཇུག་སྒོ་རབ་ཏུ་ཡངས་པ་ཞིག་ཀྱང་ཡིན།
༡༩༥༠། ལོར་མདོ་ཁམས་ཀྱི་ཡུལ་གྲུ་ཕལ་མོ་ཆེ་རྒྱ་དམར་དྲག་པོའི་དམག་གིས་ཧམ་བཟུང་བྱས་ཤིང་བོད་ཀྱི་བསྟན་པ་ཆབ་སྲིད་རླུང་འཚུབ་ཁྲོད་ཀྱི་མར་མེ་ལྟར་ཉམ་ཉེས་ཧ་ཅང་ཆེ་བའི་སྐབས་དེར། བོད་ལྗོངས་ལྷ་མི་ཡོངས་ཀྱིས་གསོལ་འདེབས་ཞུས་པ་བཞིན་ལོ་དེའི་ཟླ་བ་༡༡། ༡༧ ཏེ། དགུང་ལོ་༡༦། ལས་མ་སོན་པའི་བུ་ཕྲུག་ཅིག་གིས་བོད་ཀྱི་བསྟན་པ་ཆབ་སྲིད་ཡོངས་རྫོགས་ཀྱི་འགན་དབང་བཞེས། ༡༩༥༦། ལོར་བདག་ཅག་གི་སྟོན་པ་ཤཱཀྱ་ཐུབ་པ་སྐུ་མྱ་ངན་ལས་འདས་ནས་མི་ལོ་༢༥༠། འཁོར་བའི་དུས་དྲན་སྲུང་བརྩི་ཞུ་བར་རྒྱ་གར་དུ་ཕེབས་པ་དང་། རྒྱ་གཞུང་གིས་གདན་ཞུས་ལྟར་རྒྱ་ནག་ཏུ་ཆིབས་བསྒྱུར་བསྐྱངས་བ་སོགས་བོད་བསྟན་སྲིད་ཀྱི་ལས་ཁུར་ཡོངས་སུ་བླངས།
༡༩༥༩། ལོར་རྒྱ་དམར་དྲག་པོའི་གཞུང་གིས་བོད་ཀྱི་སྣོད་བཅུད་ཐབས་ཅད་ཧམ་འཕྲོག་བྱས་ཤིང་སྐུ་ཉིད་རང་ཡུལ་ཤོར་བའི་བཙན་བྱོལ་བའི་གནས་སུ་གྱར་ཡང་། ལྷག་བསམ་དགུང་སྔོན་ལས་ཡངས་ཤིང་སྙིང་སྟོབས་རི་རབ་ལས་བརྟན་པའི་སེམས་བསྐྱེད་ཅིག་གིས་མ་འོངས་མི་རིགས་ཀྱི་ངོ་བོ་སྲ་བརྟན་དང་རིག་གཞུང་རྒྱུན་འཁྱོངས་ཡོང་སླད། བོད་ཕྲུག་ཁམས་གཙང་གི་སློབ་གྲྭ་དང་བོད་མི་ཁམས་གཙང་གི་གཞིས་ཆགས། གྲུབ་མཐའ་རིས་མེད་ཀྱི་དགོན་སྡེ་སོགས་འབད་པ་སྟོང་ཕྲག་གིས་བསྐྲུན་པ་དང་ཆབས་ཅིག ཀ་བ་གསུམ་ལྡན་གྱི་མང་གཙོའི་ལམ་སྲོལ་གསར་དུ་ཕྱེས་ཏེ་གཞུང་གི་བདག་དབང་ཡོངས་རྫོགས་མི་མང་ལ་གནང་བ་སོགས་མཛད་རྗེས་བླ་ན་མེད་པར་བསྐྱངས།
ལྷག་པར་དུ་གང་ཉིད་ཀྱིས་ནང་པའི་ལྟ་སྤྱོད་དང་མཐུན་པའི་འཚེ་མེད་ཞི་བའི་ཐབས་ལམ་ཉག་གཅིག་སྟེ་ཕན་ཚུན་བསམ་ཤེས་དང་། མཐུན་སྒྲིལ། དྲང་བདེན། བྱམས་བརྩེ་སོགས་ཀྱི་སྒོ་ནས་འཛམ་གླིང་ཞི་བདེའི་བསྟི་གནས་ཤིག་ཏུ་བསྒྱུར་ཐབས་དང་། བོད་ཀྱི་བདེན་མཐའ་གསལ་ཐབས་གནང་དང་གནང་བཞིན་པའི་མཛད་བཟང་གི་མཚན་སྙན་གོ་ལའི་ཁྱོན་ལ་ཁྱབ་ཏེ། འཛམ་གླིང་མི་མང་ཡོངས་ཀྱི་ཡིད་དབང་ཡོངས་སུ་ཕྲོགས་ནས་ཕྱི་ལོ་༡༩༨༩། ཟླ་བ་༡༢་པའི་ཚེས་པ་༡༠་ཉིན་ལ་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་ཐོབ་ཅིང་འཛམ་གླིང་ཞི་བདེའི་དེད་དཔོན་མཆོག་གི་སྐུ་རུ་བཞེངས། དེ་མིན་༢༠༠༧་ལོར་སྙན་གྲགས་ཅན་གྱི་ཨ་རི་གསེར་གྱི་གཟེངས་རྟགས་ཐོབ་པ་སོགས་ཀྱིས་མཚོན་ཏེ་ཆེ་བསྟོད་དང་བྱ་དགའ་སོགས་གྲངས་ལས་འདས་པ་ཞིག་བཞེས་གནང་ཡོད། ད་ལྟའི་ཆར་གང་ཉིད་སྐུ་བདེ་བཞུགས་ཐོག་བོད་བསྟན་པ་ཆབ་སྲིད་ཀྱི་ཆེད་དུ་མཛད་བཟང་སྐྱོང་མུས་ལགས་སོ། །
ཨོྃ་སྭ་སྟི།
འགྲོ་འདུལ་འཕཌ་མཆོག་སྤྱན་རས་གཟིཌ་དབང་དངོས། །
གངས་ཅན་མགོན་པོ་བསྟན་འཛིན་རྒྱ་མཚོ་ཡི། །
སྐུ་ཚེ་རྟག་བརྟན་རི་བོ་པོ་ཏ་ལར། །
མྱུར་དུ་ཁྲིར་འཁོད་རྒྱལ་བསྟན་དར་རྒྱས་ཤོག །

