ལོ་གསར་ནི་མི་ཚོས་དཀའ་སྡུག་གི་ཚི་དྲེག་ཆགས་པའི་གོས་ཧྲུལ་དང་ལོ་རྙིང་ལྷན་གཅིག་ཏུ་ཕར་ལ་ཕུད་པའི་ཉིན་མོ་དང་། བདེ་སྐྱིད་ཀྱི་རེ་བར་འོད་མདངས་ཀྱིས་འཁྱུད་པའི་གནས་ལོ་གསར་པའི་དར་གོས་ཀླུབ་པའི་ཉིན་མོ་རེད། ཉིན་མོ་འདིར་ཆུང་བྱིས་པ་ཡན་ཆོད་ནས་རྒན་མགོ་དཀར་མན་ཆོད་ཚང་མས་དགའ་འབོད་ཀྱི་ཀི་སྒྲ་ལྷང་ལྷང་། དགའ་བསུའི་ཐལ་སྒྲ་འུར་འུར་གྱི་ངང་དུ་མཁའ་ལ་ཤོག་སྦག་གི་མེ་ཏོག་བཀས་ཏེ་དགའ་བསུ་ཞུ་འགྲོ། ས་ལ་མཛེས་རྒྱན་གྱིས་མེ་ཏོག་བཀོད་དེ་དགའ་བསུ་ཞུ། ཁྱིམ་དུ་སྟོན་མོ་དང་གླུ་གར་གྱི་མེ་ཏོག་སྤྲོས་ཏེ་དགའ་བསུ་ཞུ་ལ། ཡ་ཆུང་དུ་སྤྲོ་སེམས་ཀྱི་མེ་ཏོག་རབ་ཏུ་བཞད་དེ་དགའ་བསུ་ཞུ། དགའ་བསུ་ཞུ་འགྲོ། དགའ་བསུ། འོན་ཀྱང་ང་ལ་མཚོན་ན་སང་ཉིན་ནས་བཟུང་འབྲེལ་འདྲིས་མེད་པའི་ཆ་མེད་ཀྱི་སྤྱི་ལོ་ཉིས་སྟོང་བཅུ་གཉིས་ཟེར་བའི་མི་འདོད་བཙན་གྱིས་བསུས་པའི་བག་མ་འདིས་ང་གང་ཞིག་ཏུ་བསྐྱལ་ཡོང་ན་བསམ་པའི་དོགས་གནས་ཤིག་གི་སྡོམ་ཐག་དཀར་ནག་ཁྲ་གསུམ་ཀླད་པར་བཀྲམས་ནས་ཡོད། ཀུ་རེ་རྩེས། དོན་དངོས་ནས་བཤད་ན་ང་ཡང་ལོ་ན་ཆུང་སྐབས་ལོ་གསར་ལ་ཧ་ཅང་དགའ། ཕར་ཆེར་ལོ་གསར་མ་ཚེས་པའི་ཟླ་བ་གཉིས་ཙམ་གྱི་རིང་ནས་བཟུང་ལོ་གསར་ལ་ངང་བསྒུགས་བྱེད། ངའི་ཕ་ཡུལ་གྱི་ལོ་གསར་ནི་ཕ་ཡུལ་གྱི་ཁ་དཔེ་ལྟར་"བོད་ལོ་གསར་ལུག་མགོ་ལོ་གསར་རེད། རྒྱ་ལོ་གསར་ཤོག་བུའི་ལོ་གསར་རེད།" ཟེར་སྲོལ་ལྟར་ལུག་མགོ་ལོ་གསར་ངོ་མ་རེད། ང་ཚོའི་ཁྱིམ་ཚང་གི་སྟོན་བཤས་བྱས་པའི་གཡག་ལུག་ར་གསུམ་གྱི་མགོ་དག་ལོ་གསར་གཏོང་ཆེད་བསགས་ནས་འཇོག་སྲོལ་ཡོད། གནམ་གང་ཉིན་མོར་མགོ་འཚོད་པ་དང་། མགོ་ཞག་ལྡག་ཅིང་ལྕེ་ཟ་སྲོལ་ཡོད། མགོ་ནི་ལོ་གསར་དངོས་གཞིའི་ཆེད་དུ་ཁྱིམ་མི་ཚང་མར་སྐལ་བ་བགོ་བ་དང་དེ་ནས་སོ་སོར་སྡེར་ཁ་བསྒྲིགས་ཏེ་བཤམས་ནས་འཇོག