བདུད་འཇོམས་འཇིགས་བྲལ་ཡེ་ཤེས་རྡོ་རྗེས་སོ། །

བྷར་མར་ནང་ཆོས་དར་ཚུལ།

༄༅། །གནའ་བོའི་བོད་ཀྱི་ཁྱིམ་མཚེས་རྒྱལ་ཁབ་དང་དེང་སང་ཡོངས་གྲགས་སུ་བྷར་མ་ (Burma) འམ་མ་ཡན་མའི་ (Myanmar) རྒྱལ་ཁབ་ཏུ་ནང་ཆོས་དར་ཁྱབ་བྱུང་ཚུལ་རོབ་ཙམ་ཞུ་ན། སྤྱིར་ལོ་རྒྱུས་སྨྲ་བ་དག་གིས་རྡོ་བརྐོས་བྲག་རིས་དང་ཏ་ལའི་ལོ་མར་བྲིས་པའི་ཡིག་རིགས་རྙིང་པ་སོགས་སུ་གསལ་བ་ལྟར་ན་བྷར་མར་ནང་ཆོས་སྔ་ཕྱི་ལན་མང་བྱུང་ཡོད་པར་འདོད་པ་སྟེ།

༡༽དང་པོ་ནི། བྷར་མའི་ནང་དུ་སྟོན་པའི་བསླབ་པ (Buddha a Sasana) སྟེ་ཐོག་མ་ནི་ཤེ་ཝེ་དྷ་གྷོན་ཕ་གོ་དྷ་ (Shwe-Dagon Pagoda) བྷར་མའི་ཡང་སྒོན་ས་གནས་སུ་གཞུ་འདོམ་གོ་བརྒྱད་ (98) ཡོད་པའི་གསེར་གྱི་མཆོད་རྟེན་ཞིག་གྲགས་ཅན་ཞིག ལོ་རྒྱུས་ལྟར་ན་མ་ཧཱ་ས་ཀར་ཏིའི་ལོ་རབས་ ༡༠༣ སྟེ་སྟོན་པ་ཞལ་བཞུགས་བཞིན་པའི་སྐབས་སུ་བྷར་མའི་ར་མན་ན་དྷེ་སེའི་ཏབ་ཕཱུ་སའི་ (Taphus in Ramanades) ས་གནས་བྷལ་ལི་ཀ་གྲོང་ནས་ཡིན་པའི་བྷག་ལི་ཀ་དང་ཨུག་ཀལ་ལ་པ་ Baglika and Ukalpala) ཞེས་པའི་ཚོང་པ་སྤུན་གཉིས་ཤིག་སྟོན་པར་ཕྱག་མཆོད་བྱེད་དུ་སྟོན་པ་ཉིད་ཆུ་བོ་ནི་རན་ཇ་ནའི་ (Niranjana) ཉེ་འགྲམ་གི་ནགས་ཚལ་ཨུ་རུ་ཝེ་ལའི་ར་རྗ་ཡ་ཏ་ན་ལིན་ལུན་༽ལྗོན་ཤིང་དྲུང་དུ་༼ཕ་ལ་སམྨ་ཨཔྟི་༽ཏིན་ངེ་འཛིན་ལ་བཞུགས་བཞིན་པའི་སྐུ་གམ་དུ་འབྱོར་ཞིང་གུས་པ་ཆེན་པོས་སྟོན་པར་སྦྲང་རྩིའི་སྤྲི་གོར་ (honey cake) ཕུལ་བ་དང་སྟོན་པ་མཆོག་གིས་ཀྱང་ཆོས་ཀྱི་བདུད་རྩིས་ཚིམས་པར་མཛད་ཅིང་ཁོང་གཉིས་པོའི་རེ་འདོད་ལྟར་དད་རྟེན་དུ་ཉིད་ཀྱི་དབུ་སྐྲ་ཉག་མ་བརྒྱད་ཀྱང་གནང་། ཕྱིས་སུ་ཁོང་གཉིས་རང་ཡུལ་དུ་འབྱོར་སྐབས་རི་དེའུ་ཆུང་ངུ་གི་སྒང་དུ་སྟོན་པའི་དབུ་སྐྲ་ནང་རྟེན་དུ་བཞུགས་སུ་གསོལ་བའི་མཆོད་རྟེན་༼ཏམ་པ་གུ་ཏ་༽ཞེས་པ་ཞིག་བཞེངས་པ་དེར་དེང་སང་༼ཤེ་ཝེ་དྷ་གྷོན་ཕ་གོ་དྷ་༽(ShweDagon Pagoda) ཟེར།། 《རྒྱལ་པོ་དྷམ་མ་ཛེ་དྷིས་(AD 1472-1492) བཙུགས་པའི་རྡོ་རིང་ཞིག་ལ་གསལ་》
༢༽གཉིས་པ་ནི། ལུང་ལས་རྒྱལ་པོ་༼ར་མེན་ན་དྷེ་སའི་༽དུས་སྐབས་ཏེ་མ་ཧཱ་ས་ཀར་ཏིའི་ལོ་རབས་༡༡༡་ནང་དུ་དགྲ་བཅོམ་པ་༼ཐེ་ར་ཤིན་གྷ་ཝམ་པྟི་༽ཞེས་པས་སྟོན་པ་ཉིད་བྷར་མའི་ལྷོ་ཕྱོགས་ས་ཁུལ་༼སུ་དྷམ་མ་པུ་ར་༽སྟེ་དེང་སང་༼ཐེ་ཏྲོན་༽ཡུལ་དུ་ཕེབས་པར་བསྐུལ་བ་བཞིན་ཞལ་གྱིས་བཞེས་ཏེ་ཆོས་འཁོར་བསྐོར་བར་གྲགས།

༣༽ གསུམ་པ་ནི། མ་ཧཱ་ས་ཀར་ཏིའི་ལོ་རབས་༡༢༣་པའི་ནང་དགྲ་བཅོམ་པ་༼མ་ཧཱ་པུན་ནས་༽ཇི་ལྟར་གསོལ་བ་བཏབ་པ་ལྟར་སྟོན་པ་ཉིད་འཁོར་ལྔ་བརྒྱ་བཅས་པ་དང་ལྷན་གཅིག་ཏུ་༼སུ་ན་པ་རན་ཏ་ཝན་ནིཀྐ་གྷ་ན་༽ཞེས་པའི་ས་གནས་སུ་ཕེབས་ཏེ། སྐབས་དེར་སྟོན་པ་མཆོག་ལ་བསྙེན་བཀུར་ཞུ་སའི་ཙན་དན་གྱི་གཙུག་ལག་ཁང་ཞིག་ཀྱང་བཞེངས་ཤིང་གནས་དེའི་བསམ་གཏན་པ་༼ན་མན་ཏ་༽དང་ཁོང་གི་ཆོས་གྲོགས་གཉིས་ཀྱང་སྟོན་པར་གུས་ཕྱག་ཞུ་རུ་ལྷག་པ་དང་ཆབས་ཅིག་ཕྱག་མཆོད་ཀྱི་རྟེན་ཞིག་བསྩལ་བར་ཞུས་པ་ལྟར། སྟོན་པའི་ཞབས་གཡོན་མའི་རྗེས་ཟུང་ཞིག་སྟེ། གཅིག་ནི་རི་ཕྲན་༼མིན་བྷུ་༽དང་གཞན་ཞིག་དེ་ལས་ཅུང་གཟེངས་མཐོ་བའི་རི་དེའུ་ཞིག་གི་སྒང་དུ་བཞག་གནང་མཛད་པ་དག་གསེར་གྱི་ཞབས་རྗེས་ཤེས་དེང་སང་ཤིན་ཏུ་གྲགས་ཆེ་བར་མཆི།།