གནམ་གང་གི་དགོང་མོ་དེར་ང་ནི་ཕར་ཆེར་མཚན་མོ་གཉིད་མི་འོངས་པར་ནམ་ལང་རྒྱུ་བསྒུགས་ནས་འདུག ཞོགས་པ་ཚུ་ཚོད་བཞི་དང་ཕྱེད་ཙམ་ནས་ཕྱི་རུ་བསང་གཏོང་ཞིང་ཀི་བསྭོ་ལྷ་རྒྱལ་འཐེན། ཨ་མས་བཟོས་པའི་བོད་ཇ་རླངས་པ་ཐུལ་ལེ་བ་དང་གྲོ་བསྲེགས་ཟོས་ཚར་བ་དང་ནམ་མ་གསལ་བའི་སྔོན་ནས་ཆུ་ལེན་དགོས་ཤིང་ཆུ་དེའི་མིང་ལ་“སྐར་མ་ཞོགས་ཆུ་”ཟེར། ཆུ་དེ་སྔོན་ལ་སུས་ལོན་འགྲན་ཞིང་ཁྲམ་པ་ཚོས་ཀུ་རེ་རྩེ་ཁུལ་གྱིས་བུད་མེད་དག་གི་ཆུ་ཕུད་འཕྲོག་འགྲོ། ཆུ་དེས་མགོ་དང་ངོ་གདོང་འཁྲུ་སྲོལ་ཡོད། ངས་ནི་ཆུ་དེ་བདུད་རྩི་ཞིག་ཏུ་བསམ་གྱི་ཡོད་ཨང་། ད་རུང་ཨ་མྱེས་ལོ་གསར་སྐབས་སུ་ལོ་རྒན་དྲུག་བཅུ་པོ་ཁྱིམ་ཚང་ཚང་མར་མགྲོན་དུ་ཡོང་གི་རེད་གསུངས་མྱོང་། ངས་ཀྱང་ལུག་མགོ་ཅན་སོགས་ཀྱི་འཆར་སྣང་གསལ་པོ་རེ་བློས་བཟོས་ཏེ་བདེན་པར་བཟུང་མྱོང་ཨང་། དད་པ་ཅན་ཟེར་ན་གང་དྲག ད་ཚོད་ངས་ལོ་གསར་སྟོན་མོའི་ནང་གི་ཟས་རིགས་དྲན་ཆེ་ཤོས་དེ་ནི་ནས་ཆང་སེར་མོ་དང་། ལུག་ཤ་བཙོས་མ་གཉིས་དེ་རེད་འདུག ད་ལྟ་ང་མི་ཡུལ་དུ་གྱར་ནས་མི་ལོ་ ༡༥ ལྷག་བརྒལ་འདུག་ལ་མི་ལོ་དེ་དག་གི་རིང་ལ་ངས་སེམས་གཏིང་ནས་དགའ་བའི་ལོ་གསར་ཐེངས་གཅིག་ཀྱང་གཏོང་མ་མྱོང་། རྒྱུ་མཚན་གཅིག་དེ་བརྩེ་བའི་ཕ་མ་དང་སྤུན་མཆེད་དང་ཁྲ་བྲལ་ནས་མི་ཡུལ་དུ་འཚོ་བ་ལ་རོལ་དགོས་ཙང་ཡིན། གཉིས་པ་དེ་ལོ་ན་རྒན་རིམ་བཞིན་དུ་གཞོན་དུས་ཀྱི་སྤྲོ་སྣང་ཡལ་འགྲོ་བ་རྒྱུན་ལྡན་ཡིན་ཙང་མི་འགྲོ། གང་ལྟར་ང་ལ་རྒྱ་བོད་གང་གི་ལོ་གསར་ཡིན་རུང་སྤྲོ་སྣང་མི་འདུག
2012/01/01
2011/12/29
ཆེས་ཐ་མའི་མི་སྐད། ༩༽
༩) ཨལ་ཧྥུ་ པལ་མར་ (Alf Palmer 1891 – 1981) ནི་ཝ་རུང་གྷའི་སྐད་རིགས་སྨྲ་མཁན་ཐ་མ་དེ་རེད། ཁོང་ནི་ཨོ་སི་ཊོ་ལི་ཡའི་ཁུ་ཡེན་ལན་ཌི་ (Queenland) སྟེ་རྒྱལ་མོའི་ས་ཆ་ཟེར་བའི་ཊོན་ཝིལ་ན་སྐྱེས་ཤིང་ཐ་མ་ས་གནས་དེ་ག་རང་དུ་གྲོངས་ཡོད་པ་དང་པར་རིས་ནང་གི་གཡོན་ཕྱོགས་སུ་བཞུགས་མཁན་དེ་ཡིན། ཁོང་ནི་ས་གནས་དེའི་ཡུལ་མི་ཡིན་སྟབས་རང་གི་ཕ་སྐད་སྨྲ་ཐུབ་པ་མ་ཟད། ཁོང་གིས་མི་ཚེའི་ནང་ཉི་ཧོང་དང་ཨོ་སི་ཊི་ལ་ཡིའི་ནང་ནས་སྐད་རིགས་ཉམས་གསོའི་བྱ་བར་འབད་བརྩོད་གང་ཐུབ་གནང་ཡོད། གང་ལྟར་ད་ཆ་ངས་བཀོད་ཀྱིན་པའི་སྐད་རིགས་འདི་དག་ནི་ལོ་རྒྱུས་ནང་གི་ཟིན་ཐོ་ཙམ་ཞིག་དུ་གྱུར་ཟིན་པ་རེད། དེས་ན་ད་ལྟའི་ལྕགས་གཟེབ་ཏུ་བསྡམས་པ་འདྲ་བའི་ང་ཚོ་བོད་གངས་པའི་ཕ་སྐད་འདིའི་མ་འོངས་པའི་གནས་སྟངས་གང་འདྲ་ཡིན་ན་བསམ་བཞིན་ང་རྒྱུན་དུ་ཕངས་སེམས་དང་ཞེད་སྣང་གཉིས་ཀ་སྐྱེ་བཞིན་ཡོད།
གདུང་སྲས་ཕྲིན་ལས་ནོར་བུ་མཆོག་སྐུ་གཤེགས་པའི་ཡིད་སྐྱོའི་གནས་ཚུལ།
གདུང་སྲས་ཕྲིན་ལས་ནོར་བུ་མཆོག་ (1931-2011) ནི་དེང་སྐབས་བོད་ནང་པའི་ཆོས་རྒྱུད་ཀྱི་ནང་གསེས་སྔ་འགྱུར་རྙིང་མའི་དབུ་འཛིན་དམ་པ་དོན་གྱི་ཕྱིར་དུ་མཚན་ནས་བོས་ན་སྐྱབས་རྗེ་འཇིགས་བྲལ་བདུད་འཇོམ་ཡེ་ཤེས་རྡོ་རྗེ་རིན་པོ་ཆེ་མཆོག་ (1835-1904) གི་རིགས་སྲས་ཀྱི་ཐུ་བོ་དང་། སྔ་འགྱུར་རིག་འཛིན་རྒྱུད་པའི་ཤིང་རྟ་ཆེན་པོ་ཀློང་ཆེན་རབ་འབྱམས་དཔལ་བཟང་པོའི་སྐྱེ་སྤྲུལ། དཔའ་སྔ་འགྱུར་བའི་ཟབ་ཆོས་མཐར་ཐུག་འོད་གསལ་སྙིང་ཐིག་གི་རྒྱུད་འཛིན་བླ་ན་མེད་པའི་མཁས་གྲུབ་གཉིས་ལྡན་གྱི་སྐྱེས་ཆེན་ཞིག་ཡིན། སྔར་བོད་ལ་དུས་འགྱུར་མ་བྱུང་བའི་ཡར་སྔོན་དུ་སྔ་འགྱུར་བའི་མ་དགོན་ཆེན་པོ་གྲྭ་ཕྱི་སྨིན་གྲོལ་གླིང་དུ་བགྲང་བྱ་དགུའི་རིང་ལ་དཔའ་རྙིང་མའི་མདོ་སྔགས་ཀྱི་གཞུང་ལུགས་ཁག་ལ་སློབ་གཉེར་མཐར་ཕྱིན་པ་གནང་ཡོད། རྗེས་སོར་བཙན་བྱོལ་ལ་ཕེབས་རྗེས་ད་བར་ནུབ་ཨ་རི་ལ་བཞུགས་ཏེ་ཕྲིན་མཛད་ཕྲིན་བླ་ན་མེད་པ་བསྐྱངས་ཡོད་པ་དང་། ད་ལོ་སྟེ་༢༠༡༡། སྤྱི་ཟླ་༡༢། ཚེས་ ༢༦ ཉིན་གཟུགས་སྐུའི་བཀོད་པ་ཆོས་དབྱིངས་སུ་བསྡུ་ཚུལ་བསྟན་དུས་དགུང་གྲངས་ ༨༠ ཐམ་པ་ཏག་ཏག་བཞེས་ཡོད།
2011/12/28
མེ་འཁོར་ལམ།
 |
| map |
2011/12/27
ཨ་ལེས་པེ་ཀོར།
ཨ་ལེས་པེ་ཀོར།
2011/12/24
ཨེ་རག
སྙིང་རྗེ་མི་སྐྱེ་བའི་བྱེ་ཐང་ཞིག་ན། ཡོད་ཚད་ཐམས་ཅད་གནོད་སེམས་དང་ཕྲག་དོག འཁོན་འཛིན། འདོད་རྔམས་སོགས་མཉམ་གཅིག་ཏུ་བསྲེས་ཏེ་སྦྱར་བའི་རྫས་སྒྱོགས་དེ་གས་སོང་འདུག གཟིགས་དང་། དངོས་ཟོག་དང་ཁང་པ། མི་དང་དུད་འགྲོ་ཡོད་ཚད་མཉམ་གཅིག་ཏུ་བསྲེས་པའི་པའི་སླར་ཡང་སྡུག་བསྔལ་གྱི་འབར་རྫས་ཞིག་ཏུ་གྱུར་ནས་འདུག །ཙ་རིའི་ཀྲད་པ་དང་ཨ་མའི་དད་པ། གཉིས་པ།
ཙ་རིའི་ཀྲད་པ་དང་ཨ་མའི་དད་པ། གཉིས་པ།
ད་ཚོད་དུམ་བུ་དང་པོའི་ལོ་རྒྱུས་དེ་བྱུང་ནས་མི་ལོ་སུམ་ཅུ་ལྷག་བརྒལ་ཟིན་ལ་ནོར་རྗེས་འདེད་མཁན་གྱི་བུ་ཆུང་སྣབ་འཛར་དེ་ད་ལྟ་དཔྲལ་བར་གཉེར་རིས་བབས་པའི་དལ་ཡོལ་ཞིག་དུ་གྱུར་འདུག་པས། དད་འདུན་ཟབ་པའི་ཨ་མ་ཁོང་ནི་རྣམ་པ་ཚོར་ཞུ་མི་དགོས་པར་སྐྲ་དཀར་གྱི་ཚར་ཞྭ་མནབ་པའི་བགྲེས་མོ་ལོ་ལོན་ཞིག་ཏུ་གྱུར་ལོས་ཡོད་ཨང་། སྟབས་ལེགས་པ་ཞིག་ལ་དེང་རབས་འཕྲུལ་རིག་གི་དཔལ་ཡོན་རབ་ཏུ་དར་བའི་གནས་སྟངས་བཟང་པོ་འདིའི་འོག་ནས་ཨ་མ་དངོས་སུ་མ་མཇལ་རུང་། རྒྱུན་དུ་དྲོད་ཁོལ་མ་ཡལ་བའི་ཞལ་གསུང་སྙན་མོ་དག་ལག་འཕྲིན་ནས་ཉན་ཆོག་ལ་མཚམས་རེ་་དྲྭ་ཐོག་མེ་ལོང་ནས་ཞལ་རས་ཡང་ཉི་མ་འདེ་འདེ་བྱེད་ཆོག
ད་ནི་སྔོན་མའི་འཕྲོ་ནས་བཤད་ན། ང་རང་ལོ་ན་བཅུ་མ་ཟིན་པའི་སྔོན་ནས་བཟུང་ཞོགས་ལྟར་ནོར་ཕྱུགས་རྩ་ཁར་བསྐྱལ་རྗེས་ཁྱིམ་དུ་སྔ་དྲོ་བོད་ཡིག་ཀློག་འདོན་སྦྱོང་། དགོས་མོ་རི་རྒྱབ་ན་ནོར་བསྡུ་རུ་འགྲོ་དགོས་ཀྱི་ཡོད། སྐབས་དེར་ང་ལ་ཆེས་བཟོད་པར་དཀའ་བའི་དཀའ་ཚེགས་གཉིས་ཡོད་པ་སྟེ། གཅིག་ནི་རི་ཁར་གྲོང་ཚོ་དང་གྲོང་ཚོའི་ཕྱུག་རྫི་བྱིས་པ་དག་གི་དབར་རྫོགས་དུས་མེད་པའི་འཁྲུག་འཛིང་གི་ནམ་ཟླ་རིང་མོ་དེ་ཡིན་ཞིང་ང་ལ་མཚོན་ན་དོན་དངོས་ཀྱི་གཡུལ་ས་