༤༽བཞི་པ་ནི། འདས་ལོ་༢༣༥་ལོར་ཆོས་རྒྱལ་མྱ་ངན་མེད་པས་རྒྱལ་བསྟན་སྟོབས་ཀྱིས་སྤེལ་བཞིན་པའི་སྐབས་སུ། ནང་བསྟན་ཕྱོགས་མཐའ་ཀུན་ལ་ཁྱབ་སྤེལ་གཏོང་མཁན་གྱི་ཕོ་ཉ་བ་ཡུལ་གྲུ་དགུ་དང་ས་གནས་དགུ་ལ་མངགས་པའི་ནང་གི་༼མ་ཧཱ་ཏེ་ར་སོ་ན་༽དང་༼ཨུ་ཏྲར་ར་༽གཉིས་དགྲ་བཅོམ་པ་གསུམ་དང་འགྲོགས་ཏེ་༼སུ་ཝམ་ན་བྷུ་མི་སྟེ་ཏེ་ཏྲོན་༽ཡུལ་དུ་ཕྱགས་ཕེབས་ཤིང་བསྟན་པ་རྒྱ་ཆེར་སྤེལ་ལོ།།

༥༽ ལྔ་པ་ནི། སྟོན་པའི་འདས་ལོ་༩༣༩་དང་སྤྱི་ལོ་༣༨༦་ཙམ་ལ་བྱུང་བའི་ཤྲི་ལང་ཀའི་རྒྱལ་པོ་༼མ་ཧཱ་ན་མ་༽དང་དུས་མཉམ་པའི་བྷར་མའི་གནའ་བོའི་གྲོང་ཁྱེར་༼བྷ་གྷན་གྱི་ཐི་ལིག་ཡང་༽གི་རྒྱལ་པོ་༼མ་ཧཱ་ཐེ་ར་བྷུངྡྷ་གྷོ་ས་༽༼ར་རྗ་གྷ་ཧན་རྒྱུད་པ་ལས་མཆེད་པར་གྲགས་༽རང་གི་བཤེས་གཉེན་དམ་པ་༼མ་ཧཱ་ཐེ་ར་རེ་ཝ་ཏས་༽བོས་པ་ལྟར་ཤྲི་ལང་ཀར་ཕེབས་ཤིང་མ་ཧཱ་བི་ཧར་ (Mahā vihar) ནང་བཞུགས་ཏེ་པ་ལིའི་སྐད་ཐོག་ཏུ་བཞུགས་པའི་ནང་ཆོས་དག་མངྒྷ་དྷའི་སྐད་དུ་བསྒྱུར་རོ། །མདོར་ན་བྷར་མའི་ཡུལ་གྱི་ནང་ཆོས་ཕལ་མོ་ཆེ་ནི་གནས་བརྟན་སྡེ་པའི་ལུགས་སུ་ཡོད་ཅིང་གནའ་ཤུལ་རྟོག་ཞིབ་པས་གནའ་རྫས་གསར་རྙེད་ལ་འཇུག་བྱས་པ་ལྟར་ན་གནའ་བོའི་ཕཱུ་ (Pyu) རྒྱལ་པོའི་མངའ་ཁོངས་སུ་ཐེག་པ་ཆེན་པོ་དང་གནས་བརྟན་སྡེ་པའི་ལུགས་གཉིས་ཟུང་འབྲེལ་དུ་བྱུང་ཡོད་པར་བཤད་ལ་ཡུལ་གྲུ་གཞན་དག་ལ་ནང་ཆོས་ཇི་ཙམ་དར་བ་དག་གནས་བརྟན་པའི་ལུགས་ཉག་གཅིག་ཏུ་སྣང་།

དེང་གི་ཆར་བྷར་མའི་ཆོས་ལུགས་སོ་སོའི་མི་འབོར་གཤམ་གསལ།

༡༽ ནང་པ་བརྒྱ་ཆའི་་་་་་་་་་་་་་་་་་་་་་་་་་་་་་་་་་་་་་་་་་་་(89.20%),

༢༽སེམས་གཙོ་སྨྲ་བ་་་་་་་་་་་་་་་་་་་་་་་་་་་་་་་་་་་་་་་་་་་་་་་(1.27%)

༣༽ཡེ་ཤུ་པ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་(5.05%),

༤༽ཁ་ཆེ་བ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་(3.78%),

༥༽ཧིན་དྷུ་བ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་(0.55%),

༦༽སིག་དང་རྒྱ་མའི་ལི་ཕེའན་ཧྥུ་རྗེན་ཧེལ་སོགས་་་་་་་་་་་(0.61%).

ཙམ་ཡོད་ཅིང་གྲངས་ཉུང་ཆོས་ལུགས་པ་དག་ཕལ་མོ་ཆེ་སྔོན་ཆད་རྒྱ་གར་ནས་ཡོང་བ་གཙོ་ཆེར་ཡིན་ཚོད་སྣང་།

༼ས་ག་ཟླ་བར་སྟོན་པ་རྗེས་དྲན་དུ་སྤེལ།༽

མཁྱེན་ལྡན་གྱི་ཀློག་པོ་རྣམ་པ། ཕྲན་གྱི་དབྱིན་ཇིའི་ཆུ་ཚད་དམན་པས་ཚིག་དོན་གང་ཐན་ནས་ནོར་འཁྲུལ་མི་ཉུང་བ་ཞིག་ཡོད་ངེས་པས་ཡོ་བསྲང་གནོངས་རོགས་ཞུ།

ཕོ་མཆོག་མོ་དམན།

བོད་པའི་སྤྱི་ཚོགས་འདིར་སྤྱིར་བཏང་ནས་བུད་མེད་དག་ལ་མཐོང་ཆུང་དང་ཁྱད་གསོད་བྱེད་པའི་གོམས་སྲོལ་ངན་པ་ཞིག་རྒྱུན་འབྱམས་སུ་ཡོད་པ་དག་མདོར་དྲིལ་ཅུང་བཤད་ན།

དང་པོ་ལུས་རྟེན་དམན་པར་འདོད་པ།

༡། དེ་སྔོན་བསྐལ་པ་ཡར་ཐོག་གདོད་མའི་གནས་སྐབས་ནས་རང་བཞིན་གྱིས་བུད་མེད་དག་དམན་ས་འཛིན་དགོས་དོན་ནི་རི་དྭགས་རྔོན་རྒྱུ་དང་ཤིང་གཅོད་རྒྱུ་ལྟ་བུའི་ཤུགས་ལས་ཁོ་ནར་བརྟེན་ནས་འཚོ་བ་སྐྱེལ་དགོས་སྟབས་ཆ་སྙོམས་སུ་བུ་ལས་བུད་མེད་དག་ལུས་སྟོབས་ཞན་པའི་གནས་སྟངས་འདིའི་འོག་ནས་ཕོ་མཆོག་མོ་དམན་གྱི་ལྟ་བའི་ས་བོན་ཙམ་བྱུང་ཡོད་པར་སྙམ།

༢། ཤུགས་ཆེ་བ་ནི་ཆོས་ལུགས་པ་ཚོས་ལྷན་སྐྱེས་ཀྱི་ལྕགས་སྒྲོག་ལ་ཀུན་གཏགས་ཀྱི་གཟེར་བུ་སྣ་ཚོགས་པ་ཞིག་བཏབ་ཡོད་པ་སྟེ་དཔེར་ན་སྐྱེ་རྒུའི་བདག་མོ་རབ་ཏུ་ཕྱུང་བའི་ཉེས་སྐྱོན་གྱིས་བསྟན་པའི་གནས་ཚད་འགྲིབས་སོང་ཚུལ་དང་། སྐྱེས་པར་འགོ་བའི་ལུས་ལྷ་ཡོད་ཀྱང་བུད་མེད་ལ་མེད་ཟེར་བ་དང་། སྤྱིར་བུད་མེད་མི་གཙང་ཡང་འཁྲིག་པ་སྤྱོད་སྐབས་གཙོག་པ་མིན་རབས་སོགས་དགོད་ཤོར་སྤྱད་རྐྱང་བཤད་འདུག་ལ། དམིགས་བསལ་དུ་ཞི་བ་ལྷས་བུད་མེད་ནི་རྫས་ངན་སོ་དྲུག་གིས་ཡོངས་སུ་ཁེང་བའི་མི་གཙང་བའི་ཕུང་པོ་རེད་ཟེར་བ་དང་། «སྤྱོད་འཇུག་