ཞིག་ཏུ་ཡང་ཆགས་ནས་ཡོད། ང་ཚོའི་གྲོང་པར་དུད་ཚང་བཅོ་ལྔ་ལྷག་ཡོད་རུང་དགུན་ཁར་ནོར་ཕྱུགས་ཡུལ་པར་ཚགས་མཁན་ཁྱིམ་ཚང་གཉིས་གསུམ་ལས་མེད་རྐྱེན་ང་ཚོ་ཉིན་རི་བའི་ཕྱུགས་རྫི་རྡོག་མ་གཉིས་གསུམ་དེ་གཡུ་གྲོང་བ་དང་། སྐྱིད་མཁར་བ། ཝ་ལ་བ་སོགས་ཀྱི་དབང་འོག་ཏུ་རིག་གནས་གསར་བརྗེའི་སྐབས་གྲལ་རིག་འཐབ་རྩོད་ཀྱི་མནར་གཅོད་དང་ཕྱོགས་མཚུངས་པ་རེ་མྱོང་དགོས་ཙང་ཡིན། ད་རུང་ང་ཚོ་བྱིས་པ་གསུམ་པོ་ལམ་ཁར་རྩེ་འཇོས་གཡེངས་ཏེ་མུན་པ་རུབ་སྐབས་གཞི་ནས་བྲེལ་འཚུབ་འཚུབ་ཀྱིས་ནོར་རྗེས་སུ་བརྒྱུགས་རུང་ནོར་ཚང་བར་མི་འདུས་པ་དང་ཕྱི་འགྱངས་ཤོར་ཐེངས་རེར་ཨ་མས་བརྡུང་རྒྱུ་དེ་ཡང་དཀའ་ཚེགས་ཆེ་བ་ཞིག་ཡིན།
གཉིས་པ་ནི་ངས་མི་འདོད་པའི་སྤོ་བོ་ལགས་ཀྱིས་བོད་ཡིག་ཀློག་བསླབས་པ་དག་སྦྱོང་དགོས་ཀྱི་ཡོད་ཙང་ཡིན། གང་ལྟར་ཁོང་གི་བཀའ་དྲིན་ལས་ང་རང་བོད་ཡིག་ཀློག་བདེ་པོ་གང་མཚམས་ཡོད་པས་ཉིན་མ་རེར་འབུམ་གླེགས་བམ་རེ་སྔ་འདོན་བྱེད་ཐུབ་ཀྱི་ཡོད།
ངས་འབུམ་བཏོན་ཚུལ་བཤད་དུས་ཀློག་པ་པོས་ང་ཆུང་དུས་ནས་གྲྭ་པ་ཞིག་མིན་འགྲོ་བསམ་སྲིད་ཀྱང་དེ་འདྲ་ཞིག་གཏན་ནས་མ་རེད། ང་ཚོའི་ཡུལ་སྲོལ་ལ་བུ་མང་ཆེ་བས་ཆོས་དཔེ་ཀློག་ཤེས་ཤིང་དགུན་ཁར་སྤྱི་སྒེར་གྱི་རིམ་གྲོ་འཚོགས་སར་ཕོ་གསར་དག་འཛོགས་ནས་བཀའ་འགྱུར་དང་འབུམ་སོགས་འདོན། དམིགས་བསལ་ཚིགས་བཅད་ལ་འདོད་དབྱངས་སྙན་པོ་མི་འདྲ་བ་རྣམ་གྲངས་དུ་མས་གྱེར་ཞིང་། ཚིགས་ལྷུག་ལ་ཡང་གྱེར་ཆོག་པ་སྟེ་མདོ་སྡེ་ཕལ་པོ་ཆེའི་བགྲང་བརྩི་དང་འབུམ་ཉ་པའི་རྒྱུ་རློམ་འགྲེ་སོགས་ལ་དབྱངས་སྙན་མོ་དག་འགུགས་སྲོལ་ཡོད། རིམ་གྲོའི་གོ་སྐབས་འདི་བརྒྱུད་ནས་ཨ་མཆོད་ཚོ་དང་ཁྱིམ་ཚང་གི་བུ་མོ་གཉིས་འགྲིགས་སོང་བ་ཉུང་ཉུང་མིན་ལ་ཐ་ན་བདག་མོ་དང་ཨ་མཆོད་གཉིས་ཀྱིས་ནལ་བཤམས་པའི་ལོ་རྒྱུས་ཀྱང་ཁ་ཤས་ཡོད།
Subscribe to:
Posts (Atom)