སྨོན་ལམ་»ནང་། “འཇིག་རྟེན་བུད་མེད་ཇི་སྙེད་པ། །དེ་དག་སྐྱེས་པ་ཉིད་གྱུར་ཅིག །” ཅེས་པ་ལྟ་བུའི་རང་ལྟ་མཆོག་འཛིན་གྱི་དྲི་ངན་ཐུལ་ལེ་བ་དག་བཤད་ནས་བུད་མེད་རྣམས་ནམ་ཡང་ཡར་ལྡང་ས་མེད་པའི་ཧོམ་ཁུང་གཏིང་རིང་ཞིག་གི་མཐིལ་ན་དམོད་ཚིག་རྒྱ་རིམ་པ་དགུ་ཡིས་བཏབ་ནས་མནན་བཞག་འདུག

༣། དེ་མིན་ནང་ཆོས་དང་འབྲེལ་ལ་མ་འབྲེལ་པའི་བོད་པའི་ཡུལ་སྲོལ་གོམས་གཤིས་ནང་“སྐྱེས་པ་བརྒྱ་ལས་འདྲེ་ཕོ་གཅིག་དང་། བུད་མེད་བརྒྱ་ལས་ལྷ་མོ་གཅིག་ལས་མེད་སྟབས་བུད་མེད་བརྒྱ་ཆའི་དགུ་བཅུ་གོ་དགུ་ནི་མི་ཤ་ཟ་མཁན་གྱི་འབྱུང་པོ་ཡིན་”ཚུལ་དག་བུད་མེད་ཁོ་རང་ཚོས་ཀྱང་བཤད་ཅིང་རང་ཉིད་མི་མ་ཡིན་པར་འདྲེ་ཡིན་པར་ཁས་ལེན་བྱེད་པས་མཚོན་ཡོད།

གཉིས་པ་བློ་རིག་དམན་པར་འདོད་པ།

བུད་མེད་བློ་མི་བརྟན་པའི་རང་གཞིན་ཡིན་པས་སྡོམ་པ་སྲུང་མི་ཐུབ་པར་བཤད་པ་དང་། “བུད་མེད་བློ་དང་ཆུ་བོ་གཉིས། །གྱེན་དུ་མི་འགྲོ་ཐུར་དུ་འགྲོ །” ཞེས་དང་། «གླིང་སྒྲུང་»ལས། “སྨན་བུ་མོའི་བློ་ལ་བློ་ཕུགས་མེད། །རྟ་རྒོད་མའི་འགྲོས་ལ་འགྲོས་ཕུགས་མེད་”ཅེས་དང་། “ཤིག་བུད་མེད་གཉིས་ལ་རུས་པ་མེད། །”ཟེར་བ་སོགས་ཚད་ལས་བརྒལ་བའི་སྨ་འབེབས་འདི་དང་འདི་བཞིན་བཤད་ན་མི་ཚར་བ་བྱས་ཡོད། གང་ལྟར་མགོ་བོ་རེ་དགྱེ་ན་ཐོ་བས་འབུར་འཇོམ་བྱེད་ལ་རྐང་པ་རེ་བརྐྱངས་ན་སྐམ་པས་ཤ་གཅུར་བྱེད་པའི་སྤྱི་ཚོགས་དོག་པོ་འདི་ལྟ་བུའི་ཁྲོད་དུ། ད་ལན་ ༢༠༡༡ ལོའི་བོད་ཀྱི་མཛེས་མ་ཁོང་ཚོས་སྤོབས་པས་མགོ་བོ་གྱེན་དུ་བཏེགས་པར་དགའ་བསུ་དང་མཛེས་སྡུག་གི་ལང་ཚོ་ཕྱི་རུ་ངོམ་པར་ཡི་རང་ཡོད།

ཆང་བཟི་དོན་འགྲུབ།

ཉིན་ཞིག་གི་དགོང་མོར་དོན་འགྲུབ་ཆང་གིས་བཟི་སྟེ་ངུ་སྐད་སྒྲོག་ཀྱིན་ཆང་ཁང་ནང་དུ་འཛུལ་ཡོང་། དེའི་སྐབས་བཀྲ་ཤིས་དང་ཚེ་རིང་གཉིས་ཆང་ཁང་ནང་དུ་ཆང་འཐུང་བཞིན་ཡོད་པའི་དུས་དང་ཏག་ཏག་ཁེལ་བས་བཀྲ་ཤིས་ལམ་སང་ཡར་ལངས་ཏེ། “ཡ། གྲོགས་པོ་དོན་གྲུབ་གང་བྱུང་སོང་ངམ”ཞེས་དྲིས་པར་ཁོས་ངུ་ཅོར་འབྱིན་བཞིན”ངས་ཚབ་ཆེ་བའི་བྱ་བ་མ་རུང་པ་ཞིག་བྱས་ཚར། སྐར་མ་ཁ་ཤས་སྔོན་དུ་ངས་ང་རང་གི་ཆུང་མ་ཆོས་མཚོ་ལགས་ཆང་ཤེལ་དམ་གང་གི་ཆེད་དུ་བཙོངས་པ་ཡིན”ཞེས་བཤད་པ་དང་བཀྲ་ཤིས་ནི་རྦད་དེ་ཧང་སང་སྟེ། “ཨོ་ཁྱད་མཚར་ལ། འོ་ཏག་ཏག་རེད། ད་ལྟ་མོ་མིས་ཁྲིད་ཚར་དུས་ཡང་ཁྱེད་ཀྱིས་ཚུར་དགོས་འདོད་བྱེད་གི་ཡོད་དམ”ཞེས་དྲིས་པར་དོན་འགྲུབ་ཀྱིས་ཉམ་ཐག་པའི་ཚུལ་ཞིག་བསྟན་ནས“ཡོད”ཅེས་ལན་བྱིན། བཀྲ་ཤིས་ཀྱིས་སླར་ཡང་། “སྙིང་རྗེ། ཁྱོད་ཀྱིས་མོ་ཁེ་བཟང་ཅུང་ཟད་ཅིག་གི་ཆེད་དུ་བཙོངས་ཚར་བ་རེད་ལ་ད་ནི་གང་བྱས་ཀྱང་ཕྱི་དྲགས་པ་རང་རེད་གདའ། འོ་རེད། ཁྱོད་ད་རུང་མོ་ལ་དགའ་པོ་ཡོད་དམ།” ཞེས་དྲིས་པར་ཁོས་ཐེ་ཚོམས་མེད་པར། “མེད། ང་མོ་ལ་དགའ་པོ་ཁྱོན་ནས་མེད། ཡིན་ནའང་མོ་ང་ལ་དགོས། གང་ཡིན་ཟེར་ན་ང་ཁ་སྐོམ་གྱི་འདུག” ཅེས་བཤད།

དབྱིན་ཡིག་ཕབ།།

གྱེར་གཏམ།

དེང་རབས་གསར་པའི་དཔལ་ཡོན་འདི་བཞད་དུས། །
རིག་གཞུང་རྙིང་པའི་རྫུན་འབག་དེ་བུད་སོང་། །
ཨ་གསར་གཞོན་ནུས་ཧོལ་རྒྱུག་ཅིག་བྱས་ཏེ། །
ཕ་མྱེས་ཤུལ་གཞག་ཐལ་དོང་དུ་བསྐྱུར་སོང་། །
ཁ་བའི་ཟུངས་ཁྲག་བྱེ་ཐང་ལ་ཐིམ་དུས། །
གདོང་དམར་བོད་ཕྲུག་ཕྱི་གླིང་ན་འཐོར་སོང་། །
མགོ་སེར་རྨོ་མོའི་རྨོང་སྤུ་ཡི་གསེབ་ཏུ། །
གངས་རིའི་ཕོ་རྒོད་མགོ་ཡོར་ཞིག་འཁོར་འདུག །
ན་གཞོན་བོད་མོའི་ལང་ཚོ་ཡི་མེ་ཏོག །
དབྱིན་རྒན་འཁྱམ་པོའི་ཉལ་གྲོགས་སུ་སྤྱོད་འདུག །
ཨ་ཁུ་གྲྭ་པའི་གྲྭ་ཤམ་གྱི་ཁུག་ཏུ། །
ཨ་ནེ་མཛེས་མ་སྐྱིད་ཉལ་ལ་རོལ་འདུག །
ཨ་རོགས་བོད་པའི་བྱ་སྤྱོད་ལ་བསམ་ན། །
ཨ་ཁུ་སྟོན་པའི་ལྷ་སྒྲུང་དང་འདྲ་འདུག །

ཞོགས་པ།

མཐའ་མེད་གཉིད་ཀྱི་ཞིང་ལས་གློ་བུར་དུ།།
དྲིལ་བརྡ་གཟན་མོ་རྣ་བའི་གཏིང་དུ་ལྷུང༌།།
མི་འདོད་སུན་སྣང་ཞིག་གིས་དབང་མེད་དུ།།
མགོ་བོ་གོས་ཀྱིས་བཏུམས་ཏེ་ཉལ་འདོད་ཀྱང༌།།

ཞོགས་འཚོགས་རྗེས་ལུས་ཤོར་བའི་སེམས་མཚེར་གྱིས།།
ག་ལེར་གཉིད་མ་སད་ཀྱིས་ཡར་ལངས་ཏེ།།
ལག་ཟུང་གནམ་དུ་བརྒྱངས་ཏེ་གླལ་ཞིག་འཐེན།།
རྐང་ཟུང་ས་རུ་ཉུལ་ནས་བསིལ་ལྷམ་བཙལ།།
མིག་ཟུང་རབ་མ་རིབ་དེ་འབྱིད་བཞིན་དུ།།
མི་འདོད་གོམ་ཁ་དལ་མོས་ཕྱི་རུ་ཐོན།།

ཨེ་མ་འདི་ནི་ཞོགས་པའི་ཞིང་ཁམས་ཏེ།།
དྭངས་བསིལ་སྦྲང་ཆང་བཅུད་ཀྱིས་མི་མཚོན་པའི།།
རང་བྱུང་ཞོགས་རླུང་བསིལ་མོ་ཧུབ་གཅིག་གིས།།
ལུས་སེམས་སྤྲོ་དགའི་མེ་ཏོག་ཅི་ཡང་བཞད།།
དྲི་མེད་དར་གྱིས་ཕྱིས་འདྲའི་ནམ་མཁའ་ལ།།
མ་བཀོད་མཚམས་སྤྲིན་གསར་པ་མཛེས་ཤིང་སྡུག།
བསིལ་ཆུའི་མུ་ཏིག་ཁུར་བའི་ལྗོན་བཟང་སྟེང༌།།
སྤུ་སྡུག་བྱ་ཚོགས་སྤྲོ་བས་ཅ་ཅོ་སྒྲོགས།།

ཁད་རིང་ལྷུན་གྱིས་འགྱིང་བའི་རི་ཚོགས་ལ།།
ཆུ་འཛིན་དགའ་མ་དགྱེས་པས་མགུལ་ནས་འཁྱུད།།
སྔོ་ལྗང་གཡུ་ལོའི་ཁུར་གྱིས་དུབ་པ་ཡི།།
རང་བྱུང་ནགས་ཀྱི་མཛེས་ལྗོངས་ལྟ་ན་སྡུག།

རི་གྲོང་མཚམས་ཀྱི་སྨུག་སྤྲིན་དུམ་བུ་དག།
ཉལ་ལམ་བགྲོད་པའི་རྣམ་དབྱེར་ཆ་མ་འཚལ།།
རྒྱང་རིང་གངས་ནས་ཕེབས་པའི་ཉལ་འགྲོ་མས།།
ཤབ་ཤུབ་རང་བྱུང་ཁམས་ཀྱི་གསང་ཚིག་ཟློ།།
ཞོགས་པའི་ཉི་གཞོན་ཟིལ་དེ་མ་བཟོད་ནས།།
ནུབ་ཁའི་རི་བོང་འཛིན་པའི་གཟི་མདངས་ཤོར།།

ཨ་ཧ་འདི་ནི་སྐྱིད་པའི་མི་ཡུལ་ཞེས།།
འཕུར་ལ་ཕྱོགས་པའི་ཁྲུང་ཁྲུང་ཞིག་འདྲ་བར།།
ལག་གཉིས་ཤེད་ཀྱིས་བསྐྱངས་ནས་ཕྱོགས་བཞིར་བསྐོར།།
མིག་གཉིས་ཟིམ་བུར་བཙུམས་དེ་དལ་གཅིག་འགྲེངས།།
སླར་ཡང་མཁའ་རླུང་དྭངས་མོ་ཧུབ་གཅིག་གིས།།

མཁར་རུ་ཤོག་སྦག་གས་པའི་མེ་ཏོག་གམ།།
མཚོ་རུ་རྦ་རླབས་འཕྱོ་བའི་ངང་ཚུལ་ཅན།།
དགའ་མའི་རེག་པ་སྟོང་གིས་མི་བསྒྲུན་པའི།།
བརྗོད་མེད་སེམས་ཀྱི་དགའ་སྤྲོ་འདི་ཅི་ཞིག།